‘Kliagut Long Pasin Laikim Bilong Krais’

1-3. (a) Wanem samting i kirapim bel bilong Jisas na em i gat laik long bihainim pasin bilong Papa? (b) Bai yumi skelim wanem ol samting bilong pasin laikim bilong Jisas?

OLSEM WANEM? Wanpela taim yu bin lukim wanpela liklik mangi i traim long bihainim pasin bilong papa bilong em? Ating em i bihainim pasin bilong papa long wokabaut, o toktok, o pasin bilong papa long mekim ol samting. Bihain, ating dispela mangi bai kirap bihainim tingting bilong papa long wanem samting i stret na wanem samting i no stret na em bai i gat wankain bilip long God olsem papa bilong em. Em nau, pikinini i laikim tru gutpela papa bilong em, na dispela i kirapim laik bilong em long bihainim pasin bilong papa.

² Olsem wanem long pasin i stap namel long Jisas na Papa bilong em long heven? Jisas i tok: “Mi laikim Papa.” (Jon 14:31) I no gat wanpela man inap laikim Jehova olsem dispela Pikinini i save laikim em, em i bin stap wantaim Papa longtaim tru paslain long ol ensel na ol man i kamap. Dispela pasin laikim i kirapim bel bilong Pikinini na em i laik bihainim pasin bilong Papa.​—Jon 14:9.

³ Long sampela sapta paslain long dispela, yumi bin skelim pasin bilong Jisas long bihainim gut stretpela pasin, strong, na savetingting bilong Jehova. Tasol olsem wanem Jisas i bihainim pasin laikim bilong Papa bilong em? Nau yumi ken skelim tripela samting bilong pasin laikim bilong Jisas—pasin bilong em long daunim laik bilong em yet, pasin sori, na redi long lusim rong bilong man.

 4. Olsem wanem Jisas i stap gutpela piksa tru long pasin bilong daunim laik bilong em yet na laikim ol narapela?

⁴ Jisas i stap gutpela piksa tru long kamapim pasin bilong daunim laik bilong em yet na laikim ol narapela. Bilong mekim olsem yumi mas putim ol hevi samting bilong ol narapela i go pas long ol hevi bilong yumi yet. Olsem wanem Jisas i kamapim dispela kain pasin laikim? Em yet i tok: “Sapos man i lusim laip bilong em bilong helpim ol pren bilong em, dispela pasin laikim i bikpela moa winim ol arapela pasin laikim.” (Jon 15:13) Jisas i amamas long givim laip bilong em i gutpela olgeta bilong helpim yumi. Em i nambawan bikpela samting man inap mekim bilong kamapim klia em i laikim tru narapela. Tasol Jisas i kamapim pasin bilong daunim laik bilong em yet na laikim ol narapela long ol narapela rot tu.

 5. Dispela wanpela Pikinini tru bilong God i lusim heven i kam, olsem wanem dispela i soim olsem em i lusim ol gutpela samting bilong em yet?

⁵ Taim dispela wanpela Pikinini tru bilong God i no kam daun yet long graun, em i gat bikpela namba tru long heven. Em i stap klostu long Jehova na planti ensel. Tasol maski em i gat ol dispela gutpela samting, dispela gutpela Pikinini “i lusim olgeta samting em i bin holim na em i kamap olsem wanpela wokboi. Na em i kamap wanpela man bilong graun.” (Filipai 2:7) Em i orait long kam na i stap namel long ol sinman na stap long graun “i stap long han bilong Satan.” (1 Jon 5:19) Pikinini Bilong God i lusim ol gutpela samting bilong em yet, a?

6, 7. (a) Long wanem ol rot Jisas i kamapim pasin bilong daunim laik bilong em yet na laikim ol narapela? (b) Wanem stori i stap long Jon 19:25-27 i soim olsem Jisas i daunim ol laik bilong em yet na laikim ol narapela?

