Ol Witnes Kristen Bilong i Go Sindaun Long Heven
“Tasol yumi, yumi stap manmeri bilong heven.”—FILIPAI 3:20.
SAMPELA man bilong graun bai mekim wok king na pris long heven, na ol bai bosim ol ensel tu. (1 Korin 6:2, 3; KTH 20:6) Yumi kirap nogut long dispela tok i tru, a? Tasol dispela em i laik bilong Jehova, na em bai mekim olsem long rot bilong dispela wanpela Pikinini tasol bilong em, em Krais Jisas. Bilong wanem dispela Man bilong wokim yumi i laik mekim kain samting olsem? Na taim ol Kristen bilong nau i kisim dispela save, dispela i mas mekim wanem long ol? Orait nau yumi ken skelim ol bekim bilong Baibel long ol dispela askim.
2 Taim Jon Bilong Baptais i redim rot bilong Jisas, em i tokaut olsem Jisas bai mekim wanpela nupela samting. Baibel i tok: “Em [Jon] i autim tok olsem, ‘Wanpela man i kam bihain long mi, na strong bilong en i winim strong bilong mi. Mi no gutpela man inap long mi brukim skru na lusim string i pasim su bilong em. Mi save baptaisim yupela long wara. Tasol em bai i baptaisim yupela long Holi Spirit.’ ” (Mak 1:7, 8) Paslain long dispela taim, i no gat wanpela man i bin kisim baptais long spirit holi. Dispela em i wanpela nupela samting spirit holi i gat wok insait long en, na dispela samting i insait long laik bilong Jehova, em i laik kamapim long ples klia olsem em bai redim sampela man bilong mekim wok king long heven.
“Kamap Nupela Gen”
3 Wanpela taim, long pasin hait, Jisas i bung wantaim wanpela Farisi i gat biknem, na Jisas i tokaut long sampela samting moa bilong dispela laik bilong God. Dispela Farisi, em Nikodemus, em i kam long Jisas long nait na Jisas i tokim em: “Sapos man i no kamap nupela gen, em i no inap lukim kingdom bilong God.” (Jon 3:3) Nikodemus em i wanpela Farisi, olsem na yumi ken save em i bin stadi long ol tok bilong Ol Skripsa Hibru, olsem na em i gat sampela save long gutpela tok i tru bilong Kingdom bilong God. Buk Daniel i tok profet olsem God bai givim Kingdom long “wanpela man i wankain olsem yumi man bilong graun” na em bai givim tu long “ol manmeri bilong God.” (Daniel 7:13, 14, 27) Dispela Kingdom bai ‘daunim na bagarapim’ olgeta narapela kingdom, na em bai stap oltaim. (Daniel 2:44) Ating Nikodemus i ting, ol dispela tok profet bai kamap tru long lain Juda; tasol Jisas i bin tok, sapos man i laik lukim Kingdom, em i mas kamap nupela gen. Nikodemus i no kisim gut dispela tok, olsem na Jisas i tok moa olsem: “Sapos man i no kamap nupela long wara na long Holi Spirit, em i no inap i go insait long kingdom bilong God.”—Jon 3:5.
4 Jon Bilong Baptais i bin toktok long kisim baptais long spirit holi. Orait nau Jisas i skruim sampela tok moa long dispela na em i tok, sapos man i laik go insait long Kingdom bilong God, em i mas kamap nupela long spirit holi. Long dispela rot, ol man na meri inap kamap pikinini bilong God Jehova, maski ol i gat sin. Baibel i tok: “Sampela manmeri i kisim [Jisas], em ol lain i bilip long nem bilong em. Na em i givim namba long ol bai ol i ken kamap pikinini bilong God. Ol i no kamap pikinini bilong God long blut bilong papamama, o long laik bilong bodi, o long laik bilong man. Nogat. God yet i mekim ol i kamap pikinini bilong em.”—Jon 1:12, 13; Rom 8:15.
