Ol Bikpela Tok Profet i Makim Krais

“Wok bilong tokaut long Jisas em i as bilong autim ol tok profet.”​—KTH 19:​10, NW.

1, 2. (a) Kirap long 29 C.E., ol Israel i mas tingim wanem bikpela samting? (b) Long dispela stadi, bai yumi toktok long wanem samting?

EM YIA 29 C.E. Planti Israel i toktok long dispela Mesaia God i bin promis long salim i kam. Wok bilong Jon Bilong Baptais long autim tok i kirapim ol man long tingting strong moa yet long Mesaia. (Luk 3:15) Jon i tok em i no Krais. Em i makim Jisas bilong Nasaret na em i tok: “Mi autim tok pinis olsem, dispela em i Pikinini Bilong God.” (Jon 1:​20, 34) I no longtaim na ol bikpela lain tru i bihainim Jisas bambai ol i ken harim ol tok bilong em na em i ken oraitim sik bilong ol.

² Insait long ol mun i kamap bihain, Jehova i kamapim planti samting tru i tokaut long Pikinini bilong em. Ol man husat i bin stadi gut long Buk Bilong God na i lukim ol wok Jisas i mekim, i gat as tru na ol inap bilip long em. Tasol dispela lain God i bin mekim kontrak wantaim ol, planti ol i no bilip. Wan wan tasol i tokaut olsem Jisas em i Krais, em Pikinini Bilong God. (Jon 6:​60-69) Sapos yu bin i stap long dispela taim, bai yu mekim wanem? Ol samting yu bin lukim bai kirapim yu long bilip olsem Jisas em i Mesaia na yu kamap disaipel bilong em na stap gut long em? Tingim ol tok Jisas yet i mekim i soim klia em i husat taim ol i sutim tok long em olsem em i kalapim lo bilong Sabat, na tingim ol tok em i mekim bilong kamapim klia olsem em i Mesaia bambai em i ken strongim bilip bilong ol disaipel i stap gut long em.

Jisas Yet i Tokaut

 3. Wanem samting i kamap na Jisas i mas kamapim sampela tok i makim olsem em i husat tru?

³ Em taim bilong Pasova long 31 C.E. Jisas i stap long Jerusalem. Nau tasol em i bin oraitim wanpela man i gat sik inap 38 yia pinis. Tasol ol Juda i mekim nogut long Jisas, long wanem, em i bin mekim long de Sabat. Na ol i sutim tok long em olsem em i tok bilas long God, na ol i painim rot bilong kilim em i dai, long wanem, em i kolim God olsem Papa bilong em. (Jon 5:​1-9, 16-18) Bilong bekim tok long ol, Jisas i kamapim 3-pela tok i gat bikpela strong, em inap mekim na ol Juda i gat stretpela bel ol bai bilip strong long Jisas em i husat tru.

4, 5. Wanem as na Jon i mekim wok bilong autim tok? Em inapim tru dispela wok o olsem wanem?

⁴ Namba wan, em Jisas i tokim ol long tokaut bilong man i go pas long em, em Jon Bilong Baptais. Jisas i tok: “Yupela i bin salim ol man i go long Jon bilong kisim tok bilong en. . . . Jon i bin tokaut long tok i tru. Jon em i bin i stap olsem lam i lait na i givim lait long ol man. Na long sotpela taim bel bilong yupela i bin amamas long lait bilong em.”​—Jon 5:​33, 35.

⁵ Jon Bilong Baptais i olsem “lam i lait na i givim lait long ol man,” long wanem, paslain long Herot i putim em long kalabus, em i bin inapim tru wok God i bin givim long em bilong redim rot bilong Mesaia. Jon i tok: “Mi kam baptaisim ol man long wara bai ol manmeri bilong Israel i ken save long [Mesaia]. . . . Mi lukim pinis Holi Spirit i lusim heven na i kam daun olsem . . . pisin ol i kolim balus, na em i go i stap antap long em. Mi yet mi no bin save long em. Tasol God i bin salim mi na mi kam bilong baptaisim ol manmeri long wara, bipo em i bin tokim mi olsem, ‘Taim yu lukim Holi Spirit i kam daun na i stap long wanpela man, orait em dispela man tasol i kam bilong baptaisim ol manmeri long Holi Spirit.’ Na mi yet mi lukim na mi autim tok pinis olsem, dispela em i Pikinini Bilong God.”a (Jon 1:​26-37) Jon i tokaut stret olsem Jisas em i Pikinini Bilong God​—em Mesaia God i bin promis long salim i kam. Dispela tok Jon i autim i klia tumas, so inap 8-pela mun samting bihain long taim em i dai, planti Juda i gat stretpela bel ol i tokaut olsem: “Olgeta tok Jon i bin mekim long dispela man em i tru tasol.”​—Jon 10:​41, 42.

