I Gat Wanpela Rot Tasol i Go Long Laip Oltaim
“Mi yet mi rot, na mi as bilong tok tru, na mi as bilong laip.”—JON 14:6.
1, 2. Jisas i tok dispela rot i go long laip oltaim em i olsem wanem samting? Wanem insait bilong dispela tok piksa?
LONG bikpela tok bilong em antap long maunten, Jisas i makim olsem rot i go long laip i stap oltaim em wanpela rot i gat dua bilong en, na yumi mas i go insait long en bilong kamap long dispela rot. Na Jisas i tok, rot i go long laip i gat hatwok long wokabaut long en. Em i tok: “Yupela i mas i go insait long liklik dua. Dua i go long ples bilong lus, em i bikpela, na rot i go long dispela ples em i op tumas na em i isi long bihainim. Na planti manmeri i save bihainim dispela rot. Tasol dua i go long ples bilong kisim laip [oltaim], em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.”—Matyu 7:13, 14.
2 Yu kisim gut as bilong dispela tok piksa? Em i kamapim klia olsem i gat wanpela rot tasol i bringim man i go long laip, na yumi mas was gut na wokabaut gut long en na bai yumi no ken lusim dispela rot i go long laip. Orait, wanem dispela wanpela rot tasol i go long laip oltaim?
Jisas i Gat Bikpela Wok
3, 4. (a) Olsem wanem Baibel i makim olsem Jisas i gat bikpela wok tru bilong kisim bek yumi? (b) Wanem namba wan taim God i tokaut olsem ol man inap kisim laip i stap oltaim?
3 Yumi save, Jisas i gat bikpela wok tru long dispela rot, olsem aposel Pita i tok: “I no gat narapela man i inap kisim bek yumi. Nogat. Long nem bilong Jisas wanpela tasol yumi olgeta manmeri bilong graun inap i stap gut. Em wanpela tasol God i bin makim bilong kisim bek yumi.” (Aposel 4:12) Na aposel Pol i tok: “God i save givim nating presen long yumi, em laip i stap oltaim. Dispela laip yumi kisim long wok bilong Jisas Krais, Bikpela bilong yumi.” (Rom 6:23) Jisas yet i bin kamapim olsem em yet em dispela wanpela rot tasol bilong kisim laip oltaim. Em i tok: “Mi yet mi rot, na mi as bilong tok tru, na mi as bilong laip.”—Jon 14:6.
4 Olsem na em i bikpela samting long yumi bilip long dispela wok Jisas i mekim bilong helpim yumi long kisim laip i stap oltaim. Orait nau yumi ken skelim gut dispela wok bilong Jisas. Olsem wanem? Bihain long taim Adam i bin mekim sin, wanem namba wan taim God Jehova i bin tokaut olsem ol man inap kisim bek laip i stap oltaim? God i bin mekim olsem bihain stret long taim Adam i bin mekim sin. Orait nau yumi ken skelim olsem wanem God i bin tokaut long dispela wok bilong Krais Jisas olsem Man bilong kisim bek yumi.
Pikinini God i Bin Tok Promis Long En
5. Olsem wanem yumi ken save husat dispela snek i bin pulim Iv?
5 God Jehova i bin mekim tok piksa na em i tokaut long dispela Man bilong kisim bek yumi, em i tok promis long salim i kam. Em i mekim olsem taim em i kolim strafe bilong “snek,” em i bin toktok long Iv na grisim em long sakim tok bilong God na kaikai dispela pikinini bilong diwai tambu. (Stat 3:1-5) Yumi save, dispela snek em i no wanpela snek tru. Em i wanpela strongpela ensel na Baibel i tok em i “dispela snek bilong bipo yet, na ol i kolim em Satan.” (KTH 12:9) Satan i bin mekim wok long wanpela animal nating olsem maus bilong em bambai em i ken pulim Iv. Olsem na taim God i kolim strafe bilong Satan, em i tok: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [olsem pikinini] bilong meri. Bai [em, olsem pikinini bilong meri] i krungutim het bilong yu, na bai yu kaikaim lek bilong [em].”—Stat 3:15.
