Wok Wantaim Long Kisim Prais Bilong Laip

“Na laip i stap gut oltaim em i olsem: Ol i save long yu, yu wanpela tasol yu God tru, na ol i save long Jisas Krais, em yu bin salim i kam.”—JON 17:3.

 1. (a) Wanem namba wan taim Jisas i mekim sampela tok long “laip i stap gut oltaim oltaim”? (b) Husat inap kisim dispela prais?

HAIT hait em i kam long nait. Ol man i no lukim em. Em Nikodimas. Em i pilim tru ol mirakel Jisas i bin wokim long Jerusalem long taim bilong Pasova long yia 30 C.E. Taim Jisas i toktok wantaim dispela Farisi, long namba wan taim long Baibel Jisas i mekim sampela tok long “laip i stap gut oltaim oltaim.” Em i mekim gutpela tok, olsem: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:15, 16) Olgeta manmeri God inap baim bek ol, ol inap kisim gutpela prais tru! Man i gat pasin antap, olsem wanpela Farisi, ating em bai daunim em yet bambai em inap kisim kain gutpela prais olsem.

 2. (a) Long wanem narapela taim Jisas i mekim tok gen long “laip i stap gut oltaim oltaim”? (b) Husat ol inap kisim wara bilong laip?

² Liklik taim bihain Jisas i lusim Jerusalem na bihainim rot i go bek long Galili. Jisas i kamap long hap bilong Sameria na em i sindaun malolo klostu long wanpela hul wara. Ol disaipel bilong em i go bilong baim kaikai na wanpela meri bilong Sameria i kam pulimapim wara. Jisas i tokim dispela meri: “Sapos wanpela man i dring long dispela wara mi laik givim em, i no gat wanpela taim nek bilong em i ken drai gen. Nogat. Dispela wara mi laik givim em, em bai i kamap olsem hul wara insait long em. Na dispela wara oltaim bai i kamap kamap na i givim em laip i stap gut oltaim oltaim.” (Jon 4:14) Ol Juda i save givim baksait long ol Sameria, orait, bilong wanem Jisas i tokim dispela meri bilong Sameria em inap kisim gutpela prais olsem laip i stap gut oltaim oltaim? Jisas i save dispela meri i bin maritim 5-pela man na man nau em i stap wantaim em i no man bilong em. Tasol long dispela taim Jisas i tok, ol manmeri ol narapela man i save givim baksait long ol, ol tu inap kisim wara bilong laip, sapos ol i tanim bel na stretim pasin bilong ol.—Lukim tu Kolosi 3:5-7.

 3. (a) Wanem kain “kaikai” i gutpela, olsem Jisas i makim? (b) Wanem samting i kamap na i truim tok bilong Jon 4:34-36?

³ “Laip i stap gut oltaim oltaim”! Jisas i stori moa long dispela samting taim ol disaipel bilong em i kam bek na ol i tokim em, ‘Yu mas kaikai.’ Em i tokim ol: “Kaikai bilong mi em i olsem: Mi bihainim laik bilong dispela em i bin salim mi na mi kam. Na mi mas pinisim wok bilong em.” Wanem dispela wok? Jisas i tok: “Yupela i mas lukluk nabaut na lukim gut ol gaden. Ol kaikai i redi pinis. Man i wok long kamautim kaikai, em i kisim pe bilong en na em i bungim kaikai bilong laip i stap gut oltaim oltaim.” Dispela wok bilong bungim kaikai, olsem bungim ol man bilong kisim laip, em i laik kamap namel long ol man nating bilong Sameria tu, na bihain Baibel i stori long dispela wok i kamap tru namel long ol na bikpela amamas i kamap. (Jon 4:34-36; Aposel 8:1, 14-17) Dispela wok bilong bungim kaikai, olsem bungim ol man bilong kisim laip i stap gut oltaim oltaim, dispela wok i stap yet. Tasol nau gaden em i olgeta hap bilong graun. Bikpela wok i stap yet na ol disaipel bilong Krais Jisas long nau ol i mas wok strong long wok bilong Bikpela.—Matyu 13:37, 38; 1 Korin 15:58.

