Inapim Ol Samting Jisas i Beten Long En

1, 2. Jisas i mekim wanem bihain long em i mekim bung bilong Pasova wantaim ol aposel long yia 33 C.E.?

EM APINUN tru bilong mun Nisan 14, long yia 33 C.E. Jisas i stap wantaim ol pren em i laikim tru na ol i mekim pinis bung bilong tingim Pasova. Dispela bung i helpim ol long tingim gen ol samting God i bin mekim bilong kisim bek lain Israel long Isip. Tasol God bai mekim bikpela samting moa long kisim bek ol gutpela disaipel bilong Jisas. Long neks de, ol birua bilong Jisas bai kilim em i dai. Laip bilong Jisas i gutpela olgeta na em bai givim dispela laip olsem sakrifais, na dispela bai opim rot long olgeta manmeri inap lusim kalabus bilong sin na dai.—Hib. 9:12-14.

² Jisas i no laik bai yumi lusim tingting long dispela gutpela presen God i bin givim. Olsem na em i kirapim nupela bung we i kisim ples bilong Pasova, em bung yumi mas tingim long olgeta yia. Inap 11-pela gutpela aposel i stap wantaim Jisas, na em i kisim bret i no gat yis, brukim, na givim long olgeta wan wan bilong ol. Em i tokim ol olsem: “Dispela i makim bodi bilong mi em mi bai givim bilong helpim yupela. Yupela i mas mekim olsem yet bilong tingim mi.” Na tu, em i givim kap i gat retpela wain na em i tok: “Dispela kap i makim nupela kontrak mi mekim long rot bilong blut bilong mi. Dispela blut bai kapsait bilong helpim yupela.”—Luk 22:19, 20.

 3. (a) Wanem bikpela senis i kamap bihain long taim Jisas i dai? (b) Yumi mas tingim wanem ol askim taim yumi skelim beten bilong Jisas?

³ Em klostu long taim we kontrak bilong Lo namel long God na lain Israel bai pinis. Bai i gat nupela kontrak namel long Jehova na ol disaipel bilong Jisas em God i makim ol long holi spirit. Jisas i no laik bai ol disaipel i bihainim pasin bilong lain Israel. Lain Israel i no stap gut long lotuim God na dispela i bagarapim nem bilong God. (Jon 7:45-49; Apo. 23:6-9) Jisas i laik bai ol disaipel i stap wanbel na mekim wok bambai ol inap litimapim nem bilong God. Olsem na Jisas i mekim wanem? Em i askim Papa bilong em long helpim ol disaipel, na em i mekim naispela beten tru we olgeta manmeri inap ritim. (Lukim piksa long kirap bilong stadi.) Dispela beten i stap long Jon 17:1-26. Taim yumi skelim gut dispela beten, yumi ken tingim ol dispela askim: “God i bin bekim beten bilong Jisas, o nogat? Mi inapim ol samting Jisas i beten long en, o nogat?”

4, 5. (a) Yumi kisim wanem skul long namba 1 hap bilong beten bilong Jisas? (b) Taim Jisas i beten long samting em yet i laikim, Jehova i bekim beten bilong em olsem wanem?

⁴ Jisas i skulim ol disaipel long planti gutpela samting i go inap long biknait tru. Jisas i lukluk i go antap long skai na em i beten olsem: “Papa, taim i kamap pinis, givim glori long pikinini bilong yu na bai pikinini bilong yu i ken givim glori long yu. Long wanem, yu bin givim em namba long bosim olgeta manmeri. Olsem na em inap givim laip oltaim long ol lain em yu bin givim long em.” Na em i tok moa olsem: “Long graun, mi bin givim glori long yu, na mi pinisim dispela wok yu bin givim mi long mekim. Orait nau Papa, givim glori long mi. Larim mi stap wantaim yu na kisim dispela glori mi bin i gat taim mi bin stap wantaim yu paslain long ol manmeri i kamap long graun.”—Jon 17:1-5.

⁵ Taim Jisas i kirapim beten, em i kolim ol samting we i bikpela samting tru long laip bilong em. Namba 1, em i beten long Papa bilong em i ken kisim glori. Jisas i beten long wankain samting taim em i skulim ol disaipel long beten. (Luk 11:2) Namba 2, em i beten long ol samting ol disaipel i sot long en. Em i askim Papa long “givim laip oltaim long ol.” Na las tru, Jisas i askim long samting em yet i laikim, na em i tok: “Papa, givim glori long mi. Larim mi stap wantaim yu na kisim dispela glori mi bin i gat taim mi bin stap wantaim yu paslain long ol manmeri i kamap long graun.” Jehova i harim beten bilong Pikinini bilong em na em i givim planti samting moa winim ol samting Jisas i bin askim long en. God i givim em “wanpela nem i gutpela moa winim nem” bilong olgeta ensel.—Hib. 1:4.

