Strongim Bel Long Rot Bilong Pasin Laikim

“Dispela Spirit God i bin givim long yumi, em i no spirit bilong mekim yumi i pret. Nogat. Em i Spirit bilong givim strong long yumi na bilong mekim yumi i laikim tru ol arapela.”​​—2 TIMOTI 1:7.

1, 2. (a) Pasin laikim inap kirapim man long mekim wanem? (b) Olsem wanem na samting Jisas i mekim i kamapim olsem em i gat strongpela bel tru?

TUPELA nupela marit i go glas long solwara klostu long wanpela taun long is kos bilong Australia. Taim ol i laik kam antap, wanpela bikpela sak i spit i kam long meri. Man i subim meri i go na larim sak i kisim em yet. Long fiuneral, meri i tok: “Em i lusim laip bilong em bilong helpim mi.”

² Yes, pasin laikim inap kirapim man long strongim bel na mekim samting i hatwok tru long mekim. Jisas Krais yet i tok: “Sapos wanpela man i laikim tumas ol pren bilong en na i lusim laip bilong em yet bilong helpim ol, orait dispela pasin bilong laikim ol arapela i winim tru ol arapela pasin bilong laikim ol arapela manmeri.” (Jon 15:13) Sampela aua bihain long Jisas i mekim dispela tok, em i lusim laip bilong em yet, tasol i no bilong helpim wanpela man tasol, nogat; em i dai bilong helpim planti man. (Matyu 20:28) Tasol i no olsem samting i kamap wantu tasol na nau Jisas i kirap strongim bel na lusim laip bilong em, nogat. Paslain tru long em i dai, em i save olsem ol man bai tok bilas na mekim nogut tru long em, na maski em i no bin mekim wanpela rong, ol bai mekim kot long em na kilim em i dai long wanpela pos diwai. Em i redim tu ol disaipel bilong em long dispela samting. Em i tok: “Nau yumi go long Jerusalem, na ol bai i givim Pikinini Bilong Man long han bilong ol bikpris na ol saveman bilong lo. Na bai ol i mekim kot long em na pasim tok long kilim em i dai. Na bai ol i givim em long ol man bilong ol arapela lain. Na ol dispela man bai i tok bilas long em na spetim em na wipim em na kilim em i dai.”​​—Mak 10:​33, 34.

 3. Wanem samting i mekim na Jisas i gat strongpela bel?

³ Wanem samting i mekim na Jisas i gat strongpela bel? Em i gat strongpela bilip na pasin bilong pret long God. (Hibru 5:7; 12:​2) Tasol samting i strongim moa yet bel bilong em, em pasin bilong em long laikim tru God na ol man. (1 Jon 3:​16) Sapos yumi gat kain pasin laikim olsem, na strongpela bilip na pasin bilong pret long God, bai yumi tu inap strongim bel olsem Krais i bin mekim. (Efesus 5:2) Olsem wanem yumi inap kisim dispela kain pasin laikim? Yumi mas save long husat i As bilong en.

“Pasin Bilong Laikim Ol Arapela Em i Pasin Bilong God”

 4. Olsem wanem yumi ken tok Jehova em i As bilong pasin laikim?

⁴ Pasin laikim em pasin bilong Jehova na em i As bilong dispela pasin. Aposel Jon i tok: “Ol pren, yumi wan wan i mas laikim tru ol arapela, long wanem, pasin bilong laikim ol arapela em i pasin bilong God. Na man i laikim tru ol arapela, em i pikinini bilong God, na em i save tru long God. God yet em i as bilong dispela pasin bilong laikim ol arapela. Olsem na man i no save laikim ol arapela, em i no save long God.” (1 Jon 4:​7, 8) Bilong kisim dispela pasin laikim, man i mas i go klostu long Jehova long rot bilong kisim stretpela save na em i mas bihainim tru dispela save.​​—Filipai 1:9; Jems 4:8; 1 Jon 5:3.

5, 6. Wanem samting i helpim ol disaipel bilong Jisas long pastaim long kisim pasin bilong laikim tru ol narapela olsem Krais i bin mekim?

