Ol Kontribusen i Mekim Bel i Amamas
LUKIM blok daunbilo. I gat tupela pas i stap i kamapim pasin ol misin ol i kolim Kristen i save bihainim bilong kirapim ol man long givim mani long ol. Taim yu kaunim, bel bilong yu i amamas? Nogat, a? Tasol i mas i gat mani bilong helpim lotu God i orait long en long nau. Orait, olsem wanem wanpela oganaisesen Kristen i ken kisim mani ol i mas kisim bambai ol inap bihainim laik bilong God na mekim wok bilong Em?
Bilong bekim dispela askim, yumi ken skelim pasin kongrigesen Kristen long pastaim i bin bihainim, na yumi ken skelim tok bilong Krais Jisas, em i As bilong lotu Kristen. Long Luk 6:38 Jisas i tok: “Yupela i mas givim samting long ol man, na bai [ol] i givim samting long yupela. Bai ol man i skelim gutpela moa long yupela, na ol i pulapim tru, na sakim i go daun, na pulapim moa yet, inap long i kapsait, na bai ol i givim long yupela. Skel yupela i save givim long ol man, long dispela skel tasol bai [ol] i bekim long yupela.” Dispela tok piksa i stret tru long ol man i harim tok bilong Jisas. Long dispela taim bipo ol man i save pasim longpela laplap na pasim let na pulim laplap i kam antap liklik na nau hap laplap i hangamap long bros olsem bikpela poket bilong pulimapim samting long en o karim samting long en. Long tok Grik ol i kolim dispela hap laplap olsem kol’pos, insait tru bilong dispela tok i olsem “bros.” Taim wanpela man i baim samting, man bilong salim i save skelim na pulimapim long dispela “poket.”
Tasol yu ting ol bisnisman bilong bipo i save pulapim tru na sakim i go daun na pulapim moa yet inap long i kapsait? Ating wan wan tasol, o no gat wanpela! Tasol ol Kristen, sapos ol i mekim bikpela wok sori bilong helpim ol man i sot long samting, bai ol i kisim wankain bekim. Skel yumi givim long ol narapela man, olsem yumi mekim gut long ol na givim planti samting long ol o yumi pasim bel na givim liklik samting tasol, long dispela skel tasol bai ol man, na God Jehova tu, i bekim long yumi.—Skelim 2 Korin 9:6; Galesia 6:7.
Jisas i givim em yet na olgeta samting bilong em bilong helpim ol narapela man, olsem na ol i bekim wankain skel long em, olsem dispela lo i tok. Em i gutpela piksa olgeta bilong pasin bilong givim planti samting long ol narapela man. Em i no tingim skin bilong em yet—em i wok strong tru long autim gutpela tok bilong Kingdom bilong God long ol man i stap rabis. Em i no singaut long mani; em i no tok ol man i mas baim em long gutpela wok em i mekim bilong helpim ol. Nogat. Em i no tingting long kisim pe. Tasol em i no sot long samting. Long laik bilong ol yet ol man i givim planti samting long em bilong helpim em na wok bilong em.—Luk 7:22; 8:1-3.
Pasin bilong Jisas long givim samting, dispela i kirapim ol narapela, olsem Saimon Pita na Jems na Jon na ol narapela bilong ol 12-pela, long lusim olgeta samting bilong ol na mekim wok bilong autim tok. (Luk 5:10, 11; 9:1-6) Long nau tu, dispela pasin bilong givim samting i kamapim wankain gutpela wok. Ol Witnes Bilong Jehova i givim taim na strong na mani samting bilong ol bilong helpim ol narapela man bambai ol i ken harim tok bilong Kingdom bilong God. Dispela pasin bilong ol long givim samting long rot bilong autim tok i kirapim ol narapela man long mekim wankain pasin—ol tu i kirap mekim bikpela wok bilong autim gutpela tok bilong Kingdom long ol narapela man.—Provep 11:25.
Yumi givim samting long rot bilong autim tok na dispela i mekim bel i amamas, tasol i gat narapela samting yumi ken givim, em tu i mekim bel i amamas. Sapos yumi bihainim stretpela tingting na yumi givim mani, dispela tu em i hap wok lotu bilong yumi. (2 Korin 9:9-14) Olsem wanem ol Kristen bilong pastaim i bin mekim?