6, 7. (a) Husat dispela meri em i kamapim pikinini? (b) Husat dispela Pikinini bilong meri? Em bai mekim wanem samting?
6 Husat dispela “meri” em Satan i birua long en? Dispela “snek bilong bipo yet” em i kamap ples klia long Kamapim Tok Hait sapta 12, na olsem tasol dispela sapta i kamapim long ples klia dispela meri em Satan i birua long en. Ves 1 i tok, dispela meri i “pasim san olsem klos bilong en. Na mun i stap aninit long lek bilong en, na 12-pela sta i stap olsem hat long het bilong en.” Dispela meri i makim oganaisesen bilong God long heven, em ol gutpela ensel bilong em, na dispela “pikinini man” i makim Kingdom bilong God, em Krais Jisas i stap King bilong en.—KTH 12:1-5.
7 Orait husat dispela pikinini bilong meri, em Stat 3:15 i stori long en na em bai krungutim “het” bilong Satan, olsem kilim em i dai? Em dispela man God i bin salim em i kam long graun na wanpela meri i no bin slip yet wantaim man, em i karim em long rot bilong wanpela mirakel—em dispela man Jisas. (Matyu 1:18-23; Jon 6:38) Sapta 12 bilong Kamapim Tok Hait i kamapim klia olsem dispela Pikinini, Krais Jisas, em i bin kirap bek na em i stap King long heven, em bai go pas long daunim Satan, na olsem Kamapim Tok Hait 12:10 i tok, bai ‘strong bilong em i kamap long ples klia, na em i stap king’ long Kingdom bilong God.
8. (a) God i kamapim wanem nupela samting bilong kamapim laik bilong em bilong pastaim? (b) Husat i kamap olsem nupela gavman bilong God?
8 Dispela Kingdom i stap long han bilong Krais Jisas, em dispela nupela samting God i bin putim bilong kamapim laik bilong em bilong pastaim, em i laik bai ol man i ken i stap oltaim long graun. Taim Satan i bikhet, wantu tasol Jehova i wokim rot bilong stretim olgeta hevi em pasin nogut i bin kamapim, na em i laik mekim long rot bilong dispela nupela Kingdom, olsem gavman. Taim Jisas i stap long graun em i kamapim klia olsem i no em wanpela tasol bai stap king long dispela Kingdom. (Luk 22:28-30) God bai makim sampela moa namel long ol manmeri bilong graun, na ol bai i bung wantaim em long heven bilong mekim wok king wantaim em, na long dispela rot ol i kamap olsem ol nambatu pikinini bilong dispela meri. (Galesia 3:16, 29) Baibel i kolim namba bilong dispela lain em ol bai stap king wantaim Jisas—em God i bin kisim olgeta namel long ol sinman bilong graun—namba bilong dispela lain em 144,000.—KTH 14:1-3.
9. (a) Bilong wanem Jisas i mas kam long graun olsem wanpela man? (b) Olsem wanem Jisas i bagarapim na rausim wok bilong Satan?
9 Tasol i gat wanpela samting i mas kamap pastaim na bihain dispela Kingdom i ken kirap mekim wok. Em olsem: Namba wan Pikinini bilong dispela meri, em Krais Jisas, em i mas kamap long graun. Bilong wanem? Long wanem, God Jehova i bin makim em olsem dispela Man “bilong bagarapim na rausim wok bilong Satan.” (1 Jon 3:8) Na wanpela wok bilong Satan, em i bin kirapim Adam long mekim sin, na dispela i mekim na sin na i dai i kisim olgeta pikinini bilong Adam. (Rom 5:12) Jisas i bin bagarapim na rausim ol wok bilong Satan taim Em i givim laip bilong em olsem pe bilong baim bek ol man. Olsem na em i wokim rot bambai ol man i ken lusim kalabus bilong sin na dai, na em i opim rot bilong ol i ken kisim laip i stap oltaim.—Matyu 20:28; Rom 3:24; Efesus 1:7.
