Larim Jehova i Helpim Yu Long Kamap Fri Tru
“Lukluk gut long dispela lo i gutpela olgeta na i mekim man i kamap fri.”—JEMS 1:25.
YU INAP STORI LONG DISPELA?
Wanem lo i wok long redim ol man long i stap fri tru? Dispela lo i helpim husat?
Yumi mas mekim wanem bilong i stap fri tru?
Ol man i wok yet long bihainim tok bilong Jehova bai stap fri olsem wanem?
1, 2. (a) Wanem samting i wok long kamap long fridom bilong ol manmeri? Bilong wanem i olsem? (b) Long sait bilong i stap fri, ol wokboi bilong Jehova i gat wanem bilip?
YUMI stap long taim we ol manmeri i mekim moa yet ol pasin nogut olsem pasin gridi, pasin pait, na ol i no rispektim ol lo. (2 Tim. 3:1-5) Long dispela as ol gavman i putim planti moa lo, strongim wok polis, na yusim ol kamera long lukim samting ol man i mekim. Bilong lukautim ol yet, ol man long sampela kantri i putim ol sekiuriti alam long haus bilong ol, na putim planti lok moa, na sanapim ol banis i gat pawa. Planti manmeri i pret long raun long nait o larim ol pikinini i stap ol yet na i pilai ausait. I klia tru olsem fridom bilong ol manmeri i wok long lus, na i luk olsem dispela bai go nogut moa yet.
2 Long gaden Iden, Satan i tok ol man inap stap fri tru sapos ol i no stap aninit long wok bos bilong Jehova. Ol samting i kamap bihain i soim olsem Satan i giaman stret! Ol man i wok long bihainim moa yet laik bilong ol, laik bilong God nogat. Dispela i mekim na ol manmeri i kisim pen na hevi moa yet. Ol wokboi bilong Jehova tu i karim hevi long dispela samting. Tasol yumi bilip olsem taim bai kamap bihain we ol manmeri i no kalabus moa long sin na bagarap na ol bai “kisim dispela pasin bilong i stap fri i nambawan tru olsem bilong ol pikinini bilong God.” (Rom 8:21) Tru tumas, Jehova i wok long redim ol wokboi bilong em long kisim dispela kain fridom. Em i wok long mekim olsem wanem?
3. Jehova i givim wanem lo long ol wokboi bilong en? Bai yumi skelim wanem ol askim?
3 Bilong redim ol wokboi bilong en long dispela fridom, Jehova i givim yumi samting em Jems i kolim olsem “dispela lo i gutpela olgeta na i mekim man i kamap fri.” (Ritim Jems 1:25.) Planti taim ol man i tingting olsem lo em samting bilong kontrolim ol, na ol i no stap fri. Olsem na, wanem dispela ‘lo i gutpela olgeta i mekim man i kamap fri’? Na olsem wanem dispela lo i mekim yumi kamap fri?
LO I MEKIM YUMI I KAMAP FRI
4. Dispela “lo i gutpela olgeta na i mekim man i kamap fri” i makim wanem samting? Dispela lo i helpim husat?
4 Dispela “lo i gutpela olgeta na i mekim man i kamap fri” i no makim Lo Bilong Moses. Jehova i bin givim Lo Bilong Moses long ol Israel bilong soim olsem ol i sinman, na Krais i bin inapim dispela Lo. (Mat. 5:17; Gal. 3:19) Olsem na, Jems i toktok long wanem lo? Em i stori long “lo bilong Krais,” na ol i kolim tu olsem ‘lo bilong bilip’ na “lo bilong ol man i stap fri.” (Gal. 6:2; Rom 3:27; Jems 2:12) So dispela “lo i gutpela olgeta” i makim olgeta samting Jehova i tok yumi mas mekim. Dispela lo i helpim ol Kristen God i bin makim na “ol arapela sipsip.”—Jon 10:16.
5. Bilong wanem i no hatwok long bihainim dispela lo i mekim man i kamap fri?
5 Dispela “lo i gutpela olgeta” i no wankain long ol lo bilong planti kantri. Ol lo na stiatok bilong en i isi long kliagut long en na bihainim. (1 Jon 5:3) Jisas i tok: “Hap plang bilong mi i gutpela na samting mi askim yupela long karim i no hevi.” (Mat. 11:29, 30) Na tu, dispela “lo i gutpela olgeta” i no gat wok long kamapim planti liklik lo. Pasin laikim em as bilong dispela lo na dispela lo i stap long tingting na bel bilong ol man, i no long ol hap ston.—Ritim Hibru 8:6, 10.
HAU “LO I GUTPELA OLGETA” I MEKIM YUMI KAMAP FRI
6, 7. Wanem wok bilong ol lo na tambu Jehova i putim long yumi? Lo bilong i stap fri i larim yumi long mekim wanem?