Pasin Bilong Ol Kristen Bilong Pastaim
Taim kongrigesen Kristen i kamap nupela long yia 33 C.E., long namba wan de, ol 3,000 nupela bilipman i bin kisim baptais ol i ‘helpim ol brata na kaikai wantaim na beten.’ Bilong wanem ol i mekim? Bambai ol i ken “harim tok bilong ol aposel” na bilip bilong ol i ken kamap strong.—Aposel 2:41, 42.
I gat sampela Juda na sampela man bilong ol narapela lain, em ol i bihainim lotu Juda, ol i bin i kam long Jerusalem bilong lukim ol de holi bilong Pentikos. Ol i tingting long i stap liklik taim tasol long Jerusalem, tasol sampela ol i kamap Kristen na ol i laik i stap longtaim liklik bambai ol i ken kisim sampela save moa na bilip bilong ol i ken kamap strong. Tasol ol i mas i gat kaikai na haus. Sampela nupela bilipman, em ol i bilong narapela hap, ol i sot long mani, na sampela ol i gat planti. Olsem na ol i bungim olgeta samting bilong ol na tilim long ol brata i sot long samting.—Aposel 2:43-47.
Olsem wanem ol i bosim wok bilong givim kaikai na haus samting long ol? Ol aposel i bosim wok bilong bungim na tilim ol samting. Olsem na gutpela pasin bilong ol Kristen bilong pastaim i kamap ples klia—ol i tingim olgeta samting bilong ol em i samting bilong olgeta bilipman wantaim; ol i mekim wok long ol samting bilong ol bilong helpim olgeta insait long kongrigesen. (Aposel 2:44; 4:32) Na tu “olgeta man i gat graun o haus, ol i save salim long arapela man na ol i kisim mani long dispela. Na ol i save bringim dispela mani i kam, na ol i givim long ol aposel. Na ol aposel ol i save tilim long ol manmeri i sot.”—Aposel 4:34, 35.
Laik bilong ol yet na ol i salim haus o graun bilong ol o tingim olgeta samting bilong ol em i bilong olgeta bilipman wantaim. No gat wanpela man i subim ol long mekim. Na dispela pasin ol i bihainim i no bilong mekim olgeta wantaim i kamap rabis. I no olsem ol Kristen i gat planti samting ol i mas salim olgeta samting bilong ol long ol arapela man na ol i mas kamap rabis. Nogat. Ol i sori long ol brata bilong ol, em ol i sot long samting long dispela taim, na ol i salim samting bilong ol na givim dispela mani bilong helpim wok bilong Kingdom.—Skelim 2 Korin 8:12-15.
Olsem tasol long nau, sampela manmeri i go long loya na raitim pepa na tok, ol i laik givim haus o graun samting bilong ol long Sosaiti Was Taua, o ol i tok, taim ol i dai Sosaiti Was Taua i ken kisim. Long dispela rot Lain Bilong Bosim Ol Witnes Bilong Jehova i gat mani bilong helpim wok bilong Kingdom. Olgeta dispela samting ol man i givim i helpim ol narapela man long kisim save long God wankain olsem long taim bilong Pentikos long bipo. I no olsem ol i mas givim. Nogat. Laik bilong ol yet na ol i givim.
Mekim long Olgeta Taim, Em Gutpela Rot
Inap olsem 20 yia bihain long Pentikos bilong yia 33 C.E., aposel Pol i kirapim tingting bilong kongrigesen long Korin long mekim wanpela kontribusen. Em i tok: “Nau mi gat tok long dispela mani yupela i laik bungim bilong givim long ol manmeri bilong God. Mi bin soim rot bilong mekim dispela wok long ol [kongrigesen] bilong Galesia, na yupela tu i mas mekim olsem.” Nau em i soim gutpela rot long ol, em i tok: “Long [namba wan de bilong olgeta wik] yupela olgeta wan wan i mas ting long mani yupela i bin kisim long arapela wik, na hapim dispela na putim hap i stap gut long ol haus bilong yupela yet. Olsem na bihain bai mi kamap, orait yupela i no gat wok bilong painim mani bilong givim ol. Bihain mi kamap, orait yupela yet i mas makim sampela man bilong karim dispela presen bilong yupela i go long Jerusalem. Na bai mi givim pas long ol na salim ol i go.” Ating famili olgeta i save bung wantaim na pasim tok long hamas bai ol i givim, maski ol i gat planti samting o ol i stap rabis, long wanem Pol i tok ol i mas mekim “long ol haus bilong yupela yet.”—1 Korin 16:1-3.