 6. Ol aposel i mas mekim wanem na bai ol inap kisim laip oltaim? Olsem wanem yumi save olsem ol aposel i bin mekim ol dispela samting?

⁶ Long beten, Jisas i kolim tu samting yumi mas mekim na bai yumi inap kisim presen bilong laip oltaim. (Ritim Jon 17:3.) Em i tok yumi mas wok yet long “kisim save” long God na Krais. Wanpela rot em olsem, yumi mas mekim olgeta samting yumi inap mekim bilong kisim sampela save moa long Jehova na Pikinini bilong em. Narapela rot em olsem, yumi mas bihainim ol samting yumi kisim save pinis long en. Olsem Jisas i kolim long beten, ol aposel i mekim pinis dispela 2-pela samting. Jisas i tok: “Ol tok yu bin givim long mi, mi givim long ol. Na ol i kisim ol dispela tok.” (Jon 17:8) Tasol sapos ol i laik kisim laip oltaim, orait ol i mas wok yet long tingim tingim Tok Bilong God long bel, na bihainim dispela tok long ol samting ol i mekim long olgeta wan wan de. Yu ting ol aposel i bin mekim olsem long laip olgeta bilong ol taim ol i stap long graun? Yes, ol i bin mekim olsem. Yumi save long dispela, long wanem, nem bilong olgeta wan wan bilong ol i stap strong pinis long 12-pela as ston bilong Nupela Jerusalem.—Rev. 21:14.

 7. Bilong “kisim save” long God, yumi mas mekim wanem ol samting? Bilong wanem em i bikpela samting tru long yumi mas kisim save long God?

⁷ Sapos yumi laik kisim laip oltaim, orait yumi mas wok yet long “kisim save” long God. Dispela i makim wanem samting? Yumi mas wok yet long kisim planti save moa long em. Yumi mas kisim save long ol pasin bilong em na samting em i tingting pinis long mekim. Na tu, yumi mas laikim em tru na pas gut moa wantaim em. Na yumi mas soim pasin laikim long ol bratasista bilong yumi. Baibel i tok: “Man i no mekim pasin laikim em i no kisim save long God.” (1 Jon 4:8) Na tu, yumi mas bihainim tok bilong God. (Ritim 1 Jon 2:3-5.) Em gutpela blesing tru long yumi inap stap namel long ol manmeri husat i save long Jehova! Tasol yumi mas was gut, na no ken lusim gutpela pasin bilong pas gut wantaim God, olsem Judas Iskariot i bin mekim. Olsem na yumi mas wok hat long strongim pasin bilong yumi long pas gut wantaim Jehova. Sapos yumi mekim olsem, orait Jehova bai givim yumi gutpela presen bilong laip oltaim.—Mat. 24:13.

8, 9. Taim Jisas i stap long graun, wanem samting em nambawan bikpela samting long laip bilong em? Yumi ken tok Jisas i bin heitim wanem pasin?

⁸ Taim yumi ritim beten bilong Jisas long Jon sapta 17, yumi inap luksave olsem Jisas i laikim tru ol aposel, na tu, em i laikim tru yumi. (Jon 17:20) Jisas i laik bai God i kisim bek yumi, tasol dispela i no bikpela samting tru long em. Taim em i stap long graun, nambawan bikpela samting em i tingim em olsem, em i laik givim glori long nem bilong Papa bilong em. Olsem: Taim Jisas i stori long risen bilong em long kam long graun, em i ritim tok i stap long skrol bilong Aisaia, olsem: “Spirit bilong Jehova i stap long mi, long wanem, em i bin makim mi long autim gutnius long ol rabisman.” Yumi inap save tru olsem Jisas i bin kolim stret nem bilong God taim em i ritim dispela skrol.—Luk 4:16-21.

