Sapta 20
Husat Bai Kirap Bek?—Kirap Bek We?
1, 2. Olsem wanem yumi save, ol manmeri i mekim wok bilong God long bipo ol i bilip olsem ol man i dai pinis bai ol i kirap bek?
OL MANMERI i mekim wok bilong God long bipo tu ol i bilip olsem ol man i dai pinis bai ol i kirap bek. Paslain tru long taim Jisas i kam daun long graun, Ebraham i bilip olsem. Baibel i tok: “Em i tingting olsem: ‘Sapos em [pikinini bilong em Aisak] i dai pinis, maski, God inap long kirapim em bek.’ ” (Hibru 11:17 -19) Na Jop tu i gat dispela bilip. Em i tok: “Man i dai pinis em inap kisim bek laip? . . . Bai yu singaut na mi bai harim.”—Jop 14:14, 15, NW.
2 Taim Jisas i stap long graun, em i tok: “Na Moses tu em i skulim yumi long ol daiman i kirap bek long matmat. Long dispela stori bilong liklik diwai i paia, em i tok, Bikpela em i ‘God bilong Ebraham na God bilong Aisak na God bilong Jekop.’ Olsem tasol God i no God bilong ol daiman. Nogat. Em i God bilong ol man i stap laip. Long ai bilong em, olgeta ol i stap laip.” (Luk 20:37, 38) Nupela Testamen i kolim dispela tok “kirap bek” inap planti taim. Olsem na dispela tok long ol man i dai pinis ol bai kirap bek em i wanpela bikpela tok bilong Baibel.—Hibru 6:1, 2.
3. Mata i tok wanem na em i kamapim bilip bilong em olsem ol man i dai pinis bai ol i kirap bek?
3 Mata tu i bilip olsem man i dai pinis em bai kirap bek. Taim susa bilong em Lasaras i dai pinis, Mata i tokim Jisas: “Bikpela, sapos yu stap hia, bai susa bilong mi em i no i dai.” Jisas i laik mekim gut bel bilong Mata na em i tok: “Bambai susa bilong yu i kirap bek.” Na Mata i tok: “Mi save, bai em i kirap bek long las de, long dispela taim olgeta manmeri bai i kirap bek.”—Jon 11:17-24.
4-6. I gat wanem as na Mata i bilip olsem ol man i dai pinis bai ol i kirap bek?
4 I gat as tru bilong dispela bilip bilong Mata. Em i save longtaim bipo God i bin givim strong long Ilaija na Ilaisa na tupela i kirapim bek pikinini i dai pinis. (1 King 17:17-24; 2 King 4:32-37) Na Mata i save, bipo wanpela man i dai pinis na ol i tromoi em long hul ol i bin putim Ilaisa long en taim em i dai, na skin bilong dispela man i pundaun antap long ol bun bilong Ilaisa, na man hia i kirap bek. (2 King 13:20, 21) Tasol ol samting Jisas i mekim i strongim tru bilip bilong Mata.
5 Ating Mata i stap long Jerusalem taim Jisas i stori long wok Papa i givim long em bilong kirapim bek ol man i dai pinis. Jisas i tok: “Papa i save kirapim bek ol daiman na i givim laip long ol. Na olsem tasol Pikinini tu i save givim laip long ol man long laik bilong em yet. . . . Taim i laik kamap na olgeta man i stap long matmat bai ol i harim maus bilong em, na bai ol i lusim matmat na i kam ausait.”—Jon 5:21, 28, 29.
6 Baibel i no stori long Jisas i bin kirapim bek sampela man paslain long taim em i mekim dispela tok. Tasol bihain liklik em i kirapim bek pikinini man bilong wanpela meri wanpis long Nen. Tok bilong dispela samting i go kamap long Judia, olsem na ating Mata i harim! (Luk 7:11-17) Na bihain ating Mata i harim tok long Jisas i kirapim bek pikinini meri bilong Jairas. Pikinini i gat sik na em i dai. Tasol taim Jisas i kamap long haus bilong Jairas, em i tokim dispela pikinini: “Pikinini, yu kirap.” Na pikinini i kirap!—Luk 8:40-56.