“Prais Bilong Laip”

 4. Jisas i bekim wanem tok long ol Juda long holim Sabat?

⁴ Wanpela yia moa na nau de holi bilong ol Juda, ol i kolim Pasova, em i kamap. Em yia 31 C.E. Jisas i bihainim pasin bilong em na em i go long Jerusalem bilong lukim dispela bikpela de. Tasol ol Juda i kirap mekim nogut long Jisas, long wanem em i mekim gutpela pasin sori long de Sabat na oraitim sik bilong sampela man. Jisas i bekim wanem tok long ol? Jisas i tok: “Papa bilong mi em i wok inap long nau. Na mi tu mi wok.” Olsem na ol i laikim moa yet long kilim em i dai.—Jon 5:17, 18.

 5, 6. (a) Nau Jisas i stori long wanem gutpela pasin wanbel? (b) Olsem wanem Jisas i gat “laip long em yet”?

⁵ Nau Jisas i kirap na stori long gutpela pasin wanbel, em pasin wanbel i stap namel long em wantaim Papa bilong em. Em i tokim ol dispela Juda: “Papa i laikim tumas Pikinini na i soim em olgeta samting em i save mekim. Na bambai em i soim em sampela bikpela wok moa, em i winim ol dispela. Olsem na bai yupela i tingting planti.” Em i stori olsem Papa i givim narapela kain strong long em, em bikpela strong tru, long wanem em i tok: “Man i harim tok bilong mi, na i bilip long dispela em i bin salim mi na mi kam, em i gat laip i stap gut oltaim oltaim. Em bai i no kamap long kot. Nogat. Em i lusim pinis dai, na nau em i stap laip.”—Jon 5:20, 24.

⁶ Tru, ol man i olsem i “dai” long ai bilong God, long wanem ol i gat sin, ol inap “harim maus bilong Pikinini Bilong God” na kisim laip. Tasol dispela samting i kamap olsem wanem? Jisas i stori olsem: “Papa i gat laip long em yet.” Na em i bin givim strong long Pikinini, na em tu i gat laip long em yet. Dispela tok “i gat laip long em yet,” yumi inap tanim tu olsem “i gat prais bilong laip i stap long em.” (Jon 5:25, 26; lukim tok daunbilo long NW Reference Bible.) Olsem na Jisas inap helpim ol man long i stap gutpela long ai bilong God. Na tu em inap kirapim bek ol man i slip long matmat na givim laip long ol.—Jon 11:25; Revelesen 1:18.

 7.(a) Sam 36:5, 9 i tok wanem long God? (b) Pikinini bilong God i stap gut long Em na God i givim wanem gutpela pe long em?

⁷ Oltaim Jehova i gat laip long em yet. Baibel i tok: “Yu as tru bilong laip.” (Sam 36:5, 9) Tasol Pikinini bilong God i stap gut long Em i go inap long taim em i dai na God i kirapim bek em long matmat; God i kirapim em “paslain long ol man i dai pinis, olsem namba wan kaikai i redi long gaden.” Jisas “i gat prais bilong laip i stap long em,” olsem na em i gat strong bilong tekewe sin, na mekim kot, na kirapim bek ol man i dai pinis, bambai ol inap kisim laip i stap gut oltaim oltaim.—1 Korin 15:20-22; Jon 5:27-29; Aposel 17:31.

Stap Wanbel Wantaim

 8, 9. (a) Yumi mas mekim wanem na bai yumi tingting strong long kisim laip i stap gut oltaim oltaim? (b) God i putim wanem rot bilong kisim laip i stap oltaim? (c) Husat ol inap kisim ol dispela blesing? Ol i mas mekim wanem na bai ol inap kisim?

⁸ Olsem na Jut, em wanpela disaipel bilong Jisas, em i tok strong long yumi olsem: “Yupela i mas holimpas sori bilong God. Oltaim yupela i mas wetim Bikpela bilong yumi Jisas Krais, bai em i kamapim sori bilong en long ples klia, na yupela bai i kisim tru laip i stap gut oltaim oltaim.” (Jut 21) Em gutpela prais tru yumi ken wok long kisim—laip i stap gut oltaim oltaim! Taim yumi kisim dispela laip bai yumi stap gutpela olgeta, em laik bilong Bikpela Man bilong wokim yumi, em yet i gutpela olgeta. Em bai givim dispela gutpela laip long yumi long rot bilong Pikinini bilong em. Dispela kain laip bai i no gat hevi o hatwok bilong en, olsem laip bilong yumi long dispela taim nau. Long nupela taim bihain bai i no gat hevi moa, bai i no gat sik moa, bai i no gat pasin nogut na bai ol man i no i dai moa.—Maika 4:3, 4; 1 Korin 15:26.

