Jehova Em i Man Bilong Bosim Yumi!
“Mipela i mas bihainim tok bilong God tasol. Mipela i no ken bihainim tok bilong ol man.”—APOSEL 5:29.
1, 2. Taim lo bilong ol man i no stret wantaim laik bilong God, ol Witnes Bilong Jehova i save bihainim wanem pasin bilong ol aposel?
GOD JEHOVA i bin larim 12-pela man i kot long ai bilong wanpela bikpela kaunsil. Dispela samting i kamap long yia 33, na dispela kaunsil em Bikpela Kaunsil bilong ol Juda (ol i kolim Sanhedrin). Dispela 12-pela man i gat kot em ol aposel bilong Krais Jisas. Harim tok bilong hetpris! Em i tok: ‘Mipela i tambuim yupela long autim tok long nem bilong Jisas, tasol tok bilong yupela i go pulap long Jerusalem.’ Nau Pita wantaim ol narapela aposel i bekim tok, olsem: “Mipela i mas bihainim tok bilong God tasol. Mipela i no ken bihainim tok bilong ol man.” (Aposel 5:27-29) I olsem ol i tok: “Jehova em i Man bilong bosim mipela!”
2 Tru tumas, Jehova em i Man bilong bosim ol disaipel tru bilong Jisas. Dispela samting i kamap klia long hap bilong Baibel ol i kolim Wok Bilong Ol Aposel, em “Luk, dispela dokta mipela i save laikim tumas” i bin raitim long Rom long yia 61 samting. (Kolosi 4:14) Olsem ol aposel long bipo, lain bilong Jehova long nau tu ol i save bihainim tok bilong Man bilong bosim ol, em i stap long heven, long taim lo bilong ol man i no stret long laik bilong Em. Tasol ol tok bilong hap bilong Aposel long Baibel i lainim yumi long wanem samting moa? (Taim yu yet yu stadi long dispela tok bilong Wastaua, gutpela sapos yu kaunim ol ves bilong Aposel ol i raitim long blakpela rait tru.)
Jisas i Givim Wok long Ol Bilong Autim Tok
3. Taim ol disaipel i “kisim baptais long Holi Spirit,” nau ol i tingim wanem wok em i nambawan wok bilong ol?
3 Ol aposel inap sanap strong na bekim tok olsem, long wanem i gat ol samting i bin strongim bilip bilong ol. Krais i bin karim pen na i dai, tasol ol i save em i kirap bek pinis. (1:1-5) Em i bin “kisim laip gen na i kamap long ol aposel.” Em i bin tanim i kamap man long narapela narapela taim insait long 40 de na lainim ol long tok i tru bilong Kingdom. Na em i bin tokim ol disaipel ol i mas wet long Jerusalem inap long taim ol i “kisim baptais long Holi Spirit.” Taim ol i kisim pinis, nau wok bilong autim tok i mas kamap nambawan bikpela wok bilong ol, na dispela wok em i nambawan bikpela wok bilong ol Witnes Bilong Jehova long nau tu.—Luk 24:27, 49; Jon 20:19–21:24.
4. Wanem samting i mas kamap taim ol disaipel bilong Jisas i kisim spirit holi?
4 Taim ol aposel i no kisim yet spirit holi, ol i gat tingting kranki long Kingdom bilong God—ol i ting dispela Kingdom bai kamap long graun na pinisim wok bilong ol Rom long bosim kantri bilong ol. Olsem na ol i askim Jisas: “Bikpela, ating nau long dispela taim bai yu mekim kantri Israel i kamap strong gen na i gat king i bosim em, o nogat?” (1:6-8) I olsem Jisas i tok, Nogat, long wanem em i tok, “Em i no samting bilong yupela bai yupela i save long ol taim na ol de.” Em i tok, ‘taim spirit holi i kam i stap long ol,’ bai ol i kisim strong bilong autim tok bilong Kingdom bilong God long heven; ol i no ken autim tok bilong wanpela kingdom i stap long graun. Ol i mas autim tok long Jerusalem, na long Judia, na long Samaria, “na i go inap long olgeta hap bilong graun.” Spirit bilong God i helpim ol Witnes Bilong Jehova long nau tu na ol i mekim wankain wok long olgeta hap bilong graun long dispela taim bilong pinis.