7. Jisas i mekim wanem na Mata i save, Jisas em inap kirapim bek man i dai pinis?
7 Tasol Mata i no tingting long Jisas bai kirapim bek susa bilong em long dispela taim. Olsem na em i tok: “Mi save, bai em i kirap bek long las de.” Tasol Jisas i laik bai Mata i save long wok bilong em long kirapim bek ol man i dai pinis na em i tok: “Kirap bek, em mi yet. Na laip, em mi yet. Man i bilip long mi, sapos em i dai, maski, em bai i stap laip. Na olgeta man i stap laip na i bilip long mi, bai ol i no i dai.” Bihain Jisas i go long matmat bilong Lasaras na em i singaut strong na i tok: “Lasaras, yu kam ausait!” Na Lasaras i kam ausait!—Jon 11:24-26, 38-44.
8. Olsem wanem yumi save, Jisas i kirap bek?
8 Sampela wik bihain Jisas yet i dai na ol i putim em long matmat. Em i stap tripela de tasol long matmat, long wanem, olsem Pita i tok, “dispela Jisas God i kirapim pinis.” Ol bikpela bos bilong lotu ol i no inap pasim Jisas long lusim matmat. (Aposel 2:32; Matyu 27:62-66; 28:1-7) Yumi save tru Krais i kirap bek, long wanem bihain em i kamap long ai bilong planti disaipel na ol i lukim em i stap laip. Wanpela taim inap 500 samting ol i lukim em. (1 Korin 15:3-8) Ol disaipel i bilip tru olsem man i dai pinis bai kirap bek, olsem na ol i redi long karim pen na hevi na i dai tu bilong mekim wok bilong God.
9. Baibel i stori long wanem 9-pela manmeri ol i bin kirap bek?
9 Bihain Pita i kirapim bek wanpela meri long ples Jopa, nem bilong em Tabita o Dokas. (Aposel 9:36-42) Na Pol i kirapim bek yangpela man Yutikas, em i bin sindaun long wanpela rum antap na harim Pol i toktok na em i pundaun i go long graun na em i dai. (Aposel 20:7-12) Em nau, Baibel i stori long ol dispela 9-pela manmeri i kirap bek na yumi ken save tru, ol man i dai pinis ol inap kirap bek!
HUSAT OL BAI KIRAP BEK?
10, 11. (a) Bilong wanem God i stretim rot bambai ol man i dai pinis ol i ken kirap bek? (b) Wanem tupela kain man bai kirap bek, olsem Aposel 24:15 i tok?
10 Pastaim tru God i no tingting long kirapim bek sampela manmeri. Long wanem sapos Adam tupela Iv i stap gut long em, no gat wanpela man i mas i dai. Tasol Adam i mekim rong na dispela i putim sin na i dai long skin bilong olgeta manmeri. (Rom 5:12) Olsem na God i stretim rot bilong kirapim bek ol pikinini bilong Adam ol i dai pinis bambai ol inap kisim laip i stap oltaim. Tasol wanem samting i makim man em inap kirap bek o em i no inap kirap bek?
11 Baibel i tok: “God bai i kirapim ol daiman, ol stretpela man na ol man nogut wantaim.” (Aposel 24:15) Ating yu kirap nogut long dispela tok na yu tok: ‘Bilong wanem God i laik kirapim bek “ol man nogut”?’ Orait, yumi ken tingim samting i kamap taim Jisas i hangamap long pos.
12, 13. (a) Jisas i mekim wanem tok promis long wanpela man nogut? (b) Dispela “Paradais” Jisas i tok long en, em i stap we?
12 Ol dispela man ol i nilim long pos klostu long Jisas ol i man nogut. Wanpela em i tok bilas long Jisas na em i tok: “Yu Krais, a? Orait yu helpim yu yet, na yu helpim mitupela wantaim.” Tasol narapela man nogut em i bilip long Jisas na em i tok: “Jisas, bihain bai yu kamap long [kingdom] bilong yu, orait yu tingting long mi.” Na Jisas i tok promis olsem: “Mi tok tru long yu tude: Bai yu stap wantaim mi long Paradais.”—Luk 23:39-43, NW.