 6. I gat wanem as na ol wok bilong Jisas i mas kirapim ol man long bilip olsem God i helpim em?

⁶ Orait nau Jisas mekim narapela tok bilong strongim ol mak olsem em i Mesaia tru. Em i tokaut long ol gutpela wok em i bin mekim na i kamapim klia olsem God i helpim em. Em i tok: “Samting i winim Jon, em i tokaut long mi nau. Em dispela olgeta wok Papa i bin givim long mi bilong mekim na pinisim. Ol dispela wok mi save mekim i tokaut gut long ol manmeri olsem, Papa i bin salim mi na mi kam.” (Jon 5:36) Ol birua bilong Jisas tu ol i no inap sakim dispela mak wantaim ol planti mirakel em i bin wokim. Bihain sampela i askim olsem: “Bai yumi mekim wanem? Dispela man i save wokim planti mirakel.” (Jon 11:47) Tasol sampela i bilip na ol i tok: “Taim dispela man God i bin promis long salim i kam, em i kamap, ating em bai i wokim planti mirakel i winim ol mirakel dispela man hia i wokim?” (Jon 7:31) Ol manmeri i stap na harim tok bilong Jisas ol inap tru long lukim ol gutpela pasin bilong Papa i stap long Pikinini bilong em.​—Jon 14:9.

 7. Olsem wanem Ol Skripsa Hibru i tokaut long Jisas?

⁷ Orait bihain Jisas i kamapim wanpela strongpela samting tru i tokaut long em. Em i tok: “Buk bilong God . . . i save tokaut long mi,” na em i tok moa: “Sapos yupela i bilipim tok bilong Moses, orait bai yupela i bilipim tok bilong mi tu, long wanem, ol tok em i bin raitim i tokaut long mi.” (Jon 5:​39, 46) Yumi save, Moses wantaim planti arapela witnes paslain long taim bilong ol Kristen ol i bin raitim ol tok i tokaut long Krais. Na ol i bin raitim planti handet tok profet na nem bilong ol lain tumbuna, ol dispela samting i helpim ol man long luksave long Mesaia. (Luk 3:​23-38; 24:​44-46; Aposel 10:43) Na olsem wanem long Lo Bilong Moses? Aposel Pol i tok: “Lo i stap olsem waspapa bilong yumi, bilong bringim yumi i kam long Krais.” (Galesia 3:24) Tru tumas, “wok bilong tokaut long Jisas em i as bilong autim ol tok profet.”​—KTH 19:​10, NW.

 8. Bilong wanem planti Juda i no bilip long Mesaia?

⁸ Em nau, ol tok Jon i autim, na ol strongpela wok bilong Jisas yet na ol gutpela pasin bilong God em i kamapim, na planti tokaut moa yet i stap long Buk Bilong God​—ol i mas kirapim yu long bilip tru olsem Jisas em i Mesaia, a? Ol man i laikim tru God na Tok bilong em, ol bai pilim tru dispela samting na bilip olsem Jisas em i dispela Mesaia God i bin promis long salim i kam. Tasol planti Israel i no laikim tru God na Tok bilong em. Jisas i bin tokim ol birua: “Mi save long yupela. Long bel bilong yupela, yupela i no gat laik long God.” (Jon 5:42) Ol i no laik kisim “dispela biknem God wanpela tasol i save givim”​—ol i laik “kisim biknem long ol lain bilong [ol] yet.” Olsem na ol i no wanbel wantaim Jisas, em i nolaik tru long dispela kain tingting, olsem Papa bilong em i nolaik tru long en.​—Jon 5:​43, 44; Aposel 12:​21-23.

Piksa Olsem Driman i Strongim Ol

9, 10. (a) Bilong wanem i gutpela taim stret long ol disaipel i lukim wanpela mak long heven? (b) Jisas i givim wanem gutpela tok promis long ol disaipel?