5. Olsem wanem Jisas bai i kam bek long wankain pasin olsem em i bin i go?
5 Jisas i tok ol i mas autim tok long olgeta hap, na nau em i kirap long i go bek long heven. Em i lusim ol disaipel na i go antap, na bihain em i kamap long ai bilong Man bilong bosim em i stap long heven, na em i kirap mekim wok long dispela ples spirit. (1:9-11) Wanpela klaut i haitim Jisas na ol aposel i no inap lukim em moa. Em i bin tanim i kamap man, tasol em i pinisim dispela bodi bilong man em i bin kisim na long bodi bilong heven em i go antap. Em i go pinis na tupela ensel i kam na tupela i tok, Jisas bai kam bek “long wankain pasin.” Na samting i bin kamap olsem tasol, long wanem ol disaipel bilong Jisas tasol i bin lukim em i go, na ol Witnes Bilong Jehova tasol i save em i kam bek pinis olsem spirit.
Jehova i Makim
6. Olsem wanem ol i bin makim senis bilong Judas Iskariot?
6 Orait, nau ol aposel i go bek long Jerusalem. (1:12-26) Long wanpela rum antap (ating long haus bilong mama bilong Mak, em Maria) ol 11-pela gutpela aposel i wok long beten wantaim ol brata bilong Jisas, na ol narapela disaipel bilong em, na mama bilong em, em Maria. (Mak 6:3; Jems 1:1) Tasol husat bai “kisim wok” bilong Judas? (Buk Song 109:8) Inap olsem 120 disaipel ol i bung i stap taim God i makim man bilong senisim Judas, em man bilong kamapim Jisas long ol birua. Bilong inapim lain aposel na bai i gat 12-pela gen, God i mas makim wanpela man em i bin kamap wanpela disaipel bilong Jisas taim Jisas i mekim wok bilong em long graun, na em i bin lukim Jisas i kirap bek. Na tu dispela man i mas bihainim tok bilong God, em Man bilong bosim em. Ol i beten, na bihain ol i tromoi tupela ston bilong makim husat i mas kisim dispela wok, em Matias o Josep Barsabas. God i mekim na ston bilong Matias i kamap.—Sindaun 16:33.
7. (a) Olsem wanem Judas i bin “kisim mani olsem pe bilong dispela pasin nogut em i bin mekim, na em i baim wanpela hap graun”? (b) Judas i dai olsem wanem?
7 Judas Iskariot i no bin bihainim tok bilong Jehova, em Man bilong bosim em. Bilong kisim 30 mani silva tasol em i bin kamapim Pikinini bilong God long ol birua! Judas i bekim dispela mani long ol bikpris, tasol Pita i tok “Judas i kisim mani olsem pe bilong dispela pasin nogut em i bin mekim, na em i baim wanpela hap graun.” Bilong wanem Pita i tok olsem? Long wanem ol bikpris i baim dispela hap graun ol i kolim “Graun I Gat Blut,” tasol ol i baim long mani bilong Judas, na rong bilong Judas tasol i mekim na ol i baim. Ol man i tok, dispela hap graun em wanpela ples stret long hap bilong saut long Ples Daun bilong Hinom. Judas i bagarap olgeta long ai bilong Man bilong bosim em em i stap long heven, olsem na Judas i go “hangamapim em yet.” (Matyu 27:3-10) Ating baklain o han bilong diwai i bruk, olsem na Judas i pundaun antap long ol ston i gat sap na ‘bel bilong em i bruk na i kapsait long graun.’ Nogut wanpela man long lain bilong yumi em tu i kamap wanpela brata giaman!
Spirit Holi i Pulap long Ol!
8. Wanem taim ol disaipel bilong Jisas i bin kisim baptais long spirit holi? Kisim pinis, na bihain wanem samting i bin kamap?
