Askim

Tripela Gutnius wantaim i stori long tok pait i bin kamap long meri i bin welim het bilong Jisas long wel i gat bikpela pe. Olsem wanem? Olgeta aposel i toktok planti o Judas tasol i bin mekim olsem?

Yumi ken kaunim dispela stori long Gutnius Matyu, Mak, na Jon i bin raitim. Ating Judas i namba wan man bilong toktok planti, na sampela aposel moa i wanbel long tok bilong em. Dispela stori i kamapim as na yumi ken tenkyu long yumi gat 4-pela Gutnius. Tok ol dispela man i bin raitim long Gutnius em i stret, tasol i no olgeta stori i gat wankain tok. Taim yumi skelim dispela 3-pela stori, yumi kisim sampela save moa long samting i bin kamap.

Long Matyu 26:​6-13, dispela stori i kolim ples dispela samting i kamap long en​—⁠em haus bilong lepraman Saimon, long Betani​—⁠tasol em i no kolim nem bilong meri i bin kirap kapsaitim wel i gat gutpela smel long het bilong Jisas. Matyu i tok: “Ol disaipel i lukim dispela, na ol i bel nogut” na ol i toktok planti olsem ol inap salim dispela wel na kisim mani long en na givim long ol rabisman.

Gutnius Mak i raitim i stori gut long dispela samting. Tasol Mak i tok moa olsem meri i brukim ai bilong dispela botol. Dispela botol i gat “namba wan sanda,” kain olsem ol i save wokim long India. Mak i tok olsem “sampela man i stap, ol i lukim na ol i bel nogut” na “ol i krosim dispela meri.” (Mak 14:​3-9) Em nau, dispela tupela stori i kamapim olsem i no wanpela aposel tasol i bin toktok planti​—⁠sampela moa i bin mekim olsem. Dispela samting i bin kirap olsem wanem?

Jon tu i bin lukim samting i kamap, na em i stori gut long en. Em i kolim nem bilong dispela meri​—⁠Maria, susa bilong Marta na Lasarus. Na tu, Jon i kamapim narapela tok, na dispela tok i helpim dispela stori na i no pait wantaim ol narapela. Em i tok: “Em i kam welim lek bilong Jisas, na em i mekim drai long gras bilong het bilong em yet.” Taim yumi skelim dispela tupela stori, yumi inap save, Maria i bin kapsaitim dispela wel em Jon i tok em i “namba wan sanda” long het na lek bilong Jisas. Jon i pas gut wantaim Jisas na em i no save amamas taim ol narapela i sutim tok long Jisas. Em i tok: “Wanpela disaipel bilong en, em Judas Iskariot, em dispela man bihain em i putim Jisas long han bilong ol birua, em i tok olsem, ‘Bilong wanem yumi no larim ol man i baim dispela sanda na yumi kisim 300 mani silva long en, na yumi givim long ol rabisman?’ ”​—⁠Jon 12:​2-8.

Em nau, Judas em i “wanpela disaipel bilong en,” tasol yumi inap pilim olsem Jon i bel nogut, long wanem, wanpela disaipel i laik putim Jisas long han bilong ol birua. C. Howard Matheny em wanpela saveman bilong tanim tok na em i mekim sampela tok long tok bilong Jon 12:4 olsem: “Dispela tok olsem ‘dispela man bihain em i putim Jisas long han bilong ol birua’ em i makim olsem dispela man i bin tingting pinis long mekim dispela samting. Dispela i kamapim olsem taim Judas i putim Jisas long han bilong ol birua, i no olsem em i kirap tasol na em i mekim olsem, nogat, em i bin tingting pinis long mekim dispela samting inap longtaim pinis.” Jon i kamapim gutpela tingting bilong em taim em i stori long as na Judas i toktok planti. Jon i tok: “Judas i no wari long ol rabisman na em i tok olsem. Nogat. Em i stilman. Em i gat wok bilong bosim bokis mani bilong ol lain bilong Jisas, na em i save stilim mani ol i putim long en.”

Yumi ken ting olsem stilman Judas i bin kirapim dispela pasin bilong toktok planti, long wanem, em bai i gat planti mani moa bilong stilim sapos ol i salim dispela wel i gat bikpela pe, na dispela mani ol bai putim long bokis mani em i karim. Taim Judas i kirapim dispela toktok, ating sampela narapela aposel i wanbel long tok bilong em na ol i ting dispela tok em i stret. Tasol Judas em i as bilong dispela toktok planti ol i bin mekim.