“Yupela i Mas Taitim Bun Tru”

“Yupela i mas taitim bun tru, bilong go insait long liklik dua. Mi tokim yupela: Planti man bai ol i laik i go insait, tasol bai ol i no inap.”—LUK 13:24.

 1. Planti man i laik kisim wanem samting?

SAPOS yu askim liklik manki Robi, em i gat 6-pela krismas, bilong wanem em i amamas long i go long Haus Kingdom, em bai bekim tok, olsem: “Mi kisim save long Jehova na long dispela Paradais mi ken i stap longtaim longtaim long en wantaim ol gutpela animal” Na kasen-brata bilong em, Dasten, em i gat 3-pela krismas, em i save long sedyul bilong papamama bilong em, olsem na long taim bilong i go long Haus Kingdom em i save tokim ol: “Mi laik go long Haus Kingdom!” Em, tupela manki hia i laik kisim wanpela samting planti man i laik kisim, em laip i stap oltaim oltaim. Ol man i laik bai God i kisim bek ol. Tasol ol i mas mekim wanem bambai God i ken kisim bek ol na ol i ken kisim laip i stap oltaim? Ating ol i mas i go long lotu na em tasol, a?

 2. (a) Olsem wanem na yumi no inap mekim sampela wok na bai God i mas givim laip long yumi, olsem pe? (b) Yumi mas mekim wanem bambai God i ken kisim bek yumi, olsem Jisas i tok long Luk 13:24?

² Maski yumi go long ol miting o yumi mekim narapela wok, tasol i no olsem God i mas givim laip long yumi, olsem pe bilong ol wok yumi bin mekim. Nogat. God i save givim nating long yumi, olsem presen. Tasol God Jehova i makim sampela samting yumi mas mekim bambai yumi inap kisim dispela presen em i laik givim long yumi, em laip i stap oltaim. (Rom 6:23) Yumi mas mekim wanem? Wanpela samting em olsem: Yumi mas wok strong tru long mekim wok bilong em! Yumi mas pilim tru gutpela pasin bilong Em na dispela samting i mas kirapim yumi long wok strong olsem. Wanpela taim wanpela man i givim askim long Pikinini bilong God, em Krais Jisas, em i tok: “Bikpela, ating bai God i kisim bek wanpela wanpela man tasol, a?” Tok Jisas i bekim long dispela man, em bilong helpim dispela man yet na ol narapela man i laik kisim laip i stap oltaim. Em i helpim yumi tu. Jisas i tok: “Yupela i mas taitim bun tru, bilong go insait long liklik dua. Mi tokim yupela: Planti man bai ol i laik i go insait, tasol bai ol i no inap.”—Luk 13:23, 24.

 3. (a) Olsem wanem askim bilong dispela man i narapela kain? (b) Taim Jisas i bekim tok long dispela man em i tok wanem na dispela tok i sutim yumi tu?

³ Askim bilong dispela man i narapela kain. Em i tok: “Ating bai God i kisim bek wanpela wanpela man tasol?” Em i no tok: “Bai God i kisim bek mi?” o “Mi mas mekim wanem bambai God i ken kisim bek mi?” Long dispela taim bipo ol Juda i ting God bai kisim bek liklik lain tasol na ating dispela tingting i kirapim em long mekim dispela askim. Maski wanem kain tingting i as bilong dispela askim bilong em, tasol taim Jisas i bekim tok long em, Jisas i kirapim em long tingim ol samting em yet i mas mekim bambai God i ken kisim bek em. Na Jisas i tok, “Yupela i mas taitim bun tru,” i olsem em i toktok long planti man, olsem na dispela tok i mas kirapim yumi tu long skelim ol samting yumi mekim bilong lotuim God.

 4. Yumi mas mekim wanem bambai yumi inap kisim laip i stap oltaim oltaim?

⁴ Olsem na i hatwok liklik long kisim laip i stap oltaim oltaim. Jisas i tok, yumi mas taitim bun tru; yumi mas wok strong oltaim bambai yumi inap “i go insait long liklik dua.” Yumi mas bihainim olgeta tok bilong Krais na bai bilip bilong yumi i strong na i kirapim yumi long wok strong oltaim. Olsem na bilong kisim laip, yumi no ken “harim nating tasol” tok bilong em; yumi mas “bihainim dispela tok.”—Luk 6:46-49; Jems 1:22-25.

Nau Yumi Mas “Subim Skin”

 5. (a) Wanem insait bilong dispela tok bilong Jisas olsem “yupela i mas taitim bun tru”? (b) Dispela tok i helpim yu olsem wanem long givim bel olgeta long mekim wok bilong God?

