Lait i Kamap—Sampela i Bikpela na Sampela i Liklik (Namba Tu Hap)

“Mipela i save kisim lait long yu tasol.”​—⁠SONG 36:⁠9.

LONG bipo yet na i kam inap nau, ol Kristen i tingting tru long ol tok bilong Kamapim Tok Hait. Dispela hap bilong Baibel i soim yumi moa yet olsem tok i tru i wok long kamap klia moa. Long 1917 lain bilong Jehova i bin wokim wanpela buk (The Finished Mystery) i kamapim klia insait bilong tok bilong Kamapim Tok Hait. Dispela buk i kamapim long ples klia rong bilong ol bikman bilong ol misin na ol bikman bilong politik, tasol planti tok bilong en ol i kisim long ol narapela buk. Tasol dispela buk (The Finished Mystery) i mekim wanpela wok​—⁠em i traim bel bilong ol Sumatin Bilong Baibel, ol bai stap gut long dispela lain Jehova i mekim wok long en o nogat.

² Long Wastaua (tok Inglis) bilong Mas 1, 1925, i gat wanpela stori (“Birth of the Nation”) i kamapim bikpela lait long Kamapim Tok Hait long Baibel. Pastaim ol i bin ting, Kamapim Tok Hait sapta 12 i stori long wanpela pait namel long gavman haiden bilong Rom na misin Katolik bilong Rom, na pikinini man i makim pop. Tasol dispela Wastaua i soim ol olsem Kamapim Tok Hait 11:​15-18 inap helpim ol long kisim gut insait bilong tok bilong sapta 12, na i makim olsem sapta 12 i toktok long taim Kingdom bilong God i kamap.

³ Dispela i helpim ol long kamapim klia liklik ol tok bilong Kamapim Tok Hait long tupela volyum bilong buk Light, ol i wokim long 1930. Na ol i stretim sampela tok moa long buk ol i wokim long 1963 (“Babylon the Great Has Fallen!” God’s Kingdom Rules!) na narapela buk (“Then Is Finished the Mystery of God”) ol i wokim long 1969. Tasol ol i mas kisim planti save moa long ol tok profet bilong Kamapim Tok Hait. Orait, long 1988 sampela lait moa i kamap long wanpela buk ol i wokim, em Kamapim Tok Hait​—⁠Bikpela Samting Bilong En i Laik Kamap! Ating ol i wok long kisim dispela bikpela lait long tok profet bilong Kamapim Tok Hait long dispela taim, long wanem, truim bilong en i bilong kamap long “de bilong Bikpela,” em i bin kirap long 1914. (KTH 1:10) Na taim dispela de i wok long i go moa yet, insait bilong ol tok bilong Kamapim Tok Hait bai wok long kamap klia moa.

Ol i Klia Gut Long “Ol Gavman”

⁴ Long 1962 ol i kisim bikpela lait long tok bilong Rom 13:​1, i tok: “Olgeta man i mas i stap aninit long ol gavman.” Ol Sumatin Bilong Baibel bilong pastaim ol i tingim dispela “ol gavman” i olsem ol gavman bilong graun. Ol i ting, dispela tok bilong Baibel i makim olsem sapos gavman i singautim Kristen i go insait long ami long taim bilong pait, em i mas putim klos bilong ami, na holim gan, na go long pait. Ol i save, Kristen i no inap kilim i dai wanpela man, olsem na sapos em i mas sut long gan, orait em i mas sut nating long antap tasol.a

⁵ Wastaua (tok Inglis) bilong Novemba 15 na Disemba 1, 1962, i kamapim lait i klia tru long dispela samting, taim em i stori long tok bilong Jisas long Matyu 22:21: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” Na tok bilong ol aposel i stret wantaim dispela, ol i tok: “Mipela i mas bihainim tok bilong God tasol. Mipela i no ken bihainim tok bilong ol man.” (Aposel 5:29) Ol Kristen i mas i stap aninit long Sisar​—⁠em “ol gavman”​—⁠sapos ol i no tokim ol Kristen long mekim sampela samting i pait wantaim lo bilong God. Olsem na ol Kristen i no stap aninit olgeta long gavman. Samting ol i mas givim long Sisar, em ol samting i no pait wantaim lo bilong God. Ol i amamas tru long kisim lait long dispela samting!

