Bilip Bilong Yu Bai Stap Strong?

 1. Yumi ken givim wanem askim long yumi yet?

SAMPELA taim yu save tingting planti taim yu tingim ol samting bai kamap liklik taim bihain, olsem olgeta lotu giaman bai bagarap, pait bilong Gok Bilong Magok, na pait bilong Armagedon? Yu save askim yu yet olsem, ‘Taim ol dispela narakain strongpela samting nogut i kamap, bilip bilong mi bai stap strong yet o nogat?’ Sapos yu bin kisim kain tingting olsem, orait yumi bai stori long tok Jisas i mekim, olsem i stap long tim skripsa bilong dispela stadi, na dispela i ken helpim yu. Jisas i tokim ol disaipel bilong em olsem: “Yupela i no ken tingting planti. Yupela i mas bilip.” (Jon 14:1) Strongpela bilip bai helpim yumi long sanap strong maski wanem ol samting i kamap bihain.

 2. (a) Olsem wanem yumi ken strongim bilip bilong yumi? (b) Yumi bai skelim wanem samting long dispela atikol?

² Yumi ken strongim bilip bilong yumi long karim ol hevi bai kamap bihain taim yumi skelim hau yumi karim ol hevi i painim yumi long nau. Taim yumi tingim pasin yumi mekim taim wanpela hevi i painim yumi, yumi ken lain long ol samting we bilip bilong yumi i no strong long en na wok long strongim bilip long ol dispela samting. Long olgeta hevi yumi winim, bilip bilong yumi bai kamap strong moa. Dispela bai helpim yumi long winim ol hevi i painim yumi long bihain. Long dispela atikol, yumi bai skelim 4-pela samting i kamap na i soim klia olsem ol disaipel bilong Jisas i mas kisim strongpela bilip. Yumi bai skelim olsem wanem yumi ken karim ol wankain hevi long nau, na olsem wanem dispela i ken redim yumi long ol hevi bai kamap bihain.

 3. Tok bilong Jisas long Matyu 6:30, 33 i helpim yumi long kliagut long wanem samting?

³ Em nomol long het bilong famili long pilim olsem em i mas lukautim meri na ol pikinini bilong em long kaikai, klos, na haus samting. Dispela em i no isi long mekim long dispela taim bilong hevi. Long sampela hap, kampani i rausim ol wanbilip bilong yumi long wok, na maski ol i wok strong long painim narapela wok, ol i hatwok long kisim nupela wok. Ol narapela i tok nogat long mekim wok mani we i no stret long wanpela Kristen i mekim. Long ol kain taim olsem, yumi mas bilip strong olsem Jehova bai opim rot na yumi bai kisim ol samting famili bilong yumi i nidim. Jisas i tokaut klia long dispela samting long ol disaipel bilong em long Bikpela Tok Long Maunten. (Ritim Matyu 6:30, 33.) Taim yumi save tru olsem Jehova i no inap lusim yumi, yumi bai putim tingting olgeta long mekim ol wok bilong Kingdom. Taim yumi lukim olsem Jehova i lukautim yumi long kaikai na klos samting, yumi bai go klostu moa long em na bilip bilong yumi bai kamap strong moa.

4-5. Wanem samting i helpim wanpela famili taim ol i wari long ol bai kisim we ol kaikai na klos samting ol i nidim?

⁴ Skelim olsem wanem wanpela famili long Veneswela i kisim helpim long Jehova taim ol i tingting planti long hau ol i ken kisim kaikai na klos samting ol i nidim. Bipo Castro famili i save mekim wok long liklik fam bilong ol na kisim mani inap long lukautim ol yet. Bihain, wanpela lain geng i kam wantaim ol gan na kisim haus na graun bilong ol na rausim famili long graun bilong ol. Papa bilong dispela famili, em Miguel, em i tok: “Nau mipela i stap laip long ol samting mipela i planim long wanpela liklik hap graun em mipela i bin boroim. Long olgeta moning mi save askim Jehova long givim kaikai long mipela inap long dispela de.” Laip bilong dispela famili i hatwok tru, tasol ol i bilip strong tru olsem gutpela Papa bilong yumi bai lukautim ol long ol samting ol i nidim long olgeta de, olsem na Castro famili i save go long olgeta miting na autim tok. Ol i putim wok bilong Kingdom i stap nambawan samting long laip bilong ol, na Jehova i givim ol samting ol i nidim.

