Jisas i Skulim Ol Man Long God

“I no gat wanpela man i save long Papa. Pikinini tasol wantaim ol man Pikinini i soim Papa long ol, ol tasol i save long Papa.”​​—LUK 10:22.

PASLAIN long dispela namba wan Pikinini Bilong God i kam long graun, em i bin i stap longpela taim tru wantaim Papa bilong em. (Kolosi 1:​15) Olsem na Pikinini i save gut long tingting, filings, na ol pasin bilong Papa. Bihain, taim dispela Pikinini i kam long graun na kamap dispela man, Jisas, em i laik tru long helpim ol man long kisim stretpela save long Papa bilong em. Yumi inap kisim planti save long God taim yumi putim yau long ol tok dispela Pikinini i mekim.

Nem bilong God Nem bilong God, Jehova, em i bikpela samting tru long Jisas. Dispela gutpela Pikinini i laik bai ol arapela tu i save long nem bilong Papa bilong em, na yusim dispela nem. Mining bilong nem bilong Jisas em, “Jehova i Save Kisim Bek Ol Man.” Long nait paslain long em i dai, Jisas i beten long Jehova na i tok: “Mi bin kamapim nem bilong yu long ol.” (Jon 17:26) Yumi no kirap nogut olsem Jisas i bin yusim nem bilong God na em i kamapim dispela nem long ol arapela manmeri tu. Ol man husat i harim tok bilong Jisas ol i mas save long nem bilong Jehova na mining bilong en bambai ol inap kliagut long Jehova i wanem kain man.a

Bikpela pasin laikim bilong God Wanpela taim Jisas i beten long God na i tok: “Papa, . . . taim graun i no kamap yet, yu laikim mi.” (Jon 17:24) Jisas i bin pilim pasin laikim bilong Jehova taim em i stap long heven, olsem na taim em i kam long graun, em i painim rot long kamapim klia dispela gutpela pasin.

Jisas i soim olsem Jehova i laikim olgeta manmeri bilong graun. Jisas i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:​16) Tru tumas, God i laikim olgeta manmeri bilong graun, olsem na em i givim gutpela Pikinini bilong em bambai ol gutpela manmeri inap lusim kalabus bilong sin na dai na kisim laip oltaim. Yumi no inap kliagut olgeta long dispela bikpela pasin laikim.​​—Rom 8:​38, 39.

Jisas i strongim wanpela tok bilong mekim gut bel bilong yumi, olsem: Jehova i laikim tumas olgeta wan wan manmeri husat i lotuim em. Jisas i skulim ol man olsem Jehova i olsem wanpela wasman i save tingim tru olgeta wan wan sipsip bilong em na ol i dia tumas long ai bilong em. (Matyu 18:​12-​14) Jisas i tok olsem Jehova i save long olgeta liklik pisin i pundaun long graun. Jisas i tok moa: “God i kaunim pinis olgeta gras long het bilong yupela.” (Matyu 10:​29-​31) Jehova i save taim wanpela liklik pisin i lus long haus bilong en, olsem na yumi save olsem em i save gut long olgeta man husat i lotuim em na em i tingim tru ol. Jehova i lukim na kaunim pinis olgeta wan wan gras long het bilong yumi, olsem na yu ting em i no save long wanpela samting long i stap bilong yumi​—ol samting yumi sot long en, ol samting i givim hevi long yumi, na ol samting yumi tingting planti long en? Nogat tru!

Papa long heven Olsem yumi skelim pinis long stori i kamap paslain long dispela, Jisas em i dispela wanpela Pikinini Bilong God em God i laikim tumas. Olsem na yumi no kirap nogut olsem planti taim dispela Pikinini i save kolim Jehova olsem “Papa.” Long namba wan tok bilong Jisas em Baibel i kolim, em ol tok em i bin mekim long tempel taim em i gat 12-pela krismas, em i kolim Jehova olsem “Papa bilong mi.” (Luk 2:49) Dispela tok “Papa” i kamap planti taim insait long ol Gutnius, inap olsem 200 taim. Jisas i bin kolim Jehova olsem “Papa bilong yupela,” “Papa bilong mipela,” na “Papa bilong mi.” (Matyu 5:​16; 6:9; 7:​21) Jisas i no surik long yusim dispela biknem, na dispela i kamapim klia olsem ol sinman i gat rot long pas gut wantaim Jehova.

Marimari na redi long lusim rong Jisas i save olsem i gat wok long Jehova i mas marimari long ol sinman. Long tok piksa bilong pikinini i bin lusim papa, Jisas i stori long Jehova olsem wanpela papa husat i gat pasin bilong sori na lusim rong, na em i redi long kisim bek pikinini i tanim bel. (Luk 15:​11-​32) Jisas i strongim bel bilong yumi olsem: Taim man i mekim rong, Jehova i save painimaut sapos dispela man i sori long rong bilong em, na dispela i save opim rot long Jehova i ken marimari long em. Jehova i laik tru long lusim rong bilong man husat i sori long rong em i bin mekim. Jisas i tok: “Mi tok stret long yupela, wankain amamas i save kamap long heven taim wanpela man bilong mekim sin i tanim bel. Tru, ol i save amamas long 99 man i stretpela pinis na i no gat wok long tanim bel. Tasol sapos wanpela man bilong mekim sin em i tanim bel, orait ol i save amamas moa moa yet.” (Luk 15:7) Husat bai i no laik pas gut wantaim God bilong pasin marimari? I no gat wanpela, a?

Man bilong harim beten Taim Jisas i stap yet long heven paslain long em i kam long graun, em i luksave olsem Jehova em i Man bilong “harim beten,” na em i save amamas tru long harim beten bilong ol man i stap gut long lotuim em. (Song 65:2) Olsem na taim Jisas i mekim wok autim tok, em i skulim ol man long pasin bilong beten na wanem ol samting ol i ken beten long en. Em i tok: “Maski long mekim planti toktok nating.” Em i tokim ol manmeri long beten long “laik bilong [God] i mas kamap long graun olsem i wok long kamap long heven.” Na tu, yumi ken beten long kisim kaikai samting bilong olgeta wan wan de, na askim God long lusim rong bilong yumi, na helpim yumi long sakim ol traim. (Matyu 6:​5-​13; NW) Jisas i skulim ol man olsem Jehova i save mekim pasin olsem papa na em i save putim gut yau taim ol wokman bilong em ol i bilip na beten askim em long sampela samting.​​—Matyu 7:​7-​11.

Jisas i laik tru long skulim ol man long Jehova em i wanem kain God. Tasol i gat narapela samting moa long Jehova em Jisas i laik tru long tokim ol man long en​​—em rot bilong Jehova long kamapim ol senis long olgeta hap bilong graun bambai em i ken kamapim samting em i tingting pinis long mekim long dispela graun na long ol lain man i stap long en. Dispela tok i olsem as tok bilong wok autim tok em Jisas i bin mekim.

[Futnot]