Pasin Bilong Stap Rabis—Painim Rot Bilong Stretim Tru

PLANTI ripot i kam long olgeta hap i tokaut olsem pasin bilong i stap rabis i wok long i go bikpela, tasol sampela man i ting i gat rot bilong stretim dispela hevi. Wanpela nius, Manila Bulletin, i kamapim ripot bilong Divelopmen Beng bilong Esia olsem “insait long 25 yia Esia inap pinisim pasin bilong i stap rabis.” Dispela lain i tok ol i mas kamapim planti bisnis samting na bai kantri i kamap strong long ol samting bilong mani, na long dispela rot ol man i no ken i stap rabis olgeta.

Sampela lain na gavman moa ol i tingim na wokim wanpela bikpela lista bilong planti samting ol i laik mekim bilong traim long stretim dispela hevi. Sampela i olsem: kamapim sampela kain insurens bilong helpim ol man, gutpela skul, pinisim dinau bilong ol kantri i no gat planti wok bisnis ol i mas bekim long ol kantri i gat planti wok bisnis, na givim rot long ol kantri i gat planti rabisman na bai ol i ken salim ol kaikai samting bilong ol long ol narapela kantri, na givim haus long ol man i save kisim liklik pe tasol.

Long yia 2000, Yunaitet Nesen i pasim tok long ol samting ol i laik mekim na ol i makim yia 2015 bilong inapim tru ol dispela wok. Sampela i olsem, pinisim pasin bilong i stap rabis olgeta, na hangre, na pasin bilong sampela lain long kantri i kisim liklik pe tru na sampela i kisim bikpela pe tru. Tasol maski ol i gat laik tru long helpim ol rabisman olsem, planti man i ting ol i no inap mekim long dispela graun ol lain bilong en i bruk bruk.

Sampela Rot Bilong Stretim

I luk olsem ol gavman i no inap stretim dispela hevi long olgeta kantri, olsem na i gat wanem samting inap helpim ol rabisman? Olsem yumi tok pinis, i gat wanpela samting i stap na ol man inap kisim gutpela tingting long en na em inap helpim ol nau long dispela taim stret. Em wanem samting? Em Baibel tasol.

Wanem samting i mekim na Baibel i narapela kain long ol narapela buk samting? Man bilong wokim yumi, em Nambawan Bikpela, em i kamapim Baibel. Insait long Baibel em i bin putim ol tok i gat gutpela tingting na save tru​—⁠ol stiatok em olgeta lain inap bihainim long olgeta taim. Ol man i stap rabis, sapos ol i bihainim ol dispela stiatok em inap helpim ol long nau na bai i stap bilong ol i kamap gutpela. Yumi ken stori long sampela samting bilong helpim ol.

Kisim stretpela tingting long mani. Baibel i tok: “Gutpela tingting i olsem mani, na i save helpim yumi long taim nogut. Tasol gutpela tingting na save i winim mani, na i helpim yumi moa yet na yumi stap gut olgeta.” (Saveman 7:12) Yumi kisim wanem tingting long dispela? Mani i no nambawan bikpela samting. Tru, em inap helpim sindaun bilong yumi. Em i helpim yumi long baim ol samting yumi mas i gat, tasol i gat sampela samting i bikpela samting moa na mani i no inap baim. Sapos yumi save long ol dispela samting, bai yumi putim ol samting bilong skin i stap nambatu tasol na bai yumi abrusim bel hevi bilong ol lain i tingting tasol long kisim bikpela mani. Mani i no inap baim laip, tasol sapos yumi bihainim gutpela tingting, dispela inap lukautim laip bilong yumi long nau na opim rot bambai yumi ken kisim laip i stap oltaim oltaim.

Baim ol samting inap tasol long yu. Sampela samting yumi laik kisim, ol i no samting yumi mas i gat. Yumi mas tingim ol samting yumi mas i gat na putim ol dispela samting i go pas. Yumi inap giamanim bel bilong yumi yet olsem yumi mas i gat wanpela samting, tasol tru tru em i no wanpela samting yumi mas kisim bilong helpim yumi. Man i gat gutpela tingting, pastaim em bai makim hap mani em i kisim long wok bilong baim ol samting em i mas i gat​—⁠olsem kaikai, klos, haus, na ol samting olsem. Orait nau em bai skelim gut hap mani i stap yet na bai em i ken save, dispela mani inap long baim sampela samting moa o nogat. Jisas i tok piksa long man i laik wokim haus, na em i tok, man i “sindaun pastaim na tingim gut pe bilong wokim dispela haus. Em i laik save, mani bilong en bai inap long pinisim dispela haus, o nogat.”​—⁠Luk 14:⁠28.