⁹ Husat inap kisim ol dispela gutpela samting God i tok promis long en? Ol bai kisim we? Ol manmeri i bilip long ofa bilong Krais na ol i mekim wok bilong God tu wantaim, ol inap kisim. Ol dispela manmeri i stap wanbel wantaim ol brata Kristen bilong ol long olgeta hap bilong graun. Ol i stap wanbel long bilip.—Jems 2:24; Efesas 4:16.

10. (a) God i “stiaim olgeta samting” na mekim wanem samting pastaim? (b) Bihain God i “stiaim olgeta samting” na mekim wanem?

¹⁰ Laik bilong God, em i laik “stiaim olgeta samting ․․․ bai em i bungim olgeta samting long Krais, ol samting bilong heven na bilong graun tu.” (Efesas 1:8, 10) God i laik bungim lain bilong em; pastaim em i bungim ol 144,000 wanwok bilong Krais. “God i bin baim bek ol namel long ol manmeri bilong graun, na ol i stap olsem namba wan lain God i kisim bek bilong em yet wantaim Pikinini Sipsip [em Krais Jisas].” Ol dispela manmeri i “kirap bek long dispela namba wan taim”; ol i bilong i go long heven bambai ol i ken i stap king na pris wantaim Krais inap 1,000 yia. Bihain God i stiaim olgeta samting bambai em i ken bungim ‘ol samting bilong graun.’ Em i kirap bungim bikpela lain, olsem “planti tumas manmeri ․․․ ol i bilong olgeta lain man, na bilong olgeta graun, na bilong olgeta kain skin, na bilong olgeta tok ples.” Ol dispela wokboi bilong God i winim taim bilong “bikpela hevi” na ol inap kisim laip i stap gut oltaim oltaim long “nupela graun.”—Revelesen 14:1, 4; 20:4, 6; 7:4, 9-17; 21:1, 4.

11. (a) Husat ol bai pas tru wantaim, olsem tok bilong Efesas 1:11 i makim? (b) Olsem wanem tok bilong Jon 15:4, 5 i stret long ol dispela manmeri i pas long Jisas?

¹¹ Ol pikinini bilong God, olsem “ol samting bilong heven,” em spirit holi i bin makim ol, ol i pas tru wantaim Jisas na Papa bilong em. Ol i kamap lain tru bilong tupela. God i “putim [ol] pinis long lain bilong em yet” bilong kisim Kingdom wantaim Jisas. (Efesas 1:11) Jisas i kirapim ol long pas gut wantaim em olsem ol han bilong diwai wain i pas long diwai, na bai ol inap karim planti kaikai. Sapos ol i lusim Krais Jisas bai ol “i no inap mekim wanpela samting.”—Jon 14:10, 11, 20; 15:4, 5; 1 Jon 2:27.

Nau Ol “Arapela Sipsip” Tu i Insait

12. (a) Olsem wanem ol “arapela sipsip” i bung wantaim “liklik lain sipsip”? (b) Olsem wanem tok bilong 1 Jon 2:1-6 i stret long dispela tupela lain?