Lait Long Wok Bilong Oganaisesen

⁶ Ol i tingting long husat ol i mas mekim wok elda na dikon long ol kongrigesen. Ol i laik abrusim pasin bilong ol misin i gat ol bikman bilong ol. Olsem na ol i ting lain bilong kongrigesen yet i mas vot na makim ol elda na dikon. Tasol Wastaua (tok Inglis) bilong Septemba 1 na Oktoba 15, 1932, i kamapim sampela lait moa long dispela na i tok, pasin bilong vot na makim ol elda, Baibel i no as bilong en. Olsem na ol i pinisim dispela pasin na putim wanpela komiti bilong lukautim wok bilong kongrigesen, na Sosaiti yet i makim wanpela dairekta bilong ol.

⁷ Sampela lait moa i kamap long Wastaua (tok Inglis) bilong Jun 1 na Jun 15, 1938, na i soim olsem ol i no ken vot na makim ol wokman bilong kongrigesen​—⁠oganaisesen bilong Jehova yet i mas mekim. Long 1971 narapela lait i kamap na i soim olsem wanpela wasman tasol i no ken lukautim kongrigesen. I mas i gat wanpela lain elda, olsem wasman, bilong olgeta wan wan kongrigesen na Lain Bilong Bosim Ol Witnes Bilong Jehova i mas makim ol. Olsem na lait i wok long i go bikpela insait long 40 yia samting na ol i save, long rot bilong Lain Bilong Bosim Ol Witnes, “wokboi i gat gutpela tingting” i mas makim ol elda na dikon, nau ol i kolim olsem wokman bilong kongrigesen. (Matyu 24:​45-47) Dispela i stret wantaim ol samting i kamap long taim bilong ol aposel. Long taim bilong ol, lain bilong bosim ol Kristen i bin makim ol man olsem Timoti na Taitus bilong i stap wasman. (1 Timoti 3:​1-7; 5:22; Taitus 1:​5-9) Ol dispela samting i truim tok bilong Aisaia 60:​17, i tok: “Bai mi senisim ol bras bilong yu wantaim gol, na ol ain bilong yu wantaim silva . . . ol plang bilong yu wantaim bras na ol ston bilong yu wantaim ain. Na bai mi makim pasin bilong gutpela sindaun na bel isi bilong bosim yu, na stretpela pasin bai i stiaim wokabaut bilong yu.”

⁸ Na tu, ol i mas skelim wok bilong Sosaiti Was Taua. Inap planti yia Lain Bilong Bosim Ol Witnes Bilong Jehova ol i stap olsem dairekta bilong Sosaiti Was Taua, na presiden i lukautim klostu olgeta wok bilong en. Olsem yiabuk bilong ol Witnes Bilong Jehova bilong 1977 (pes 258-259) i tok, long 1976 ol i makim 6-pela komiti bilong Lain Bilong Bosim Ol Witnes, na olgeta wan wan komiti i mas lukautim wanpela wok. Komiti Bilong Lukautim Ol Wokman i save lukautim olgeta brata sista i wok long ol haus Betel long olgeta hap. Komiti Bilong Wokim Ol Buk i save lukautim wok bilong baim graun o haus samting na ol wok bilong loya samting, na wokim ol buk. Komiti Bilong Wok Autim Tok i save lukautim wok bilong autim tok na wok bilong ol wasman bilong raun, na ol painia, na wok bilong ol pablisa bilong kongrigesen. Komiti Bilong Wok Tisa i save redim ol samting bilong ol miting, ol bikpela de kibung, kibung sekit, kibung distrik, kibung intenesenel, na ol skul bilong skulim lain bilong God long ol samting bilong spirit. Komiti Bilong Raitim Tok i save lukautim wok bilong raitim na tanim tok bilong ol buk na nius samting, na ol i mas glasim gut ol tok na bai i stret wantaim ol tok bilong Baibel. Komiti Bilong Ol Siaman i save lukautim wok bilong stretim ol hevi samting i save kamap na ol narapela samting ol i mas stretim hariap. Na long 1976 ol i makim komiti bilong ol brens-ofis tu, na wanpela wasman tasol i no ken lukautim ol wok bilong brens.b

Lait Long Pasin Kristen

⁹ Planti lait i kamap long pasin ol Kristen i mas bihainim. Wanpela i olsem: Ol Kristen i no insait long ol samting bilong dispela graun. Wanpela bikpela lait tru i kamap long dispela samting long Wastaua (tok Inglis) bilong Novemba 1, 1939. Dispela Wastaua i kamap long taim stret, bihain liklik long taim Namba 2 Pait i kirap! Wastaua i tok, ol Kristen i no ken insait long ol wok politik o ol pait bilong graun. (Maika 4:​3, 5; Jon 17:​14, 16) Dispela em i wanpela as na ol man bilong olgeta kantri i birua long ol Kristen. (Matyu 24:⁠9) Ol pait bilong lain Israel bilong bipo i no stap olsem piksa bilong pasin ol Kristen i mas bihainim. Jisas i kamapim klia dispela samting long Matyu 26:52. Na long nau i no gat wanpela kantri politik God i bosim, olsem em i bin bosim lain Israel bilong bipo, nogat.