6 Ol tambu Jehova i putim long ol man i bilong helpim ol na lukautim ol. Olsem, tingim lo bilong graviti. Ol man i no komplein na tok olsem dispela lo i putim hevi long ol. Ol i save olsem dispela lo i lukautim ol. Long wankain pasin, ol samting Jehova i tok yumi mas mekim, em lo bilong Krais “i gutpela olgeta” i skulim yumi long en, ol i bilong helpim yumi.
7 Lo bilong i stap fri i save lukautim yumi, na em i larim yumi long inapim ol stretpela laik bilong yumi long rot we yumi no bagarapim yumi yet na yumi rispektim ol raits na fridom bilong ol arapela. Olsem na yumi fri long inapim ol stretpela laik bilong yumi na em tasol. Dispela i makim olsem yumi mas i gat laik long mekim ol samting Jehova i laikim na ol samting em i tok yumi mas mekim. Yumi mas lain long laikim ol samting Jehova i laikim na heitim ol samting em i heitim. Lo bilong i stap fri i save helpim yumi long mekim olsem.—Amo. 5:15.
8, 9. Olsem wanem pasin bilong bihainim lo bilong i stap fri i helpim yumi? Kamapim wanpela eksampel.
8 Yumi no gutpela olgeta, olsem na yumi hatwok long bosim ol laik nogut. Tasol taim yumi strong long bihainim lo bilong i stap fri, dispela i mekim na yumi stap fri long sampela samting long nau. Olsem, Jay i bin kalabus long smok tabak. Taim em i kirap stadi long Baibel, em i kisim save olsem God i no amamas long pasin bilong smok. Jay i mas wokim disisen. Em bai larim laik bilong em long smok i bosim em o bai em i bihainim tok bilong Jehova? Em i bihainim savetingting na wokim disisen bilong mekim wok bilong God, maski em i hatwok tru long lusim smok. Jay i pilim olsem wanem taim em i lusim pinis smok? Em i tok em i amamas tru na pilim olsem em i stap “fri tru.”
9 Pasin bilong ol man bilong dispela graun long i stap fri i save larim ol man long inapim ol laik bilong ol. Tasol Jay i kisim save olsem, dispela kain pasin bilong i stap fri i mekim ol man i kamap wokboi bilong sin. Ol man husat i bihainim ol lo bilong God long i stap fri, ol i larim holi spirit i stiaim ol. Long dispela rot ol i kamap fri na ol inap stap “laip na i stap bel isi.” (Rom 8:5, 6) Jay i kisim strong we bilong lusim smok? I no long strong bilong em yet, nogat, em strong i kam long God. Jay i stadi oltaim long Baibel, beten bilong kisim holi spirit, na kisim helpim long ol bratasista long kongrigesen. Ol dispela wankain samting inap helpim yumi olgeta long i stap fri tru. Orait nau yumi ken stori long dispela.
LUKLUK GUT LONG TOK BILONG GOD
10. Pasin bilong lukluk gut long lo bilong God i makim wanem samting?
10 Jems 1:25 i tok, “man husat i lukluk gut long dispela lo i gutpela olgeta na i mekim man i kamap fri, na em i save mekim long olgeta taim, em bai amamas long em i mekim olsem.” Tok Grik ol i tanim olsem “lukluk gut” i makim pasin bilong lindaun bilong glasim gut wanpela samting. Yumi mas taitim bun long mekim olsem. Olsem na sapos yumi laik bai dispela lo bilong i stap fri i stiaim tingting na bel bilong yumi, orait yumi mas wok strong long stadi gut long Baibel long olgeta taim na skelim long bel ol tok yumi ritim.—1 Tim. 4:15.
11, 12. (a) Jisas i mekim wanem tok i soim olsem yumi mas larim tok i tru i stiaim olgeta wokabaut bilong yumi? (b) Olsem piksa antap i makim, yumi mas abrusim wanem kain tingting, na moa yet sapos yumi yangpela?
11 Na tu, pasin bilong bihainim tok bilong God i mas stap olsem samting yumi mekim long olgeta taim. Tok i tru i mas stiaim olgeta wokabaut bilong yumi. Jisas i bin mekim kain tok olsem long sampela man i bilip long em, em i tok: “Sapos yupela i holimpas tok bilong mi, orait yupela i disaipel tru bilong mi, na yupela bai save long tok i tru, na tok i tru bai mekim yupela i kamap fri.” (Jon 8:31, 32) Wanpela dikseneri bilong Baibel i stori olsem dispela tok “save” i makim olsem yumi kliagut olsem save yumi gat em i bikpela samting long laip bilong yumi. Olsem na yumi ken tok olsem, yumi save gut long tok i tru taim tok i tru i stiaim olgeta wokabaut bilong yumi. Long dispela rot “tok bilong God” bai “wok i stap” insait long yumi. Em bai helpim yumi long mekim yet sampela senis long pasin bilong yumi na bai yumi kamapim moa yet ol pasin bilong Papa bilong yumi long heven.—1 Tes. 2:13.