13 Tasol wanem insait bilong dispela tok bilong Jisas? “Paradais” i stap we? Orait, namba wan paradais God i bin wokim i stap we? Long graun, a? God i putim namba wan man na meri long gutpela ples paradais ol i kolim Iden. Olsem na dispela man nogut bai kirap bek i stap long Paradais long graun, long wanem dispela tok “paradais” i makim gutpela ples i gat ol gutpela diwai na plaua na wara samting.—Jenesis 2:8, 9.
14. Dispela man bipo em i man nogut, olsem wanem Jisas bai stap wantaim em long Paradais?
14 Tru, Krais Jisas i no ken i stap hia long graun taim dispela man i kirap bek. Nogat. Jisas bai i stap king long heven na bosim dispela Paradais long graun. Tasol i stret Jisas i tok em bai stap wantaim dispela man, long wanem Em bai kirapim bek dispela man na lukautim em long ol samting bilong skin na spirit. Tasol bipo dispela man em i man nogut, olsem na bilong wanem Jisas bai larim em i stap long Paradais?
15. Bilong wanem God bai kirapim bek “ol man nogut”?
15 Tru dispela man em i “man nogut,” na em i no gat save long laik bilong God. Tasol sapos em i save long laik bilong God, yu ting em bai mekim pasin nogut? Bilong skelim bel bilong dispela man, Jisas bai kirapim bek em wantaim planti milion manmeri moa ol i no gat save long God na ol i dai. Olsem: I gat planti manmeri ol i bin i stap bipo ol i no gat save long rit rait na ol i no bin lukim wanpela Baibel. Ol i dai pinis na ol i stap long matmat (Sheol, Hades), tasol bai ol i kirap bek. Taim ol i kirap bek na i stap long paradais long graun, bai ol i kisim save long laik bilong God na bai ol inap bihainim na kamapim bel bilong ol, ol i givim bel tru long God o nogat.
16. (a) Husat ol i no ken kirap bek? (b) Bilong wanem yumi no ken skelim ol man? (c) Wanem wok bilong yumi?
16 Tasol i no olsem olgeta manmeri i dai pinis bai ol i kirap bek. Nogat. Judas Iskariot man bilong kamapim Jisas long ol birua em i no ken kirap bek. Long laik bilong em yet em i mekim pasin nogut na Baibel i kolim em olsem “man bilong lus.” (Jon 17:12) Em i go long “namba tu dai” (Gehenna). Dispela i makim man i dai na pinis olgeta na i no inap kirap bek. (Matyu 23:33) Ol manmeri i save pinis long laik bilong God na long laik bilong ol yet ol i mekim pasin nogut, ating ol i mekim rong long spirit holi. Na God i no ken kirapim bek man i mekim rong long spirit holi bilong em. (Matyu 12:32; Hibru 6:4-6; 10:26, 27) Tasol God em i Jas, olsem na yumi yet yumi no ken skelim ol man nogut bilong nau o bilong bipo bipo, ol bai kirap bek o nogat. God i save husat ol i stap long matmat (Hades) na husat ol i stap long “namba tu dai” (Gehenna). Olsem na wok bilong yumi em olsem: Yumi mas mekim olgeta samting bambai God i ken orait long yumi na yumi ken i stap long nupela taim em bai kamapim.—Luk 13:24, 29.
17. Husat ol bai kisim laip oltaim, tasol ol i no bilong kirap bek?
17 Planti manmeri ol i mekim wok bilong God nau long “las taim,” ol bai winim taim bilong Amagedon. Bai ol i no i dai, olsem na ol i no ken kirap bek bilong kisim laip i stap oltaim. Bai ol i kamap olsem “nupela graun” na sapos ol i stap gut long God, ol i no ken i dai. Olsem Jisas i tokim Mata: “Olgeta man i stap laip na i bilip long mi, bai ol i no i dai.”—Jon 11:26; 2 Timoti 3:1.
18. “Ol stretpela man” i kirap bek ol i husat?
18 Husat ol dispela “stretpela man” ol i bilong kirap bek? Sampela ol i bin i stap long graun taim Jisas i no kam daun yet na ol i bin mekim wok bilong God. Hibru sapta 11 i kolim nem bilong sampela. Ol i no gat tingting long go long heven. Ol i tingting long ol bai stap laip gen long graun. Na sampela “stretpela man” ol i bilong kirap bek, em ol gutpela man i bin mekim wok bilong God na nau tasol ol i dai. Samting ol i tingting long kisim, God bai givim long ol—em bai kirapim bek ol na givim laip oltaim long ol long graun.
