Sapta 18
“Ol i No Bilong Dispela Graun”
1. (a) Paslain long taim Jisas i dai, em i beten na askim God long mekim wanem long ol disaipel bilong em? (b) Bilong wanem em i bikpela samting long klia long pasin bilong dispela graun?
LONG apinun, paslain long ol i kilim i dai Jisas, em i beten long God long em i ken helpim ol disaipel bilong em. Em i save Satan bai putim bikpela hevi tru long ol, olsem na Jisas i tokim Papa bilong em: “Mi no askim yu long kisim ol i go aut long dispela graun. Nogat. Mi beten long yu long yu ken lukautim ol, na man nogut i no ken bagarapim ol. Ol i no bilong dispela graun, olsem mi no bilong dispela graun.” ( Jon 17:15, 16) Bilong wanem em i bikpela samting long klia long pasin bilong dispela graun? Long wanem, Satan em i hetman bilong dispela graun. Ol Kristen i no laik insait long pasin bilong dispela graun em Satan i bosim.—Luk 4:5-8; Jon 14:30; 1 Jon 5:19.
2. Olsem wanem Jisas i no bilong dispela graun?
2 Jisas i “no bilong dispela graun,” tasol i no olsem em i no laikim ol man. Nogat. Em i oraitim ol sikman, kirapim bek ol man i dai pinis, na lainim ol man long Kingdom bilong God. Em i lusim laip bilong em bilong helpim ol manmeri. Tasol em i no laikim tingting na pasin bilong ol man i bihainim tingting bilong graun bilong Satan. Olsem na em i tok yumi no ken bihainim ol laik nogut bilong skin, laikim tumas mani kago, o wok long kisim biknem. (Matyu 5:27, 28; 6:19-21; Luk 20:46, 47) Olsem na yumi no kirap nogut long Jisas i no laik insait long wok politik bilong dispela graun. Maski em i wanpela Juda, em i no insait long ol kros bilong wok politik i kamap namel long ol Rom na ol Juda.
“Kingdom Bilong Mi i No Bilong Dispela Graun”
3. (a) Ol hetman bilong lotu Juda i kotim Jisas long Pailat na ol i sutim wanem tok long em? Bilong wanem ol i mekim olsem? (b) Olsem wanem yumi ken save Jisas i no gat laik long kamap king long graun?
3 Tingim ol samting i kamap taim ol hetman bilong lotu Juda i holim Jisas na bringim em i go long Pontius Pailat, em gavena bilong Rom. Ol i tingting planti, long wanem, Jisas i bin kamapim pasin giaman bilong ol, ol i man bilong tupela maus. Na bilong kirapim Pailat long kilim Jisas i dai, ol i sutim tok long Jisas olsem: “Mipela i lukim dispela man i paulim pasin bilong ol manmeri bilong mipela. Em i tambuim mipela long givim takis long Sisar. Na em i save tok olsem em yet em dispela king God i makim bilong kisim bek ol manmeri bilong en.” (Luk 23:2) Tasol dispela tok i giaman, long wanem, wanpela yia paslain long dispela ol man i laik makim Jisas i stap king, tasol em i no laik. ( Jon 6:15) Em i save em bai kamap King long heven long bihain. (Luk 19:11, 12) Na tu, Jehova bai putim em i stap king, ol man i no ken mekim.
4. Jisas i ting olsem wanem long pasin bilong givim takis?
4 Tripela de paslain long taim ol i holim Jisas, ol Farisi i laik trikim em long mekim sampela tok i no stret long pasin bilong givim takis. Tasol Jisas i tok: “Soim wanpela mani [mani bilong ol Rom] long mi. Dispela piksa na nem i stap long mani em i bilong husat? Taim ol i tok: ‘Bilong Sisar,’ em i tokim ol olsem, ‘Orait samting bilong Sisar, em yupela i mas givim long Sisar. Na samting bilong God, em yupela i mas givim long God.’ ”—Luk 20:20-25.
5. (a) Taim ol man i kam holim Jisas, em i lainim ol disaipel long wanem samting? (b) Jisas i tok wanem long Pailat bilong kamapim as bilong samting em i bin mekim? (c) Wanem samting i kamap long kot bilong Jisas?
5 Jisas i no lainim ol man long bikhet long gavman. Nogat. Taim ol soldia na ol narapela man i kam bilong holim Jisas, Pita i kamautim bainat na katim yau bilong wanpela man. Tasol Jisas i tok: “Putim bainat bilong yu i go bek long paus bilong en. Olgeta man i pait long bainat, bainat bai i bagarapim ol.” (Matyu 26:51, 52) Long de bihain Jisas i tokim Pailat long as bilong dispela samting em i bin mekim, em i tok: “Kingdom bilong mi em i no bilong dispela graun. Sapos kingdom bilong mi em i bilong dispela graun, orait inap ol wokman bilong mi i pait, na i no gat wanpela man inap putim mi long han bilong ol Juda.” ( Jon 18:36) Pailat i tokaut stret olsem “mi no painim wanpela rong long dispela man.” Tasol em i bihainim laik bilong ol man na em i tokim ol long nilim Jisas long diwai.—Luk 23:13-15; Jon 19:12-16.