Ol Pikinini Bilong God
5 Taim Jisas i toktok wantaim Nikodemus, spirit holi i kamap pinis long Jisas na i makim em pinis long kamap King long Kingdom bilong God long bihain, na God i tokaut pinis olsem Jisas i Pikinini bilong Em. (Matyu 3:16, 17) Jehova i kamapim sampela pikinini moa long taim bilong Pentikos long yia 33. Ol gutpela disaipel i bung long Jerusalem long wanpela rum antap, na ol i kisim baptais long spirit holi. Long dispela taim yet ol i kamap nupela long rot bilong spirit holi na bai ol i ken kamap pikinini spirit bilong God. (Aposel 2:2-4, 38; Rom 8:15) Na tu, ol i kisim spirit holi bambai ol inap kisim ol gutpela samting bilong heven, em bilong ol pikinini bilong God, na pastaim spirit holi i putim mak long ol bilong makim olsem ol bai kisim tru ol dispela samting long heven.—2 Korin 1:21, 22.
6 Dispela lain em ol namba wan lain bilong graun God i bin makim bilong i go insait long Kingdom bilong heven. Olsem: Taim ol i dai na kirap bek, ol bai insait long oganaisesen bilong Kingdom bilong heven em bai bosim ol man bilong graun na ol ensel. Laik bilong Jehova i olsem: Long rot bilong dispela Kingdom em bai mekim holi bikpela nem bilong em, na long ai bilong olgeta man na ensel em bai kamapim long ples klia olsem em i nambawan Bos bilong heven na graun. (Matyu 6:9, 10; Jon 12:28) I stret tru long sampela man bilong graun bai insait long dispela Kingdom! Long gaden Iden, taim Satan i sutim tok namba wan taim long wok bilong Jehova long bosim ol man, Satan i mekim olsem long rot bilong sampela man. Orait, nau Jehova i laik bai ol man i insait long wok bilong stretim dispela tok Satan i bin sutim long em. (Stat 3:1-6; Jon 8:44) Aposel Pita i raitim pas long sampela man God i bin makim bilong i stap king long dispela Kingdom, na em i tok: “Yumi litimapim nem bilong God . . . Em i gat bikpela sori long yumi, na em i kirapim Jisas Krais long matmat, na long dispela rot God i givim yumi nupela laip. . . . Em i makim yumi pinis bilong kisim gutpela laip bilong heven. Dispela laip em i no inap bagarap. Em i klin olgeta long ai bilong God, na em bai i no inap pinis. God i redim dispela laip pinis, bilong yupela i kisim long taim yupela i stap wantaim em long heven.”—1 Pita 1:3, 4.
7 Ol dispela Kristen God i kisim ol olsem pikinini bilong em, ol i kamap brata bilong Krais Jisas. (Rom 8:16, 17; 9:4, 26; Hibru 2:11) Ol samting Jisas i mekim i kamapim klia olsem em i dispela Pikinini God i bin promis long givim long Abraham, olsem na ol dispela Kristen God i makim, ol i olsem ol nambatu pikinini bilong dispela lain, na long rot bilong en olgeta man bilong graun i bilip ol bai kisim blesing. (Stat 22:17, 18; Galesia 3:16, 26, 29) Ol bai kisim wanem blesing? Ol i gat rot long lusim sin na kamap wanbel wantaim God na mekim wok bilong em long nau i go inap long olgeta taim bihain. (Matyu 4:23; 20:28; Jon 3:16, 36; 1 Jon 2:1, 2) Ol Kristen God i makim ol pinis na ol i stap yet long graun, ol i soim rot long ol man i gat stretpela bel bambai ol i ken kisim dispela blesing—ol i autim tok bilong brata spirit bilong ol, em Krais Jisas, na God Jehova, em Papa bilong ol.—Aposel 1:8; Hibru 13:15.