⁵ Long laspela beten Jisas i mekim wantaim ol 11-pela gutpela aposel, Jisas i kamapim klia olsem pasin bilong save long God inap helpim man long kisim pasin laikim: “Mi bin kamapim nem bilong yu long ol. Na bai mi kamapim moa yet, bai ol i ken kisim pasin bilong laikim ol arapela man, olsem yu save laikim mi. Na mi tu mi ken i stap long ol.” (Jon 17:26) Jisas i helpim ol disaipel bilong em long kisim pasin laikim, kain olsem i stap namel long em na Papa. Ol tok na pasin bilong Jisas i kamapim ol samting nem bilong God i makim​​—ol gutpela pasin bilong God. Olsem na Jisas inap tok: “Man i lukim mi, em i lukim Papa.”​​—Jon 14:​9, 10; 17:8.

⁶ Pasin bilong laikim tru ol narapela olsem Krais i bin mekim em wanpela pasin holi spirit bilong God i save kamapim. (Galesia 5:​22) Taim ol Kristen bilong pastaim i kisim holi spirit long Pentikos 33 C.E., ol inap tingim bek planti samting Jisas i bin lainim ol long en, na tu, ol inap klia gut moa long mining bilong ol tok bilong Baibel. Dispela save i strongim pasin bilong ol long laikim tru God. (Jon 14:26; 15:26) Wanem samting i kamap long dispela? Maski ol i save ol inap lusim laip bilong ol, ol i daunim pret na givim bel long autim gutnius.​​—Aposel 5:​28, 29.

Ol i Gat Strongpela Bel na Pasin Laikim

 7. Wanem hevi i painim Pol na Barnabas long raun bilong tupela long autim gutnius?

⁷ Aposel Pol i tok: “Dispela Spirit God i bin givim long yumi, em i no spirit bilong mekim yumi i pret. Nogat. Em i Spirit bilong givim strong long yumi na bilong mekim yumi i laikim tru ol arapela.” (2 Timoti 1:​7) Dispela samting i bin painim Pol yet. Tingim samting i bin kamap long Pol tupela Barnabas taim ol i mekim raun bilong ol long autim gutnius. Tupela i autim tok long ol taun, olsem Antiok, Aikoniam, na Listra. Long olgeta taun, sampela i kamap bilipman. Tasol sampela i kamap birua. (Aposel 13:​2, 14, 45, 50; 14:​1, 5) Long Listra, wanpela bikpela lain manmeri i kros nogut tru. Ol i tromoi ston long Pol na taim ol i ting em i dai pinis, ol i lusim em! “Tasol ol manmeri i bilip long Jisas, ol i kam sanap raunim em, na Pol i kirap gen na i go insait long taun. Na long de bihain em i go wantaim Barnabas long taun Derbe.”​​—Aposel 14:​6, 19, 20.

 8. Olsem wanem strongpela bel bilong Pol na Barnabas i kamapim pasin bilong ol long laikim tru ol arapela?

⁸ Ol i laik kilim Pol i dai, tasol yu ting dispela i pretim Pol tupela Barnabas na ol i givap? Nogat tru! Bihain long “tupela i mekim planti manmeri i kamap disaipel” long Derbe, tupela “i go bek long Listra na Aikoniam na Antiok.” Bilong wanem ol i mekim olsem? Ol i laik strongim ol nupela long stap strong long bilip. Pol na Barnabas i tok: “Yumi laik i go insait long kingdom bilong God, tasol pastaim yumi mas wokabaut long rot i gat planti hevi i stap long en.” I klia tru olsem ol i bin kisim strongpela bel long rot bilong laikim tru “ol sipsip” bilong Krais. (Aposel 14:​21-​23; Jon 21:​15-​17) Taim ol i makim pinis ol elda bilong ol nupela kongrigesen, Pol na Barnabas i beten na “putim ol dispela lain i bilip long Bikpela long han bilong Bikpela.”