Ol Disaipel i Bihainim Jisas
6. Ol Kristen bilong pastaim i mekim wanem bilong soim olsem ol i no bihainim tingting na pasin bilong dispela graun? Ol i mekim wanem bilong soim olsem ol i laikim tru ol man?
6 Olsem na ol disaipel bilong Jisas i save long ol samting ol i mas mekim na bai ol i no bilong dispela graun. Ol i mas sakim tingting na pasin bilong dispela graun, olsem pasin bilong pait na bagarapim man na pasin pamuk i kamap long ol haus spot samting bilong ol Rom. Ol Kristen i sakim ol dispela samting, olsem na ol man i tok ol i no save laikim ol man. Tasol dispela tok i no stret, ol i wok strong long helpim ol narapela long save long ol samting God i bin mekim bilong kisim bek ol.
7. (a) Ol disaipel bilong pastaim i no bilong dispela graun, olsem na wanem samting i painim ol? (b) Ol i gat wanem tingting long ol bikman bilong gavman na long givim takis samting? Bilong wanem ol i ting olsem?
7 Ol man i birua long ol disaipel bilong Jisas olsem ol i bin birua long em, na planti taim em ol bikman bilong gavman i gat tingting kranki na ol i mekim dispela pasin. Tasol long 56 C.E. samting, aposel Pol i raitim pas long ol Kristen long Rom, na em i tokim ol long “aninit long ol gavman [ol hetman politik],” long wanem, “olgeta wok bilong gavman i kamap long han bilong God tasol.” Tru, Jehova i no kamapim ol gavman bilong graun, tasol em i larim ol i stap i go inap long taim Kingdom bilong em tasol bai bosim graun. Olsem na i stret Pol i tokim ol Kristen long rispek long ol bikman bilong gavman na long givim takis.—Rom 13:1-7; Taitus 3:1, 2.
8. (a) Ol Kristen i mas daun long ol gavman inap long wanem mak? (b) Olsem wanem ol Kristen bilong pastaim i bihainim pasin bilong Jisas?
8 Tasol ol Kristen i daun long ol gavman inap long mak. Taim lo bilong Jehova i pait wantaim lo bilong man, ol man i mekim wok bilong Jehova ol i mas bihainim ol lo bilong Em. Lukim tok wanpela buk (On the Road to Civilization—A World History) i mekim long ol Kristen bilong pastaim: “Ol Kristen i no laik insait long sampela wok ol man bilong Rom i mas mekim. Ol Kristen . . . i pilim olsem sapos ol i insait long ami ol i sakim bilip bilong ol. Ol i no holim wok politik. Ol i no lotu long empera, em bikman bilong gavman.” Taim kaunsil bilong ol Juda i “tambuim” ol disaipel long autim tok, ol i tok: “Mipela i mas bihainim tok bilong God tasol. Mipela i no ken bihainim tok bilong ol man.”—Aposel 5:27-29.
9. (a) Bilong wanem ol Kristen long Jerusalem i mekim ol samting ol i mekim long 66 C.E.? (b) Olsem wanem dispela i gutpela piksa long yumi?
9 Ol disaipel i no insait liklik long ol kros bilong wok politik o ol woa. Long 66 C.E., ol Juda long Judia ol i bikhet long Sisar. Kwiktaim ami bilong Rom i kam banisim Jerusalem. Ol Kristen long Jerusalem i mekim wanem? Ol i tingim tok bilong Jisas olsem ol i mas lusim taun. Taim ol ami bilong Rom i lusim Jerusalem inap liklik taim, ol Kristen i ranawe i go, ol i brukim wara Jordan na i go long ples maunten bilong Pela. (Luk 21:20-24) Ol i no insait liklik long dispela pait na ol i stap olsem gutpela piksa bilong ol gutpela Kristen long bihain i ken bihainim.
Ol Kristen i No Bilong Dispela Graun Nau Long Las Taim
10. (a) Ol Witnes Bilong Jehova i wok strong long mekim wanem wok? Bilong wanem ol i mekim olsem? (b) Ol i no save insait liklik long wanem samting?
10 Olsem wanem? Ol samting i bin kamap i soim olsem i gat wanpela lain nau long taim bilong las de em ol i bihainim pasin bilong ol Kristen bilong pastaim na ol i no insait liklik long ol samting bilong dispela graun? Yes, i gat. Em ol Witnes Bilong Jehova. Insait long dispela taim bilong las de, ol i bin autim tok olsem Kingdom bilong God tasol inap kamapim bel isi, gutaim, na amamas oltaim long ol manmeri i laikim stretpela pasin. (Matyu 24:14) Tasol ol i no save insait liklik long ol kros o pait bilong ol lain bilong dispela graun.
11. (a) Ol Witnes i no insait liklik long wok politik samting, tasol olsem wanem long ol pris pasto? (b) Ol Witnes Bilong Jehova i ting olsem wanem long ol man i laik insait long wok politik?