¹⁰ Na ol i kisim lait long lo bilong blut tu. Sampela Sumatin Bilong Baibel i bin ting, lo bilong tambuim pasin bilong kaikai blut long Aposel 15:​28, 29 em i bilong ol Juda Kristen tasol. Tasol Aposel 21:​25 i soim yumi, long taim bilong ol aposel ol manmeri bilong ol narapela lain i kamap Kristen ol tu i mas bihainim dispela tok. Olsem na lo bilong tambuim blut em i stap long olgeta Kristen, olsem Wastaua (tok Inglis) bilong Julai 1, 1945, i tok. Na yumi no sakim blut bilong ol animal tasol, olsem ol sosis ol i wokim long blut; yumi mas sakim blut bilong man tu, olsem pasin bilong kisim blut long haus sik.

¹¹ Na taim lait i wok long kamap strong, sampela pasin pastaim ol i no orait tumas long en tasol ol i no tingim tumas, bihain ol i save, ol dispela pasin i gat bikpela rong. Wanpela samting olsem, em pasin bilong smok. Long Wastaua (tok Inglis) bilong Ogas 1, 1895, Brata Russell i kamapim tok bilong 1 Korin 10:31 na 2 Korin 7:1 na em i tok: ‘Sapos Kristen i smok, dispela pasin i no inap litimapim nem bilong God na i no inap helpim em yet tu.’ Kirap long 1973 ol i save klia olsem man i smok em i no inap kamap wanpela Witnes Bilong Jehova. Na long 1976 Sosaiti i kamapim klia olsem sapos wanpela Witnes i wok long wanpela haus bilong pilai laki, em i no inap i stap insait long kongrigesen.

Sampela Samting Moa i Kamap Klia

¹² Na ol i kisim sampela lait moa long hamas “ki” Jisas i bin givim long Pita. Ol Sumatin Bilong Baibel i bin ting, Pita i kisim tupela ki i opim rot bilong ol man bilong ol narapela lain i ken insait long lain bilong Kingdom​—⁠wanpela ki em bilong ol Juda, em Pita i mekim wok long en long Pentikos bilong yia 33, na wanpela em bilong ol man bilong ol narapela lain, em Pita i bin mekim wok long en pastaim long yia 36, taim em i autim tok long Kornilius. (Aposel 2:​14-41; 10:​34-48) Tasol bihain ol i save, i gat namba 3 lain i stap​—⁠em ol Samaria. Pita i mekim wok long namba 2 ki taim em i opim rot long ol na ol i ken insait long lain bilong Kingdom. (Aposel 8:​14-17) Olsem na Pita i mekim wok long namba 3 ki taim em i autim tok long Kornilius.​—⁠Wastaua, Janueri 1, 1981, pes 10-17, 20.

¹³ Narapela lait i kamap na ol i kisim save olsem Jisas i bin toktok long tripela banis sipsip. (Jon, sapta 10) Ol i olsem: (1) Banis sipsip bilong ol Juda, em Jon Bilong Baptais i wasman bilong dua bilong en, (2) banis sipsip bilong lain bilong i stap king long Kingdom, (3) banis sipsip bilong “ol arapela sipsip,” em ol i gat tingting long i stap oltaim long graun.​—⁠Jon 10:​2, 3, 15, 16; Wastaua, Oktoba 1, 1984, pes 7-17.

¹⁴ Na ol i kisim stretpela save tu long samting dispela namba 50 yia bilong ol Israel i olsem piksa bilong en. Lo i tok, olgeta namba 50 yia em i bikpela taim bilong amamas, na sapos man i bin baim hap graun samting, orait em i mas bekim long papa tru bilong graun. (Wok Pris 25:10) Inap longtaim ol i bin ting, dispela namba 50 yia i makim Taim Bilong Wan Tausen Yia Bilong Krais i Stap King. Tasol nau long dispela taim ol i kisim save olsem samting dispela namba 50 yia i makim, i bin kirap long Pentikos bilong yia 33​—⁠long dispela taim ol man i kisim spirit holi ol i no aninit moa long Lo Bilong Moses.​—⁠Wastaua, Jun 1, 1987, pes 18-30.