⁶ Taim Jisas i mekim wok bilong em long graun, em i kamapim pasin bilong daunim laik bilong em yet na laikim ol narapela. Em i no tingim em yet liklik. Em i givim bel tru long wok, olsem na em i lusim ol samting bilong skin em ol man i save kisim. Em i tok: “Ol foks i gat hul long graun na ol pisin i gat hap bilong slip, tasol Pikinini bilong man i no gat ples bilong slip.” (Matyu 8:20) Jisas i gat gutpela save long mekim wok kapenta, olsem na em inap lusim sampela haptaim bilong wokim gutpela haus bilong em yet o bilong wokim ol naispela tebol sia samting na salim bilong kisim mani. Tasol em i no yusim save bilong em bilong kisim ol samting bilong skin.

⁷ Wanpela stori i kamapim klia pasin bilong Jisas long daunim laik bilong em yet na laikim ol narapela i stap long Jon 19:25-27. Tingim ol samting i stap long tingting na bel bilong Jisas long dispela apinun em bai i dai long en. Taim em i karim bikpela pen long diwai pos, em i wari long ol aposel, wok autim tok, na moa yet em i tingting long bai em i stap gut long Papa bilong em o nogat na dispela bai mekim wanem long nem bilong Papa. Tru tumas, ol samting bai painim ol manmeri long bihain, dispela i stap long han bilong Jisas! Tasol maski em i gat planti samting bilong tingim, paslain liklik long em i dai, Jisas i tingim tu mama bilong em, Maria, ating long dispela taim man bilong em i bin dai pinis. Jisas i askim aposel Jon long lukautim Maria olsem em i mama tru bilong Jon, na dispela aposel i kisim Maria i go i stap long haus bilong em. Olsem na Jisas i stretim rot na bai i gat wanpela i lukautim mama bilong em long ol samting bilong skin em i nidim na helpim em tu long pas gut wantaim Jehova. Tru tumas, Jisas i kamapim olsem em i laikim tru ol narapela na i no tingim em yet tasol!

 8. Wanem mining bilong tok Grik Baibel i kolim bilong makim pasin sori bilong Jisas?

⁸ Olsem Papa bilong em, Jisas i gat pasin sori. Baibel i tok Jisas i pilim tru hevi bilong ol man na dispela i kirapim em long mekim ol samting bilong helpim ol. Bilong stori long pasin sori bilong Jisas, Baibel i mekim wok long wanpela tok Grik ol i tanim olsem “sori tru.” Wanpela saveman i tok: “Dispela i makim . . . samting man i pilim strong tru long bel bilong em. Em wanpela tok Grik i kamapim klia tru pasin bilong sori.” Tingim sampela samting i bin kamap em Jisas i bel sori tru long en na dispela i kirapim em long mekim sampela samting.

9, 10. (a) Wanem samting i kamap na Jisas na ol aposel i laik go long ples i no gat man? (b) Taim ol man i kam na Jisas i no inap i stap wanpis, em i mekim wanem? Bilong wanem em i mekim olsem?

⁹ Pasin sori i kirapim Jisas long skulim ol man long God. Stori i stap long Mak 6:30-34 i soim wanem samting i kirapim Jisas long sori long ol man. Piksaim long tingting ol samting i kamap. Ol aposel i amamas, long wanem, ol i bin pinisim wanpela bikpela raun bilong wok autim tok. Ol i kam bek long Jisas na ol i amamas long stori long ol samting ol i bin lukim na harim. Tasol bikpela lain manmeri i kam bung na Jisas na ol aposel i no gat taim bilong kaikai. Oltaim Jisas i save luksave long ol samting, na nau tu em i lukim olsem ol aposel i taiet. Em i tokim ol: “Yupela tasol kam wantaim mi long wanpela hap i no gat man na malolo liklik.” Ol i kalap long bot na brukim hap not bilong Raunwara Galili na go long hap i no gat man. Tasol ol manmeri i lukim ol i go. Sampela narapela i harim olsem ol i go. Olgeta dispela man i ran long nambis bilong hap not na ol i kamap long hapsait bilong raunwara paslain long bot i kamap!