8 Baibel i toktok long taim ol dispela pikinini bilong God bai i ‘kamap ples klia.’ (Rom 8:19) Taim ol i go insait long Kingdom na mekim wok king wantaim Jisas, ol bai insait long wok bilong bagarapim ol lain bilong dispela graun em Satan i bosim ol. Orait bihain long en, inap long wan tausen yia, ol bai insait long wok bilong helpim ol man long kisim ol gutpela samting bilong ofa bilong Krais na bai olgeta man bilong graun i ken kamap gutpela olgeta, em dispela nambawan laip tru Adam i bin tromoi. (2 Tesalonaika 1:8-10; KTH 2:26, 27; 20:6; 22:1, 2) Ol dispela samting bai kamap insait long taim ol i kamap ples klia. Olgeta bilipman i wetim dispela samting.
9 Ol Kristen God i bin makim ol na ol i stap long olgeta hap, em “ol namba wan pikinini bilong God, em ol lain God i raitim nem bilong ol long buk bilong en long heven.” (Hibru 12:23) Ol i namba wan lain bilong kisim ol gutpela samting bilong ofa bilong Krais. Na tu, ol i olsem “bodi bilong Krais,” na dispela i kamapim klia olsem ol i pas gut wantaim na ol i pas gut wantaim Jisas tu. (1 Korin 12:27) Pol i tok: “Bodi bilong man em i wanpela tasol, na i gat planti hap bilong en. . . . Na Krais tu i stap olsem, long wanem, wanpela Holi Spirit tasol i bin baptaisim yumi olgeta na mekim yumi i kamap wanpela bodi tasol, yumi ol Juda na Grik, na yumi ol wokboi nating na yumi man i stap fri. Yumi olgeta i bin kisim wanpela Spirit tasol bilong yumi ken dring long en.”—1 Korin 12:12, 13; Rom 12:5; Efesus 1:22, 23; 3:6.
“Israel Tru Bilong God”
10 Inap 1,500 yia samting paslain long taim Jisas i kam olsem Mesaia, lain Israel bilong skin ol i lain bilong Jehova. Planti taim Jehova i tokim ol long dispela na bai ol i no ken lusim tingting, tasol bihain lain Israel i no stap gut long em. Taim Jisas i kamap, dispela lain i sakim em. (Jon 1:11) Olsem na Jisas i tokim ol bikman bilong lotu: “God bai i rausim kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.” (Matyu 21:43) Bilong kisim laip i stap oltaim, yumi mas save, wanem lain em dispela ‘lain i save kamapim kaikai bilong kingdom.’
11 Dispela nupela lain Israel em lain Kristen God i makim long spirit holi na ol i kamap nupela long Pentikos bilong yia 33. Ol manmeri i bin kam insait pastaim long dispela lain, em ol disaipel Juda bilong Jisas ol i kisim em olsem King bilong ol long heven. (Aposel 2:5, 32-36) Tasol ol i insait long nupela lain Israel bilong God, long wanem, ol i bilip long Jisas; i no olsem ol i Juda na ol inap mekim olsem, nogat. Olsem na dispela nupela lain Israel bilong God i narapela kain tru—ol i wanpela lain bilong spirit. Klostu olgeta bilong lain Juda ol i sakim Jisas, olsem na Jehova i singautim ol Samaria na bihain ol man bilong ol narapela lain long kam insait long dispela nupela lain. Nem bilong dispela nupela lain em “lain Israel tru bilong God.”—Galesia 6:16.
12 Long Israel bilong bipo, taim ol manmeri i no Juda ol i kam insait long lotu bilong ol Juda, ol i mas bihainim Lo Bilong Moses, na bilong makim olsem, ol man i mas katim skin. (Kisim Bek 12:48, 49) Sampela Juda Kristen i bin ting, ol man i no bilong lain Juda na ol i insait long lain Israel bilong God, ol tu i mas mekim olsem. Tasol Jehova i gat narapela laik. Spirit holi i stiaim Pita i go long haus bilong wanpela man bilong ol narapela lain, em Kornilius. Orait, taim Kornilius wantaim ol wanhaus bilong em i bilip long ol tok Pita i autim long ol, ol i kisim spirit holi—na ol i no kisim baptais yet long wara. Dispela i kamapim klia olsem Jehova i kisim ol dispela manmeri bilong ol narapela lain i kam insait long lain Israel bilong God, na em i no tok ol i mas bihainim Lo Bilong Moses.—Aposel 10:21-48.