Ofa Bilong Krais i Mekim Wanem Wok
10. Olsem wanem Jisas na Adam i klostu wankain?
10 God i bin kisim laip bilong Jisas long heven na putim insait long bel bilong wanpela meri bilong graun bambai em i ken kamap wanpela man i gutpela olgeta, em i no bin kisim sin long Adam. Olsem na em inap long i stap oltaim long graun. Na Adam tu, God i bin wokim em olsem wanpela man i gutpela olgeta na em i gat rot long i stap oltaim long graun. Aposel Pol i tingting long dispela samting taim em i raitim tok olsem: “ ‘Namba wan man, Adam, i bin kisim laip.’ Tasol narapela Adam i kamap bihain tru [Krais Jisas], em i bin kamap spirit bilong givim laip long man. Namba wan Adam em i bilong graun. God i bin wokim em long graun tasol. Namba 2 Adam em i bilong heven.”—1 Korin 15:45, 47.
11. (a) Samting Adam na Jisas i mekim, dispela i mekim wanem long ol manmeri? (b) Yumi mas ting olsem wanem long ofa bilong Jisas?
11 Tupela man i klostu wankain—em dispela tupela man tasol i bin stap long graun olsem man i gutpela olgeta—na tok bilong Baibel i kamapim long ples klia dispela samting, em i tok Jisas i bin “givim laip bilong em yet [olsem pe i wankain stret] bilong baim bek olgeta manmeri.” (1 Timoti 2:6) Jisas i wankain stret long husat? Long Adam taim em i stap yet olsem man i gutpela olgeta! Sin bilong namba wan Adam i mekim na olgeta man bilong graun i mas i dai. Orait ofa bilong dispela “Adam i kamap bihain tru,” em i wokim rot bambai yumi ken lusim kalabus bilong sin na dai, na bai yumi ken i stap oltaim oltaim! Tru tumas, dispela ofa bilong Jisas em i gutpela samting tru! Aposel Pita i tok: “God . . . i no givim ol samting bilong graun i save bagarap, olsem silva na gol, bilong baim bek yupela. Nogat.” Pita i tok: “Em i baim bek yupela long blut bilong Krais. Dispela blut em i dia tumas. Krais em i olsem wanpela pikinini sipsip i no gat mak o sua samting i bagarapim skin bilong en.”—1 Pita 1:18, 19.
12. Baibel i stori olsem wanem long ol samting God i bin mekim bilong rausim dispela sin i bin kisim olgeta manmeri bilong graun na ol i mas i dai?
12 Baibel i kamapim ol gutpela tok i stori long olsem wanem God bai rausim dispela sin i bin kisim olgeta manmeri bilong graun na ol i mas i dai. Em i tok: “Wanpela man [Adam] i bin kalapim lo, na long dispela sin God i kotim yumi olgeta manmeri. Olsem tasol, wanpela man [Jisas] i mekim stretpela pasin [olsem Jisas i bihainim rot bilong i stap gut long God i go inap long taim em i dai], na God i ting long dispela na i kolim yumi olgeta stretpela man, na yumi stap laip. Wanpela man [Adam] i bin sakim tok, na long dispela pasin bilong em planti manmeri i kamap manmeri bilong mekim sin. Olsem tasol, wanpela man [Jisas] i bihainim tok, na long dispela pasin bilong em planti manmeri bai i kamap stretpela manmeri.”—Rom 5:18, 19.
