Yu Insait Long Dispela Lain God i Laikim Tru?
“Man i kisim lo bilong mi na i bihainim gut, dispela man em i laikim mi tru. Na man i laikim mi, Papa bilong mi bai i laikim em.”—JON 14:21.
1, 2. (a) Jehova i bin mekim wanem bilong soim olsem em i laikim tru ol manmeri? (b) Jisas i kamapim wanem samting long nait bilong Nisan 14, 33 C.E.?
JEHOVA i save laikim tru ol manmeri em i bin wokim ol. Em i laikim tumas olgeta manmeri bilong graun, olsem na “em i givim dispela wanpela Pikinini long ol . . . [na bai] olgeta manmeri i bilip long em ol i no ken lus. . . . Bai ol i kisim laip i stap gut oltaim oltaim.” (Jon 3:16) Taim bilong mekim Memorial bilong tingim i dai bilong Krais em i wok long kam klostu, olsem na ol trupela Kristen i mas pilim moa yet olsem Jehova “i laikim yumi . . . na em i bin salim Pikinini Man bilong en i kam long graun bilong lusim ol sin bilong yumi.”—1 Jon 4:10.
2 Long nait bilong Nisan 14, 33 C.E., Jisas na ol 12-pela aposel i bung long wanpela rum antap long wanpela haus long Jerusalem bilong mekim Pasova bilong tingim taim God i bin kisim bek ol Israel long Isip. (Matyu 26:17-20) Taim ol i mekim pinis dispela bung bilong ol Juda, Jisas i salim Judas Iskariot i go na Em i kamapim wanpela bung bilong kaikai em bihain ol Kristen bai mekim olsem Memorial bilong tingim i dai bilong Krais.a Jisas i kisim bret i no gat yis wantaim retpela wain bilong makim skin na blut bilong em na em i givim long ol 11-pela aposel i stap yet na ol i kaikai. Matyu, Mak, na Luk, em ol man bilong raitim Gutnius, na aposel Pol, ol i stori long ol samting Jisas i bin mekim long dispela bung. Pol i kolim dispela kaikai olsem “kaikai tru bilong Bikpela.”—1 Korin 11:20; Matyu 26:26-28; Mak 14:22-25; Luk 22:19, 20.
3. Stori bilong aposel Jon long ol laspela aua bilong Jisas taim em i stap wantaim ol disaipel long rum antap, em i narapela kain olsem wanem long stori bilong ol narapela disaipel?
3 Ating aposel Jon i no stori long pasin bilong tilim bret na wain, long wanem, taim em i raitim Gutnius bilong em (olsem 98 C.E.), ol Kristen bilong pastaim ol i save pinis long dispela pasin. (1 Korin 11:23-26) Tasol Jon wanpela tasol i stori long sampela tok na pasin Jisas i bin mekim paslain na bihain stret long taim em i kamapim bung bilong Memorial, em ol bikpela samting yumi mas save long en. Ol dispela tok spirit holi i kirapim Jon long raitim i stap long 5-pela sapta long Gutnius bilong em. Ol i kamapim klia wanem kain man God i save laikim. Orait nau yumi ken skelim Jon sapta 13 i go 17.
Kisim Skul Long Pasin Sori Bilong Jisas
4. (a) Olsem wanem Jon i kamapim strong bikpela tok Jisas i givim long ol disaipel taim em i kamapim Memorial? (b) Wanem wanpela bikpela as na Jehova i laikim Jisas?
4 Pasin bilong laikim tru narapela em i wanpela bikpela tok long ol dispela sapta i kamapim ol tok Jisas i givim long ol disaipel taim em i laik lusim ol. Dispela tok “laikim” i stap olsem 30 taim long ol dispela sapta. Pasin bilong Jisas long laikim tru Papa bilong em, Jehova, na ol disaipel, em i kamap klia moa yet long ol dispela sapta. Fopela Gutnius olgeta i stori long Jisas i laikim Jehova, tasol Gutnius bilong Jon tasol i kamapim dispela tok bilong Jisas: “Mi laikim tru Papa.” (Jon 14:31) Na Jisas i tok Jehova i laikim em, na em i tokaut long as bilong dispela, olsem: “Papa i save laikim mi tumas, na long wankain pasin mi bin laikim yupela. . . . Sapos yupela i bihainim gut ol lo na tok bilong mi, orait yupela bai i stap insait long laikim bilong mi, olsem mi bin bihainim gut ol lo na tok bilong Papa bilong mi, na mi stap insait long laikim bilong em.” (Jon 15:9, 10) Em nau, Jehova i laikim tumas Pikinini bilong em, long wanem, Pikinini i save bihainim gut ol tok bilong Em. Em samting olgeta disaipel bilong Jisas Krais i mas tingim, a?