⁹ Em wanpela yia bihain long taim Jisas i bin kamapim ol samting i makim stret olsem em i Mesaia. Pasova bilong yia 32 C.E. i kamap i go pinis. Ating pasin birua, pasin bilong laikim tumas mani kago, o ol hevi bilong graun i mekim na planti manmeri em ol i bin bilip long Jisas, nau ol i no bihainim em moa. Na ating sampela i tingting planti na i bel hevi, long wanem, Jisas i sakim ol man i laik bai em i mas kamap king. Taim ol hetman bilong lotu Juda i tokim Jisas long wokim mirakel olsem mak long heven, Jisas i no laik mekim dispela samting na kisim biknem. (Matyu 12:​38, 39) Ating sampela i tingting planti long dispela. Na tu, Jisas i wok long tokim ol disaipel long wanpela samting ol i hatwok tru long kisimgut​—“em i mas i go long Jerusalem, na em i mas karim planti pen long han bilong ol hetman wantaim ol bikpris na ol saveman bilong lo. Na bai ol i kilim em i dai.”​—Matyu 16:​21-23.

¹⁰ Inap 9-pela o 10-pela mun moa na bai “[Jisas] i mas lusim dispela graun na i go long Papa.” (Jon 13:1) Jisas i wari long ol disaipel i bin stap gut long em, na em i tok promis long sampela long ol bai lukim dispela samting em i no bin soim long ol Juda i no bilip​—em wanpela mak long heven. Em i tok: “Mi tok tru long yupela, sampela man i sanap hia bai ol i no i dai yet, na bai ol i lukim Pikinini Bilong Man i kam olsem king.” (Matyu 16:28) Yumi save, Jisas i no tok i gat sampela disaipel bai i stap inap long taim Kingdom Bilong Mesaia i kamap long 1914. Jisas i tingting long soim 3-pela disaipel long bikpela glori em bai kisim taim em i kamap King bilong Kingdom. Long dispela piksa olsem driman bilong samting bai kamap bihain, bodi bilong Jisas i senis na i kamap narakain.

11. Stori long piksa olsem driman long bodi bilong Jisas i kamap narakain.

¹¹ Inap 6-pela de bihain, Jisas i kisim Pita, Jems, na Jon i go long wanpela maunten i antap moa​—ating em i wanpela kil bilong maunten Hermon. Taim “ol i lukluk i stap, bodi bilong Jisas i senis na i kamap narakain. Na pes bilong en i lait olsem san, na laplap samting bilong en i kamap waitpela olsem lait.” Na tupela profet, em Moses wantaim Elaija, ol tu i kamap na ol i toktok wantaim Jisas. Ating dispela bikpela samting i kamap long nait na ol disaipel inap lukim klia tru. Em i olsem samting tru tru long ol, olsem na Pita i tok em i laik sanapim 3-pela haus win​—wanpela bilong Jisas, wanpela bilong Moses, na wanpela bilong Elaija. Pita i toktok yet na wanpela klaut i lait tumas i karamapim ol na wanpela maus insait long klaut i tok: “Dispela em i Pikinini bilong mi, mi laikim em tumas, na mi amamas long em. Yupela harim tok bilong em.”​—Matyu 17:​1-6.

12, 13. Dispela piksa olsem driman long bodi bilong Jisas i kamap narakain, em i bin mekim wanem long ol disaipel? Bilong wanem?

¹² Tru, i no longtaim i go pinis na Pita i bin tokaut olsem Jisas em i ‘dispela man God i bin makim, em i Pikinini Bilong God i gat laip.’ (Matyu 16:16) Tasol nau Pita i harim maus bilong God yet i tokaut, na dispela i kamapim klia Jisas em i husat tru na wanem wok em bai mekim! Man! Dispela piksa olsem driman em i strongim tru bilip bilong Pita, Jems na Jon! Nau bilip bilong ol i strong moa, olsem na ol i redi long ol hevi bai painim ol long bihain na long bikpela wok ol bai mekim insait long kongrigesen bai kamap bihain.

¹³ Dispela piksa olsem driman long bodi bilong Jisas i senis na i kamap narakain, em i bin pas strong tru long tingting na bel bilong ol disaipel. Inap 30 yia bihain Pita i tok: “God Papa i bin givim biknem long em, na i mekim dispela gutpela lait i kamap long em. Na God yet i stap long dispela nambawan lait bilong heven na em i mekim tok long Jisas olsem, ‘Dispela em i Pikinini bilong mi, mi laikim em tumas, na mi amamas long em.’ Mipela i bin i stap wantaim em long dispela maunten God i bin i stap long en, na mipela i harim dispela tok i kam long heven.” (2 Pita 1:​17, 18) Jon tu i pilim tru dispela samting em i bin lukim. Inap 60 yia samting bihain, ating em i tingim dispela samting na em i tok: “Mipela i lukim pinis bikpela namba na strong bilong em. Em i namba bilong dispela wanpela Pikinini tasol, Papa i salim em i kam.” (Jon 1:14) Tasol dispela i no laspela piksa olsem driman ol disaipel bilong Jisas bai kisim.