¹² Tasol olsem wanem long ol planti milion arapela manmeri ol i kain olsem sipsip na inap 50 yia pinis Jisas i bin tilim ol i stap narapela lain long “ol meme”? (Matyu 25:31-40) Ol dispela manmeri ol i no bilong “liklik lain sipsip” bilong Jisas em i givim Kingdom long ol. Nogat. Tasol ol dispela “arapela sipsip” i bung wantaim “liklik lain sipsip” na ol i kamap wanpela bikpela lain sipsip i wok gut wantaim Papa na Pikinini. (Luk 12:32; Jon 10:16) Aposel Jon i tok, Krais Jisas “i mekim wok bilong tekewe sin bilong yumi [ol manmeri bilong “liklik lain”]. Na em i no mekim dispela wok bilong helpim yumi tasol. Nogat. Bilong helpim olgeta man i stap long graun.” Olsem na ol “arapela sipsip,” em God i kisim ol namel long olgeta man i stap long graun, ol tu inap pas gut wantaim God na Krais, olsem stap wanbel wantaim ol. I olsem Jon i tok: “Sapos wanpela man i bihainim tok bilong God, orait em i save tru long givim bel bilong en long God. Sapos wanpela man i tok, ‘Mi stap [wanbel] wantaim God,’ orait dispela man i mas wokabaut olsem Krais i bin wokabaut. Long dispela yumi inap save, yumi stap [wanbel] wantaim God.” Pastaim “liklik lain sipsip” na bihain ol “arapela sipsip” ol i mas wokabaut olsem Krais i bin wokabaut.—1 Jon 2:1-6.

13. (a) Jisas i beten long wanem samting long Jon 17:20, 21? (b) Olsem wanem yumi save dispela tok i no makim tasol ol manmeri ol bai wok king wantaim Krais?

¹³ Olsem na nau dispela tupela lain wantaim, bilong heven na bilong graun, ol i ‘stap wanbel wantaim Papa na Pikinini’; ol i wanbel wantaim long mekim wok bilong God. Jisas i beten na em i tok, “Mi laikim dispela olgeta man i stap wanbel, olsem yu Papa, yu stap long mi na mi stap long yu. Olsem tasol mi laikim ol i stap long yumitupela.” Dispela tok i no makim tasol lain bilong kisim wok king, long wanem ol disaipel bilong Jisas ol i no stap long Jehova, olsem ‘bodi bilong Jehova,’ o mekim wok king wantaim em, a? Olsem na insait bilong dispela tok i olsem ol i wok gut wantaim God na Krais, olsem ol i wanbel wantaim tupela na i gat wankain tingting, taim ol i autim tok long ol manmeri bilong graun.—Jon 17:20, 21.

14. Olsem wanem lain bilong heven i pas tru wantaim Krais long nau? Olsem wanem ol i save long dispela samting?

¹⁴ Dispela tupela lain wantaim i stap wanbel wantaim Papa na Pikinini, tasol lain bilong heven, em spirit holi i makim ol, ol i pas tru wantaim God na Krais long nau. Long wanem, nau God i mekim wok long ofa bilong Krais na kolim ol stretpela man bilong kisim laip. Em i mekim olsem bambai spirit holi inap kamapim ol i stap olsem ol pikinini bilong Em, na bihain bai ol inap kisim wok king wantaim Krais long heven. Ol i save God i kisim ol i stap olsem pikinini bilong em, long wanem ol i tok: “Holi Spirit yet [em strong bilong God i mekim ol i kamap pikinini bilong Em] i save helpim spirit bilong yumi [bikpela tingting bilong ol] na i tokaut ples klia long yumi stap pikinini bilong God.”—Rom 3:23, 24; 5:1; 8:15-18.

15. Ol manmeri ol inap kisim laip long graun, olsem wanem long ol long nau? na long bihain?

¹⁵ Ol manmeri ol inap kisim laip long graun, ol i no i stap olsem. Tasol God i kolim ol stretpela man inap long ol i stap pren bilong Em, olsem em i mekim long Ebraham na Rehap na sampela moa long bipo. Taim Krais i bosim graun long 1,000 yia, isi isi bai skin na tingting bilong ol dispela manmeri i kamap gutpela olgeta, olsem na taim laspela traim i pinis “bai olgeta samting i stap gut tumas [olsem ol] pikinini bilong God.” (Rom 8:19-21; Jems 2:21-26) Olsem na ol manmeri i bihainim tok bai God i kolim ol stretpela man bilong kisim laip i stap gut oltaim oltaim long graun.—Lukim Jon 10:10; Aisaia 9:7; 11:1-9; 35:1-6; 65:17-25.