8 Jisas i bin tok promis olsem ol bai kisim baptais long spirit holi. Orait, olsem wanem long dispela? Ol i bin kisim spirit holi long Bikpela De Bilong Pentikos long yia 33, em 10-pela de bihain long taim Jisas i bin go antap long heven. (2:1-4) Taim ol i kisim baptais olsem, bel bilong ol i kirap tru! Inap olsem 120 disaipel ol i bung long rum antap na “wantu wanpela nois i kam long heven, em i olsem krai bilong strongpela win.” Em i no win, tasol krai bilong en i olsem krai bilong win. Samting “olsem paia” i kamap na i stap long olgeta wan wan disaipel na aposel. “Holi Spirit i pulap long olgeta dispela manmeri, na ol i stat long mekim tok long ol kain kain tok ples.” Taim ol i kisim dispela baptais, olsem spirit holi i kapsait long ol, long dispela taim spirit holi i mekim na ol i kamap pikinini bilong God, na God i makim ol i bilong em yet, na em i putim mak long ol bilong makim olsem ol i bilong kisim laip long heven.—Jon 3:3, 5; 2 Korin 1:21, 22; 1 Jon 2:20.
9. Spirit holi i pulap long ol disaipel na ol i autim tok bilong wanem samting?
9 Ol Juda na ol narapela man i bihainim lotu bilong ol, em ol i bilong “olgeta kantri bilong graun” na ol i kam i stap long Jerusalem long dispela taim, ol i kirap nogut long ol dispela samting i kamap. (2:5-13) Ol i tok: “Olsem wanem na yumi olgeta wan wan yumi harim ol i toktok long tok ples bilong yumi stret?” Ating ol i harim ol i toktok long tok ples bilong ol man bilong kantri Midia (i stap klostu long Judia long hap sankamap), o bilong ol Frigia (long Esia Maina), o bilong ol Rom (long Yurop). Taim ol disaipel i autim tok “bilong ol strongpela wok bilong God” long ol dispela kain kain tok ples, planti manmeri i kirap nogut long dispela samting, tasol sampela ol i tok bilas na ol i tok, ‘Ating ol i spak.’
Pita i Autim Tok na Tok Bilong Em i Sutim Tru Bel Bilong Ol
10. Dispela samting i kamap long de Pentikos long yia 33 i truim wanem tok profet? I gat truim bilong dispela tok profet long nau tu o nogat?
10 Pita i kirap long autim tok na pastaim em i tok, ol disaipel i no spak long wanem em 9 klok tasol long moningtaim. (2:14-21) Em i tok, dispela samting i kamap em i truim tok promis bilong God, em i bin tok long kapsaitim spirit bilong em long ol manmeri bilong em. Na God i kirapim Pita long makim taim bilong yumi, long wanem Pita i tok “klostu long las de” bai ol “i autim tok bilong [God] olsem ol profet.” (Joel 2:28-32) Klostu long las de bai Jehova i mekim ol narapela kain samting i kamap long skai, na bai em i wokim ol mirakel long graun, na bihain bai bikpela de bilong em i kamap. Na long dispela taim ol manmeri i bilip na ol i kolim nem bilong em na singaut long em bilong helpim ol, em bai kisim bek ol dispela manmeri tasol. Long nau tu God i bin kapsaitim spirit bilong em long ol manmeri em i makim, na dispela samting i bin helpim ol long wok strong tru long ‘autim tok olsem ol profet,’ na long mekim gut dispela wok.
11. Ol Juda i mekim wanem long Jisas? Tasol God i mekim wanem long em?
11 Bihain Pita i helpim ol man long save long dispela Man em God i bin tok long salim em i kam. (2:22-28) God yet i makim olsem Jisas em i dispela Man, long wanem em i bin givim strong long Jisas na Jisas i bin mekim ol strongpela wok na ol kain kain mirakel. (Hibru 2:3, 4) Tasol ol Juda i bin nilim Jisas long diwai “long han bilong ol man nogut,” em ol Rom ol i no save bihainim lo bilong God. Dispela samting i bin kamap “olsem bipo yet [God] i bin tingim na i pasim tok pinis long mekim,” long wanem em laik bilong God. Tasol God i kirapim bek Jisas, na em i pinisim bodi bilong Jisas long wanpela kain pasin bambai bodi bilong em i no ken sting long matmat.—Buk Song 16:8-11.