 9. Ol elda long Efesus i pilim tru pasin laikim bilong Pol na ol i mekim wanem?

⁹ Pol i gat pasin laikim na strongpela bel, olsem na planti Kristen bilong pastaim i laikim em tru. Tingim samting i bin kamap long wanpela miting em Pol i mekim wantaim ol elda. Ol dispela elda i bin kam long Efesus, we Pol i bin stap 3-pela yia na ol man i bin mekim nogut long em. (Aposel 20:​17-​31) Pol i strongim ol long stap wasman bilong ol sipsip bilong God, na bihain em i brukim skru na beten wantaim ol. Orait nau “olgeta i krai planti, na ol i holimpas Pol na i givim kis long em. Ol i sori nogut tru, long wanem, Pol i bin tok long ol bai i no inap lukim pes bilong en moa.” Man! Ol dispela brata i laikim tru Pol! Ol i no laik tru bai Pol na ol poroman i raun wantaim em i lusim ol.​​—Aposel 20:36–​21:1.

10. Olsem wanem ol Witnes Bilong Jehova long nau i bin strongim bel na kamapim olsem ol i laikim tru ol arapela?

¹⁰ Long nau, ol wasman bilong raun, ol elda bilong kongrigesen, na planti arapela, ol i save strongim bel na helpim ol sipsip bilong Jehova, olsem na ol sipsip i save laikim tru ol. Olsem: Long ol kantri we i gat pait o ol i tambuim wok bilong autim tok, ol wasman raun na meri bilong ol i save go lukim ol kongrigesen, maski ol i save olsem ol inap kalabus o lusim laip bilong ol long mekim dispela wok. Na planti Witnes i bin kisim bikpela hevi long han bilong ol bikman na lain bilong ol, long wanem, ol i no laik kamapim ol narapela Witnes long ol dispela bikman o tokaut long wanem rot ol i kisim kaikai bilong spirit. Na planti tausen i bin kisim bikpela hevi na pen, na dai tu, long wanem, ol i no laik lusim wok bilong autim gutnius na pasin bilong bung wantaim ol wanlotu long ol miting Kristen. (Aposel 5:​28, 29; Hibru 10:​24, 25) I gutpela sapos yumi bihainim pasin bilong bilip na pasin laikim bilong ol dispela bratasista i gat strongpela bel!​​—1 Tesalonaika 1:6.

No Ken Lusim Pasin Bilong Laikim Ol Narapela

11. Wanem sampela samting Satan i mekim wok long en bilong daunim ol wokboi bilong Jehova? Ol i mas mekim wanem?

¹¹ Taim ol i rausim Satan i kam daun long graun, em i belhat nogut tru long ol wokboi bilong Jehova, long wanem, ol i “save bihainim ol lo bilong God, na ol i save autim tok bilong Jisas.” (KTH 12:​9, 17) Wanpela tul Satan i save mekim wok long en, em pasin birua. Tasol planti taim dispela samting i save helpim ol manmeri bilong God, long wanem, taim pasin birua i painim ol, pasin laikim Kristen i save helpim ol long pas gut wantaim na i kirapim planti bilong ol long givim bel moa yet long autim tok. Narapela tul Satan i mekim wok long en, em ol laik nogut bilong skin. Yumi mas i gat strongpela bel na bai ol laik nogut bilong yumi yet i no ken ‘giamanim’ na pulim yumi.​​—Jeremaia 17:9; Jems 1:​14, 15.

12. Satan i save mekim wanem wok long “spirit bilong dispela graun” bilong daunim pasin bilong yumi long laikim God?

¹² I gat narapela samting tu Satan i save mekim wok long en na i gat bikpela strong​​—em “spirit bilong dispela graun,” olsem ol tingting na laik bilong dispela graun, na dispela i save pait long holi spirit bilong God. (1 Korin 2:​12) Spirit bilong dispela graun i save kirapim ol man long mangal na laikim tumas mani kago, olsem “aigris” long ol samting. (1 Jon 2:​16; 1 Timoti 6:​9, 10) Tru, mani kago samting i no gat rong long en, tasol sapos yumi kirap laikim tumas dispela samting, winim God, orait nau Satan i winim yumi. Spirit bilong dispela graun i gat “strong,” em inap kirapim ol man long inapim ol laik nogut bilong skin, na i giamanim ol man, na i wok strong i stap, na i go long olgeta hap olsem win i save go long olgeta hap. No ken larim spirit bilong dispela graun i stiaim yu!​​—Efesus 2:​2, 3, NW; Sindaun 4:​23.