⁵ Long dispela taim bilong hevi, Miguel na meri bilong em, Yurai, i putim tingting olgeta long hau Jehova i bin lukautim ol. Sampela taim, Jehova i bin yusim ol wanbilip long givim sampela samting bilong helpim ol, o long helpim Miguel long painim wok. Na sampela taim, Jehova i yusim brens ofis long givim ol samting ol i nidim long rot bilong ol rilif saplai. Jehova i no bin lusim ol. Dispela i mekim na ol i lukim olsem famili bilong ol i kamap strong long bilip. Bikpela pikinini meri bilong em Yoselin, i tingim wanpela taim ol i kisim kain helpim long Jehova, na em i tok: “Mi lukim hau Jehova i helpim mipela na dispela i strongim mi tru. Mi tingim Em olsem wanpela pren we mi ken rilai long em long laip olgeta bilong mi.” Na em i tok moa olsem: “Ol hevi em famili bilong mipela i karim i redim mipela long ol bikpela hevi bai kamap bihain.”

 6. Olsem wanem yu ken strongim bilip bilong yu taim yu bungim hevi bilong mani?

⁶ Yu bungim hevi bilong mani? Sapos olsem, ating dispela i bin givim hatwok tru long yu. Maski i olsem, yu ken yusim dispela haptaim long strongim bilip bilong yu. Beten na ritim tok bilong Jisas i stap long Matyu 6:25-34 na tingim tingim long bel. Tingim ekspiriens bilong ol bratasista long nau em Jehova i bin helpim ol taim ol i bisi long mekim wok bilong Em. (1 Kor. 15:58) Taim yu mekim olsem, dispela bai strongim bilip bilong yu olsem Papa bilong yu long heven i bin helpim ol narapela i gat wankain sindaun olsem yu, na em bai helpim yu tu. Em i save long ol samting yu nidim, na em i save hau long givim ol dispela samting long yu. Taim yu lukim Jehova i helpim yu, bilip bilong yu bai kamap strong moa, na yu bai sanap strong long ol bikpela hevi i kamap bihain.—Hab. 3:17, 18.

 7. Olsem Matyu 8:23-26 i kamapim, olsem wanem “bikpela win tru” i traim bilip bilong ol disaipel?

⁷ Taim Jisas na ol disaipel bilong em i bungim taim nogut long solwara, Jisas i yusim dispela samting long helpim ol disaipel bilong em long kliagut olsem ol i mas kisim strongpela bilip. (Ritim Matyu 8:23-26.) Taim win i strong tru na wara i kam insait long bot, Jisas i slip i stap. Ol disaipel i pret nogut tru na ol i kirapim em na askim em long seivim ol, na Bikpela i tok isi long ol olsem: “Yupela ol man i gat liklik bilip, bilong wanem yupela i pret?” Ol disaipel i gat wok long luksave olsem Jehova bai lukautim Jisas na olgeta lain i stap wantaim em na bai ol i no ken kisim bagarap. Yu luksave long skul yumi ken kisim long dispela stori? Strongpela bilip inap helpim yumi long winim ol bikpela hevi na ol bikpela disasta olsem “bikpela win tru.”

8-9. Wanem samting i traim bilip bilong Anel, na wanem samting i helpim em?

