Givim Bret na Pis Long Planti Tausen Manmeri

Ol 12-pela aposel i bin raun autim tok long hap bilong Galili, na ol i kam bek na tokim Jisas long “olgeta samting ol i bin mekim, na long olgeta samting ol i skulim ol man long en.” Yumi ken ting olsem ol i taiet, tasol ol i no gat taim bilong kaikai, long wanem, planti manmeri i kam, olsem na Jisas i tokim ol: “Yupela tasol kam wantaim mi long wanpela hap i no gat man na malolo liklik.”—Mak 6:30, 31.

Ol i kalap long bot, ating klostu long Kaperneam bilong i go long hap is bilong wara Jordan, dispela ples i stap longwe long Betsaida. Tasol planti manmeri i lukim ol i go, na ol i bihainim nambis na ran i go paslain long bot i kam sua.

Taim ol i go sua, Jisas i lukim bikpela lain manmeri i stap, na em i sori tru long ol, long wanem, ol i olsem sipsip i no gat wasman. Olsem na em i kirap “skulim ol long planti samting” bilong Kingdom. (Mak 6:34) Na tu, em i “oraitim ol sikman.” (Luk 9:11) Bihain ol disaipel i tokim em: “Dispela ples i no gat man na em apinun pinis. Salim ol manmeri i go na bai ol i ken i go long ol liklik taun na baim kaikai bilong ol yet.”—Matyu 14:15.

Tasol Jisas i tokim ol: “I no olsem ol i mas i go. Yupela givim kaikai long ol.” (Matyu 14:16) Jisas i save long samting em bai mekim, olsem na em i traim Filip na i askim em: “Bai yumi baim bret we bilong ol dispela manmeri long kaikai?” Jisas i askim Filip, long wanem, em i bilong Betsaida. Maski sapos ol i baim bret, i gat planti manmeri na bret bai i no inap long ol. I gat 5,000 man na sapos ol i kaunim ol meri na ol pikinini, ating em bai inap olsem 10,000 manmeri olgeta! Olsem na Filip i tok: “Sapos yumi baim bret inap long 200 koin denarius, [denarius em pe wanpela wokman i kisim taim em i wok de olgeta] dispela bai i no inap long olgeta wan wan maski yumi givim ol liklik hap bret tasol.”—Jon 6:5-7.

Ating Andru i gat wankain tingting olsem Filip na em i tok: “Liklik mangi hia i gat 5-pela bret bali na 2-pela liklik pis. Tasol dispela i no inap tru long dispela bikpela lain manmeri.”—Jon 6:9.

Em taim bilong san, paslain liklik long Pasova long yia 32 C.E., olsem na planti gras i gro long dispela ples maunten. Jisas i tokim ol disaipel long tokim ol manmeri long sindaun long gras long ol liklik grup inap olsem 50 na 100. Na em i kisim 5-pela bret na 2-pela pis na em i tok tenkyu long God. Bihain em i brukim bret na pis na i givim long ol disaipel long tilim long ol manmeri. Olgeta manmeri i kaikai na ol i pulap tru!

Bihain, Jisas i tokim ol disaipel bilong em: “Bungim ol hap kaikai i stap yet na bai yumi no westim wanpela hap kaikai.” (Jon 6:12) Taim ol i bungim ol hap kaikai, ol i pulimapim long 12-pela basket!