Long Filipin, Eufrosina, em wanpela mama wanpis i gat 3-pela pikinini, em i save wok mani na em i mas tingting gut na skelim gut ol samting em i mas baim, long wanem, man bilong em i bin lusim em inap sampela yia i go pinis. Taim em i skelim ol samting em i mas baim, em i lainim ol pikinini long tingim ol samting ol i mas i gat na putim i go pas. Olsem: Taim ol i lukim wanpela samting ol i laik kisim, em i no save tok nogat tasol. Em i save tokim ol: “Yu ken kisim sapos yu laik, tasol yu mas skelim. Yumi gat mani inap long baim wanpela samting tasol. Yumi inap baim dispela samting yu laikim, o yumi ken baim liklik abus o kumu samting bilong kaikai wantaim rais long dispela wik. Orait yu laikim wanem samting? Yu yet yu ken skelim.” Kwiktaim ol pikinini i save pilim dispela tok na ol i wanbel long baim kaikai, na maski long ol narapela samting.

Amamas long ol samting yu gat. Narapela stiatok bilong Baibel i tok: “Sapos yumi gat kaikai na laplap samting, orait yumi ken tok, ‘Em inap long mi.’ ” (1 Timoti 6:⁠8) Mani yet i no save kamapim amamas. Planti maniman ol i no stap amamas, tasol planti man i stap rabis ol i stap amamas tru. Ol i lain pinis long amamas long ol liklik samting ol i mas i gat bilong i stap laip. Jisas i bin tok, i gutpela sapos ai bilong yumi “i gutpela,” olsem ai i lukluk stret i go long ol bikpela samting tasol. (Matyu 6:22) Dispela i save helpim yumi na yumi tok, samting yumi holim, em inap long yumi. Planti man i rabis liklik ol i stap bel gut, long wanem, ol i bin kisim pasin bilong pas gut wantaim God na ol i stap amamas wantaim famili bilong ol​—⁠em ol samting ol i no inap baim long mani.

Em sampela samting Baibel i toktok long en na ol inap helpim ol man i stap rabis na bai ol i ken karim dispela hevi. Tasol i gat planti tok moa bilong Baibel inap helpim ol, olsem abrusim ol pasin nogut olsem smok na pilai laki, em ol samting i save pinisim mani bilong yumi. Tingim ol bikpela samting long i stap bilong yumi, olsem ol samting bilong spirit. Sapos i no gat planti wok mani, traim wanpela wok yu gat save long en na ol man inap baim yu long mekim dispela wok. (Sindaun 22:29; 23:21; Filipai 1:​9-11) Baibel i laik kirapim yu long bihainim dispela kain “gutpela tingting na save,” long wanem, em “bai i givim laip long yu.”​—⁠Sindaun 3:​21, 22.

Ol dispela tok bilong Baibel inap helpim ol man long lusim sampela hevi bilong i stap rabis, tasol i gat sampela askim long ol samting bilong bihain em yumi laik save long en. Olsem wanem? Ol rabisman i mas i stap rabis i go inap long olgeta taim bihain? Sampela lain inap stretim pasin olsem i gat sampela lain ol i maniman tru na sampela lain i stap rabis tru? Orait yumi ken skelim wanpela rot bilong stretim dispela, em planti man i no save long en.

Gutpela Samting Baibel i Tok Long Wetim

Planti man i save tok, Baibel em i gutpela buk. Tasol ol i no save Baibel i gat sampela tok i makim olsem sampela bikpela senis bai kamap liklik taim.