12 Askim yu yet olsem, ‘Mi save gut long tok i tru? Tok i tru i stiaim olgeta wokabaut bilong mi? O mi laikim yet sampela pasin bilong ol man bilong dispela graun long i stap fri?’ Wanpela sista husat i go bikpela insait long famili Kristen i stori olsem taim em i yangpela, em i bilip long Jehova, tasol em i no save gut long em. Em i tok: “Mi no bin lain long heitim ol samting Jehova i heitim. Mi no ting olsem Jehova i bisi long ol samting mi mekim. Na taim hevi i painim mi, mi no lain long askim Jehova long helpim mi. Mi bin bihainim savetingting bilong mi yet. Nau mi save olsem dispela em longlong pasin bikos long dispela taim bipo mi no gat save liklik.” Gutpela tru, dispela sista i bin luksave olsem tingting bilong en i kranki olgeta, na em i mekim sampela bikpela senis long laip bilong en. Na em i kirap mekim wok painia oltaim.
HOLI SPIRIT INAP HELPIM YU LONG KAMAP FRI
13. Olsem wanem holi spirit bilong God i save helpim yumi long i stap fri?
13 Long 2 Korin 3:17, Baibel i tok: “Taim holi spirit bilong Jehova i stap, man i stap fri.” Olsem wanem holi spirit inap mekim yumi stap fri? Holi spirit i save helpim yumi long kamapim ol kain pasin olsem “pasin laikim, amamas, bel isi, i no les kwik, pasin helpim, gutpela pasin, bilip, pasin isi, na bosim bel.” (Gal. 5:22, 23) Ol man i no inap i stap fri tru sapos ol i no gat ol dispela pasin, na moa yet pasin laikim. I stap bilong ol man bilong nau i kamapim klia dispela samting. Bihain long aposel Pol i kolim ol pasin bilong holi spirit, em i tok: “I no gat lo i tambuim ol dispela pasin.” Wanem mining bilong tok em i mekim? Em olsem, i no gat wanpela lo inap pasim ol dispela pasin bilong holi spirit long i kamap bikpela moa long laip bilong yumi. (Gal. 5:18) Jehova i laik bai yumi wok long kamapim ol dispela pasin moa yet na mekim olsem inap oltaim oltaim.
14. Olsem wanem tingting bilong dispela graun i mekim ol man i kamap wokboi nating?
14 Ol man em tingting bilong dispela graun i stiaim ol na ol i save inapim ol laik bilong ol yet, ol inap ting ol i stap fri. (Ritim 2 Pita 2:18, 19.) Tasol ol i no save ol i stap olsem ol wokboi nating. Ol gavman i mas kamapim planti lo bilong kontrolim ol laik na pasin bilong ol. Na Pol i tok olsem ol i no kamapim ol lo “bilong ol stretpela man, nogat, em bilong ol man nogut na ol bikhetman.” (1 Tim. 1:9, 10) Na ol dispela man ol i stap wokboi bilong laik nogut bilong bodi, long wanem, ol i “mekim ol samting em bodi i laikim,” na bodi em wanpela hatpela bosman. (Efe. 2:1-3) Olsem ol binatang i go insait long botol hani bilong inapim laik bilong ol na ol i pas long hani, ol dispela man i bihainim ol laik nogut bilong ol na ol i kamap ol wokboi bilong sin.—Jems 1:14, 15.
STAP FRI INSAIT LONG KONGRIGESEN KRISTEN
15, 16. Kirap long taim yumi kam insait long kongrigesen Kristen, yumi bin kisim wanem ol gutpela samting? Yumi gat wanem fridom insait long kongrigesen?
15 Taim yu bin kam insait long kongrigesen Kristen, yu no bin putim aplikesen bilong joinim kongrigesen olsem ol man i save mekim taim ol i laik joinim wanpela klap. Nogat. Yu kam insait long kongrigesen, long wanem, Jehova i laik bai yu kam. (Jon 6:44) Bilong wanem em i singautim yu? Yu ting em i lukim wanpela stretpela man husat i pret long God? Ating yu bai tok, “Nogat ya!” Orait, God i lukim wanem samting? Em i luksave olsem yu bai amamas long bihainim lo bilong em na wokabaut long pasin em i laikim. Kirap long taim yu kam insait long kongrigesen, Jehova i bin lukautim yu long rot bilong skulim yu long tok bilong Baibel. Em i mekim na yu no kalabus moa long ol tok giaman na bilip nating bilong lotu giaman, na tu, em i skulim yu long bihainim pasin bilong Krais. (Ritim Efesus 4:22-24.) Olsem na, nau yu kisim gutpela samting tru, yu stap insait long dispela wanpela lain manmeri we ol i stap fri tru.—Jems 2:12.