⁵ Wanem insait bilong dispela tok olsem “yupela i mas taitim bun tru”? Long tok Grik, dispela tok i olsem a·go·niʹze·sthe, na ol i kisim long wanpela tok (a·gonʹ) insait bilong en i olsem “ples bilong resis.” Sampela Baibel (olsem The Kingdom Interlinear Translation) i tanim dispela tok olsem “subim skin.” Olsem na taim yu tingim dispela tok yu mas tingim wanpela stediam o ples bilong resis long bipo na tingim ol man i insait long resis ol i “taitim bun tru” o subim skin bambai ol inap kisim prais. Olsem na dispela tok Grik i makim man i insait long resis bilong ol Grik long bipo, tasol i kamapim gut as bilong tok bilong Jisas, em i tok yumi mas givim bel olgeta long mekim wok. Yumi no ken givim hap bel tasol.—Luk 10:27; lukim tu 1 Korin 9:26, 27.

 6. Bilong wanem nau yumi mas taitim bun tru?

⁶ Tasol long wanem taim yumi mas “subim skin bilong i go insait long liklik dua”? Na yumi mas mekim i go inap long wanem taim? (Luk 13:24, The New English Bible) Orait yumi mas skelim gut tok bilong Jisas long Luk 13:24. Jisas i tok “yupela i mas taitim bun tru”—dispela i makim samting nau ol man i mas mekim; na em i tok, “planti man bai ol i laik i go insait”—dispela i makim samting bihain bai kamap. Olsem na nau em i taim bilong taitim bun tru o subim skin. Ol man i no inap i go insait, ating ol i laik go insait long wanem wanem taim ol yet i laikim. Tasol taim pinis; dua i pas pinis. Long Luk 13:25, Jisas i tok, papa bilong haus i pasim pinis dua bilong haus na nau sampela man i kirap paitim dua na singaut olsem: “‘Bikpela, yu opim dua long mipela!’ Na em bai i bekim tok long [ol], i spik, ‘Mi no save yupela i bilong wanem ples.’” Sori tumas long ol manmeri ol i no kirap nau na tingim lotu bilong Jehova pastaim!—Matyu 6:33.

 7. Filipai 3:12-14 i tok wanem na yumi save, oltaim yumi mas wok strong? Bilong wanem oltaim yumi mas wok strong?

⁷ Oltaim yumi mas wok long taitim bun na subim skin. Yumi mas mekim i go i go. No gat wanpela i go insait olgeta long “liklik dua.” Pol i save long dispela samting. Em i no ting olsem em inap pinis na em i slek long resis bilong kisim laip. Nogat. Em i raitim tok olsem: “Mi no ting olsem: Mi kisim pinis dispela pasin bilong Krais, na mi inap pinis. Nogat. Mi wok long holimpas dispela pasin, olsem Krais Jisas i bin holimpas mi. Ol brata, mi no ting mi kisim pinis yet dispela pasin. Mi gat wanpela tingting tasol: Mi lusim tingting long olgeta samting bilong bipo, na mi save wok strong long kisim samting bilong bihain. Mi save ran strong bilong kamap long mak na kisim namba. Dispela namba i olsem: Long wok bilong Krais Jisas, God i singautim mi bilong mi go antap.” (Ol tok long narapela kain rait, em mipela yet i raitim olsem.)—Filipai 3:12-14.

 8. (a) Wanem samting i pasim rot long “planti man” na ol i no inap kisim laip i stap oltaim? (b) Dispela i toksave long yumi olsem wanem?

⁸ Ol dispela “planti man” i laik i go insait, ol i husat? na bilong wanem ol i no inap i go insait? Ol i olsem ol Krisendom, na i makim tru ol pris pasto bilong ol. Ol i tok ol i save gut long Krais na ol i olsem hap famili bilong em, long wanem ol i tok ol i bin “kaikai na dring” wantaim em, tasol ol i giaman. Ol i laik kisim laip long rot ol yet i makim, i no long rot God i makim. Olsem na Krais Jisas i tok em i no save long ol. Long ai bilong em ol i olsem “man bilong mekim rong.” (Luk 13:26, 27) Ol man, em dua i pas long ol na ol i no inap i go insait bilong kisim laip i stap oltaim, ating sampela ol i bin mekim wok bilong Jehova, tasol nau ol i slek long mekim; ol i no givim bel moa long lotu i tru. Pastaim ol i wok strong long mekim ol wok bilong Kingdom, tasol nau ol i “no hat” moa long mekim. (Revelesen 3: 15, 16) Ating ol i “bihainim pasin bilong God long skin tasol”—ol i go long sampela miting na wan wan taim ol i autim tok—tasol ol i no gat dispela kain bilip i save kirapim man long taitim bun tru na lotuim God. (Lukim 2 Timoti 3:5.) Ol i laik i go insait “long liklik dua,” tasol dispela i no inap; ol i mas taitim bun tru na subim skin bilong ol bambai ol inap i go insait.