Lait i Kamap Long Sampela Tok

¹⁵ “Em [dispela saveman] i hatwok long painim tok i swit long yau bilong ol man, na em i raitim gut ol dispela trupela tok.” (Saveman 12:10) Dispela tok i stret tu long ol dispela tok yumi mekim long lait i wok long kamap, long wanem, lait i no kamap tasol long ol bikpela samting olsem bilip na pasin ol Kristen i mas bihainim​—⁠lait i kamap tu long sampela kain tok bilong ol Kristen na insait tru bilong en. Olsem: Wanpela buk ol Sumatin Bilong Baibel i bin laikim moa yet em namba wan volyum bilong buk Studies in the Scriptures, nem bilong en, The Divine Plan of the Ages. Dispela tok “plan” i olsem “tingting long mekim.” (Sindaun 19:21) Tasol bihain ol i save, dispela tok inap makim ol man bilong graun tasol, em ol i save tingting long samting ol bai mekim. Baibel i no save tok, Jehova i save tingting long mekim ol samting. Jehova i no gat wok long tingting gut long ol samting em bai mekim, nogat. Olgeta samting em i laik mekim, ol bai kamap gutpela tasol, long wanem, gutpela tingting na save na strong bilong em i bikpela moa yet. Olsem Efesus 1:10 i tok: “Em [God] i laik stiaim olgeta samting i go i go, na long dispela taim em i makim pinis, em bai i bungim olgeta samting long Krais.” Olsem na ol i kisim save olsem, taim yumi stori long Jehova, yumi save tok, “ol samting Jehova i laik mekim,” na i no stret tumas sapos yumi tok, “ol samting Jehova i tingting long mekim.”

¹⁶ Na ol i kisim gut tok bilong Luk 2:14. Baibel King James Version na Buk Baibel tu i kolim dispela tok olsem: “Litimapim nem bilong God i save stap antap tru. Na long graun ol manmeri i ken stap bel isi. God i belgut long ol.” Tasol ol i kisim save olsem dispela tok bilong Baibel King James Version na Buk Baibel i no stret tumas, long wanem, God i no save belgut long ol man nogut. Olsem na ol Witnes i bin ting, dispela tok i olsem: Ol man i belgut long God ol i ken i stap bel isi. Em nau, ol i save tok, ol man i laik harim tok bilong Baibel ol i belgut long God. Tasol bihain ol i kisim save olsem: God yet i mas belgut long ol man​—⁠i no ol man i belgut long God. Olsem na long Baibel New World Translation long Luk 2:​14, i gat sta daunbilo i kolim klia olsem “ol man em [God] i orait long ol.” Olgeta Kristen i bihainim tok promis ol i bin mekim taim ol i dediket long em, God i belgut long ol.

¹⁷ Na inap longtaim pinis, ol Witnes i save mekim wanpela tok, olsem ‘stretim bek nem bilong Jehova.’ Tasol Satan i no gat tok long Jehova i holim dispela nem, a? Na lain bilong Satan tu i no mekim olsem​—⁠ol i no tok, i no stret Jehova i holim dispela nem. Olsem na Jehova i no gat wok long stretim dispela samting. Long dispela as, ol buk samting bilong Sosaiti Was Taua long nau i no tok olsem Jehova i mas stretim bek dispela nem bilong em. Ol dispela buk i tok, Jehova i mas kamapim long ples klia olsem i stret em i stap King bilong heven na graun, na em bai mekim nem bilong em i stap holi. Dispela i stret wantaim beten Jisas i tokim yumi long mekim, olsem: “Nem bilong yu i mas i stap holi.” (Matyu 6:⁠9) Planti taim Jehova i tok em bai mekim nem bilong em i stap holi​—⁠em dispela nem ol Israel i bin mekim nogut long en, tasol ol i no tok, i no stret Jehova i holim dispela nem.​—⁠Esekiel 20:​9, 14, 22; 36:⁠23.

¹⁸ Long 1971, wanpela buk (“The Nations Shall Know That I Am Jehovah”​—⁠How?) i tok: “Krais Jisas i mekim pait . . . bilong kamapim long ples klia olsem i stret Jehova i stap King bilong heven na graun, na bilong litimapim nem bilong Jehova.” (Pes 364-365) Long 1973, narapela buk (God’s Kingdom of a Thousand Years Has Approached) i tok: “Dispela ‘bikpela hevi’ i laik kamap, em taim bilong God i Gat Olgeta Strong, em Jehova, long kamapim long ples klia olsem i stret em i stap King bilong heven na graun, na em i taim bilong mekim gutpela nem bilong em i stap holi.” (Pes 409) Orait, long 1975, narapela buk (Man’s Salvation Out Of World Distress at Hand!) i tok: “Long dispela taim bihain, nambawan bikpela samting tru bilong heven na graun bai kamap​—⁠Jehova bai kamapim long ples klia olsem i stret em i stap King bilong heven na graun, na em bai mekim nem bilong em i stap holi.”​—⁠Pes 281.