⁸ Skelim stori bilong Anel, em wanpela sista long Pueto Riko, long hau em i winim wanpela bikpela hevi na dispela i strongim bilip bilong em. “Bikpela win tru” i bin kamap na i putim hevi long em. Dispela hevi i bin kamap long 2017 taim bikpela win Hariken Maria i bagarapim haus bilong Anel. Dispela hariken i mekim na ol i pinisim Anel long wok. Anel i tok: “Long dispela taim bilong hevi, mi tingting planti tru, tasol mi lain long beten na trastim Jehova na mi no larim bel hevi i daunim mi.”

⁹ Anel i stori long narapela samting we i helpim em long karim hevi, em pasin bilong bihainim tok. Em i tok: “Mi bihainim ol daireksen i kam long oganaisesen na dispela i helpim mi long stap bel isi. Mi lukim han bilong Jehova long ol gutpela tok mi kisim bilong strongim mi, na tu, long ol kaikai na klos samting em bikpela lain brata i givim long mi.” Em i tok moa: “Jehova i givim mi planti samting tru, winim ol samting mi askim long en, na dispela i strongim tru bilip bilong mi.”

10. Yu ken mekim wanem sapos yu bungim taim nogut o yu karim wanpela bikpela hevi i olsem “bikpela win tru”?

¹⁰ Yu bungim taim nogut o wanpela bikpela hevi i kain olsem “bikpela win tru” long laip bilong yu? Ating yu karim hevi long wanpela netrol disasta. O yu karim hevi long wanpela bikpela sik we i mekim yu bel hevi tru na yu no save long wanem samting yu bai mekim. Ating sampela taim yu bai tingting planti, tasol no ken larim dispela i pasim yu long trastim Jehova. Go klostu long em long rot bilong beten. Strongim bilip bilong yu long rot bilong tingim ol taim bipo we Jehova i bin helpim yu. (Sng. 77:11, 12) Yu ken save tru olsem em i no inap lusim yu—long nau tu, na inap oltaim bihain, em i no inap lusim yu.

11. Wai na yumi mas tingting strong long bihainim tok bilong ol man i go pas long yumi?

¹¹ Wanem narapela samting inap helpim yu long karim ol hevi? Olsem Anel i tok, pasin bilong bihainim tok. Lain long trastim ol lain em Jehova na Jisas i trastim ol. Sampela taim, ol man ol i makim bilong go pas long yumi inap givim sampela daireksen we yumi yet i no kliagut long en. Tasol tingim, Jehova i save blesim pasin bilong bihainim tok. Yumi kisim save long Baibel na ol ekspiriens bilong ol bratasista i holimpas bilip olsem pasin bilong bihainim tok i save seivim laip bilong ol man. (Kis. 14:1-4; 2 Sto. 20:17) Tingim tingim long bel ol kain eksampel olsem. Dispela bai strongim yu long wok gut wantaim oganaisesen bilong God long nau na long bihain tu. (Hib. 13:17) Taim yu mekim olsem, yu no inap pret long dispela traipela hevi tru em klostu nau bai kamap.—Prov. 3:25.

12. Olsem Luk 18:1-8 i kamapim, taim yumi karim hevi bilong pasin i no stret, bilong wanem yumi mas i gat strongpela bilip?

¹² Jisas i save olsem pasin i no stret bai traim bilip bilong ol disaipel bilong em. Bilong helpim ol long karim dispela hevi, em i mekim wanpela tok piksa i stap long Buk Luk. Jisas i stori long wanpela wido i wok yet long askim jas long helpim em, maski dispela jas i no save mekim stretpela pasin. Em i bilip olsem sapos em i wok yet long askim, jas bai helpim em. Bihain jas i harim singaut bilong em na mekim samting em i askim long en. Yumi inap kisim wanem skul long dispela stori? Jehova i save mekim stretpela pasin. So Jisas i tok: “Olsem wanem? Ol manmeri God i bin makim na ol i wok long krai long em long san na nait, ating God bai i no stretim rong ol arapela i mekim long ol, a?” (Ritim Luk 18:1-8.) Bihain Jisas i tok moa olsem: “Taim Pikinini bilong man i kam, bai em i lukim trupela bilip i stap long graun o nogat?” Taim yumi karim hevi bilong pasin i no stret, yumi mas pruvim olsem yumi gat strongpela bilip wankain olsem dispela wido long rot bilong i no les kwik na wok yet long beten strong. Taim yumi gat kain strongpela bilip, yumi ken save olsem long taim stret, Jehova bai helpim yumi. Yumi mas bilip tu long strong bilong beten. Sampela taim, beten bilong yumi bai kamapim ol samting em yumi no ting long en.