¹⁰ Yu ting Jisas i kros long ol man i no larim em i stap wanpis? Nogat tru! Taim em i lukim ol manmeri—ol i planti tausen—i wetim em i stap, em i pilim tru dispela long bel. Mak i tok: “Em i lukim bikpela lain manmeri na em i sori tru long ol, long wanem, ol i olsem sipsip i no gat wasman. Em i kirap skulim ol long planti samting.” Jisas i kliagut olsem dispela olgeta man wan wan ol i mas kisim tok i kam long God bilong stiaim ol. Ol i olsem ol sipsip i paul nabaut, ol i no gat wasman i stiaim o lukautim ol. Jisas i save ol hetman bilong lotu i no gat bel sori ol i givim baksait long ol man nating, maski ol i gat wok long stap olsem ol gutpela wasman. (Jon 7:47-49) Jisas i sori tru long ol man, olsem na em i kirap skulim ol long “Kingdom Bilong God.” (Luk 9:11) Tingim, taim Jisas i no save yet ol man bai ting wanem long tok em i skulim ol long en, em i sori long ol. Olsem na i no olsem em i skulim ol man na long dispela as em i sori long ol, nogat; pasin sori i kirapim em long skulim ol.

11, 12. (a) Long taim bilong ol man i bin raitim Baibel, ol man i ting olsem wanem long ol lepraman? Jisas i mekim wanem taim wanpela man em “sik lepra i pulap tru long bodi bilong em” i kam long em? (b) Taim Jisas i tatsim lepraman, ating dispela i mekim wanem long em? Olsem wanem stori bilong wanpela dokta i kamapim klia dispela samting?

¹¹ Bel i kirapim em long helpim ol man i karim pen na hevi. Ol manmeri i gat kain kain sik i pilim olsem Jisas i gat pasin sori, olsem na ol i laik go long em. Dispela i kamap ples klia taim ol manmeri i bihainim Jisas na wanpela man “em sik lepra i pulap tru long bodi bilong em” i kam long Jisas. (Luk 5:12) Long taim bilong ol man i bin raitim Baibel, ol lepraman i mas i stap longwe long ol narapela man, nogut ol narapela i kisim sik bilong ol. (Namba 5:1-4) Tasol bihain, ol bikman rabai i no sori liklik long ol lepraman na ol i kamapim ol hatpela lo bilong ol yet.a Tasol lukim pasin Jisas i mekim long dispela lepraman: “Wanpela lepraman i kam brukim skru long em na tok: ‘Sapos yu laik, yu inap mekim mi kamap klin.’ Jisas i sori tru long em na i putim han i go na tatsim em na tok: ‘Mi laik! Yu ken kamap klin.’ Na wantu sik lepra i lusim em.” (Mak 1:40-42) Jisas i save lo i tambuim ol lepraman long stap long hap i gat ol man. Tasol em i no tokim dispela man long lusim em, nogat; em i sori tru long em na dispela i kirapim em long mekim wanpela narakain samting. Jisas i tatsim em!

¹² Olsem wanem? Yu inap tingim dispela lepraman i pilim olsem wanem taim Jisas i tatsim em? Tingim stori bilong wanpela dokta. Dokta Paul Brand, em i gat bikpela save long sik lepra, em i stori long wanpela lepraman em i bin helpim long India. Taim em i sekim dispela man, dokta i putim han bilong em long solda bilong lepraman na stori long em—long rot bilong man i tanim tok—long ol marasin samting man i mas kisim. Wantu lepraman i kirap long krai. Dokta i tok: “Olsem wanem? Mi mekim sampela tok i no stret?” Man bilong tanim tok i mekim tokples na askim yangpela man long dispela samting na bihain em i tokim dokta: “Nogat dokta. Em i tok em i krai, long wanem, yu putim han long solda bilong em. Paslain long em i kam long hia, i no gat wanpela man i bin tatsim em inap planti yia.” Dispela lepraman i bin kam long Jisas i pilim amamas taim Jisas i tatsim em. Em i kisim bikpela helpim moa. Taim Jisas i tatsim em, sik bilong em i pinis, em dispela sik we i mekim na em i mas stap longwe long ol man.

13, 14. (a) Jisas i bungim wanem lain taim em i kam klostu long taun Nain? Wanem samting i mekim na yumi sori tru long dispela mama? (b) Pasin sori bilong Jisas i kirapim em long mekim wanem bilong helpim wido meri bilong Nain?