16 Tingim dispela: Taim yu stap wantaim ol manmeri husat i laikim tru Jehova long bel olgeta, yu save pret? Taim yu toktok wantaim ol bratasista bilong yu long Haus Kingdom, yu save wari olsem sampela bai stilim ol samting bilong yu? Nogat tru! Yu pilim seif na fri. Bai yu pilim olsem sapos yu bung wantaim sampela arapela lain long narapela hap? Nogat! Fridom yu pilim long nau taim yu stap namel long ol manmeri bilong Jehova, em liklik tasol taim yu skelim wantaim fridom yu bai pilim long bihain.
‘STAP FRI OLSEM PIKININI BILONG GOD’
17. Taim ‘ol pikinini bilong God i kamap ples klia,’ olsem wanem dispela bai helpim ol manmeri bilong graun long i kamap fri?
17 Pol i stori long fridom Jehova bai givim long ol manmeri bilong en hia long graun. Em i tok: “Ol samting God i wokim i gat laik stret long dispela taim i mas kamap we glori bilong ol pikinini bilong God bai kamap ples klia.” Na Pol i tok moa olsem: “Olgeta samting God i bin wokim bai lusim dispela kalabus bilong bagarap, na ol bai kisim dispela pasin bilong i stap fri i nambawan tru olsem bilong ol pikinini bilong God.” (Rom 8:19-21) “Ol samting God i wokim” i makim ol manmeri husat i wet long kisim laip oltaim long graun na ol bai kisim helpim taim “ol pikinini bilong God,” em ol Kristen God i bin makim, “bai kamap ples klia.” Dispela bai kamap taim ol Kristen God i bin makim, em ol i stap long heven, ol i kirap helpim Krais long bagarapim ol man nogut na bringim “bikpela lain manmeri” i go insait long nupela taim.—Rev. 7:9, 14.
18. Olsem wanem fridom bilong ol manmeri i bihainim tok bilong God bai i go bikpela? Ol manmeri bai kisim wanem pasin bilong i stap fri?
18 Pasin bilong ol manmeri long i stap fri long dispela taim bai i narapela kain tru. Wok bilong Satan na ol spirit nogut i no inap givim hevi moa long ol. (Rev. 20:1-3) Em bai gutpela samting tru! Kirap long dispela taim, ol 144,000 king na pris bai mekim wok long ofa bilong baim bek ol man i go inap long olgeta man i kamap gutpela olgeta na i no gat sin. (Rev. 5:9, 10) Bihain long ol i winim ol hevi i traim bilip bilong ol, ol manmeri husat i bihainim tok bai kamap fri tru, wankain olsem Jehova i bin tingting long en long bipo yet. Ol bai “kisim dispela pasin bilong i stap fri i nambawan tru olsem bilong ol pikinini bilong God.” Tingim! Bai yu no hatwok moa long mekim ol samting God i tok yumi mas mekim. Bodi, bel, na tingting bai i gutpela olgeta, na bai yu inap bihainim stret ol pasin bilong God.
19. Yumi mas mekim yet wanem samting sapos yumi laik “kisim dispela pasin bilong i stap fri i nambawan tru olsem bilong ol pikinini bilong God”?
19 Olsem wanem? Yu laik “kisim dispela pasin bilong i stap fri i nambawan tru olsem bilong ol pikinini bilong God”? Sapos olsem, orait larim “dispela lo i gutpela olgeta na i mekim man i kamap fri” i stiaim tingting na bel bilong yu. Oltaim stadi gut long Baibel. Tok i tru i mas stiaim olgeta wokabaut bilong yu. Beten bilong kisim holi spirit. Kisim helpim long kongrigesen Kristen na long olgeta gutpela tok i kam long Jehova. No ken larim Satan i giamanim yu, olsem em i bin giamanim Iv, na kirapim yumi long ting olsem ol samting God i laik bai yumi mekim i pasim yumi tumas. Maski Satan em i kleva stret, yumi inap winim em, long wanem, “yumi save long ol trik bilong em.”—2 Kor. 2:11.
[Ol Piksa long pes 9]
Mi gat laik yet long i stap fri long mekim sampela samting ol man bilong dispela graun i save mekim?
[Ol Piksa long pes 9]
Mi larim tok i tru i stiaim olgeta wokabaut bilong mi?