16. (a) “Liklik lain sipsip” na ol “arapela sipsip” i mekim wanem na dispela samting i makim olsem ol i stap wanbel? (b) Tasol olsem wanem na tok bilong Jon 3:3-5 i makim “liklik lain sipsip” tasol?

¹⁶ Olgeta manmeri wan wan long “liklik lain sipsip” na long bikpela lain “arapela sipsip,” ol i amamas long mekim wok bilong God na ol i wok strong long mekim. (Luk 12:32; Jon 10:16; Taitas 2:13, 14) Liklik hap lain bilong lain bilong heven ol i stap yet long graun, ating ol i gat bikpela krismas na bikpela save moa long mekim ol wok Kristen, tasol dispela tupela lain wantaim i wok long bihainim ol gutpela pasin Kristen em spirit holi i kamapim. (Efesas 4:24; Galesia 5:22, 23) Tasol dispela tupela lain i no wankain olgeta, olsem Jisas i makim long Nikodimas taim em i no mekim yet sampela tok long laip i stap gut oltaim oltaim. Jisas i tokim Nikodimas: “Sapos man i no kamap nupela gen, em i no inap lukim kingdom bilong God.” (Jon 3:3-5) Olsem na ol Kristen em God i singautim ol bilong mekim wok king wantaim Jisas long Kingdom bilong Em, ol dispela Kristen i kamap nupela gen long spirit. (1 Korin 1:9, 26-30) Dispela samting i no painim ol “arapela sipsip”; no gat wok long ol i kamap nupela gen long spirit, long wanem ol i bilong kisim laip i stap gut oltaim oltaim long Paradais long graun aninit long dispela Kingdom.—Matyu 25:34, 46 namba tu hap; Luk 23:42, 43.

Kaikai Bilong Bikpela na Nupela Kontrak

17. (a) Olgeta manmeri i laik kisim laip i stap gut oltaim oltaim, bilong wanem ol i mas bung wantaim lain bilong God long taim bilong Memorial? (b) Olsem wanem long bung bilong Memorial long yia 1985?

¹⁷ Long dispela yia, 1986, long Mas 24, taim san i go daun pinis, ol Witnes Bilong Jehova long olgeta hap bilong graun ol i bin mekim Memorial o Kaikai Bilong Bikpela bilong tingim i dai bilong Jisas. Ol i tingim tru ofa bilong em, em i bin givim gutpela skin na blut bilong em bilong stretim bek nem bilong Papa bilong em na bilong baim bek ol sinman. (1 Korin 11:23-26) Olgeta manmeri i tingting long kisim laip (long heven o long graun) ol i mas bung wantaim lain bilong God long dispela taim bilong amamas. Long yia 1985 inap olsem 7,792,109 manmeri ol i bin bung wantaim bilong tingim i dai bilong Jisas. Tasol ol manmeri i kisim bret na wain bilong Memorial, em dispela i makim bodi na blut bilong Krais, ol inap olsem 9,051 tasol. Bilong wanem ol i liklik lain olsem?

18, 19. (a) Long Luk sapta 22 Jisas i stori long wanem ol kontrak? (b) Wanem wok bilong dispela tupela kontrak wan wan? (c) Olsem wanem Jisas i mekim wok olsem “wanpela namelman tasol,” olsem Moses i makim?

¹⁸ Orait, Jisas i tok wanem taim em i kirapim dispela Kaikai long pastaim? Em i givim bret long ol disaipel na bihain em i mekim olsem tasol long wain na em i tok: “Dispela kap wain em i nupela kontrak long blut bilong mi, mi kapsaitim bilong helpim yupela.” Bihain em i stori moa long as bilong kisim ol i kam insait long nupela kontrak, em i tok: “Taim ol samting i kamap bilong traim mi, yupela i bin i stap wantaim mi, na yupela i no lusim mi. Na Papa bilong mi em i givim kingdom long mi, olsem tasol mi givim kingdom long yupela. Na long kingdom bilong mi bai yupela i kaikai na dring long tebol bilong mi. Na bai yupela i sindaun long sia bilong king na yupela i stap jas bilong ol 12-pela lain manmeri bilong Isrel.”—Luk 22:19, 20, 28-30.