¹³ Bel i kirapim em long daunim bel hevi. Jisas i pilim tru bel hevi bilong ol narapela. Tingim stori i stap long Luk 7:11-15. Em i kamap wan na hap yia bihain long Jisas i kirap mekim wok bilong em, em long taim Jisas i kam klostu long taun Nain bilong Galili. Taim Jisas i kam klostu long banis bilong taun, em i bungim wanpela lain i karim bodi bilong man i dai pinis. I dai bilong dispela man i kamapim bikpela bel hevi tru. Em wanpela yangpela man em mama bilong em wanpela wido na em i no gat narapela pikinini. Ating bipo tu dispela meri i bin wokabaut wantaim lain i karim bodi—bodi bilong man bilong em. Nau pikinini man bilong em i dai, ating dispela wanpela pikinini tasol i bin lukautim mama long ol samting bilong skin. Ating sampela manmeri i wokabaut wantaim em ol i lain bilong singsing sori na bilong pilai musik bilong sori. (Jeremaia 9:17, 18; Matyu 9:23) Tasol Jisas i lukluk long mama i bel hevi tru, ating em i wokabaut klostu long bet we ol i karim bodi bilong pikinini man bilong em.

¹⁴ Jisas “i sori tru long” mama i krai sori. Long gutpela pasin Jisas i tokim em: “No ken krai moa.” Jisas i kam klostu na putim han long bet, maski ol i no askim em long kam. Ol man i karim bet—na ating ol narapela manmeri tu—ol i no wokabaut moa. Long strongpela nek Jisas i tokim bodi i no gat laip long en: “Yangpela man, mi tokim yu, kirap.” Wanem samting i kamap? “Man i dai pinis, em i kirap sindaun na stat long toktok,” kain olsem man i slip i dai na wanpela i kirapim em! Orait nau Baibel i mekim tok yumi pilim tru long bel: “Jisas i givim em bek long mama bilong em.”

15. (a) Olsem wanem ol stori bilong Baibel long Jisas i sori long ol man i soim olsem pasin sori na pasin bilong mekim sampela samting i poroman wantaim? (b) Olsem wanem yumi inap bihainim Jisas long dispela samting?

¹⁵ Ol dispela stori i lainim yumi long wanem samting? Long ol dispela stori pasin sori i poroman wantaim pasin bilong mekim sampela samting. Taim Jisas i lukim hevi bilong ol narapela, em i sori tru long ol, na dispela i kirapim em long mekim sampela samting. Olsem wanem yumi ken bihainim pasin bilong em? Yumi ol Kristen i gat wok long autim gutnius na kamapim ol disaipel. Nambawan samting i kirapim yumi, em pasin bilong laikim tru God. Tasol yumi mas tingim olsem pasin sori tu i kirapim yumi long mekim dispela wok. Taim yumi pilim hevi bilong ol man olsem Jisas i bin pilim, bel bilong yumi bai kirapim yumi long wok strong long autim gutnius long ol. (Matyu 22:37-39) Olsem wanem long pasin bilong sori long ol wanbilip i karim pen o krai sori? Yumi no inap wokim mirakel na oraitim sik o kirapim man i dai pinis. Tasol yumi inap kamapim pasin sori bilong yumi na tokim ol olsem yumi wari long ol o yumi ken mekim sampela samting bilong helpim ol.​—Efesus 4:32.

16. Olsem wanem pasin bilong Jisas long redi long lusim rong i kamap klia taim em i stap long diwai pos?

¹⁶ Jisas i bihainim stret pasin laikim bilong Papa bilong em long wanpela narapela bikpela rot—em i “redi long fogivim ol sin.” (Buk Song 86:5) Em i kamapim dispela pasin taim em i stap long diwai pos. Ol i laik kilim em i dai long pasin i semim em, ol nil i go insait long han na lek bilong em, tasol Jisas i toktok long wanem samting? Yu ting em i singaut long Jehova i mas mekim save long ol man i laik kilim em i dai? Nogat, sampela laspela tok Jisas i mekim i olsem: “Papa, yu ken lusim sin bilong ol. Ol i no save long dispela samting ol i mekim.”​—Luk 23:34.b

17-19. Olsem wanem Jisas i soim olsem em i lusim rong bilong aposel Pita long em i bin tok tripela taim olsem em i no save long Em?