12. Devit i bin mekim tok profet long wanem samting bai kamap? Ol man i mas mekim wanem bambai God inap kisim bek ol?
12 Pita i autim tok i go na em i kamapim sampela tok profet moa i makim dispela Man em God i tok long salim em i kam. (2:29-36) Em i tok, Devit i bin tok profet long Jisas, em nambawan bikpela tumbuna pikinini bilong Devit na em i dispela Man i mas i kam, na Devit i tok, Jisas bai dai na kirap bek. Pita i tok, Jisas i go antap pinis na em i sindaun long han sut bilong God. Em i kisim spirit holi long han bilong Papa bilong em na nau em i kapsaitim long ol. (Buk Song 110:1) Ol man i harim dispela tok bilong Pita ol i bin ‘lukim na harim’ dispela samting i kamap long rot bilong spirit holi, long wanem ol i bin lukim olsem ol hap paia i stap antap long het bilong ol disaipel, na ol i bin harim ol kain kain tok ples ol i mekim. Pita i tok tu, ol man i laik bai God i kisim bek ol, ol i mas bilip olsem Jisas em i Bikpela bilong ol na em i dispela Man em God i bin tok long salim em i kam.—Rom 10:9; Filipai 2:9-11.
Jehova i Mekim na Lain Bilong Ol i Go Bikpela
13. (a) Ol Juda na ol narapela man i bihainim lotu Juda ol i mas bilip long wanem samting na bai ol inap baptais stret? (b) Hamas ol i bin kisim baptais? Na wanem samting i kamap long Jerusalem?
13 Ol tok bilong Pita i sutim tru bel bilong ol manmeri i harim! (2:37-42) Ol i pilim tru rong ol i bin mekim, em ol i bin orait long ol man i kilim i dai dispela Man em God i bin salim em i kam. Olsem na Pita i tok: “Yupela olgeta wan wan i mas tanim bel na kisim baptais long nem bilong Jisas Krais, na God bai i lusim ol sin bilong yupela. Yupela i mekim olsem, na bai God i givim Holi Spirit long yupela.” Ol Juda na ol man bilong ol narapela lain, em ol i bihainim lotu Juda, ol i bilip olsem Jehova em i God, na ol i save ol i mas kisim spirit bilong Em. Tasol nau ol i mas tanim bel na bilip olsem Jisas em dispela Man God i bin tok long salim em i kam, na bai ol inap kisim baptais long nem bilong Papa, na bilong Pikinini, na bilong spirit holi, em dispela i makim olsem ol i save long wok bilong Papa na Pikinini na spirit holi. (Matyu 28:19, 20) Taim Pita i autim tok long ol dispela Juda na ol dispela narapela man i bihainim lotu Juda, nau Pita i mekim wok long namba wan ki bilong spirit em Jisas i bin givim long em bilong givim save long ol Juda na opim dua long ol bambai ol inap go insait long Kingdom bilong heven. (Matyu 16:19) Long dispela de tasol inap olsem 3,000 ol i kisim baptais! Dispela bikpela lain witnes bilong Jehova ol i autim tok long liklik hap tasol, em taun Jerusalem!
14. Bilong wanem ol bilipman i bin “lukim olgeta samting bilong ol olsem samting bilong olgeta manmeri i bilip long Jisas”? Na ol i bin mekim wanem?
14 Planti ol i bin kam long ol longwe ples na ol i sot long kaikai samting bilong helpim ol long i stap longtaim moa long Jerusalem, tasol ol i laik i stap inap sampela wik o mun moa bambai ol i ken lain gut long dispela nupela lotu bilong ol na ol i ken autim dispela tok long ol man. Olsem na ol disaipel bilong Jisas long pastaim i mekim pasin sori na narapela i helpim narapela, olsem ol Witnes Bilong Jehova i save mekim long nau. (2:43-47) Inap liklik taim ol bilipman i “lukim olgeta samting bilong ol olsem samting bilong olgeta manmeri i bilip long Jisas.” Olsem na ol i larim ol man i baim ol hap graun samting bilong ol, na ol i kisim mani long dispela, na ol i tilim dispela mani long olgeta man i sot long kaikai samting. Dispela samting i helpim kongrigesen bilong pastaim na ol i kamap strong long bilip, na ‘long olgeta de Jehova i wok long kisim bek sampela manmeri na mekim lain bilipman i kamap planti moa.’