Bilong Wanem Yumi Mas Go Insait long “Liklik Dua”

 9. Man i laik i go insait long liklik dua, bilong wanem em i mas taitim bun tru?

⁹ Liklik dua bilong kisim laip i op long olgeta man. Tasol “planti man” ol i no laik taitim bun o subim skin bambai ol inap i go insait. Wanem samting i mekim na dispela dua i liklik na i hatwok long i go insait? Man i laik i go insait long dispela dua, pastaim em i mas kisim save long God Jehova na Krais Jisas. (Jon 17:3) Olsem na em i mas lusim olgeta pasin bilong ol lotu bilong dispela graun, ol lotu bilong Krisendom tu. Em i mas bihainim laik bilong God; em i mas mekim wankain wok olsem Jisas i bin mekim taim em i stap long graun. (1 Pita 2:21) Ol Kristen i dediket na baptais pinis, ol i mas sakim pasin bilong laikim tumas mani, na pasin pamuk na pasin doti bilong ol man bilong dispela graun. (1 Jon 2:15-17; Efesas 5:3-5) Ol i mas rausim ol dispela pasin na kisim ol gutpela pasin Kristen.—Kolosi 3:9, 10, 12.

10. Olsem wanem pasin bilong bosim skin inap helpim yumi long kisim laip i stap oltaim?

¹⁰ Ol dispela “wanpela wanpela man” ol i save ol i mas wok strong long mekim wok bilong God na ol i mas kamapim ol gutpela pasin bilong spirit bilong God, pasin bilong bosim gut skin tu. (Galesia 5:23) Spirit bilong Jehova i helpim ol na ol i wok strong bambai ol inap bosim gut skin bilong ol na stiaim i go bilong kisim laip i stap oltaim.—1 Korin 9:24-27.

Yu Yet Yu Mas Mekim Wanem Bilong Taitim Bun Tru?

11. (a) Sampela i mas wok strong moa long mekim wanem wanem samting? Bilong wanem ol i mas wok strong moa long mekim? (b) Yumi olgeta i mas wok strong moa long mekim wanem wok?

¹¹ Maski yumi nupela baptais o yumi bin wok wantaim oganaisesen bilong Jehova inap planti yia pinis, tasol yumi no ken slek long mekim ol samting bambai Jehova i ken amamas long yumi. Olsem tok bilong Jisas i mekim: Yumi mas givim bel olgeta long Jehova, na yumi mas redi long karim olgeta kain hevi na hatwok bambai yumi inap i go insait long liklik dua. Jisas i no tok tasol long pasin bilong yumi i mas kamap gutpela o yumi mas mekim bikpela wok moa long wok bilong God; nogat; tasol yumi sampela i mas wok strong bambai pasin bilong yumi i ken kamap gutpela, o yumi mas wok strong bambai yumi inap lusim sampela pasin nogut na yumi no ken ‘mekim wanpela samting i save sutim lek bilong narapela man na em i pundaun.’ (2 Korin 6:1-4) Na yumi sampela i mas wok strong moa long mekim stadi bilong yumi yet bambai ‘sori bilong yumi i ken mekim planti save na olgeta gutpela tingting i kamap bikpela moa yet long yumi.’ (Filipai 1:9-11) Na sampela ol i mas wok strong moa long i go long ol miting long olgeta taim, long Buk-Stadi tu, na bekim tok long ol miting. (Hibru 10:23-25) Na yumi olgeta yumi ken skelim wok bilong yumi long autim tok: Yumi wok strong tru long “mekim wok bilong autim gutnius long ol man”?—2 Timoti 4:5.

12. Bilong save yumi wok strong long mekim wok bilong God o nogat, yumi ken tingim wanem ol askim?

¹² Planti ol i wok strong long mekim ol samting bambai Jehova i ken amamas long ol na nau ol inap mekim wok painia haptaim, o wok painia oltaim, o mekim wok long Betel. Olsem wanem long yu? Yu save autim tok bilong Kingdom? Orait, yu inap mekim wok painia haptaim sampela taim long olgeta yia, o mekim wok painia oltaim? Sapos nau yu mekim wok painia haptaim, yu wok long kamap painia oltaim? Sapos nogat, gutpela sapos yu tingting long mekim, a? Long dispela rot yu inap kisim blesing—bai yu stap klostu moa long God Jehova na Krais Jisas, olsem pren tru bilong tupela.—Sam 25:14.