Gutpela Samting Tru Bai Kamap
13. Bilong wanem planti manmeri i tok ol i no laik i stap oltaim oltaim?
13 Yumi mas amamas tru long God i bin wokim rot bilong helpim yumi! Olsem wanem long yu? Yu amamas tru long God i bin givim wanpela Man bilong kisim bek yumi? “Yu amamas olsem yu gat rot long i stap oltaim oltaim?” Wanpela lain i bin givim dispela laspela askim long sampela manmeri, na bekim bilong ol i kamap long nius bilong wanpela biktaun bilong Yunaitet Stets. Ating bai yu kirap nogut long save, planti bilong ol, inap 67.4 pesen, ol i tok, “Nogat.” Bilong wanem ol i tok ol i no laik i stap oltaim oltaim? Ating ol i tingim i stap bilong ol long graun long nau i gat planti planti hevi tumas long en. Wanpela meri i tok: “Bai mi no amamas long lukim skin bilong mi olsem meri i gat 200 krismas.”
14. Bilong wanem ol man bai i amamas tru long i stap oltaim?
14 Tasol Baibel i no toktok long ol man bai stap oltaim na sik bai wok yet long painim ol, na ol bai go lapun, na ol narapela hevi bai painim ol, nogat. Long wanem, Jisas, em King bilong Kingdom bilong God, em bai pinisim ol dispela kain hevi em Satan i bin kamapim. Baibel i tok, Kingdom bilong God ‘bai i daunim na bagarapim’ olgeta gavman bilong dispela graun i save mekim nogut long ol man. (Daniel 2:44) Long dispela taim, God bai mekim ol samting i stret wantaim dispela beten Jisas i bin skulim ol disaipel long en—em bai kamapim “laik” bilong em long graun olsem i stap long heven. (Matyu 6:9, 10) Long nupela taim God bai kamapim, taim olgeta pasin nogut i pinis long graun, Jisas bai mekim wok long dispela ofa bilong em bilong helpim ol man. Em nau, olgeta man i winim mak, bai skin bilong ol i kamap gutpela olgeta!
15, 16. Long nupela taim God bai kamapim, ol samting bai stap olsem wanem?
15 Ol man i stap long nupela taim God bai kamapim, wanpela tok bilong Baibel bai kamap tru long ol, olsem: “Bodi bilong dispela man bai i kamap gutpela na strongpela gen, wankain olsem em i bin i stap long taim em i yangpela man.” (Jop 33:25) Narapela tok promis long Baibel em tu bai kamap tru, olsem: “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.”—Aisaia 35:5, 6.
16 Man! Tingim dispela samting: Maski yumi gat hamas krismas—yumi gat 80, o 800, o planti krismas moa—skin bilong yumi bai stap gutpela tru, no gat liklik sik long en! Ol samting bai stap olsem Baibel i tok promis long en, olsem: “I no gat man . . . bai i tok olsem, ‘Mi gat sik.’ ” Long dispela taim, dispela tok promis tu bai kamap tru: “[God] bai i mekim drai wara i stap long ai bilong . . . ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—Aisaia 33:24; KTH 21:3, 4.
17. Long nupela taim God bai kamapim, yumi ken ting ol man bai kamapim wanem ol gutpela wok?
17 Long dispela nupela taim, bai yumi inap mekim wok long dispela gutpela kru bilong yumi long pasin God i laikim; em i bin wokim kru bilong yumi bambai yumi inap kisim save i go i go, i no gat pinis bilong en. Em nau, tingim ol gutpela gutpela wok yumi inap mekim! Ol man bilong nau ol i no gutpela olgeta, tasol yumi ken lukim ol samting ol i bin wokim long olkain samting i stap long graun—olsem ol telefon i wok long bateri samting, maikrofon, hanwas, kompyuta, balus, na planti samting moa. Ol man i no kisim ol samting long ples antap olsem long ol sta samting na ol i wokim ol dispela samting, nogat. Orait taim yumi gat rot long i stap oltaim long Paradais bai kamap long graun, bai yumi inap wokim ol kain kain samting moa yet, i no gat pinis bilong en!—Aisaia 65:21-25.