13. Wanem samting inap traim pasin bilong yumi long strongim bel na bihainim stretpela pasin?

¹³ Bilong sakim spirit bilong dispela graun na bihainim stretpela pasin, yumi mas i gat strongpela bel. Olsem: Yumi mas i gat strongpela bel bambai yumi inap pasim kompiuta o TV taim ol piksa bilong pasin sem i kamap. Yumi mas i gat strongpela bel bambai yumi inap lusim ol poroman nogut na sakim ol wanlain i strong long pulim yumi. Na tu, yumi mas i gat strongpela bel bambai yumi inap bihainim ol lo na ol stiatok bilong God, maski ol wanskul, ol wanwok, ol neiba, o ol wanblut i tok bilas long yumi.​​—1 Korin 15:33; 1 Jon 5:​19.

14. Yumi mas mekim wanem sapos spirit bilong dispela graun i wok long pulim yumi?

¹⁴ Olsem na em i bikpela samting long yumi mas strongim pasin bilong yumi long laikim tru God na ol bratasista Kristen! Lusim haptaim na skelim ol pasin yu save bihainim na ol mak yu laik winim na bai yu inap save olsem spirit bilong dispela graun i bin pulim yu liklik o nogat. Sapos olsem​—maski em liklik samting tasol​—orait beten askim Jehova long strongim bel bilong yu na bai yu inap rausim spirit bilong dispela graun. Jehova bai harim kain beten olsem. (Song 51:17) Tingim: Spirit bilong Jehova i gat bikpela strong, winim spirit bilong dispela graun.​​—1 Jon 4:4.

Stap Strong Taim Ol Traim i Painim Yu

15, 16. Olsem wanem pasin bilong laikim tru ol narapela olsem Krais i bin mekim inap helpim yumi long karim hevi? Kamapim wanpela ekspiriens.

¹⁵ Sampela narapela hevi ol wokboi bilong Jehova i mas karim, em ol samting sin na lapun i save kamapim, olsem sik, hap bodi i bagarap, na bel hevi. (Rom 8:​22) Pasin bilong laikim tru ol narapela olsem Krais i bin mekim, dispela inap helpim yumi long karim ol dispela hevi. Tingim Namangolwa, em i bin kamap bikpela insait long wanpela famili Kristen long Sambia. Taim em i gat tupela krismas tasol, hap bodi bilong Namangolwa i bagarap. Em i tok: “Mi sem, mi ting olsem taim ol man i lukim bodi bilong mi, ol bai kirap nogut tru. Tasol ol brata Kristen i helpim mi long kisim narapela kain tingting. Dispela i mekim na mi daunim pret bilong mi na bihain mi kisim baptais.”

¹⁶ Maski Namangolwa i gat wilsia, long ol rot i gat wesan long en, em i mas wokabaut long han na skru bilong lek. Tasol inap tupela mun long olgeta yia, em i save wok painia haptaim. Wanpela meri i bin krai taim Namangolwa i autim tok long em. Bilong wanem? Long wanem, em i pilim tru bilip na strongpela bel bilong dispela sista bilong yumi. Jehova i mekim gut long Namangolwa, na 5-pela Baibel sumatin bilong em i bin baptais, na wanpela em i elda bilong kongrigesen. Namangolwa i tok: “Planti taim lek bilong mi i pen nogut tru, tasol mi no larim dispela samting i pasim mi.” Dispela sista em wanpela tasol bilong planti Witnes long olgeta hap em bodi bilong ol i no gat strong, tasol ol i laikim tru God na ol narapela, olsem na ol i givim bel tru long wok bilong autim tok. Ol i “gutpela samting” tru long ai bilong Jehova!​​—Hagai 2:​7, NW.

17, 18. Wanem samting i helpim planti man long karim hevi bilong sik na ol narapela hevi? Stori long sampela long hap bilong yu yet.