Ol i Oraitim Wanpela Sikman, na Ol Samting Dispela i Bin Kamapim
15. Taim Pita tupela Jon i go insait long tempel, wanem samting i bin kamap? Ol manmeri i lukim dispela samting i kamap na ol i mekim wanem?
15 Jehova i bin helpim wok bilong ol disaipel bilong Jisas long rot bilong “ol kain kain mirakel.” (3:1-10) Olsem na taim Pita tupela Jon i laik go insait long tempel long 3 klok apinun, em taim bilong mekim beten paslain long ofa bilong apinun, tupela i lukim wanpela lek nogut, em mama i karim em olsem, em i sindaun klostu long Naispela Dua na “em i save singaut long mani samting” long ol manmeri i go insait long tempel. Pita i tokim em: “Mi no gat mani. Tasol samting mi gat, em mi laik givim yu. Long nem bilong Jisas Krais bilong Nasaret mi tokim yu, yu kirap na wokabaut.” Orait, wantu lek bilong dispela man i kamap strong! Em i go insait long tempel na em “i wokabaut na i kalap kalap na i litimapim nem bilong God,” olsem na ol manmeri i amamas tru. Ating sampela i tingim tok bilong profet Aisaia, em i bin tok: “Ol lek nogut bai ol i kalap olsem ol dia.”—Aisaia 35:6.
16. Olsem wanem ol aposel inap oraitim wanpela man i gat lek nogut?
16 Ol manmeri i harim tok long dispela samting i kamap, na ol i kirap nogut tru na ol i kam bung long wanpela veranda long tempel i stap long hap bilong sankamap, ol i kolim Veranda bilong Solomon. Pita i kirap long autim tok long ol. (3:11-18) Em i tokim ol olsem God yet i bin givim strong long tupela bilong oraitim dispela man i gat lek nogut, na God i givim dispela strong long ol long rot bilong Wokman bilong em i kisim biknem pinis, em Jisas. (Aisaia 52:13–53:12) Ol Juda i bin givim baksait long dispela man em “i holi na i save mekim stretpela pasin olgeta”; tasol Jehova i bin kirapim bek em. Tru, taim ol i kilim i dai Jisas, ol manmeri na ol hetman bilong ol i no save ol i kilim i dai dispela Man em God i bin salim em i kam, tasol long dispela rot God i bin truim tok profet i tok, “bai ol i kilim bikman God i bin makim.”—Daniel 9:26.
17. (a) Ol Juda i mas mekim wanem? (b) God i ‘salim Krais i kam’ long taim bilong yumi na kirap long dispela taim i kam inap long nau wanem samting i bin kamap?
17 Ol Juda i bin mekim nogut long dispela Man em God i salim em i kam, olsem na Pita i kolim ol samting ol i mas mekim. (3:19-26) Ol i mas “tanim bel,” olsem ol i mas hevi long ol rong ol i bin mekim, na ol i mas “senisim tingting nogut” bilong ol, olsem ol i mas baut na kirap bihainim narapela rot olgeta. Sapos ol i bilip long Jisas na ol i bilip olsem em i dispela Man God i bin tok long salim em i kam, na ol i bilip long ofa bilong em, orait bai God i lusim ol rong bilong ol na dispela bai givim nupela strong long ol. (Rom 5:6-11) Pita i givim tok long ol Juda bilong kirapim ol long tingim gen olsem ol i lain pikinini bilong kontrak God i bin mekim wantaim ol tumbuna bilong ol. Em i bin tokim Abraham, olsem: “Long tumbuna pikinini bilong yu mi bai mekim gut long olgeta lain manmeri bilong graun.” Olsem na God i bin salim Wokman bilong em i kam bilong helpim ol Juda pastaim, em ol i tanim bel. Long yia 1914 God Jehova i bin ‘salim Krais i kam’ olsem King long Kingdom bilong heven, na kirap long dispela taim God i bin kirapim lain bilong em long bihainim gen ol tok i tru na larim em i bosim ol, na long dispela rot lain Witnes Bilong Jehova i bin kisim nupela strong.—Stat 12:3; 18:18; 22:18.