Ol i Kisim Sampela Save Moa

14, 15. Olsem wanem aposel Jon bai stap inap long taim Jisas i kam bek?

¹⁴ Taim Jisas i kirap bek pinis, em i kamap long ol disaipel klostu long raunwara Galili. Em i tokim Pita: “Sapos mi laik bai [Jon] i stap inap long taim mi kam bek, ating em i samting bilong yu, a?” (Jon 21:​1, 20-22, 24) Olsem wanem? Dispela tok i makim olsem aposel Jon bai stap longpela taim moa, winim ol narapela aposel? Yumi ken ting olsem, long wanem, em i mekim wok bilong Jehova klostu 70 yia moa. Tasol dispela tok bilong Jisas i makim wanpela bikpela samting moa.

¹⁵ Dispela tok, “inap long taim mi kam bek,” em i kirapim yumi long tingim tok bilong Jisas long “Pikinini Bilong Man i kam olsem king.” (Matyu 16:28) Jisas inap tok Jon bai stap inap long taim em i kam bek, long wanem, bihain Jon i kisim wanpela tok profet olsem piksa na i lukim Jisas i kam olsem King long Kingdom. Klostu long taim Jon i dai, taim em i stap kalabus long ailan Patmos, em i kisim ol driman i olsem tok profet bilong ol samting bai kamap long “de bilong Bikpela.” Bel bilong Jon i pilim tru ol driman em i bin lukim, olsem na taim Jisas i tok: “Tru tumas, bai mi kam kwiktaim,” Jon i tokaut olsem: “I tru. Bikpela Jisas, yu kam.”​—KTH 1:​1, 10; 22:20.

16. Bilong wanem yumi mas wok yet long strongim bilip bilong yumi?

¹⁶ Ol man i bin stap long taim bilong ol aposel na ol i gat stretpela bel, ol i kisim Jisas olsem Mesaia na ol i bilip long em. Ol i stap namel long ol man i no bilip, na ol i mas mekim wok autim tok, na ol traim bai painim ol long bihain, dispela i mekim na ol man i kamap bilipman ol i mas i gat ol samting bilong strongim bilip bilong ol. Jisas i bin kamapim long ples klia planti samting i soim olsem em i Mesaia, na em i bin givim planti tok profet olsem driman bilong strongim ol disaipel i stap gut long em. Long nau yumi stap klostu tru long pinis bilong “de bilong Bikpela.” Klostu nau Krais bai pinisim olgeta pasin nogut bilong dispela graun bilong Satan na em bai kisim bek ol lain bilong God. Yumi tu i mas strongim bilip bilong yumi, na bilong mekim olsem yumi mas mekim wok long olgeta samting Jehova i bin givim long yumi bilong helpim yumi long ol samting bilong spirit.

Jehova i Lukautim Ol Long Taim Nogut

17, 18. Olsem wanem ol disaipel bilong pastaim i stap narapela kain long ol lain i birua long ol samting God i tingting pinis long mekim? Wanem samting i kamap long tupela lain?

¹⁷ Taim Jisas i dai pinis, ol disaipel i bihainim tok bilong em long autim tok “long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.” (Aposel 1:8) Maski ol man i mekim nogut tru long ol, Jehova i blesim nupela kongrigesen Kristen, em i givim save long ol samting bilong spirit long ol na i gat planti nupela disaipel i kamap.​—Aposel 2:47; 4:​1-31; 8:​1-8.

¹⁸ Tasol ol man i birua long gutnius i no gat wanpela gutpela samting i painim ol long nau na i stap bilong ol i wok long go nogut moa. Sindaun 4:19 i tok: “Rot bilong ol man nogut i tudak olsem biknait. Ol i save pundaun na ol i no save wanem samting i sutim lek bilong ol.” Dispela “tudak” i go tudak moa long yia 66 C.E., taim ol ami bilong Rom i kam banisim Jerusalem. Inap sotpela taim ol bin lusim dispela hap, i luk olsem i no gat as na ol i mekim olsem, tasol long 70 C.E. ol i kam bek, na long dispela taim ol i bagarapim tru Jerusalem. Josifas, em wanpela Juda i bin raitim stori bilong ol samting i bin kamap bipo, em i tok, winim wan milion Juda ol i dai long dispela taim. Tasol ol Kristen i stap gut long God ol i abrusim bagarap. Bilong wanem? Long wanem, taim ol Rom i bin lusim dispela hap inap sotpela taim, ol Kristen i bihainim tok bilong Jisas long ranawe.​—Luk 21:​20-22.

