PILIM OLSEM YU GAT ASUA “Rausim Sin Bilong Mi na Mi Ken Kamap Klin”

PASIN bilong ting olsem yu gat asua inap daunim yu tru. King Devit i tok: “Ol rong bilong mi i karamapim mi pinis, na ol dispela rong i olsem kago mi karim na i hevi tumas.” (Song 38:4) Sampela Kristen i bel hevi tru na dispela i daunim ol, na ol i ting Jehova i no inap long lusim rong bilong ol. (2 Korin 2:7) Yu ting i stret ol man i kisim dispela kain tingting? Sapos yu mekim bikpela rong, yu ting Jehova i no inap long fogivim yu? Nogat tru, God i no inap mekim olsem.

Jehova i no save lusim tingting long ol man i tanim bel na kam bek long em. Oltaim em i redi long kisim bek ol! Long tok piksa bilong pikinini i lusim papa, Jisas i tok Jehova i olsem papa bilong dispela pikinini husat i lusim famili bilong en na i go mekim ol kranki pasin. Tasol i no longtaim na em i go bek long famili bilong em. Baibel i tok: “Taim em i stap longwe yet, papa i lukim em na i sori tru long em, na em i ran i go na holimpas em na givim kis long em.” (Luk 15:11-20) Olsem wanem? Yu laik i go klostu long Jehova, tasol yu pilim olsem yu “stap longwe yet” long em? Olsem papa long tok piksa bilong Jisas, Jehova i save sori tru long yu na em i redi long welkamim yu.

Olsem wanem? Yu ting yu mekim bikpela rong o yu pilim olsem yu mekim planti rong na Jehova i no inap long fogivim yu? Tingim tok bilong Jehova long Aisaia 1:18, em i tok: “Harim. Bai yumi mas bung na stretim tok. Maski yupela i gat planti sin, na yupela i stap olsem waitpela laplap em retpela pen i bagarapim pinis, mi Bikpela, mi tok, bai yupela inap kamap waitpela gen olsem ais.” Olsem na maski yu mekim bikpela rong olsem retpela pen i pas long waitpela klos, Jehova inap long fogivim yu.

Jehova i no laik bai maus bilong bel i kotim yu na dispela i mekim yu bel hevi. Olsem wanem yu inap pilim tru pasin bilong God long fogivim yu na bai maus bilong bel bilong yu i stap klin? Bai yumi stori long 2-pela samting King Devit i mekim. Namba 1, Devit i tok: “Mi laik autim olgeta sin bilong mi long Bikpela.” (Song 32:5) Tingim, Jehova i singautim yu long “stretim tok” wantaim em long rot bilong beten. Olsem na kamapim tingting na ol rong bilong yu long Jehova. Devit i save long dispela, olsem na em i beten na tok: “Rausim sin bilong mi. . . . Mi save, yu no givim baksait long man i pilim hevi long sin na i daunim em yet.”​—Song 51:2, 17.

Namba 2, Devit i kisim helpim long man God i makim, em profet Natan. (2 Samuel 12:13) Long nau, Jehova i makim ol elda long kongrigesen long helpim ol man i mekim rong long tanim bel na bai ol i pas gut wantaim Jehova. Taim ol elda i toktok wantaim yu, ol bai kamapim ol tok bilong Baibel na mekim ol beten bilong givim bel isi long yu. Na dispela bai mekim na bel i no gat tok na bai yu kamap strong gen long tok i tru.​—Jems 5:14-16.

Ating yu inap pilim olsem i hatwok tru long toktok wantaim ol elda na long kamapim rong bilong yu long God Jehova. Pastaim, Devit i gat wankain tingting na inap sampela haptaim em i “no autim sin” bilong em. (Song 32:3) Bihain, em i luksave olsem gutpela samting i kamap taim em i autim ol rong bilong em na bihainim gen stretpela pasin.

Bikpela samting em Devit i amamas gen. Em i tok: “Sapos God i lusim pinis rong bilong wanpela man, na i rausim sin bilong em, dispela man i ken amamas.” (Song 32:1) Na tu, Devit i beten long God olsem: “Bikpela, yu ken helpim mi long tokaut stret, na long litimapim nem bilong yu.” (Song 51:15) God i fogivim Devit na dispela i givim bel isi long em, olsem na em i tokim ol arapela long pasin marimari bilong Jehova.

Jehova i laik bai maus bilong bel bilong yu i stap klin. Na tu, Em i laik bai yu stap amamas na tokim ol arapela long ol samting em i tingting pinis long mekim. (Song 65:1-4) Tingim, Baibel i tok: ‘Ol sin bilong yumi i tekewe, na Jehova yet bai givim nupela strong long yumi.’​—Aposel 3:19.

Kain samting i bin painim Marta. Em i tok: “Oltaim pikinini man bilong mi i save salim nius Wastaua na Kirap! i kam long mi. Isi isi mi pas gut gen wantaim Jehova. Tasol samting mi hatwok tru long en, em long askim God long lusim ol rong bilong mi. Tasol bihain, long rot bilong beten mi toktok wantaim God na askim em long lusim rong bilong mi. I hatwok long bilip olsem bihain long 40 yia mi kam bek long Jehova. Samting i painim mi i soim olsem maski ol man i lusim God inap planti yia, rot i op long ol inap long kam bek long God na stap insait yet long pasin laikim bilong en.”