Wok Yet Long “Karim Planti Kaikai”
1 Jisas i mekim tok piksa na i tok em yet i olsem diwai wain tru, Papa bilong em i Papa bilong gaden wain, na ol disaipel em God i bin makim, ol i han bilong diwai wain i karim kaikai. Taim Jisas i stori long wok bilong Papa bilong gaden, em i kamapim klia olsem em i bikpela samting long ol man i mas pas strong long diwai wain. (Jo. 15:1-4) Dispela i skulim yumi olsem, olgeta man i pas gut wantaim Jehova, ol i mas stap olsem wanpela han bilong “diwai wain tru,” em Jisas Krais, na ol i mas karim gut kaikai. Yumi mas wok yet long kamapim ol pasin em holi spirit i as bilong en, na karim yet planti kaikai bilong Kingdom.—Ga. 5:22, 23; Mt. 24:14; 28:19, 20.
2 Ol Pasin Holi Spirit i As Bilong En: Pasin bilong yumi long kamapim ol pasin em holi spirit i as bilong en, i soim olsem yumi wok long kamap strong long ol samting bilong spirit o nogat. Olsem wanem? Yu wok long kamapim ol pasin em spirit bilong God i as bilong en long rot bilong stadi na tingim tingim long bel Tok Bilong God long olgeta taim? (Fl. 1:9-11) No ken surik long beten askim God long givim holi spirit long yu, em dispela inap helpim yu long kamapim ol pasin i litimapim nem bilong Jehova na i helpim yu long wok yet long kamap strong long ol samting bilong spirit.—Lu. 11:13; Jo. 13:35.
3 Taim yumi wok long kamapim ol pasin holi spirit i as bilong en, dispela bai helpim yumi long givim bel moa long wok autim tok. Olsem: Pasin laikim na bilip i kirapim yumi long makim taim long go oltaim long wok autim tok, maski yumi gat planti wok bilong mekim. Ol pasin olsem bel isi, i no belhat kwik, pasin helpim, stap isi, na daunim laik bilong olpela bel, i helpim yumi long mekim gutpela pasin long ol man i birua long yumi. Pasin bilong amamas i helpim yumi long kisim amamas long wok autim tok maski sampela man i no laik harim tok.
4 Kaikai Bilong Kingdom: Yumi laik kamapim tu kaikai bilong Kingdom. Yumi ‘givim biknem long God, na dispela pasin i mas i stap olsem ofa yumi save givim long God.’ (Hi. 13:15) Yumi mekim olsem long rot bilong givim bel na sanap strong long autim gutnius. Olsem wanem? Yu wok strong long kamapim sampela kaikai moa bilong Kingdom long rot bilong mekim gut moa wok bilong autim tok?
5 Jisas i tok kaikai em ol gutpela disaipel bilong em bai karim i narapela narapela. (Mt. 13:23) Olsem na yumi no ken skelim yumi yet wantaim ol narapela, nogat, yumi mas givim nambawan gutpela samting bilong yumi yet long Jehova. (Ga. 6:4) Sapos yumi skelim gut sindaun bilong yumi yet taim yumi ritim Tok Bilong God, dispela bai helpim yumi long wok yet long litimapim nem bilong Jehova na “karim planti kaikai.”—Jo. 15:8.