5. Jisas i mekim wanem bilong kamapim klia olsem em i laikim tumas ol disaipel bilong em?
5 Long kirap bilong stori long laspela taim Jisas i bung wantaim ol aposel, Jon i kamapim klia olsem Jisas i laikim tru ol aposel. Jon i tok: “[Pasova] i no kamap yet, na Jisas i save, taim i kamap pinis bilong em i mas lusim dispela graun na i go long Papa. Em i laikim tumas ol manmeri bilong en . . . i go inap long taim em i dai.” (Jon 13:1) Long dispela nait, Jisas i skulim ol disaipel long mekim wok bilong helpim ol narapela, na ol i no inap lusim tingting long samting Jisas i mekim. Em i wasim lek bilong ol. Em samting olgeta wan wan i mas i gat laik long mekim long Jisas na ol brata bilong ol, tasol ol i no mekim. Jisas yet i mekim dispela wok i no gat nem liklik, na nau em i tokim ol disaipel: “Mi Bikpela na mi Tisa, na mi wasim lek bilong yupela. Orait yupela tu i mas wasim lek bilong ol arapela man bilong lain bilong yumi. Mi soim pasin long yupela, na yupela tu i mas mekim wankain pasin olsem nau mi mekim long yupela.” (Jon 13:14, 15) Ol trupela Kristen i mas i gat laik long helpim ol brata na amamas long mekim olsem.—Matyu 20:26, 27; Jon 13:17.
Bihainim Nupela Lo
6, 7. (a) Jon i tokaut long wanem bikpela samting bilong taim Jisas i kamapim Memorial? (b) Jisas i givim wanem nupela lo long ol disaipel? Dispela lo i nupela olsem wanem?
6 Stori bilong Jon long samting i bin kamap long rum antap long nait bilong Nisan 14, em tasol i kamapim olsem Judas Iskariot i go ausait. (Jon 13:21-30) Taim yumi skelim 4-pela Gutnius wantaim, yumi kisim save olsem Jisas i bin kamapim Memorial bihain long taim dispela man bilong kamapim em long ol birua i go ausait. Orait nau em i toktok longtaim liklik wantaim ol gutpela aposel na em i givim laspela tok long ol. Taim yumi mekim ol samting bilong redi long go long Memorial, yumi mas i gat laik long save long ol dispela tok bilong Jisas, long wanem, yumi laik insait long dispela lain God i laikim tru.
7 Taim Jisas i kamapim pinis Memorial, namba wan samting em i tokim ol disaipel long mekim, em samting i nupela long ol. Em i tok: “Nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:34, 35) Dispela lo i nupela olsem wanem? Bihain liklik, long dispela nait yet, Jisas i tokaut klia olsem: “Lo bilong mi em i olsem. Yupela wan wan i mas laikim tru ol arapela, long wankain pasin olsem mi bin laikim yupela. Sapos wanpela man i laikim tumas ol pren bilong en na i lusim laip bilong em yet bilong helpim ol, orait dispela pasin bilong laikim ol arapela i winim tru ol arapela pasin bilong laikim ol arapela manmeri.” (Jon 15:12, 13) Lo Bilong Moses i tokim ol Israel long ol i mas ‘laikim tru ol wantok olsem ol i laikim ol yet.’ (Wok Pris 19:18) Tasol dispela lo bilong Jisas i go moa. Ol Kristen i mas laikim ol narapela long wankain pasin olsem Krais i bin laikim ol—ol i mas redi long lusim laip bilong ol bilong helpim ol brata.
8. (a) Man i gat pasin bilong daunim laik bilong em yet na laikim tru ol narapela, em i mas redi long mekim wanem? (b) Ol Witnes Bilong Jehova i save mekim wanem bilong soim olsem ol i gat dispela kain pasin bilong laikim tru ol narapela?
8 Taim bilong Memorial em gutpela taim bilong skelim yumi wan wan yet na yumi olgeta wantaim olsem kongrigesen, na bai yumi ken save yumi gat dispela mak bilong lotu Kristen tru—olsem pasin bilong laikim tru narapela olsem Krais i bin mekim—o nogat. Olsem na ol Kristen i mas redi long i dai bilong helpim ol brata bilong ol, na sampela Kristen i bin mekim tru tru dispela samting na bai ol i no ken kamapim ol brata long ol birua. Na yumi mas redi long daunim sampela laik bilong yumi yet bilong helpim ol brata na ol narapela man. Aposel Pol i stap gutpela piksa bilong dispela samting. (2 Korin 12:15; Filipai 2:17) Long olgeta hap bilong graun ol man i save long pasin bilong ol Witnes Bilong Jehova long daunim laik bilong ol yet—ol i save helpim ol brata bilong ol na ol narapela man, na ol i wok strong long autim tok i tru bilong Baibel.b—Galesia 6:10.
