I Stap na Wok Bilong Jisas

Planti Disaipel i Lusim Jisas

JISAS i stap long haus lotu long Kaperneam na em i skulim yet ol manmeri olsem em i bret tru i kam long heven. Em i bin stori wantaim ol long dispela tok taim em i wokim mirakel na givim sampela bret na pis long ol na em i lusim ol i stap long hap bilong raunwara Galili, na bihain ol i kam painim em long Kaperneam.

Jisas i stori moa olsem: “Dispela bret mi bai givim . . . em i bodi bilong mi. Mi givim bai ol manmeri bilong graun ol i ken kisim laip.” Tupela yia bipo, long mun Epril o Me samting long yia 30, Jisas i bin tokim Nikodemus, God i laikim tumas olgeta manmeri, olsem na em i salim Pikinini bilong em i kam bilong baim bek ol. Olsem na nau Jisas i laik tokim ol, sapos ol i kaikai bodi bilong em, olsem bilip long ofa em bai givim, bai ol inap kisim laip.

Dispela tok bilong Jisas i pundaunim ol manmeri. Ol i tok: “Olsem wanem na dispela man em inap givim bodi bilong en long yumi na yumi kaikai?” Jisas i laik bai ol i save, em i mekim tok piksa tasol, olsem na em i givim narapela tok gen long ol. Em i tokim ol long wanpela samting, na sapos ol i ting ol i mas mekim tru, bai ol i bel nogut moa long em, long wanem em i samting nogut tru long ol.

Em i tok: “Tru tumas mi tokim yupela, sapos yupela i no kaikai bodi bilong Pikinini Bilong Man, na sapos yupela i no dringim blut bilong em, bai yupela i no gat laip i stap long yupela. Man i save kaikai bodi bilong mi na dringim blut bilong mi, em i gat laip i stap gut oltaim oltaim, na bai mi kirapim em long las de. Long wanem, bodi bilong mi em i kaikai tru, na blut bilong mi em i samting tru bilong dring.”

Sapos Jisas i tok ol i mas kaikai bodi tru bilong em, em samting nogut tru. Tasol Jisas i no tok olsem. Nogat. Em i laik helpim ol long save, sapos man i laik kisim laip, em i mas bilip long ofa bilong Jisas, em bodi na blut bilong em. Tasol planti disaipel ol i no laik kisim save long as tru bilong dispela tok. Ol i tok: “Dispela tok em i hevi tumas. Husat inap long harim?”

Jisas i save planti disaipel bilong em i bel nogut long dispela tok, olsem na em i tok: “Dispela tok em i bagarapim bilip bilong yupela, a? Na sapos yupela i lukim Pikinini Bilong Man i go antap long dispela ples bipo em i stap long en, orait olsem wanem? . . . Dispela tok mi givim long yupela, em i spirit, na em i gat laip. Tasol sampela man namel long yupela ol i no bilip.”

Jisas i tok moa: “Ol i no bilip, na long dispela as tasol mi bin tokim yupela, ‘Sapos Papa i no givim strong long wanpela man, orait dispela man bai i no inap i kam long mi.’ ” Planti disaipel i harim tok na ol i lusim em na ol i no bihainim em moa. Olsem na Jisas i lukluk i go long 12-pela aposel, na em i askim ol yupela tu i laik lusim mi na i go?”

Pita i bekim tok olsem: “Bikpela, bai mipela i go long husat? Tok bilong yu tasol i save givim laip i stap gut oltaim. Na mipela i bilip, na i save gut olsem, yu dispela gutpela stretpela man God i bin makim bilong em yet.” Tok bilong Pita i kamapim bel bilong em, em i laik stap gut long Jisas, maski em na ol narapela aposel i no save gut long as dispela tok bilong Jisas.

Jisas i amamas long dispela tok bilong Pita, tasol em i tok: “Mi yet mi bin makim yupela ol 12-pela disaipel. Tasol wanpela namel long yupela em i olsem wanpela [man] nogut.” Em i tok long Judas Iskariot. Ating Jisas i tok olsem long wanem em i pilim olsem nau Judas i kirap pinis long bihainim pasin nogut.

Ol manmeri i laik makim Jisas i kamap king bilong ol, tasol em i no laik, olsem na ol i bel hevi, na ating ol i tingting olsem: ‘Em i no laik kamap king bilong yumi, olsem na ating em i no dispela Man em God i tok long salim i kam.’ I gat dispela samting tu na ol man i no amamas long Jisas. Jon 6:​51-71; 3:⁠16.

◆ Jisas i givim bodi bilong em bilong helpim husat? Olsem wanem ol i ‘kaikai bodi’ bilong em?

◆ Jisas i mekim wanem narapela tok na ol manmeri i kirap nogut long en? Em i laik helpim ol long save long wanem samting?

◆ Taim planti man i lusim Jisas, Pita i tok wanem?