19, 20. (a) Bilong wanem lain bilong God i no ken pret nau long taim dispela pasin bilong graun i laik pinis? (b) Long ol yia paslain long 1914, Jehova i bin givim wanem gutpela save tru long lain bilong em?

¹⁹ Long nau tu i olsem. Dispela taim bilong bikpela hevi tru i laik kamap, em bai pinisim olgeta pasin nogut bilong dispela graun Satan i bosim. Tasol lain bilong God i no ken pret, long wanem, Jisas i tok promis olsem: “Harim. Mi save stap wantaim yupela olgeta de, i go inap long dispela taim i pinis.” (Matyu 28:20) Bilong strongim bilip bilong ol disaipel bilong pastaim na redim ol long karim ol hevi bai kamap bihain, Jisas i givim wanpela piksa olsem driman long ol long bikpela glori em bai kisim long heven olsem King Mesaia. Olsem wanem long nau? Long 1914 ol samting bilong dispela piksa i kamap tru tru. Nau Jisas i stap King long Kingdom na dispela i strongim tru bilip bilong lain bilong God. Em i olsem wanpela promis bilong gutpela samting tru bai kamap bihain, na isi isi Jehova i bin givim gutpela save long ol wokman bilong em long dispela Kingdom Bilong Mesaia i kamap pinis. Namel long bikpela tudak bilong dispela graun, “rot bilong ol stretpela man i lait olsem san i kamap long moningtaim, na lait i wok long kamap strong moa, inap long belo.”​—Sindaun 4:18.

²⁰ Paslain long 1914, wanpela liklik lain Kristen God i bin makim, ol i kirap long kisimgut ol bikpela tok i tru bilong taim Bikpela bai kam bek. Olsem: Ol i kisim save olsem taim Bikpela i kam bek, ol man bilong graun i no inap lukim em, olsem tupela ensel i kamapim long taim ol i bin kamap long ol disaipel long 33 C.E., taim Jisas i wok long go antap long heven. Taim wanpela klaut i haitim Jisas na ol disaipel i no inap lukim em moa, ol ensel i tok: “Dispela Jisas, nau God i kisim em na em i lusim yupela na i go antap long heven, em bai i kam bek gen long wankain pasin olsem nau yupela i lukim em i go long heven.”​—Aposel 1:​9-11.

21. Long stadi i kamap bihain long dispela, bai yumi stori long wanem samting?

²¹ Ol disaipel i bin stap gut long Jisas, ol tasol i lukim em i go antap. Olsem long taim bodi bilong Jisas i bin senis na kamap narakain, i no gat bikpela lain manmeri i lukim dispela samting; ol man i no save long samting i bin kamap. Na i wankain tu long taim Jisas i kam bek olsem King long Kingdom. (Jon 14:19) Ol gutpela disaipel God i bin makim long holi spirit, ol tasol bai save em i stap pinis olsem King. Long stadi i kamap bihain long dispela, bai yumi stori long bikpela samting tru dispela save bai mekim long ol, na bihain i gat wok bilong bungim planti milion manmeri em ol i bilong i stap long graun aninit long wok king bilong Jisas.​—KTH 7:​9, 14.

[Futnot]

Yu Inap Tingim?

• Taim ol i sutim tok long Jisas olsem em i bin kalapim lo bilong Sabat na em i tok bilas long God, em i mekim wanem bilong soim olsem em i Mesaia?

• Taim bodi bilong Jisas i senis na i kamap narakain, olsem wanem dispela i helpim ol disaipel bilong pastaim?

• Wanem mining bilong tok bilong Jisas long Jon bai stap inap long taim em i kam bek?

• Long 1914, wanem piksa olsem driman i kamap tru tru?

[Ol Piksa long pes 10]

Jisas i kamapim long ples klia olsem em i Mesaia

[Piksa long pes 12]

Taim bodi bilong Jisas i senis na i kamap narakain, dispela i strongim bilip bilong ol disaipel

[Piksa long pes 13]

Jon i mas i stap inap long taim Jisas i “kam bek”