¹⁹ Profet Jeremaia i bin mekim tok profet long dispela nupela kontrak, em i tok long rot bilong dispela kontrak bai Jehova i tekewe rong na sin bilong lain bilong em bambai ol i ken “save long Jehova” na pas tru wantaim em. (Jeremaia 31:31, 34, NW) Moses em i “namelman” bilong kontrak bilong Lo God i mekim wantaim lain Isrel bilong skin, na olsem tasol Jisas em i kamap “namelman bilong ․․․ dispela kontrak i winim kontrak bilong bipo,” em dispela kontrak God i wokim wantaim lain Isrel bilong spirit, olsem “Isrel tru bilong God.” Dispela em bilong baim bek ol manmeri God i singautim ol bilong kisim Kingdom wantaim Krais. Long dispela rot “ol i ken kisim dispela laip bipo God i tok long givim long ol pikinini bilong en. Na bai ol i stap gut oltaim oltaim.” (Galesia 3:19, 20; 6:16; Hibru 8:6; 9:15; 12:24) Long dispela pasin olsem Baibel i stori long en, Krais Jisas i kamap dispela “wanpela namelman tasol i sanap namel long God na man.”—1 Timoti 2:5, 6.

20. (a) I stret husat ol i ken kisim bret na dring wain bilong Memorial? (b) Bilong wanem i olsem?

²⁰ Orait, i stret husat ol i ken kisim bret na wain bilong Memorial? Em dispela lain God i wokim nupela kontrak wantaim ol long ofa bilong Jisas. Ol tasol i ken kisim dispela bret na dring dispela wain. (Sam 50:5) Wok bilong dispela kontrak i bilong tekewe sin bilong ol 144,000 wanwok bilong Jisas bambai God i ken kolim ol stretpela man na orait long ol i kisim laip olsem man bilong graun pastaim, na nau ol i ken givim dispela laip olsem ofa na God i ken kisim ol i go insait long Kingdom bilong heven. (Rom 4:25; 2 Timoti 2:10, 12) Tasol olsem wanem long ol “arapela sipsip”?

21. (a) Ol “arapela sipsip” i go long Memorial bilong lukluk tasol na dispela samting i helpim ol olsem wanem? (b) Memorial i kirapim ol man long tingim gut wanem samting? Olsem na i gat wanem askim?

²¹ Ol manmeri bilong ol “arapela sipsip” ol i no insait long dispela nupela kontrak, olsem na ol i no save kisim bret o dring wain bilong Memorial. Tasol taim ol i go long dispela bung na lukluk tasol, dispela samting i save helpim ol. Em i helpim ol long tingim gut ol samting bilong spirit olsem Jisas i tok long en taim em i beten long Papa bilong em na em i tok: “Laip i stap gut oltaim em i olsem: Ol i save long yu, yu wanpela tasol yu God tru, na ol i save long Jisas Krais, em yu bin salim i kam.” (Jon 17:3) Na yu mas tingim: Kaikai Bilong Bikpela o Memorial i kirapim ol manmeri long tingim gut bodi na blut bilong Jisas. Em i givim bodi na blut bilong em olsem ofa na dispela samting em i bikpela samting tru long olgeta manmeri i laik kisim laip i stap gut oltaim oltaim. Olsem wanem dispela em i bikpela samting long ol “arapela sipsip,” long wanem ol i no insait long nupela kontrak na ol i no save kisim bret na wain long Memorial? Orait, nau yumi ken stori long dispela samting long tok i kamap bihain.

Bai Yu Bekim Olsem Wanem?

◻ Olsem wanem isi isi Jisas i givim save long ol man olsem ol inap kisim laip i stap gut oltaim oltaim?

◻ God i bin “stiaim olgeta samting” na bungim wanem samting pastaim na wanem samting bihain?

◻ Olsem wanem ol “arapela sipsip” i stap wanbel wantaim Papa na Pikinini na ol brata bilong Krais?

◻ Olsem wanem na ol Kristen em spirit holi i bin makim ol, ol tasol i save kisim bret na dring wain bilong Memorial?

[Piksa long pes 13]

“Liklik lain sipsip” na ol “arapela sipsip” ol i wanbel wantaim—ol i wok wantaim long mekim wok bilong God olsem Jisas i bin mekim