13 Sampela bilipman i hatwok long bihainim dispela nupela pasin, olsem na ol aposel na elda long Jerusalem i mas toktok long dispela samting. Dispela lain i harim stori bilong ol disaipel olsem sampela bilipman i no bilong lain Juda ol i kisim spirit holi. Orait, ol i skelim ol tok bilong Baibel na ol i kisim save olsem dispela samting i kamap em i truim tok profet bilong Baibel. (Aisaia 55:5; Amos 9:11, 12) Orait ol i pasim tok i stret, olsem: Ol Kristen i no bilong lain Juda ol i no gat wok long bihainim Lo Bilong Moses. (Aposel 15:1, 6-29) Olsem na lain Israel bilong God em i wanpela nupela lain tru—i no wanpela lain i bruk long lotu Juda, nogat.
14 Olsem na taim disaipel Jems i raitim pas i go long ol Kristen God i bin makim ol, em i raitim tok olsem dispela pas i bilong ‘12-pela lain bilong Israel ol i stap long ol narapela hap bilong graun.’ (Jems 1:1; KTH 7:3-8) Tru, ol manmeri insait long nupela lain Israel i no bruk i go long ol narapela narapela liklik lain. Insait long lain Israel bilong spirit, i no gat 12-pela lain olsem long Israel bilong skin bipo. Tasol dispela tok God i kirapim Jems long raitim i makim olsem: Long ai bilong Jehova, dispela Israel bilong God i senisim pinis 12-pela lain bilong Israel bilong skin. Sapos wanpela Israel bilong skin i kam insait long dispela nupela lain—maski em i bilong lain bilong Juda o lain bilong Livai—em i no winim ol narapela bilong dispela nupela lain.—Galesia 3:28; Filipai 3:5, 6.
Nupela Kontrak
15 Ol manmeri bilong ol narapela lain ol i insait long dispela nupela lain, long ai bilong Jehova ol i Juda tru bilong spirit! Aposel Pol i tok: “Sapos man i stap Juda long nem tasol, em i no Juda tru. Na pasin bilong katim skin, em i no samting bilong bodi tasol. Nogat. Man i stap Juda long bel na tingting bilong en, em i Juda tru. Na pasin tru bilong katim skin, em tu i mas kamap insait long bel na tingting bilong man. Em i no save kamap long pasin bilong bihainim ol tok ol i bin raitim long lo. Nogat. Em i samting Spirit bilong God i save kamapim.” (Rom 2:28, 29) Planti manmeri bilong ol narapela lain i bihainim singaut bilong kam insait long lain Israel bilong God, na dispela i truim tok profet bilong Baibel. Profet Hosea i raitim tok olsem: “Bipo mi save tokim ol manmeri bilong mi, ‘Mi No Laikim Yupela.’ Tasol bihain bai mi laikim ol tru. Bipo mi save tokim ol olsem, ‘Yupela i No Bilong Mi.’ Tasol bihain bai mi tok, ‘Yupela i manmeri bilong mi.’ Na ol bai i bekim tok olsem, ‘Yu God bilong mipela.’ ”—Hosea 2:23; Rom 11:25, 26.