¹⁷ Bikpela sik tu inap mekim yumi bel hevi. Wanpela elda bilong kongrigesen i tok: “Long buk stadi mi go long en, wanpela sista i gat sik daiabitis na sik long kidni, na narapela i gat kensa, na tupela i gat atraitis, na narapela i gat sik lupus na faibromaljia. Sampela taim ol i bel hevi. Tasol ol i save go long olgeta miting. Taim ol i sik nogut tru o ol i stap long haus sik, em long dispela kain taim tasol ol i no go long ol miting. Ol i save autim tok long olgeta mun. Ol i kirapim mi long tingim aposel Pol, em i tok: ‘Taim mi no gat strong, long dispela taim tasol mi gat strong tru.’ Mi pilim tru pasin laikim na strongpela bel bilong ol. Ating hevi bilong ol i mekim na ol i tingting tasol long ol samting i bikpela samting tasol.”​​—2 Korin 12:​10.

¹⁸ Sapos bodi bilong yu i no strong o yu gat bikpela sik, “beten oltaim” long God i ken helpim yu na bai yu no ken bel hevi. (1 Tesalonaika 5:​14, 17) Tru, ating sampela taim bai yu bel hevi, tasol wok long tingim ol gutpela samting tasol, ol samting bilong spirit, na ol gutpela samting Kingdom bai kamapim. Wanpela sista i tok: “Wok bilong autim tok i olsem wanpela gutpela marasin.” Taim em i autim gutnius long ol narapela, dispela i save helpim em long holimpas stretpela tingting.

Pasin Laikim i Helpim Man i Mekim Rong Long Kam Bek Long Jehova

19, 20. (a) Wanem samting inap helpim ol man i bin mekim rong long strongim bel na kam bek long Jehova? (b) Bai yumi skelim wanem samting long stadi i kamap bihain long dispela?

¹⁹ Planti man husat i no stap strong moa long ol samting bilong spirit o ol i bin mekim bikpela rong, ol i hatwok long kam bek long Jehova. Tasol ol bai kisim strong long mekim olsem sapos ol i tanim bel tru na kirap laikim gen God. Tingim Mario,a em i stap long Amerika. Mario i lusim kongrigesen Kristen na em i kamap man bilong dring na kisim drak, na 20 yia bihain, em i go long kalabus. Mario i tok: “Mi kirap long tingim i stap bilong mi long bihain na mi stat gen long ritim Baibel. Mi kirap pilim tru ol gutpela pasin bilong Jehova, olsem pasin marimari bilong em, na planti taim mi beten askim God long marimari long mi. Taim mi lusim kalabus, mi abrusim ol poroman nogut bilong mi, na mi go long ol miting Kristen, na bihain kongrigesen i kisim bek mi. Ol samting nogut mi bin mekim i wok long bagarapim bodi bilong mi, tasol mi gat gutpela samting bilong wetim i kamap bihain. Mi tenkyu tru long Jehova long em i sori na marimari long mi.”​​—Song 103:​9-​13; 130:​3, 4; Galesia 6:​7, 8.

²⁰ Tru, ol man kain olsem Mario ol i mas wok strong na bai ol inap kam bek long Jehova. Tasol sapos ol i kirap laikim gen Jehova​—em long rot bilong stadi long Baibel, beten, na tingim tingim ol tok long bel​—dispela bai strongim bel bilong ol long kam bek. Ol gutpela samting bilong Kingdom em Mario i wetim long kamap, dispela tu i strongim Mario. Yes, pasin laikim na strongpela bilip na pasin bilong pret long God inap helpim yumi, tasol pasin bilong wetim gutpela samting i kamap, em tu i gat bikpela strong na inap helpim yumi. Long stadi i kam bihain long dispela, bai yumi skelim gut dispela pasin, em wanpela gutpela presen i kam long God.

[Futnot]

Yu Inap Bekim?

• Olsem wanem pasin laikim i mekim na Jisas i gat strongpela bel?

• Olsem wanem pasin bilong laikim ol brata i bin helpim Pol na Barnabas long strongim bel?

• Satan i save mekim wok long wanem samting bilong bagarapim pasin laikim Kristen?

• Pasin bilong laikim Jehova inap strongim bel bilong yumi long karim wanem ol hevi?

[Piksa long pes 23]

Pasin bilong Pol long laikim ol narapela i strongim bel bilong em na em i no givap

[Piksa long pes 24]

Yumi mas i gat strongpela bel na bai yumi inap bihainim ol lo bilong God

[Piksa long pes 24]

Namangolwa Sututu