KIRAP BEK LONG WANEM TAIM NA WE?
19. (a) Olsem wanem Jisas “em i kirap long matmat paslain long olgeta man”? (b) Em i kirap paslain long husat?
19 Baibel i tok, Krais Jisas “em i kirap long matmat paslain long olgeta man.” (Aposel 26:23) Em i kirap bek paslain long olgeta narapela man, em ol bai kirap bek na ol i no bilong i dai gen. Na em i namba wan man i bin kirap bek olsem wanpela spirit. (1 Pita 3:18) Tasol Baibel i tok, sampela moa ol tu bai kirap bek olsem. Baibel i tok: “Yumi olgeta man wan wan bai yumi kirap bek na kisim laip long taim bilong yumi yet. Namba wan em Krais. Na taim em i kam bek, yumi olgeta lain bilong em bai yumi kirap.” (1 Korin 15:20-23) Olsem na sampela bai kirap bek pastaim na sampela bihain.
20. (a) Dispela “lain bilong [Krais]” ol i husat? (b) Ol i kirap long wanem kirap bek?
20 Dispela “lain bilong em,” em lain 144,000 gutpela disaipel God i makim ol bilong wok king wantaim Krais long Kingdom. Ol bai kirap bek i go long heven na Baibel i stori long dispela, olsem: “Ol man i kirap bek long dispela namba wan taim, ol i ken amamas na i stap holi. Namba tu dai em i no gat strong bilong daunim ol dispela man. Nogat. Bai ol i . . . stap king wantaim Krais long dispela 1,000 yia.”—Revelesen 20:6; 14:1, 3.
21. (a) Dispela kirap bek bilong “namba wan taim” em i kamap long wanem taim? (b) Olsem na yumi save, husat ol i kirap bek pinis i go long heven?
21 Olsem na Krais i kirap bek na bihain long em ol 144,000 i mas kirap bek. Ol i insait long dispela kirap bek bilong “namba wan taim.” (Filipai 3:11) Ol i kirap bek long wanem taim? Baibel i tok: ‘Taim Krais i kam bek.’ Yumi save Krais i kam bek pinis long yia 1914. Olsem na “bikpela De” bilong kirapim ol gutpela Kristen i go long heven, em kirap bek bilong “namba wan taim,” dispela “De” i kamap pinis. Olsem na yumi save, ol aposel na Kristen bilong pastaim ol i kirap bek pinis i go long heven.—2 Timoti 4:8.
22. (a) Husat moa ol i bilong kirap bek long “namba wan taim”? (b) Wanem taim ol i kirap bek?
22 Tasol i gat sampela Kristen nau ol i stap taim Krais i kam bek pinis, na ol tu i bilong mekim wok king wantaim Krais long heven. Ol i hap lain bilong dispela lain 144,000 na ol i stap yet long graun. Wanem taim ol i mas kirap bek? Taim ol i dai, wantu tasol bai ol i kirap bek; ol i no bilong slip long matmat. Baibel i tok, taim ol i dai “olgeta i senis na i kamap narakain, kwik tumas, wantu tasol, long taim bilong las biugel i krai. Yes, biugel bai i krai, na ol daiman bai i kirap, na ol i no inap bagarap moa.”—1 Korin 15:51, 52; 1 Tesalonaika 4:15-17.
23. Sampela manmeri bai senis na kamap spirit na Baibel i stori olsem wanem long dispela samting?
23 Yumi save, yumi no inap lukim ol dispela manmeri i kirap long dispela kirap bek bilong “namba wan taim.” ol i kirap bek olsem ol spirit. Ol i senis i kamap spirit na Baibel i stori long dispela olsem: “Bodi yumi planim, em i save bagarap. Bodi i kirap bek, em i no inap bagarap. . . . Bodi yumi planim, em i bilong graun. Bodi i kirap bek, em i bilong heven.”—1 Korin 15:42-44.
24. (a) Husat ol bai kirap bek bihain long ol man i kirap bek long “namba wan taim”? (b) Ol dispela manmeri i kirap bek bihain, olsem wanem ol i kisim “laip i gutpela moa”?