Pas Gut Wantaim Jehova na Jisas
9. Yumi laik pas gut tru wantaim God na Pikinini bilong em, olsem na yumi amamas long mekim wanem?
9 Sapos Jehova na Pikinini bilong em, Krais Jisas, i laikim tru yumi, dispela em i gutpela samting tru na i no gat narapela gutpela samting i winim dispela. Tasol bilong ol i ken laikim tru yumi na yumi pilim tru dispela samting, i gat sampela samting yumi mas mekim. Long laspela nait Jisas i stap wantaim ol disaipel, em i tok: “Man i kisim lo bilong mi na i bihainim gut, dispela man em i laikim mi tru. Na man i laikim mi, Papa bilong mi bai i laikim em. Na mi tu bai mi laikim em, na bai mi soim mi yet long em.” (Jon 14:21) Yumi laik pas gut tru wantaim God na Pikinini bilong em, olsem na yumi amamas long bihainim ol lo bilong ol, wanpela em dispela nupela lo long daunim sampela laik bilong yumi yet na laikim tru ol narapela, na dispela lo Jisas i givim long ol disaipel taim em i kirap bek pinis, olsem ol i mas “autim tok long ol manmeri” na helpim ol man i bilip long gutnius long “kamap disaipel.”—Aposel 10:42; Matyu 28:19, 20.
10. Rot i op long ol Kristen God i makim na “ol arapela sipsip” i ken stap olsem wanem wantaim Jehova na Jisas?
10 Bihain, long dispela nait yet, Jisas i bekim wanpela askim bilong gutpela aposel Judas (Tadius), olsem: “Sapos man i laikim mi tru, em bai i bihainim gut tok bilong mi. Na Papa bilong mi bai i laikim dispela man. Na bai mitupela i kam long em na i stap wantaim em oltaim oltaim.” (Jon 14:22, 23) Ol Kristen God i makim na i singautim ol long mekim wok king wantaim Krais long heven, taim ol i stap yet long graun, long dispela taim tu ol i save pas gut tru wantaim Jehova na Pikinini bilong em. (Jon 15:15; 16:27; 17:22; Hibru 3:1; 1 Jon 3:2, 24) Tasol ol poroman bilong ol bilong “ol arapela sipsip,” em ol i gat tingting long stap oltaim long graun, ol tu inap pas gut wantaim “wasman” bilong ol, Jisas Krais, na God bilong ol, Jehova, sapos ol i bihainim tok bilong tupela.—Jon 10:16; Song 15:1-5; 25:14.
“Yupela i No Man Bilong Dispela Graun”
11. Jisas i givim wanem tok lukaut long ol disaipel bilong em?
11 Laspela taim Jisas i bung wantaim ol gutpela disaipel paslain long taim em i dai, em i givim tok lukaut olsem: Sapos man i stap olsem man God i laikim, orait ol man bilong dispela graun bai i birua long em. Jisas i tok: “Sapos ol manmeri bilong graun i birua long yupela, orait yupela i no ken lusim tingting, pastaim ol i bin birua long mi tu. Sapos yupela i stap olsem ol man bilong dispela graun, orait ol manmeri bilong graun ol inap laikim yupela olsem ol lain bilong ol yet. Tasol yupela i no man bilong dispela graun. Nogat. Mi makim yupela pinis bai yupela i lusim pasin bilong dispela graun. Olsem na ol manmeri bilong graun i save birua long yupela. Yupela i mas tingim gut dispela tok mi mekim long yupela. Wokboi i no winim bikman bilong en. Sapos ol i bin mekim nogut long mi, orait ol bai i mekim nogut long yupela tu. Na sapos ol i bin bihainim tok bilong mi, orait ol bai i bihainim tok bilong yupela tu.”—Jon 15:18-20.
12. (a) I gat wanem as na Jisas i toksave long ol disaipel olsem ol man bilong dispela graun bai i birua long ol? (b) Taim bilong Memorial i wok long kam klostu, olsem na i gutpela sapos yumi olgeta i tingim wanem samting?