16 Sapos ol Israel bilong spirit i no aninit long Lo Bilong Moses, i gat wanem as na ol i insait long dispela nupela lain? Jehova i wokim nupela kontrak wantaim dispela lain Israel bilong spirit long rot bilong Jisas. (Hibru 9:15) Long Nisan 14 bilong yia 33, taim Jisas i kamapim Memorial bilong tingim dai bilong em, em i givim bret na wain long 11-pela gutpela aposel bilong em, na em i tok, wain i makim ‘blut bilong em bilong mekim kontrak.’ (Matyu 26:28; Jeremaia 31:31-34) Olsem Luk i stori long en, Jisas i tok, wain i makim ‘blut bilong em bilong mekim kontrak.’ (Luk 22:20) Taim spirit holi i kam daun long ol Kristen long Pentikos na lain Israel bilong God i kamap nupela, God i tekewe Kingdom long lain Israel bilong skin na em i givim long dispela nupela lain Israel bilong spirit, na dispela i truim tok bilong Jisas. Orait, nau dispela nupela lain ol i wokman bilong Jehova, em ol witnes bilong em, na lain Israel bilong skin, nogat.—Aisaia 43:10, 11.
“Nupela Jerusalem”
17 Tru tumas, biknem tru i wetim ol dispela manmeri ol i bilong i go long heven! Na yumi amamas tru long kisim save long ol gutpela gutpela samting i wetim ol! Buk Kamapim Tok Hait i givim sampela save long yumi long gutpela samting ol bai kisim long heven. Kamapim Tok Hait 4:4 i tok: “I gat 24 sia i raunim dispela sia king [bilong Jehova], na 24 hetman i sindaun i stap long ol dispela sia. Ol dispela hetman i putim longpela waitpela klos, na ol i gat ol hat gol olsem ol hat king i stap long het bilong ol.” Ol dispela 24 elda em ol Kristen God i makim long spirit holi na ol i kirap bek pinis, na nau ol i holim dispela namba long heven olsem Jehova i promis pinis. Yumi tingim hat king na sia king bilong ol na yumi save ol i king. Na yumi tingim tu bikpela samting tru ol inap mekim, em ol i raunim sia king bilong Jehova na ol i mekim wok!
18 Kamapim Tok Hait 14:1 i stori moa long ol, olsem: “Mi lukim Pikinini Sipsip i sanap long maunten Saion, na 144,000 manmeri i sanap wantaim em. Nem bilong Pikinini Sipsip na nem bilong Papa bilong en, dispela nem God i bin raitim long pes bilong ol.” Em nau, yumi lukim namba stret bilong dispela lain God i makim ol—em 144,000. Yumi inap save ol i stap king, long wanem, ol i sanap wantaim dispela King em Jehova i bin makim, em “Pikinini Sipsip,” Jisas. Na tu, ol i stap long maunten Saion bilong heven. Maunten Saion bilong graun em dispela ples Jerusalem i stap long en, em biktaun bilong king bilong Israel. Maunten Saion bilong heven i makim bikpela namba tru Jisas wantaim ol wanlain bilong em i holim, em ol i olsem Jerusalem bilong heven.—2 Stori 5:2; Song 2:6.
19 Olsem na Baibel i kolim dispela lain i kisim pinis biknem long heven olsem “nupela Jerusalem.” (KTH 21:2) Bipo Jerusalem bilong graun em i “taun bilong Nambawan King,” na haus bilong Jehova tu i stap long dispela ples. (Matyu 5:35) Nupela Jerusalem bilong heven em i lain king bilong Kingdom, na long rot bilong en, bikpela King Jehova wantaim King em i bin makim, em Jisas, nau tupela i mekim wok king na ol pris i mekim wok pris bilong ol, na ol gutpela blesing tru i kirap long sia king bilong Jehova na i kam long graun bilong oraitim ol man. (KTH 21:10, 11; 22:1-5) Long narapela driman, Jon i harim sampela maus i stori long ol gutpela Kristen em God i bin makim ol na ol i kirap bek pinis, na i kolim ol olsem ‘meri bilong Pikinini Sipsip.’ Em i gutpela tok piksa tru i makim olsem ol i pas gut wantaim Jisas na ol i amamas long i stap aninit long em! Yumi ken tingim bikpela amamas i kamap long heven taim laspela man bilong dispela lain i kisim pinis gutpela pe bilong em long heven. Em nau, marit bilong Pikinini Sipsip bai kamap! Long dispela taim, dispela lain king bilong heven em inap pinis.—KTH 19:6-8.