⁹ Paslain tru long Jisas i kam long graun, ol bikman bilong lotu Juda i tambuim ol man long yusim nem bilong God. Yumi save olsem Jisas i bin heitim tru dispela pasin. Em i tokim ol dispela bikman bilong lotu olsem: “Mi kam long nem bilong Papa bilong mi, tasol yupela i no bin kisim mi. Sapos narapela man i kam long nem bilong em yet, orait yupela bai kisim em.” (Jon 5:43) Sampela de paslain long Jisas i dai, em i beten na kolim gen nambawan bikpela samting em i tingim, em i tok: “Papa, litimapim nem bilong yu.” (Jon 12:28) Long dispela beten yumi wok long skelim, yumi inap luksave olsem nambawan bikpela samting long laip bilong Jisas em long givim glori long nem bilong Papa bilong em.

10, 11. (a) Olsem wanem Jisas i bin autim nem bilong Papa bilong em? (b) Bilong wanem ol disaipel bilong Jisas i wok long autim nem bilong Jehova?

¹⁰ Jisas i beten olsem: “Mi bin kamapim nem bilong yu long dispela lain yu bin kisim namel long ol manmeri na givim long mi. Ol i bilong yu, na yu givim ol long mi, na ol i bin bihainim tok bilong yu. Mi no stap moa namel long ol manmeri, tasol lain bilong mi ol i stap namel long ol manmeri na mi bai kam long yu. Papa Holi, tingim nem bilong yu, em yu bin givim long mi, na lukautim ol na bai ol i ken i stap wanpela olsem mitupela i stap wanpela.”—Jon 17:6, 11.

¹¹ Taim Jisas i “kamapim,” o autim, nem bilong Papa bilong em long ol disaipel, em i yusim nem Jehova. Na tu, Jisas i helpim ol long kliagut long Jehova em i husat. Em i skulim ol long ol gutpela pasin bilong God na pasin laikim em i save soim long yumi. (Kis. 34:5-7) Long nau, Jisas i stap King long heven na em i wok yet long helpim ol disaipel long autim nem bilong Jehova long olgeta hap bilong graun. Bilong wanem ol disaipel i mekim dispela wok? Ol i laik helpim planti manmeri moa long kisim save long Jehova paslain long pinis bilong dispela haptaim nogut bilong nau. Taim pinis i kamap, God bai kisim bek ol witnes bilong em husat i stap gut long em, na olgeta manmeri bai save olsem Jehova i gat biknem tru!—Ese. 36:23.

12. Bilong pinisim wok Jisas i bin kirapim, yumi mas mekim wanem 3-pela samting?

¹² Jisas i tokim ol disaipel long pinisim wok em i bin kirapim. Em i beten olsem: “Yu bin salim mi i go namel long ol manmeri bilong graun, na mi tu mi bin salim ol i go namel long ol manmeri bilong graun.” Tasol Jisas i save olsem ol bai nidim helpim long mekim dispela wok. Taim Jisas i stap wantaim ol, em i wok strong long helpim ol disaipel long daunim ol pasin kranki bilong ol. Long beten em i askim Jehova long helpim ol disaipel long mekim 3-pela bikpela samting. Namba 1, em i beten bai ol disaipel i no ken insait long ol samting bilong dispela graun bilong Satan. Namba 2, em i beten bai ol disaipel i bihainim Tok Bilong God na stap holi. Namba 3, em i beten bai ol disaipel i ken pas gut wantaim, wankain olsem em na Papa i pas gut wantaim. Yumi olgeta wan wan i mas askim yumi yet olsem: ‘Mi mekim ol dispela 3-pela samting em Jisas i kolim long beten?’ Jisas i bilip olsem sapos ol disaipel i mekim ol dispela samting, orait planti man bai bilipim tok ol i autim.—Ritim Jon 17:15-21.

13. Long taim bilong ol aposel, olsem wanem Jehova i bekim beten bilong Jisas?

¹³ Taim yumi stadi long Buk Aposel, yumi inap lukim olsem Jehova i bin harim na bekim beten bilong Jisas. Long taim bilong ol aposel, kain kain manmeri i kamap Kristen, ol Juda na ol man bilong ol narapela lain, ol maniman na ol rabisman, na ol sleiv na ol bosman. Tingim, em isi long ol inap bung wantaim lain bilong ol yet tasol na i no bung wantaim ol narapela, na hevi inap kamap long dispela pasin! Tasol ol i pas gut wantaim, olsem na aposel Pol i tok ol i kain olsem ol narapela narapela hap bilong bodi na Jisas i stap olsem het bilong ol. (Efe. 4:15, 16) Ol manmeri long graun bilong Satan i no pas gut wantaim, olsem na taim ol dispela Kristen i pas gut wantaim, dispela i soim olsem holi spirit bilong Jehova tasol inap kamapim dispela pasin.—1 Kor. 3:5-7.