¹⁹ Tru tumas, Jehova i bin mekim gut tru long lain bilong em na ol i stap long gutpela lait bilong spirit! Tasol ol pris pasto bilong ol misin ol i stap tudak long ol samting bilong spirit, olsem wanpela i tok: “Bilong wanem i gat sin? Bilong wanem i gat pen na hevi? Bilong wanem i gat Satan i stap? Bai mi askim Bikpela long ol dispela samting taim mi go antap long heven.” Tasol ol Witnes Bilong Jehova inap tokim em: As bilong en, em bikpela tok i kamap long wok king bilong Jehova, em Satan i tok, i no stret Jehova i stap King na bosim ol man, na i no gat wanpela man bai stap gut long God sapos Satan i birua long em.

²⁰ Long bipo na i kam inap nau, ol bikpela na liklik lait i bin soim rot long ol wokman bilong Jehova i dediket pinis long em. Dispela i truim tok bilong Song 97:11 na Sindaun 4:18. Tasol bilong wokabaut long lait, yumi mas tenkyu tru long ol dispela lait yumi wok long kisim, na i stap bilong yumi i mas stret wantaim dispela lait. Olsem yumi lukim pinis, dispela bikpela lait yumi kisim em i soim yumi long pasin yumi mas bihainim na wok bilong yumi long autim tok.

[Ol Futnot]

Yu Inap Tingim?

◻ Wanem lait i kamap long yumi mas i stap aninit long “ol gavman”?

◻ Lait i kamap na wanem ol samting i kamap long wok bilong oganaisesen?

◻ Lait i kamap na i givim wanem save long yumi long pasin Kristen?

◻ Lait bilong spirit i kamapim klia wanem sampela tok bilong Baibel?

[Askim Bilong Stadi]

1. Bipo ol i bin mekim wanem bilong kamapim klia ol tok piksa bilong Kamapim Tok Hait?

 2. Wanpela stori long Wastaua (“Birth of the Nation”) i kamapim wanem lait long ol tok bilong Kamapim Tok Hait?

 3. Wanem ol buk i kamapim sampela lait moa long Kamapim Tok Hait?

4, 5. (a) Ol Sumatin Bilong Baibel i bin ting olsem wanem long tok bilong Rom 13:1? (b) Bihain ol i kisim wanem save long Baibel long dispela “ol gavman”?

 6. (a) Bilong lusim pasin bilong ol misin, em ol i gat ol bikman bilong bosim lain bilong ol, ol i mekim wanem? (b) Bihain ol i save klia, wanem pasin i stret long makim ol man bilong i stap wasman bilong kongrigesen?

 7. Lait i wok long kamap na ol i stretim wanem ol samting long wok bilong makim ol wasman bilong kongrigesen?

 8. (a) Tok i tru i wok long kamap klia moa na ol i stretim wanem pasin bilong Sosaiti long mekim ol wok? (b) I gat wanem ol komiti long Lain Bilong Bosim Ol Witnes Bilong Jehova? Olgeta wan wan i lukautim wanem wok?

 9. Lait bilong tok i tru i helpim ol Kristen long save, ol i mas i stap olsem wanem wantaim ol gavman bilong graun?

10. Lait i kamapim klia olsem ol Kristen i mas ting olsem wanem long blut?

11. Na lait i kamapim klia olsem ol Kristen i mas ting olsem wanem long pasin bilong smok?

12. (a) Wanpela lait i kamapim klia olsem Pita i bin kisim hamas ki bilong Kingdom? (b) Stori long ol wok Pita i mekim long ol wan wan ki.

13. Wanem lait i kamap long ol banis sipsip em Jon sapta 10 i stori long en?

14. Lait i kamap na ol i save klia, samting dispela namba 50 yia i makim em i kirap long wanem taim?

15. Ol i kisim wanem lait long dispela tok “tingting long mekim”?

16. Isi isi ol i kisim wanem stretpela save long tok bilong Luk 2:⁠14?

17, 18. Jehova bai kamapim long ples klia wanem samting? Em bai mekim wanem samting i stap holi?

19, 20. Olsem wanem yumi ken soim olsem yumi tenkyu long ol lait bilong spirit yumi bin kisim?

[Piksa Kredit Lain long pes 25]