20 Tru tumas, ol gutpela blesing tru i wetim dispela lain em aposel Pol i tok long ol olsem: “Tasol yumi, yumi stap manmeri bilong heven.” (Filipai 3:20) Klostu olsem 2 tausen yia pinis Jehova i bin makim ol manmeri bilong kamap pikinini spirit bilong em, na em i redim ol bilong kisim gutpela samting tru long heven. Ol samting i kamap i makim olsem wok bilong makim na redim dispela lain em i laik pinis. Tasol i gat sampela samting moa i kamap, olsem Jon i lukim long driman na i stap long Kamapim Tok Hait sapta 7. Olsem na nau yumi mas tingim narapela lain Kristen, na bai yumi toktok long dispela lain long narapela stori i kamap bihain long dispela.
Yu Tingim Yet?
◻ Wanem ol narapela narapela wok spirit holi i mekim long ol manmeri ol i bilong i go long heven?
◻ Ol manmeri God i makim ol, ol i stap olsem wanem wantaim Jehova? Ol i stap olsem wanem wantaim Jisas?
◻ Baibel i tok wanem long lain Kristen God i makim ol?
◻ Bilong kamapim lain Israel bilong God, God i wokim wanem kontrak?
◻ Ol Kristen God i makim ol, ol bai kisim wanem ol gutpela wok long heven?
[Askim Bilong Stadi]
1. Jehova i gat wanem gutpela laik tru long sampela man bilong graun?
2. Jon Bilong Baptais i tokaut long wanem nupela samting Jisas bai mekim? Dispela nupela samting i insait long wanem samting?
3. Jisas i tokim Nikodemus long wanem ol nupela samting bilong Kingdom bilong heven?
4. Ol man i kamap nupela long spirit holi, ol inap mekim wanem?
5. Wanem taim ol gutpela disaipel i bin kisim baptais long spirit holi? Wanem sampela wok moa bilong spirit holi i kamap long dispela taim?
6. Wanem laik bilong God long dispela Kingdom bilong heven? Bilong wanem i stret long ol man bilong graun i insait long dispela Kingdom?
7. Ol man i kisim baptais long spirit holi, ol i stap olsem wanem wantaim Jisas?
8. Olsem wanem ol pikinini bilong God bai ‘kamap ples klia’?
9. Baibel i tok wanem long dispela lain Kristen God i makim ol na ol i stap long olgeta hap bilong graun?
10, 11. Long taim bilong ol aposel, bilong wanem i mas i gat nupela lain Israel? Husat ol i insait long dispela nupela lain?
12, 13. Olsem wanem ol i ken save, dispela nupela lain Israel i no wanpela lain i bruk long lotu Juda?
14. Yumi ken ting olsem wanem long tok bilong Jems, em i kolim lain Kristen olsem ‘12-pela lain bilong Israel ol i stap long ol narapela hap bilong graun’?
15, 16. (a) Jehova i ting olsem wanem long ol manmeri bilong lain Israel bilong God em ol i no bilong lain Juda? (b) Bilong kamapim nupela lain Israel, Jehova i wokim wanem kontrak?
17, 18. Buk Kamapim Tok Hait i stori olsem wanem long biknem i wetim ol Kristen God i makim ol?
19, 20. (a) Ol Kristen God i makim ol, ol bai insait long wanem lain bilong heven? (b) Inap hamas yia pinis Jehova i bin wok long makim ol manmeri i bilong i go sindaun long heven?
[Ol Piksa long pes 10]
Insait long tu tausen yia samting, Jehova i bin makim ol manmeri ol bai mekim wok king long Kingdom bilong heven