13. Olsem wanem beten i bin helpim wanpela famili em ol man i bin mekim pasin i no stret long ol?

¹³ Tingim stori bilong wanpela sista nem bilong em Vero, em i save stap long Demokratik Ripablik Bilong Kongo. Vero, man bilong em husat i no Witnes, na pikinini meri bilong em i gat 15 krismas, ol i mas ranawe lusim ples taim wanpela lain soldia i kam pait long dispela ples. Long rot, dispela lain soldia i blokim rot na stopim famili na tok long kilim ol i dai. Taim Vero i stat long krai, pikinini meri bilong em i mekim isi bel bilong em long rot bilong beten strong, na oltaim em i wok long kolim nem bilong Jehova long beten. Taim em i beten pinis, komanda bilong dispela lain soldia i askim dispela yangpela meri olsem: “Yangpela meri, husat i skulim yu long beten?” Em i tok “Mama bilong mi skulim mi, em i bihainim pasin bilong beten i stap long Matyu 6:9-13.” Komanda i tok: “Yangpela meri, yu na papamama bilong yu i ken go wantaim bel isi, na Jehova God bilong yu i ken lukautim yu!”

14. (a) Wanem samting inap traim bilip bilong yumi? (b) Wanem samting inap helpim yumi long sanap strong na karim hevi?

¹⁴ Ol kain ekspiriens i skulim yumi olsem beten i gat strong. Tasol olsem wanem sapos God i no bekim hariap beten bilong yu? Olsem wido long tok piksa bilong Jisas, wok yet long beten, na bilip tru olsem God i no inap lusim yu, na em bai bekim beten bilong yu long taim i stret na long rot em yet i makim. Wok yet long askim Jehova long holi spirit bilong em. (Fili. 4:13) Tingim, klostu nau Jehova bai givim yu planti gutpela blesing na yu bai lusim tingting long ol hevi i bin painim yu long bipo. Taim yu larim Jehova i helpim yu long sanap strong na karim ol hevi, yu bai kamap strong long bilip na yu ken karim ol narapela hevi i painim yu long bihain.—1 Pita 1:6, 7.

15. Olsem Matyu 17:19, 20 i kamapim, ol disaipel bilong Jisas i bungim wanem ol hatwok?

¹⁵ Jisas i skulim ol disaipel bilong em olsem bilip inap helpim ol long winim ol hevi. (Ritim Matyu 17:19, 20.) Wanpela taim ol i no inap long rausim spirit nogut, maski long ol narapela taim paslain long dispela, ol i bin mekim olsem. Wai na i olsem? Jisas i tokim ol olsem ol i mas i gat strongpela bilip. Em i tokim ol olsem sapos ol i gat strongpela bilip, ol inap winim ol bikpela hatwok, maski ol dispela hatwok i bikpela olsem ol maunten! Long nau, yumi tu inap karim ol hevi i bikpela tru olsem ol maunten na i givim hatwok long yumi.