Ol i No Laik Pasim Maus!
18. “Ol kamda,” em ol Juda, ol i bin rausim wanem “ston”? Husat dispela wanpela man tasol em inap kisim bek yumi?
18 Ol bikpris na kepten bilong ol man i save was long tempel na ol Sadyusi ol i gat bikpela kros long Pita tupela Jon, long wanem tupela i autim tok long ol manmeri olsem Jisas i kirap pinis long matmat, olsem na ol i holimpas tupela na kalabusim tupela. (4:1-12) Ol Sadyusi i save tok, ol man i dai pinis bai ol i no inap kirap bek, tasol planti narapela manmeri i bilip na inap olsem 5,000 man ol i kisim baptais. Pita tupela Jon i kot long ai bilong bikpela kaunsil bilong Jerusalem na taim kaunsil i askim tupela long dispela mirakel, Pita i bekim tok olsem: “Long nem bilong Jisas Krais bilong Nasaret, dispela man lek nogut i bin kamap orait.” “Ol kamda,” em ol Juda, ol i bin rausim dispela “ston,” tasol em i kamap “nambawan ston bilong strongim banis bilong haus.” (Buk Song 118:22) Na Pita i tok, “I no gat narapela man i inap kisim bek yumi.”
19. Taim ol man i tambuim ol aposel long autim tok, ol aposel i bekim wanem tok long ol?
19 Ol lain hia i laik pasim tupela bambai tupela i no ken autim tok moa long nem bilong Jisas. (4:13-22) Tasol dispela lek nogut i orait bek em i stap. Tupela i bin wokim “wanpela mirakel” na olgeta manmeri i save long dispela samting, tasol kaunsil i tambuim tupela na i tok, ‘Yupela i no ken autim tok moa long nem bilong Jisas.’ Orait, tupela i bekim wanem tok long ol? Tupela i tok: ‘Mipela i no inap pasim maus. Mipela i mas autim tok long olgeta samting mipela i bin lukim na harim.’ Ol i bihainim tok bilong Jehova, em i Man bilong bosim ol!
God i Harim Beten Bilong Ol!
20. Ol disaipel i beten askim God long mekim wanem? Na wanem samting i bin kamap?
20 Ol Witnes Bilong Jehova i save beten long taim bilong ol miting, na olsem tasol ol disaipel i bin beten taim tupela aposel hia i lusim kaunsil na i kam tokim ol long ol samting i bin kamap. (4:23-31) Ol i beten na ol i tok, Herot Antipas na Pontius Pailat wantaim ol man bilong ol arapela lain na ol Israel, ol i bin bung wantaim bilong daunim dispela Man em God i bin salim i kam. (Buk Song 2:1, 2; Luk 23:1-12) Jehova i harim beten bilong ol na em i givim spirit holi long ol. Spirit holi i pulap long ol na ol i autim tok bilong God. Ol i tokaut strong na ol i no pret. Ol i no bin beten askim Man bilong bosim ol long pinisim pasin nogut ol man i mekim long ol; nogat; ol i beten askim em long helpim ol bambai ol inap karim dispela hevi na ol i ken strong tru long autim tok na ol i no ken pret.
21. Barnabas em husat? Em i gat wanem ol gutpela pasin?
21 Ol bilipman i tingting yet olsem olgeta samting bilong ol i bilong olgeta wantaim, na i no gat wanpela i sot long kaikai samting. (4:32-37) Wanpela man i kam givim mani long ol aposel em wanpela Livai, nem bilong em Josep, em i man bilong ailan Saiprus. Ol aposel i givim narapela nem Barnabas long em, insait bilong dispela nem i olsem “Man bilong strongim bel.” Ating ol i bin givim dispela nem long Josep, long wanem em i gutpela man—em i save sori long ol narapela man na em i laik helpim ol. Yumi olgeta yumi laik stap kain man olsem, a?—Aposel 11:22-24.