Yu Inap Taitim Bun na Mekim Wok Painia?

13. (a) Sapos yu laik mekim wok painia, i mas i gat wanem tupela bikpela samting? (b) Bilong mekim wok painia, ating yumi ken stretim wanem samting?

¹³ Sapos yu inap mekim wok painia oltaim, tasol yu no mekim, olsem wanem? Yu inap “subim skin” o wok long stretim ol samting bambai yu inap mekim wok painia? I gat tupela bikpela samting: Namba wan em olsem: Yu mas i gat laik long mekim dispela wok, na namba tu em olsem: Ol samting i mas stret bambai yu inap mekim. Sapos yu no gat laik long mekim dispela wok, orait beten askim God long kirapim dispela laik long bel bilong yu. Toktok wantaim ol painia. Kirap nau long mekim bikpela wok moa long autim tok bilong Kingdom. Taim rot i op, orait mekim wok painia haptaim. Sapos long dispela taim ol samting i no stret long yu mekim wok painia, orait skelim ol wok yu mas mekim: Yu inap stretim liklik na mekim wok painia o nogat? Ating wanpela sista i save mekim wok mani, tasol i no olsem em i mas mekim. O ating wanpela brata i lapun na em i mekim yet wok mani, tasol em inap lusim. Kisim gutpela sindaun o tromoi bikpela mani long holide o kisim nupela nupela ka samting, ol dispela samting i no samting tru bilong helpim yumi long i stap laip.—Luk 12:15; 1 Jon 2:15-17.

14. (a) Wanem samting i kirapim wanpela brata na meri bilong em long mekim wok painia? (b) Ol i kirapim ol pikinini bilong ol long tingting long mekim wanem wok?

¹⁴ Wanpela papa i gat tripela pikinini man, em tupela i no winim yet 13 krismas, na 6-pela yia bipo em i kirap mekim wok painia. Bilong wanem em i kirap mekim? Em i tok: “Mi laik mekim sampela wok moa. Mi pilim olsem sapos mi inap mekim wok painia oltaim na mi no mekim, orait mi no truim dediket bilong mi.” Meri bilong em tu i kirap mekim wok painia. Bilong wanem em i kirap mekim? Em i tok: “Inap 4-pela yia pinis mi bin mekim wok painia haptaim na bihain mi save, i no hatwok moa long mi mekim. Mi laik insait moa long dispela wok i no ken kamap gen, na mi laik makim gutpela pasin ol pikinini bilong mipela i ken bihainim.” Dispela brata wantaim meri bilong em i bin skul long yunivesiti na bihain ol i harim tok i tru. Brata i tok: “Papamama bilong mipela i strong long mipela i mas skul long yunivesiti inap 4-pela yia.” Orait, tupela i laik kirapim pikinini bilong ol long mekim wanem wok? “Mi save tokim ol, mipela i laik bai ol i mekim wok painia na i stap 4-pela yia long Betel.”

15. (a) Wanem samting i kirapim sampela long taitim bun na mekim wok painia? (b) I gat wanem samting na yu laik mekim wok painia?

¹⁵ Wanem samting i kirapim ol narapela long mekim wok painia oltaim? Orait, lukim ol dispela tok bilong sampela:

“Mi no bin kamap strong long spirit na mi tingting planti long dispela samting.” (Robert H.)

“Mi save autim tok olsem wanpela pablisa, tasol mi pilim olsem mi inap mekim bikpela wok moa.” (Rhea H.)

“Wok painia i mekim na i stap bilong mi i gat as bilong en.” (Hans K.)

“Mi laik givim bel olgeta long mekim wok bilong Jehova, na wok painia i rot bilong mi mekim olsem.” (Charanjit K.)

“Sapos mi no givim strong na yangpela bilong mi long mekim dispela bikpela wok, bihain bai mi hevi long dispela samting.” (Gregory T.)

“Mi save mi mas mekim wok bambai Jehova i ken blesim mi, olsem na mi kirap mekim wok painia.” (Grace-ann T.)

“Wok painia i helpim mi long kamapim bel bilong mi, mi laikim tumas Jehova.” (Marco P.)

“Bipo mi mekim wok mani, tasol mi no kisim amamas olsem mi lukim ol painia i kisim.” (Nancy P.)

Yu yet bai yu skruim wanem tok long dispela?