¹⁷ Ating wanpela stori i kamapim gut moa pasin bilong Jisas long lusim rong, em long pasin Jisas i mekim long aposel Pita. Yumi save Pita i laikim tru Jisas. Long Nisan 14, long laspela nait bilong Jisas i stap laip, Pita i tokim em: “Bikpela, mi redi long go wantaim yu long kalabus na mi redi long dai wantaim yu.” Tasol bihain long sampela aua tasol, Pita i tok tripela taim olsem em i no save long Jisas! Baibel i tokim yumi long samting i kamap taim Pita i tok namba tri taim em i no save long Jisas: “Bikpela i tanim na i lukluk long Pita.” Sin bilong Pita i bagarapim tru bel bilong em, na em “i go ausait na krai nogut tru.” Taim Jisas i bin dai long dispela de yet, ating dispela aposel i tingting olsem: ‘Bikpela bilong mi i lusim rong bilong mi o nogat?’​—Luk 22:33, 61, 62.

¹⁸ Pita i no wet longpela taim bilong kisim bekim. God i kirapim bek Jisas long moning bilong Nisan 16, na i luk olsem long dispela de stret Jisas i kamap long Pita. (Luk 24:34; 1 Korin 15:4-8) Bilong wanem Jisas i tingim dispela aposel i bin tok strong olsem em i no save long em? Ating Jisas i laik soim Pita husat i tanim bel pinis, olsem Bikpela bilong em i tingim yet olsem Pita i gutpela samting na em i laikim em tru. Tasol Jisas i mekim sampela samting moa.

¹⁹ Bihain, Jisas i kamap long ol disaipel long Raunwara Galili. Long dispela taim, Jisas i askim Pita inap tripela taim (Pita i bin tok tripela taim em i no save long Bikpela) long pasin bilong Pita long laikim em. Bihain long namba tri taim, Pita i tok: “Bikpela, yu save long olgeta samting, na yu save olsem mi laikim yu tumas.” Tru tumas, Jisas inap lukim bel bilong man, olsem na em i save long pasin bilong Pita long laikim na givim bel long em. Tasol Jisas i opim rot long Pita i ken tokaut long dispela samting. Na tu, Jisas i tokim Pita long givim “kaikai” na “was” long “ol liklik sipsip” bilong Em. (Jon 21:15-17) Pastaim, Pita i bin kisim wok bilong autim tok. (Luk 5:10) Tasol nau Jisas i soim olsem em i bilip long Pita, na em i givim bikpela wok moa long em—wok bilong lukautim ol man i kamap disaipel bilong Krais. Bihain liklik, Jisas i givim bikpela wok long Pita insait long kongrigesen Kristen. (Aposel 2:1-41) Pita i mas amamas tru long save olsem Jisas i bin lusim rong bilong em na i bilip yet long em.

20, 21. Olsem wanem yumi ken ‘kliagut long pasin laikim bilong Krais’?

²⁰ Tru tumas, Tok Bilong Jehova i stori gut long pasin laikim bilong Krais. Tasol pasin laikim bilong Krais i mas kirapim yumi long mekim wanem? Baibel i tokim yumi long “kliagut long dispela pasin laikim bilong Krais i winim olgeta save.” (Efesus 3:19) Olsem yumi bin lukim, ol Gutnius i stori long laip na wok autim tok bilong Jisas i lainim yumi long planti samting bilong pasin laikim bilong Krais. Tasol bilong “kliagut long dispela pasin laikim bilong Krais,” yumi mas save long tok Baibel i mekim long em, na yumi mas mekim sampela samting moa.

²¹ Tok Grik ol i tanim olsem “save gut long” i makim olsem kisim save long “rot bilong mekim ol samting.” Taim yumi kamapim pasin laikim olsem Jisas i bin mekim—yumi no tingim yumi yet na yumi helpim ol narapela, yumi sori long ol na helpim ol, yumi lusim tru rong bilong ol—orait yumi ken save tru long bel na tingting bilong Jisas. Long dispela rot, taim yumi mekim ol samting, yumi bai ‘kliagut long pasin laikim bilong Krais i winim olgeta save.’ Na yumi no ken lusim tingting olsem taim yumi bihainim moa yet pasin bilong Krais, bai yumi go klostu moa long dispela man em Jisas i bihainim stret pasin bilong em, em gutpela God bilong yumi, Jehova.