12 Jisas i givim dispela tok lukaut na bai ol dispela 11-pela aposel na olgeta trupela Kristen i kam bihain long ol i no ken bel hevi na lusim bilip taim ol man bilong dispela graun i birua long ol. Em i tok moa: “Mi no laik bai yupela i lusim bilip, olsem na mi bin mekim dispela tok long yupela. Bai ol i tambuim yupela long kam lotu wantaim ol. Na bihain bai taim i kamap, na ol man i kilim yupela i dai, ol bai i ting ol i mekim gutpela wok bilong God. Ol i no save long Papa, na ol i no save long mi. Olsem na ol bai i mekim ol dispela pasin.” (Jon 16:1-3) Wanpela dikseneri bilong Baibel i tok dispela tok ol i tanim hia olsem “lusim bilip,” em i makim olsem “man i no bilip moa long narapela na em i lusim em, maski i stret em i mas bilip long em na bihainim tok bilong em.” Taim bilong Memorial i wok long kam klostu, olsem na i gutpela sapos yumi olgeta i tingim i stap bilong ol gutpela man bilong bipo, na bilong nau tu, na bihainim pasin bilong ol long sanap strong long taim bilong hevi. Maski ol man i birua na mekim nogut long yu, yu no ken larim dispela i mekim na yu lusim Jehova na Jisas. Pasim tok long bel olsem yu bai bilip tru long tupela na bihainim tok bilong ol.
13. Jisas i beten askim Papa long lukautim ol disaipel long wanem samting?
13 Taim Jisas i laik lusim dispela rum antap na em i mekim laspela beten, em i tokim Papa bilong em: “Tok bilong yu, mi givim pinis long ol. Na ol manmeri bilong dispela graun ol i save birua long ol, long wanem, ol manmeri bilong mi ol i no bilong dispela graun, olsem mi tu mi no bilong dispela graun. Mi no askim yu long kisim ol i go aut long dispela graun. Nogat. Mi beten long yu long yu ken lukautim ol, na man nogut i no ken bagarapim ol. Ol i no bilong dispela graun, olsem mi yet mi no bilong dispela graun.” (Jon 17:14-16) Yumi ken bilip tru olsem Jehova i save strongim na was gut long ol manmeri em i save laikim, em ol i no insait long ol samting bilong dispela graun.—Aisaia 40:29-31.
Stap Insait Long Sori Bilong Papa na Pikinini
14, 15. (a) Jisas i tok em i kain olsem wanem samting? Em i narapela kain long wanem “rabis diwai wain bilong bus”? (b) Husat ol i “han” bilong “diwai wain tru”?
14 Taim Jisas i toktok wantaim ol gutpela disaipel bilong em long nait bilong Nisan 14, em i tok em yet em “diwai wain tru”—em i narapela kain long ol Israel ol i no stap gut long God na ol i olsem “rabis diwai wain bilong bus.” Em i tok: “Mi yet mi diwai wain tru. Na Papa bilong mi em i papa bilong gaden.” (Jon 15:1) Planti handet yia paslain, profet Jeremaia i kamapim ol tok Jehova i bin mekim long bikhetlain Israel, olsem: “Pastaim yu olsem wanpela gutpela diwai wain mi bin planim. . . . Tasol olsem wanem na nau yu kamap rabis diwai wain bilong bus?” (Jeremaia 2:21) Na profet Hosea i tok, ol Israel “i olsem gutpela diwai wain [i wok long go nogut] i karim planti kaikai tumas. . . . Ol i man bilong giaman tasol.”—Hosea 10:1, 2.
15 Ol Israel i no kamapim kaikai bilong trupela lotu, nogat; ol i tromoi lotu i tru na kamapim kaikai bilong helpim ol yet. Tripela de paslain long laspela bung Jisas i mekim wantaim ol gutpela disaipel blong em, em i tokim ol hetman Juda, em ol i man bilong giaman, olsem: “Mi tokim yupela, God bai i rausim kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.” (Matyu 21:43) Dispela nupela lain em “Israel tru bilong God,” i gat 144,000 Kristen long en, em ol i olsem “han” bilong dispela “diwai wain tru,” Krais Jisas.—Galesia 6:16; Jon 15:5; KTH 14:1, 3.
16. Jisas i kirapim ol 11-pela gutpela aposel long mekim wanem? Olsem wanem long gutpela lain remnan nau long dispela taim bilong las de?