Yu Wok Inap Tru long Skel Bilong Yu?

16.Ol painia tasol i taitim bun tru o olsem wanem? Stori long dispela samting.

¹⁶ Sampela Witnes Bilong Jehova ol i beten na skelim bel bilong ol na ol wok samting ol i mas mekim na ol i save, ol i mekim wok bilong God inap tru long skel bilong ol. Ating yu wanpela bilong dispela lain. Sapos olsem, orait yu ken save, Jehova wantaim Pikinini bilong em, tupela i laikim yu tru na tupela i pilim tru ol wok yu mekim, long wanem yu taitim bun tru na yu givim bel olgeta long mekim. (Lukim Luk 21:1-4.) Olsem: Long sampela kantri i gat hevi long wok politik o wok bisnis na ol brata bilong yumi i mas lusim 9-pela aua inap 5-pela o 6-pela de long wik bilong kisim liklik wansiling inap long baim kaikai samting bilong lukautim skin bilong ol. Long sampela kantri gavman i tambuim wok bilong yumi, na ol brata sista i mekim wok painia ol i lapun na i no wok moa, o yangpela brata sista i save wok nait, o ol mama (i gat pikinini) na gavman i orait long ol i no wok mani. Long ol dispela kain kantri lain painia i wok long kamap bikpela moa long olgeta taim.

17. Olsem wanem long Epafrodaitas na yumi ken save, God i no skelim tasol hamas wok yumi mekim na em i tok, yumi taitim bun o nogat?

¹⁷ Tasol ating yu tok, ‘Mi laik bai skin bilong mi i gat strong. Gutpela sapos mi inap kamap yangpela gen!’ Tasol yu no ken bel hevi. God i no save skelim tasol hamas wok yumi mekim na em i tok yumi taitim bun tru o nogat. Tingim Epafrodaitas. Taim em i gat sik, em i no inap wok strong na mekim bikpela “wok bilong Krais” olsem long taim em i no gat sik. Tasol Pol i tok em i bin wok strong. Na Pol i tok, yumi mas “litimapim nem bilong kain man olsem.”—Filipai 2:25-30.

18. (a) Ol brata sista i gat sampela samting i pasim ol na ol i no inap mekim wok painia, ol i ken mekim wanem bilong helpim wok painia insait long kongrigesen? (b) Yu yet yu ken mekim wanem bilong kirapim ol brata sista long kongrigesen bilong yu long tingim gut wok painia?

¹⁸ Tasol i gat wanpela samting yu ken mekim bilong helpim wok painia insait long kongrigesen. Em wanem samting? Yu mas wok strong long kamapim tingting bilong yu, yu tingting tru long wok painia. Olsem: Sapos nau yu no inap mekim wok painia, long wanem yu gat sampela wok yu mas mekim long famili, orait yu inap helpim wanpela long famili, olsem meri bilong yu o pikinini bilong yu o brata o susa bilong yu, long mekim wok painia? Ol brata sista i gat sik samting, ol i ken tingim tru ol brata sista ol i mekim wok painia, na ol i ken wok wantaim ol long autim tok taim ol inap long mekim. (Lukim 1 Korin 12:19-26.) Olsem bai olgeta long kongrigesen i ken taitim bun na tingim gut wok painia. Ol gutpela samting i kamap long dispela rot em bai strongim olgeta.

19. Yumi mas wok strong yet long mekim wanem?

¹⁹ Yu yet yu mas mekim wanem na bai yu taitim bun tru? Ating yu mas wok strong bambai yu inap kisim baptais? O yu mas wok strong long lusim wanpela pasin kranki yu save mekim? O ating yu mas wok strong moa long pas gut wantaim Jehova? Ating yu mas kirap mekim wok painia haptaim? o wok painia oltaim? o wok long Betel? Maski wanem wanem samting yu mas mekim bilong kamap strong long spirit, bikpela samting em olsem: Nau yu mas mekim. Olsem na yumi olgeta yumi mas wok yet long taitim bun bambai yumi inap i go insait long liklik dua na kisim laip i stap oltaim!

Sampela Tok Bilong Tingim

◻ Wanem insait bilong tok bilong Jisas em i tok, “Yupela i mas taitim bun tru”?

◻ Yu mas bihainim dispela tok long wanem taim? Na yu mas mekim wanem bilong bihainim?

◻ Bilong wanem ol dispela “planti man” i no inap i go insait long liklik dua?

◻ Ol brata sista i gat sampela samting i pasim ol, olsem wanem ol i ken taitim bun tru?

◻ Inap long wanem taim yumi mas wok strong long go insait long liklik dua?