18. Bilong wanem bai yumi no les liklik long i stap bilong yumi long nupela taim God bai kamapim?
18 Na bai yumi no les liklik long i stap bilong yumi. Nau tu yumi save amamas long wetim taim bilong kaikai, maski yumi bin kaikai inap planti tausen taim pinis! Orait taim yumi kamap gutpela olgeta, bai yumi amamas moa yet long kisim ol kaikai i swit tru, em ol bai kamap long Paradais long graun. (Aisaia 25:6) Na long olgeta taim bai yumi kisim amamas long lukautim ol planti animal samting bilong graun, na amamas long lukim ol gutpela gutpela kala i save kamap long skai taim san i laik go daun, na lukim ol maunten, na wara, na ol gutpela ples daun. Tru tumas, bai yumi no les liklik long i stap bilong yumi long nupela taim God bai kamapim!—Song 145:16.
God i Laik Yumi Mas Mekim Wanem
19. Bilong wanem i stret yumi ken ting olsem yumi mas mekim sampela samting bilong kisim laip oltaim?
19 Yu ting God bai givim dispela gutpela presen tru long yu olsem laip oltaim long Paradais, na yu no gat wok long mekim wanpela samting bilong kisim? Yumi save, God i laik bai yumi mas mekim sampela samting, a? Em i no save givim nating dispela presen long yumi. Presen i stap long han bilong em na em i laik givim long yumi, tasol yumi yet i mas putim han i go na kisim. Em nau, yumi mas mekim sampela samting. Olsem na ating bai yu mekim wankain askim olsem yangpela maniman i bin givim long Jisas: “Mi mas mekim wanem gutpela pasin na bai mi kisim laip i stap gut oltaim oltaim?” O ating bai yu mekim askim olsem wanpela wasman bilong kalabus long Filipai i bin mekim long aposel Pol, olsem: “Mi mas mekim wanem samting na bai God i kisim bek mi?”—Matyu 19:16; Aposel 16:30.
20. Wanem wanpela bikpela samting yumi mas mekim bilong kisim laip i stap oltaim?
20 Long nait paslain long taim Jisas i dai, em i beten long Papa bilong em, na long dispela beten em i kolim wanpela samting yumi mas mekim. Jisas i beten olsem: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) I stret yumi mas save long Jehova, long wanem, em yet i bin wokim rot bilong yumi ken kisim laip i stap oltaim, na i stret yumi mas save long dispela man em i bin i dai bilong helpim yumi, em Krais Jisas. Tru, yu mas kisim dispela save, tasol i gat narapela samting tu yu mas mekim.
21. Olsem wanem yumi inap kamapim klia olsem yumi bilip tru?
21 Baibel i tok: “Man i bilip long Pikinini, em i gat laip i stap gut oltaim oltaim.” Na em i tok moa olsem: “Man i no bihainim tok bilong Pikinini, em bai i no inap kisim laip. Nogat. Belhat bilong God i stap long em.” (Jon 3:36) Yu inap kamapim klia olsem yu bilip long Pikinini taim yu senisim pasin bilong yu na bihainim laik bilong God. Yu mas givim baksait long rot i no stret yu bin bihainim, na nau yu mas kirap long mekim ol samting em God i laikim. Yu mas mekim ol samting aposel Pita i tok long mekim, olsem: “Yupela i mas senisim tingting nogut bilong yupela, na tanim bel, na bai God i rausim ol sin bilong yupela.”—Aposel 3:19.