16 Jisas i tokim ol 11-pela aposel i stap wantaim em long rum antap, olsem: “Olgeta han bilong mi i no save karim kaikai, em Papa i save rausim. Na olgeta han i save karim kaikai, em Papa i save rausim ol lip samting bilong en i nogut, na mekim em i kamap klin, bai em i ken karim planti kaikai. Yupela i mas pas long mi, na bai mi pas long yupela. Sapos han bilong diwai wain em i no pas long diwai, orait em i no inap karim kaikai. Olsem tasol, sapos yupela i no pas long mi, yupela tu i no inap karim kaikai.” (Jon 15:2, 4) Ol samting i bin kamap long lain bilong Jehova long nau i soim olsem lain remnan bilong ol Kristen God i makim, ol i pas yet long Het bilong ol, Krais Jisas. (Efesus 5:23) Ol i bin larim God i klinim na stretim ol. (Malakai 3:2, 3) Kirap long 1919 na i kam, ol i bin kamapim planti kaikai bilong Kingdom—pastaim ol i bungim sampela Kristen moa God i makim, na long 1935 ol i kirap bungim bikpela lain poroman bilong ol, olsem “planti manmeri tru,” em ol i wok long kamap planti moa.—KTH 7:9; Aisaia 60:4, 8-11.
17, 18. (a) Wanem tok bilong Jisas i save helpim ol Kristen God i makim, na ol arapela sipsip, long stap insait long sori bilong Jehova? (b) Taim yumi go long Memorial, dispela bai helpim yumi olsem wanem?
17 Sampela tok moa bilong Jisas i go long olgeta Kristen God i makim wantaim ol poroman bilong ol, olsem: “Yupela i mas karim planti kaikai na i stap disaipel bilong mi . . . Papa i save laikim mi tumas, na long wankain pasin mi bin laikim yupela. . . . Sapos yupela i bihainim gut ol lo na tok bilong mi, orait yupela bai i stap insait long laikim bilong mi, olsem mi bin bihainim gut ol lo na tok bilong Papa bilong mi, na mi stap insait long laikim bilong em.”—Jon 15:8-10.
18 Yumi olgeta i laik stap insait long sori bilong God, na dispela i save kirapim yumi long mekim wok Kristen na karim kaikai. Yumi save mekim olsem long pasin bilong autim “gutnius bilong kingdom” long olgeta taim rot i op. (Matyu 24:14) Na long sindaun bilong yumi, yumi save wok strong long bihainim “ol gutpela pasin” spirit holi i kamapim. (Galesia 5:22, 23) Taim yumi go long Memorial bilong tingim i dai bilong Jisas, dispela bai strongim tingting bilong yumi long mekim ol dispela samting, long wanem, dispela bung bai kirapim yumi long tingim gen pasin bilong God na Krais long laikim tru yumi.—2 Korin 5:14, 15.
19. Stori i kamap bihain long dispela bai toktok long wanem samting moa bilong helpim yumi?
19 Taim Jisas i kamapim Memorial pinis, em i tok promis olsem Papa bai salim wanpela ‘helpim,’ em spirit holi, i kam long ol gutpela disaipel bilong em. (Jon 14:26) Stori i kamap bihain long dispela bai toktok long ol wok dispela spirit i save mekim bilong helpim ol Kristen God i makim na ol arapela sipsip long stap insait long sori bilong Jehova.
[Ol Futnot]
a Long yia 2002, long kalenda bilong Baibel, Nisan 14 i kirap taim san i go daun pinis long Fonde, Mas 28. Ol Witnes Bilong Jehova long olgeta hap bai bung long dispela nait bilong tingim i dai bilong Bikpela bilong ol, Jisas Krais.
b Lukim buk Jehovah’s Witnesses—Proclaimers of God’s Kingdom, em ol Witnes Bilong Jehova i wokim, sapta 19 na 32.
Ol Askim Bilong Tingim Gen
• Jisas i mekim wanem bilong skulim ol disaipel long mekim wok bilong helpim ol narapela?
• Taim bilong Memorial em i gutpela taim bilong skelim yumi yet long wanem samting?
• Toksave bilong Jisas olsem ol man bilong dispela graun bai birua na mekim nogut long yumi, bilong wanem yumi no ken larim dispela i mekim na yumi lusim bilip?
• Husat i “diwai wain tru”? Husat ol i “han”? Ol i mas mekim wanem?
[Piksa long pes 15]
Jisas i skulim ol aposel long pasin bilong laikim tru ol narapela
[Ol Piksa long pes 16, 17]
Ol disaipel bilong Krais i save bihainim tok bilong em long daunim sampela laik bilong ol yet na laikim tru ol narapela