Bihainim Savetingting na Wokim Plen

Tok piksa bilong pikinini i lus em nau tasol Jisas i stori long en, inap kirapim ol takisman, ol saveman bilong lo, na ol Farisi long save long samting God i redi long mekim, em long fogivim ol sinman i tanim bel tru. (Luk 15:1-7, 11) Orait nau Jisas i toktok long ol disaipel bilong em. Em i mekim narapela tok piksa i stori long wanpela maniman husat i kisim save olsem bosboi bilong em i no mekim gut wok bilong em.

Jisas i stori olsem bosboi i no lukautim gut mani kago samting bilong dispela maniman. Olsem na maniman i tok em bai rausim bosboi long wok. Bosboi i tingting olsem: “Bai mi mekim wanem? Bos bilong mi bai tekewe wok bilong mi. Mi no gat strong long digim graun na mi sem long singaut long ol man long givim ol samting long mi.” Bilong helpim sindaun bilong em long bihain, em i tok: “Mi save long samting mi bai mekim na bai ol man i kisim mi i go long haus bilong ol taim mi pinis long wok.” Orait kwiktaim em i singautim ol man husat i gat dinau na askim olsem: “Yu gat hamas dinau long bos bilong mi?”—Luk 16:3-5.

Namba 1 man i tok: “10-pela dram bilong oliv oil,” em inap olsem 2,200 lita oil. Ating man i kisim dinau, em i gat bikpela gaden oliv o ating em i wanpela bisnisman i save salim oil. Orait bosboi i tokim em: “Kisim dinau pepa bilong yu na sindaun na hariap raitim 5-pela long en,” em inap olsem 1,100 lita.—Luk 16:6.

Na bosboi i askim namba 2 man: “Na yu, dinau bilong yu hamas?” Em i tok: “100 dram wit,” em inap olsem 22,000 lita. Orait bosboi i tokim em: “Kisim dinau pepa bilong yu na raitim 80 long en.” Em i daunim dinau bilong dispela man inap 20 pesen.—Luk 16:7.

Bosboi i bosim yet ol mani kago samting bilong maniman, olsem na em i gat namba long daunim dinau bilong ol man i gat dinau long dispela maniman. Bosboi i daunim ol dinau, na long dispela rot em i kamap pren bilong ol dispela man na bihain taim em i pinis long wok, ating ol inap helpim em.

Bihain maniman i harim stori long ol samting i bin kamap. Em i no inap kisim profit, tasol em i tok amamas long bosboi, long wanem, “maski dispela bosboi em i man nogut” em i bin “bihainim savetingting.” Jisas i tok moa: “Ol manmeri bilong dispela graun i winim ol manmeri i stap long lait. Ol i winim ol long pasin bilong bihainim savetingting long ol samting ol i mekim long ol manmeri bilong lain bilong ol.”—Luk 16:8.

Jisas i no tok pasin bosboi i mekim i stret, na tu, em i no laik kirapim ol man long mekim pasin giaman long wok bisnis. Orait em i laik kamapim wanem poin? Jisas i tokim ol disaipel olsem: “Mekim ol arapela i kamap pren bilong yupela long rot bilong mani nogut na taim ol dispela mani nogut i pinis, ol i ken kisim yupela i go long ples bilong i stap oltaim oltaim.” (Luk 16:9) Yes, yumi inap kisim skul long tok piksa bilong Jisas long pasin bilong bihainim savetingting. Ol wokman bilong God, em “ol manmeri i stap long lait,” ol i mas bihainim savetingting na yusim gut mani kago samting bilong ol long nau na bai ol inap kisim laip oltaim long bihain.

God Jehova na Pikinini bilong em, tupela tasol inap orait long husat man bai kisim laip long Kingdom bilong heven o long Paradais long graun aninit long dispela Kingdom. Olsem na yumi mas wok strong long kamap pren bilong tupela long rot bilong yusim mani kago samting bilong yumi long sapotim ol wok bilong Kingdom. Na bai yumi inap kisim laip oltaim long bihain, tasol ol samting yumi gat olsem ol gol, silva na ol arapela samting bai bagarap.

Jisas i tok tu olsem ol man i lukautim gut na yusim mani kago bilong ol, ol bai lukautim gut ol bikpela samting tu. Olsem na Jisas i tok: “Sapos yupela i no soim olsem yupela i lukautim gut wok yupela i mekim long mani nogut, orait husat bai putim samting tru [olsem ol wok bilong Kingdom] long han bilong yupela?”—Luk 16:11.

Jisas i kamapim klia long ol disaipel olsem bilong i go insait long “ples bilong i stap oltaim oltaim,” ol i mas mekim planti wok moa. Man i no inap stap olsem wokman tru bilong God na long wankain taim stap olsem wokboi bilong mani, nogat. Orait Jisas i pinisim tok piksa olsem: “I no gat wanpela wokman o wokmeri bilong haus inap i stap wokboi bilong tupela bosman. Em bai laikim wanpela na i no laikim narapela, o em bai pas wantaim wanpela na les long narapela. Yupela i no inap stap wokboi bilong God na mani wantaim.”—Luk 16:9, 13.