Pasin Giaman Bilong Ol i Kamap Ples Klia
22, 23. Ananaias na Safaira i mekim wanem rong? Samting i bin painim ol em inap givim wanem save long yumi?
22 Tasol Ananaias na meri bilong em, em Safaira, tupela i no bihainim moa tok bilong Jehova em Man bilong bosim ol. (5:1-11) Tupela i baim wanpela hap graun bilong ol i go long ol man na tupela i giaman na i tok, ol mani ol i bin kisim ol i givim olgeta long ol aposel. Spirit bilong God i givim save long Pita na Pita i save long giaman bilong tupela. Tupela i mekim dispela pasin giaman na tupela i dai. Dispela samting i bin kamap i mas givim tingting long ol man em Satan i laik pulim ol long mekim pasin giaman!—Sindaun 3:32; 6:16-19.
23 Bihain long dispela, ol manmeri i gat tingting kranki long bel ol i pret long kam bung wantaim ol disaipel. Tasol sampela manmeri ol i bilip. (5:12-16) Na ol sikman na ol manmeri i gat spirit nogut i stap long ol, taim ol i bilip long strong bilong God, olgeta “i kamap orait gen.”
Bihainim Tok Bilong God, Tok Bilong Ol Man i Nambatu
24, 25. I gat wanem as na ol hetman bilong ol Juda i bin mekim nogut long ol aposel? Tasol ol dispela man i stap gut long God ol i tok wanem na dispela i olsem wanpela lo olgeta wokboi bilong Jehova i mas bihainim?
24 Hetpris wantaim ol Sadyusi i lukim olsem planti manmeri i bilip, olsem na ol i laik pasim wok bilong ol aposel. Ol i kirap holim olgeta aposel na putim ol long kalabus. (5:17-25) Tasol long nait, ensel bilong God i helpim ol long lusim kalabus. Na long moningtaim tru ol i stap long tempel na ol i wok long autim tok long ol manmeri! Maski ol man i mekim nogut long ol wokboi bilong Jehova, ol wokboi i no lusim wok bilong ol.
25 Tasol nau ol i kisim ol aposel i kam sanap long ai bilong Bikpela Kaunsil bilong ol Juda bilong subim ol long lusim wok bilong ol. (5:26-42) Kaunsil i tambuim ol long autim tok, tasol ol i bekim tok olsem: “Mipela i mas bihainim tok bilong God tasol. Mipela i no ken bihainim tok bilong ol man.” Dispela i olsem wanpela lo ol disaipel bilong Jisas i bihainim, na ol Witnes Bilong Jehova long nau tu ol i save bihainim. Wanpela tisa bilong Lo, em Gamaliel, em i mekim toksave long kaunsil, na bihain ol hetman i paitim ol aposel, na tambuim ol long autim tok, na lusim ol i go.
26. Skelim wok bilong ol aposel wantaim wok bilong ol Witnes Bilong Jehova long nau.
26 Ol aposel i amamas long God i ting ol inap long kisim sem long nem bilong Jisas. “Na long olgeta de, ol i save go long tempel na long ol haus bilong ol manmeri, na ol i wok long skulim ol manmeri. Ol i no lusim wok bilong autim gutnius.” Ol i save go long haus bilong ol man na autim tok bilong God. Na ol Witnes bilong God long nau tu ol i save mekim olsem. Ol dispela Witnes i bin kisim spirit bilong God, long wanem, ol i save bihainim tok bilong em na ol i tok, “Jehova em i Man bilong bosim mipela!”
Bai Yu Bekim Wanem Tok?
◻ Ol disaipel bilong Jisas long bipo na long nau ol i mas mekim wanem wok?
◻ Wanem samting i bin kamap long de Pentikos long yia 33?
◻ Long wanem taim na olsem wanem Pita i bin mekim wok long namba wan ki bilong spirit, em Jisas i bin givim long em?
◻ Samting i bin painim Ananaias na Safaira inap givim wanem save long yumi?
◻ Taim ol man i tambuim ol aposel long autim tok, ol aposel i tok wanem na dispela i olsem wanpela lo olgeta Witnes Bilong Jehova i mas bihainim?