24 Baibel i tok, i gat kirap bek bilong “namba wan taim,” olsem na yumi save, i gat narapela kirap bek bilong bihain. Ol manmeri i kirap bek long dispela taim bihain, em ol stretpela man na man nogut. Taim Amagedon i pinis bai ol i kirap bek na stap long paradais long graun. Bai ol i kisim “laip i gutpela moa,” winim dispela laip tupela manki i kisim taim Ilaija na Ilaisa i kirapim ol, na ol narapela tu bipo ol i kirap bek long graun. Bilong wanem dispela laip bilong ol bai i “gutpela moa”? Long wanem bai ol inap kisim laip i stap oltaim.—Hibru 11:35.
EM WANPELA MIRAKEL BILONG GOD
25. (a) Bodi ol i planim, olsem wanem na dispela bodi i no kirap bek? (b) Wanem samting i kirap bek? God i givim wanem samting long ol man em i kirapim bek ol?
25 Taim man i dai pinis, skin bilong em ol i planim, dispela skin i no ken kirap bek. Baibel i makim olsem taim em i stori long ol man i kirap bek i go long heven. (1 Korin 15:35-44) Na ol manmeri i kirap bek long graun, ol tu i no kisim bek dispela skin ol man i planim pinis. Long wanem ating dispela skin i sting pinis na tanim i kamap graun gen. Olsem na God i no save kirapim bek dispela skin yet, em i kirapim bek dispela man yet. Ol manmeri bilong i go long heven, God i kirapim bek ol na givim nupela bodi long ol, em bodi bilong heven. Na ol manmeri em i kirapim ol i stap long graun, em i givim nupela bodi bilong graun long ol, em wankain olsem bodi bilong bipo bambai ol manmeri inap luksave long ol.
26. (a) Man i kirap bek long matmat, olsem wanem dispela em i wanpela mirakel? (b) Long nau ol man inap mekim wanem na yumi save God inap tingim tru ol man i dai pinis?
26 Tru tumas, dispela em wanpela mirakel bilong God! Taim man i stap laip, em i kisim tingting na save na kain kain samting i painim em. Na em i gat ol pasin bilong em yet i narapela kain long pasin bilong olgeta narapela man. Tasol God Jehova i tingim olgeta dispela samting bilong dispela man na em bai kirapim bek dispela man yet wantaim olgeta pasin na tingting na save bilong em. Olsem Baibel i tok: “Long ai bilong [God], olgeta ol i stap laip.” (Luk 20:38) Long nau ol man inap kisim piksa bilong man na putim nek bilong man long kaset na maski bihain dispela man i dai, tasol ol inap kirapim bek nek bilong em long kaset o lukim piksa bilong em. Tasol Jehova em inap kirapim bek tru olgeta manmeri i stap laip long tingting bilong em, na em bai mekim!
27. I gat wanem ol askim nau bai yumi stori long en?
27 Na Baibel i stori long planti samting moa bai kamap long Paradais taim ol man i kirap bek pinis. Olsem: Jisas i bin stori long ol man i kirap bek, sampela “ol i kirap bek na i stap laip,” na sampela “ol i kirap bek na i kamap long kot.” (Jon 5:29) Wanem insait bilong dispela tok bilong Jisas? Ol samting i painim ol “gutpela” man taim ol i kirap bek, em i wankain long ol samting bai painim “ol man i bin mekim pasin nogut”? Orait nau yumi ken stori long De bilong Kot na bai yumi inap save long dispela samting.
[Ol Piksa long pes 167]
“Mi save, bai em i kirap bek long las de”
Ilaija i kirapim bek pikinini man bilong wanpela meri wanpis
Ilaisa i kirapim bek wanpela pikinini
Wanpela man i dai pinis ol i tromoi em antap long bun bilong Ilaisa na man i kirap bek
[Ol Piksa long pes 168]
Sampela manmeri Jisas i kirapim bek ol:
Pikinini man bilong meri bilong Nen
Lasaras
Pikinini meri bilong Jairas
[Ol Piksa long pes 169]
Sampela moa ol i bin kirap bek:
Dokas
Jisas yet
Yutikas
[Piksa long pes 170]
Dispela Paradais Jisas i tokim man nogut long en, em i stap we?