Askim
Baibel i givim wanem tingting long yumi long man i bin mekim bikpela rong tru em i mas kisim bikpela strafe, olsem ol i mas kilim em i dai?
Tru, ating yumi olgeta wan wan i gat tingting bilong yumi yet long dispela samting, na ol samting i bin painim yumi, o sindaun bilong yumi kirap long taim yumi liklik yet, i olsem as bilong dispela tingting. Tasol yumi ol Witnes Bilong Jehova i mas wok strong long bihainim tingting bilong God long pasin bilong kilim i dai ol man i bin mekim bikpela rong tru—yumi no ken insait long tok pait bilong ol lain politik long dispela samting olsem planti man i save mekim.
Yumi ken tokaut stret olsem, long Baibel God i no makim olsem i gat rong long givim bikpela strafe long man, olsem kilim em i dai, nogat.
Taim ol man i no stap longtaim yet long graun, Jehova i bin kamapim tingting bilong em long dispela samting, olsem yumi lukim long Stat sapta 9. Em i stori long Noa wantaim lain bilong em, em ol i kamap tumbuna bilong olgeta lain bilong graun. Taim ol i lusim pinis sip, God i tok ol inap kaikai mit bilong ol animal—olsem ol inap kilim, na rausim blut, na kaikai. Orait, long Stat 9:5, 6, God i tok: “Sapos wanpela animal o wanpela man i pinisim laip bilong yupela, bai mi mekim save tru long em. Yes, sapos man i kilim i dai narapela man, bai mi mekim em i karim hevi bilong dispela pasin em i mekim. Man i kilim i dai narapela man, em yet i mas dai long han bilong ol man, long wanem, mi God mi bin wokim ol manmeri i kamap olsem mi yet.” Em nau, Jehova i tok, sapos man i kilim i dai narapela man, em i mas i dai long han bilong ol man.
Taim God i kisim lain Israel olsem lain bilong em, ol man i mas kisim dispela strafe long sampela bikpela rong moa i brukim lo bilong God—olsem ol i mas i dai. Long Namba 15:30, yumi lukim tok olsem: “Man o meri i bikhet long mi na i mekim sin, dispela i olsem em i tok bilas long mi Bikpela. Olsem na yupela i mas kilim em i dai, maski em i man bilong yupela Israel o bilong narapela kantri i stap long ples bilong yupela.”
Tasol olsem wanem long taim kongrigesen Kristen i kamap pinis? Yumi save Jehova i bin tok long ol gavman bilong graun i ken i stap, na em i givim namba long ol long holim wok gavman. Baibel i tokim ol Kristen long bihainim tok bilong ol gavman, na i tok gavman “em i wokman bilong God, bilong helpim yu na mekim yu i stap gut. Tasol sapos yu mekim pasin nogut, orait yu mas pret. Yu save, gavman i holim bainat, na em i no holim nating. Em i wokman bilong God, bilong bekim pe nogut long man i mekim pasin nogut.”—Rom 13:1-4.
Tasol olsem wanem? Dispela tok i makim olsem God i bin givim wok long ol gavman bilong kilim i dai ol man i bin mekim ol bikpela rong? Yes, dispela tok i makim olsem. Yumi inap kisim dispela tingting long tok bilong 1 Pita 4:15. Long dispela skripsa aposel Pita i tokim ol brata bilong em: “Yupela i mas lukaut, nogut ol i givim pen long yupela, long wanem, yupela i bin kilim man i dai o stilim ol samting o mekim ol arapela kain pasin nogut o yupela i bin paulim wok bilong ol arapela.” Tingim dispela tok, “yupela i mas lukaut, nogut ol i givim pen long yupela, long wanem, yupela i bin kilim man i dai.” Pita i no tok, i no stret long gavman i givim pen long ol kilman, olsem strafe bilong ol. Em i makim olsem i stret wanpela kilman i kisim strafe. Tasol olsem wanem? Kilman inap kisim strafe olsem em i mas i dai?
Em inap. Dispela samting i kamap ples klia long tok bilong Pol long Aposel sapta 25. Ol Juda i bin sutim tok long Pol olsem em i bin mekim sampela rong i brukim Lo bilong ol. Ol i kalabusim Pol, na taim kepten bilong ami i salim em i go long namba wan gavman, dispela kepten i tok long Aposel 23:29 olsem: “Mi askim ol na ol i tokim mi long sampela tok bilong lo bilong ol na ol i sutim dispela tok long em. Tasol ol i no kotim em long wanpela samting inap long yumi kilim em i dai o yumi kalabusim em.” Tupela yia bihain, Pol i kot long Gavena Festus. Aposel 25:8 i tok: “Pol i bekim tok olsem, ‘Mi no bin mekim wanpela rong. Mi no bin brukim lo bilong ol Juda, na mi no mekim wanpela samting nogut long tempel, na mi no bin mekim rong long Sisar.’ ” Tasol tingim tok Pol i mekim long strafe, na bikpela strafe tru, olsem dai. Long Aposel 25:10, 11 yumi kaunim tok olsem:
“Pol i tok olsem, ‘Dispela haus hia, nau mi sanap long en, em i haus kot bilong Sisar. Dispela haus tasol em i ples bilong harim kot bilong mi. Yu save pinis, mi no bin mekim wanpela rong long ol Juda. Sapos mi bin mekim wanpela rong inap long mi dai long en, orait mi ken i dai. Tasol sapos dispela tok ol i kotim mi long en, em i no tru, orait i no gat man inap long putim mi long han bilong ol. Mi laik bai Sisar yet i mas harim kot bilong mi.’ ”
Pol i sanap long kot bilong gavman i bin kisim namba long God long mekim dispela wok, na Pol i tokaut olsem i stret Sisar i ken givim strafe long ol man i mekim rong, na gavman i ken tok long ol i mas i dai tu. Em i no tok, sapos em i bin mekim wanpela bikpela rong, i no stret long em i mas i dai. Na em i no tok tu olsem Sisar i ken makim ol kilman tasol bilong i dai.
Tru, kot bilong ol Rom i no stret olgeta; na ol kot bilong dispela graun long nau tu i no stret olgeta. Sampela man long dispela taim bipo na long nau tu, ol i no bin mekim wanpela rong, tasol kot i bin makim ol i gat rong, na ol i kisim strafe. Pailat tu i bin tok long Jisas olsem: “Mi no painim wanpela rong long em inap long mi ken tok long em i mas i dai.” Tasol maski dispela bikman bilong gavman i bin tokaut olsem Jisas i no bin mekim wanpela rong, ol i kilim em i dai.—Luk 23:22-25.
Dispela i no kirapim Pol o Pita long tok olsem i no stret long gavman i makim wanpela man bilong i dai. Tingting bilong God long dispela samting i olsem: Ol gavman bilong graun i stap yet, olsem na inap long taim ol i pinis, ol i ‘holim bainat bilong bekim pe nogut long man i mekim pasin nogut.’ Ol i ken mekim wok long bainat, olsem kilim i dai ol man i bin mekim rong. Tasol taim i gat sampela tok i kamap olsem i stret wanpela gavman bilong dispela graun i ken kilim i dai ol kilman o nogat, ol Kristen tru i save was gut na ol i no insait long dispela tok pait—ol i no bihainim pasin bilong ol pris pasto bilong ol misin long dispela samting.