14. Long taim bilong yumi, olsem wanem Jehova i bekim beten bilong Jisas?

¹⁴ Tasol sori tru, ol samting i senis bihain long taim ol aposel i dai. Bikpela pasin apostet i kirap. Ol bilip giaman i kirap insait long kongrigesen na i mekim na olgeta i lusim pasin bilong pas gut wantaim, na ol i brukim lain. (Apo. 20:29, 30) Tasol long yia 1919, Jisas i helpim ol Kristen God i bin makim na ol i lusim kalabus bilong lotu giaman, na Jisas i bungim ol long “nambawan gutpela rot bilong mekim ol man i kamap wanbel.” (Kol. 3:14) Ol i pas gut na stap wanbel long mekim wok autim tok. Orait, wanem gutpela samting i kamap? Long nau, winim 7 milion manmeri “bilong olgeta kantri na bilong olgeta lain na bilong olgeta lain pipol na bilong olgeta tokples” i pas gut wantaim na stap wanbel long lotuim Jehova wantaim ol Kristen God i bin makim. (Jon 10:16; Rev. 7:9) Dispela em naispela bekim tru long beten Jisas i bin mekim long Jehova olsem, “ol manmeri bilong graun i ken save olsem yu bin salim mi i kam na yu laikim ol olsem yu laikim mi”!—Jon 17:23.

15. Taim Jisas i beten, em i laik bai ol Kristen God i makim i kisim wanem samting?

¹⁵ Long apinun bilong mun Nisan 14, Jisas i givim “glori,” o ona, long ol aposel taim em i mekim kontrak wantaim ol olsem ol bai mekim wok king wantaim em long Kingdom. (Luk 22:28-30; Jon 17:22) Olsem na Jisas i tingim olgeta manmeri husat bai kamap ol Kristen em God bai makim ol long holi spirit, na em i beten olsem: “Papa, mi laik bai dispela lain yu bin givim long mi, ol tu i ken stap wantaim mi long hap mi stap long en. Na ol i ken lukim dispela glori bilong mi, em yu bin givim long mi, long wanem, yu bin laikim mi paslain long ol manmeri i bin bon long graun.” (Jon 17:24) Ol arapela sipsip i amamas long pe em ol Kristen God i makim ol bai kisim, na ol i no bel nogut. Dispela i kamapim klia olsem ol Kristen tru long nau i pas gut wantaim na ol i stap wanbel.

16, 17. (a) Long pinis bilong beten bilong Jisas, em i tok em bai wok yet long mekim wanem? (b) Yumi mas wok yet long mekim wanem?

¹⁶ Jehova i gat wanpela lain manmeri husat i pas gut wantaim na stap wanbel na ol i save gut long em, tasol planti manmeri bilong graun i no laik luksave long dispela samting. Ol i mekim olsem, long wanem, ol bikman bilong lotu i skulim ol long ol tok giaman. Wankain samting i bin kamap long taim bilong Jisas. Olsem na taim Jisas i laik pinisim beten, em i tok: “Stretpela Papa, ol manmeri i stap longwe long yu, ol i no save long yu husat, tasol mi save yu husat, na lain bilong mi i save olsem yu bin salim mi i kam. Mi bin kamapim nem bilong yu long ol na mi bai kamapim moa yet. Bai ol i ken kamapim pasin bilong laikim ol arapela olsem yu bin laikim mi, na bai mi ken pas wantaim ol.”—Jon 17:25, 26.

¹⁷ Jisas i bin mekim gut wok bilong autim nem bilong Papa bilong em. Long nau, em i stap Het bilong kongrigesen na em i wok yet long helpim yumi long autim nem bilong Papa bilong em na tokaut long samting em Papa i tingting pinis long mekim. I gutpela yumi bihainim tok bilong Jisas na givim bel tru long autim tok na kamapim ol disaipel. (Mat. 28:19, 20; Apo. 10:42) Na tu, yumi ol manmeri bilong God i mas wok strong long pas gut wantaim na stap wanbel. Taim yumi mekim olsem, yumi inapim ol samting Jisas i bin beten long en. Dispela bai givim glori long nem bilong Jehova na yumi bai stap amamas inap oltaim oltaim.