11 Tasol ol pris pasto bilong ol lotu bilong dispela graun ol i insait tru long wok politik. Long sampela kantri, ol i bin kempein long helpim sampela man long kamap memba o mekim sampela tok bilong daunim ol narapela i laik kamap memba. Sampela pris pasto yet ol i bin kamap memba. Na sampela i subim ol memba bilong gavman long helpim sampela wok ol pris yet i laikim. Tasol ol Witnes Bilong Jehova i no insait liklik long wok politik. Na ol i no pasim ol narapela man i laik joinim wanpela politikol pati, o sanap long eleksen, o votim narapela man. Jisas i tok, ol disaipel bilong em ol i no bilong dispela graun, olsem na ol Witnes Bilong Jehova i no save insait liklik long wok politik.
12. Wanem samting i bin kamap taim ol lotu bilong dispela graun i insait long ol samting bilong graun?
12 Olsem Jisas i bin tok profet, planti taim ol lain man i pait long woa. Insait long sampela kantri narapela lain i pait wantaim narapela lain. (Matyu 24:3, 6, 7) Ol hetman bilong lotu i save sapotim wanpela kantri o lain na daunim narapela, na ol i kirapim lain bilong ol long mekim wankain pasin. Wanem samting i bin kamap? Ol man i kilim i dai ol wanlotu bilong ol, long wanem, ol i bilong narapela kantri o lain. Dispela i no stret wantaim laik bilong God.—1 Jon 3:10-12; 4:8, 20.
13. Olsem ol samting i bin kamap i soim, ol Witnes i gat wanem tingting long ol pait samting bilong dispela graun?
13 Tasol ol Witnes Bilong Jehova i no save insait liklik long wanpela pait. Wastaua (tok Inglis) bilong Novemba 1, 1939 i tok: “Olgeta manmeri long lain bilong Bikpela ol i no insait liklik long woa bilong ol lain pipel bilong dispela graun.” Ol Witnes Bilong Jehova long olgeta kantri na bilong olgeta kain sindaun ol i wok yet long bihainim dispela pasin. Ol i no larim ol wok politik na ol woa i bagarapim pasin bilong ol long pas gut wantaim olsem wanpela bikpela lain brata i stap long olgeta hap. Ol i “paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip.” Ol i no insait long ol samting bilong dispela graun, olsem na ol i no lain long pait.—Aisaia 2:3, 4; 2 Korin 10:3, 4.
14. Ol Witnes Bilong Jehova i no insait long ol pasin bilong dispela graun, olsem na wanem samting i bin painim ol?
14 Wanem samting i kamap taim ol Witnes i no insait long ol samting bilong dispela graun? Jisas i tok: “Yupela i no man bilong dispela graun. . . . Olsem na ol manmeri bilong graun ol i save birua long yupela.” ( Jon 15:19) Planti Witnes Bilong Jehova i bin kalabus, long wanem, ol i wokman bilong God. Ol man i bin givim bikpela pen na kilim i dai sampela, olsem ol i bin mekim long ol Kristen long taim bilong ol aposel. Dispela samting i bin kamap, long wanem, Satan “em i giaman god bilong dispela graun,” em i birua long ol wokman bilong Jehova, em ol i no bilong dispela graun.—2 Korin 4:4; KTH 12:12.
15. (a) Olgeta lain man i wokabaut i go we? Ol Witnes Bilong Jehova i klia long wanem samting? (b) Bilong wanem em i bikpela samting yumi mas klia long ol pasin bilong dispela graun?
15 Ol wokman bilong Jehova i amamas long ol i no bilong dispela graun, long wanem, olgeta lain man i wokabaut i go long kisim bagarap long Armagedon. (Daniel 2:44; KTH 16:14, 16; 19:11-21) Bai yumi abrusim bagarap, long wanem, yumi klia long pasin bilong dispela graun. Yumi stap wanbel long olgeta hap bilong graun, na yumi stap gut long Kingdom bilong God long heven. Tru, taim yumi no insait long ol samting bilong dispela graun ol man bai tok bilas na birua long yumi. Tasol klostu nau dispela samting bai pinis, long wanem, pasin bilong dispela graun em Satan i bosim bai pinis olgeta. Tasol ol man i mekim wok bilong Jehova ol bai stap oltaim long nupela taim i gat stretpela pasin long en em Kingdom bilong God i bosim.—2 Pita 3:10-13; 1 Jon 2:15-17.
Stori Gen Long Ol Dispela Tok
• Jisas i mekim wanem bilong soim ol samting yumi mas mekim na yumi “no bilong dispela graun”?
• Ol Kristen bilong pastaim i gat wanem tingting long (a) tingting na pasin bilong dispela graun? (b) ol hetman bilong graun? na (c) pasin bilong givim takis?
• Ol Witnes Bilong Jehova long nau i bin mekim wanem bilong kamapim klia olsem ol i no insait long ol samting bilong dispela graun?
[Piksa long pes 165]
Jisas i tok em yet na ol disaipel bilong em ol i “no bilong dispela graun”