16. Olsem wanem bilip i bin helpim Geydi long karim hevi bilong man bilong em i dai na bikpela bel sori?

¹⁶ Tingim stori bilong Geydi, wanpela sista long Guatemala. Ol man i kilim i dai man bilong em Edi taim tupela i pinis long miting bilong kongrigesen na kam bek long haus. Olsem wanem bilip bilong Geydi i bin helpim em long karim dispela bikpela bel sori tru? Em i tok: “Beten i helpim mi long putim hevi bilong mi long han bilong Jehova, dispela i givim bel isi long mi. Mi lukim Jehova i lukautim mi long rot bilong ol wanfamili na ol pren bilong mi long kongrigesen. Mi bisi long wok bilong Jehova, na dispela i daunim pen bilong mi na helpim mi long mekim ol wok inap long wan wan de na mi no wari tumas long de tumora. Bihain long mi karim dispela hevi, mi lain olsem maski wanem hevi i painim mi long bihain, mi inap sanap strong na winim long rot bilong helpim i kam long Jehova, Jisas, na oganaisesen bilong God.”

17. Yumi ken mekim wanem sapos yumi karim hevi i bikpela olsem maunten?

¹⁷ Olsem wanem? Yu wok long krai sori long wanpela long famili i dai? Lusim haptaim long strongim bilip bilong yu long kirap bek long rot bilong ritim ol stori bilong kirap i stap long Baibel. Yu bel hevi long wanpela wanfamili i raus long kongrigesen? Stadi long Baibel bilong strongim bilip bilong yu olsem rot Jehova i makim bilong stretim man, dispela em gutpela rot tru. Maski wanem wanem hevi i painim yu, yusim dispela olsem rot bilong strongim bilip bilong yu. Tokim Jehova long ol samting yu pilim long bel. Na no ken stap wanpis, oltaim stap klostu long ol bratasista bilong yu. (Prov. 18:1) Yu ken mekim ol wok samting we bai helpim yu long karim hevi i painim yu, maski bel hevi inap mekim yu krai sampela taim. (Sng. 126:5, 6) Oltaim wok yet long mekim ol samting yu save mekim olsem go long ol miting, autim tok, na ritim Baibel. Na oltaim putim tingting olgeta long ol gutpela blesing Jehova i laik givim long yu long bihain. Taim yu lukim hau Jehova i helpim yu, bilip bilong yu long em bai kamap strong moa.

18. Sapos yu lukim olsem yu sot long bilip, yu ken mekim wanem?

¹⁸ Sapos ol hevi i painim yu long bipo o long nau i soim olsem yu sot long bilip long sampela samting, no ken bel hevi. Tingim dispela olsem rot bilong strongim bilip bilong yu. Mekim wankain tok olsem ol aposel bilong Jisas, ol i tok: “Yu mas mekim bilip bilong mipela i kamap bikpela moa.” (Luk 17:5) Na tu, tingim ol eksampel em yumi stori long ol long dispela atikol. Olsem Miguel na Yurai, tingim olgeta taim Jehova i save helpim yu. Olsem pikinini meri bilong Vero na Anel, beten strong long Jehova, moa yet long taim yu bungim wanpela bikpela hevi. Na olsem Geydi, luksave olsem Jehova inap givim yu helpim em yu nidim long rot bilong ol wanfamili o ol pren. Taim yu lukim hau Jehova i helpim yu long karim ol hevi i painim yu long nau, yu bai bilip strong olsem em bai helpim yu long karim wanem ol hevi i painim yu long bihain.

19. Jisas i save tru long wanem samting, na yu ken save tru long wanem samting?

¹⁹ Jisas i tokim ol disaipel long ol samting we ol i sot long bilip long en, tasol em i bilip tru olsem Jehova bai helpim ol long sanap strong na karim wanem ol hevi i painim ol long bihain. (Jon 14:1; 16:33) Jisas i save tru olsem strongpela bilip bai helpim bikpela lain manmeri long abrusim taim bilong bikpela hevi tru. (Rev. 7:9, 14) Yu bai insait long dispela bikpela lain? Yes, long bikpela pasin helpim bilong Jehova, yu ken insait long dispela lain, sapos yu yusim olgeta rot Jehova i givim yumi long nau long kisim na holimpas strongpela bilip!—Hib. 10:39.