22. Yumi mas mekim wanem ol samting bilong bihainim pasin bilong Jisas?
22 Yumi no ken lusim tingting olsem: Yumi mas bilip long Jisas bambai yumi inap kisim laip i stap gut oltaim. (Jon 6:40; 14:6) Yumi kamapim klia olsem yumi bilip long Jisas taim yumi ‘bihainim pasin bilong em.’ (1 Pita 2:21) Yumi mas mekim wanem bilong mekim olsem? Taim Jisas i beten long God, em i tokaut olsem: “God, . . . mi kam pinis bilong bihainim laik bilong yu.” (Hibru 10:7) Em i bikpela samting tru long yu mas bihainim pasin bilong Jisas na mekim laik bilong God na givim laip bilong yu long Jehova, olsem dediket long em. Orait bihain, yu mas kisim baptais long wara bilong makim olsem yu dediket pinis. Jisas tu i bin kisim baptais. (Luk 3:21, 22) Em nau, i stret tru yumi mekim ol dispela samting. Aposel Pol i bin tok: “Krais i bin givim bel bilong en long mipela, na dispela i save kirapim mipela long wok.” (2 Korin 5:14, 15) Em i kirapim yumi olsem wanem? Pasin sori i bin kirapim Jisas long givim laip bilong em bilong baim bek yumi. Olsem wanem? Yu ting dispela i mas kirapim yumi na yumi bilip long em? Tru tumas, em i mas kirapim yumi long bihainim gutpela pasin bilong em long givim em yet bilong helpim ol narapela. Krais i bihainim laik bilong God; yumi mas mekim wankain pasin, yumi no ken bihainim moa laik bilong yumi yet.
23. (a) Ol man bilong kisim laip oltaim ol i mas kam insait long wanem lain? (b) Ol manmeri insait long kongrigesen Kristen i mas mekim wanem?
23 Tasol i no dispela samting tasol yumi mas mekim, nogat. Taim 3,000 manmeri i kisim baptais long de Pentikos bilong yia 33 C.E., Baibel i tok, ol i “kam insait.” Ol i kam insait long wanem samting tru? Luk i tok: “Ol manmeri i strong long harim tok bilong ol aposel, na long helpim ol brata.” (Aposel 2:41, 42) Em nau, ol i bung wantaim bilong stadi long Baibel na bilong poroman wantaim, olsem na ol i kam insait long kongrigesen Kristen. Ol Kristen bilong bipo ol i bin go long ol miting Kristen bilong skul gut long ol samting bilong spirit. (Hibru 10:25) Ol Witnes Bilong Jehova long nau i save bihainim dispela pasin, na ol i laik kirapim yu long bung wantaim ol long ol dispela miting.
24. “Dispela laip em i laip tru” em i wanem samting? Em bai kamap olsem wanem? Em bai kamap long wanem taim?
24 Long nau planti milion manmeri ol i wokabaut long dispela liklik rot i go long laip. Yumi mas taitim bun tru bilong i stap long dispela liklik rot! (Matyu 7:13, 14) Pol i makim olsem taim em i givim gutpela tok long yumi, olsem: “Man i bilip long Krais, em i olsem man i ran long resis. Olsem na yu mas ran strong long dispela gutpela resis na bai yu kisim laip i stap gut oltaim oltaim.” Bilong “kisim dispela laip em i laip tru,” yumi mas taitim bun tru. (1 Timoti 6:12, 19) Dispela laip tru, em i no dispela laip nau yumi stap long en, i gat planti pen na hevi em sin bilong Adam i bin kamapim long skin bilong yumi. Em laip long nupela taim God bai kamapim, em klostu nau bai kamap taim Krais i mekim wok long ofa bilong em bilong helpim olgeta man i laikim tumas God Jehova na Pikinini bilong em—em bihain long taim Jehova i pinisim pasin nogut bilong dispela graun. I gutpela tru sapos yumi olgeta i ken insait long dispela lain i laik kisim laip—“em i laip tru”—olsem laip oltaim long dispela gutpela nupela taim God bai kamapim.
Bai Yu Bekim Olsem Wanem?
◻ Long Stat 3:15, snek, na meri, na pikinini bilong meri, ol i makim husat?
◻ Olsem wanem Jisas i wankain stret olsem Adam? Ofa bilong Jisas i opim rot long wanem samting?
◻ Yu inap wetim wanem gutpela samting na bai yu ken stap amamas tru long nupela taim God bai kamapim?
◻ Yumi mas mekim wanem bambai yumi inap stap long nupela taim God bai kamapim?
[Piksa long pes 10]
Ol yangpela na ol lapun i ken kisim laip oltaim long rot bilong Jisas tasol
[Piksa long pes 11]
Long taim God i makim, ol lapun bai kamap yangpela gen