God i tingting pinis long kirap mekim ol samting bilong stretim ol hevi bilong ol man, na pasin bilong i stap rabis tu. Ol gavman bilong graun i kamapim klia pinis olsem ol i no inap mekim o ol i no laik mekim, olsem na God i tingting pinis long senisim ol dispela gavman. Em bai mekim olsem wanem? Baibel i tok long Daniel 2:44: “God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”

Orait taim God i rausim pinis ol dispela “king” o gavman, wanpela King God yet i makim, em bai kirap stretim ol hevi. Dispela King i no wanpela man bilong graun​—⁠em i wanpela strongpela man bilong heven, kain olsem God yet, na em i gat strong long kamapim ol bikpela senis bilong pinisim pasin bilong nau olsem sampela man i stap maniman tru na sampela ol i stap rabis tru. God i bin makim Pikinini bilong em yet long mekim dispela wok. (Aposel 17:31) Song 72:​12-14 i stori long ol samting dispela King bai mekim: “Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol. Sapos ol man nogut i laik daunim ol na bagarapim ol, em i save kisim bek ol. Em i save laikim ol tumas na em i mekim olsem.” Em gutpela samting tru bilong wet long en, a? Bai i gat malolo long ol hevi! King God i bin makim em bai kirap helpim ol man i stap rabis na ol man i no gat strong.

Ol hevi i save painim ol rabisman ol bai pinis long dispela taim. Ves 16 bilong Song 72 i tok: “Planti rais na wit samting i ken kamap long ol gaden bilong ol manmeri, inap olsem i save kamap long Lebanon.” Kaikai i no ken sot moa olsem i save kamap long taim bilong bikpela hangre, o mani i sot, o ol lain bilong gavman i no mekim gut wok bilong ol.

Ol narapela hevi tu bai pinis. Olsem: Planti manmeri long graun ol i no gat haus bilong ol yet. Tasol God i tok promis olsem: “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol na wokim wain na dring. Ol manmeri bilong mi bai i stap longpela taim tru, olsem ol strongpela diwai. Na bai ol i amamas long ol samting ol yet i bin hatwok long kamapim.” (Aisaia 65:​21, 22) Olgeta man bai i gat haus bilong ol yet na ol bai kisim amamas long wok bilong ol. Olsem na God i tok promis long stretim tru hevi bilong i stap rabis na dispela hevi i no inap kamap moa. Bai i no gat ol man i stap maniman tru na ol man i stap rabis tru, na i no gat sampela lain i hatwok tru long painim liklik kaikai bilong ol.

Tru, taim man i harim ol dispela tok promis long namba wan taim, ating em bai ting dispela samting i no inap kamap tru. Tasol taim yumi skelim gut ol tok bilong Baibel, bai yumi lukim olsem olgeta tok promis bilong God long bipo ol i kamap tru pinis. (Aisaia 55:11) Olsem na yumi no ken tingting olsem em bai kamap tru o nogat. Bikpela askim tru i olsem: Yu mas mekim wanem bambai yu ken kisim ol gutpela samting taim dispela tok promis i kamap tru?

Bai Yu Stap Long Dispela Taim?

Dispela gavman em i gavman bilong God, olsem na yumi mas i stap olsem man God bai orait long em i ken i stap aninit long dispela gavman. Em i no bin haitim ol samting yumi mas save long en bilong winim dispela mak. Ol tok bilong soim rot long yumi i stap long Baibel.

King God i bin makim, em Pikinini bilong God, em i gat stretpela pasin. (Aisaia 11:​3-5) Olsem na ol man God i orait long ol i ken i stap aninit long dispela gavman, ol tu i mas i gat stretpela pasin. Sindaun 2:​21, 22 i tok: “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.”

Olsem wanem? I gat rot bilong kisim save long ol samting yu mas mekim bilong winim ol dispela mak? I gat. Sapos yu stadi long Baibel na bihainim ol tok bilong en, bai yu inap i stap long dispela gutpela taim tru bai kamap bihain. (Jon 17:⁠3) Ol Witnes Bilong Jehova bai amamas long helpim yu long stadi long Baibel. Mipela i laik singautim yu long mekim olsem na bai yu ken insait long wanpela lain em bihain ol i no ken i stap rabis na ol narapela i no ken mekim nogut long ol.

[Piksa long pes 5]

Eufrosina: “Mi save skelim gut ol samting mi laik baim, olsem na famili bilong mi i gat ol samting ol i mas kisim”

[Ol Piksa long pes 6]

Pasin bilong pas gut wantaim God na i stap amamas wantaim famili, em ol samting yumi no inap baim long mani