Dispela rot Pol i makim em gutpela rot ol brata sista long ol kongrigesen long nau i ken bihainim. Olsem wanem em i gutpela rot? Long wanem bai ol i mekim long olgeta taim. Sapos kongrigesen bilong yu i mas baim Haus Kingdom long olgeta mun na baim ol samting bilong lukautim Haus Kingdom, orait brens-ofis long Peru i tok, ‘hamas mani ol i givim, em i no bikpela samting. Bikpela samting, em olsem: Ol i mas givim long olgeta taim, olsem long olgeta wik o long olgeta mun ol i ken putim hap mani bilong helpim wok bilong Kingdom.’ Yu ting olsem wanem long mekim olsem? Yu ting em gutpela rot? Yumi ken lainim ol pikinini tu long givim liklik mani long olgeta wik o olgeta mun samting, olsem hap wok lotu bilong ol.
Olsem na sapos man i bihainim stretpela tingting na em i givim kontribusen, dispela i mekim bel bilong man na bel bilong God i amamas. Long 2 Korin 9:7 Baibel i tok: “Yupela olgeta wan wan i mas tingting gut pastaim long bel bilong yupela yet, na bihainim dispela tingting tasol na givim samting. Nogut wanpela man i bel hevi long givim samting, na em i ting ol man i strong tumas long em, na long dispela pasin tasol em i givim. Nogat. God i laikim man i amamas long givim samting.”
[Blok long pes 29]
Pasin Bilong Ol Misin Ol i Kolim Kristen
“Bikpela i toktok wantaim mi na tokim mi long raitim dispela pas long yu . . . sapos God i no bin tokim mi long raitim, mi no ken raitim kain pas olsem long yu na tokim yu, sapos nau yu salim kwik 20 dola bilong helpim mi, bai God i givim planti blesing long yu olsem yu no bin kisim bipo.”—Pas wanpela pasto bilong Kanada i salim long planti man na em i sainim olsem: “Mi wokman na Wanwok bilong yu.”
“Opim dispela Wel Holi Bilong Welim Man, (no ken larim liklik hap i lus nating). Jisas i stap insait long dispela wel bilong bilip. Mekim mak bilong kruse long het bilong yu long dispela wel, na bihain yu mas bilip na go insait long wanpela rum, yu wanpela tasol, na yu mas kisim wanem wanem mani i stap long yu na makim kruse long olgeta wan wan mani pepa bambai God i ken stretim ol hevi bilong yu long mani na mekim mani bilong yu i kamap planti, olsem Luk 6:38 i tok . . . Taim yu laik welim dispela mani long dispela wel holi, mekim long olgeta mani pepa yu holim. Mekim mak bilong kruse long olgeta wan wan na bihain kisim bikpela mani, maski em i 20 dola o 10 dola o 5 dola, na mekim mak bilong kruse long en long dispela wel holi na salim i kam bilong helpim wok bilong God.”—Wanpela “pasto” long Amerika i salim dispela pas long planti man na em i tok, dispela pas i kam long “Wanpela man i stap Profet bilong God inap 30 yia.”
[Blok long pes 31]
Sampela Rot Bilong Givim Mani Bilong Helpim Wok Bilong Kingdom
◆ GIVIM NATING OLSEM PRESEN: Yu ken salim mani i go long brens-ofis bilong International Bible Students Association long hap bilong yu. Yu ken givim graun o haus tu. Sapos yu salim mani o yu laik givim haus o graun long Asosiesen, yu mas raitim pas wantaim na tokim ol yu laik givim nating dispela olsem presen.
◆ OLSEM DINAU: Yu ken givim mani o haus samting long Asosiesen olsem dinau na sapos bihain yu sot na yu laik kisim bek olgeta dispela mani o hap tasol, yu ken kisim; Asosiesen bai bekim long yu. Sapos yu raitim pepa bilong givim mani o haus samting long Asosiesen taim yu dai, tasol taim yu stap laip yet yu givim olsem dinau, dispela bai helpim Asosiesen na bai i no hatwok long ol i kisim taim yu dai.
◆ INSURENS: Sapos yu gat laip-insurens yu ken raitim nem bilong International Bible Students Association na tok ol i ken kisim dispela mani taim yu dai. Yu ken mekim wankain pasin long beng bilong yu. Tasol sapos yu mekim olsem, yu mas raitim pas long Asosiesen na toksave long ol.
◆ RAITIM PEPA: Yu ken i go long loya na raitim wanpela pepa na tok yu laik bai International Bible Students Association i kisim mani o haus samting bilong yu taim yu dai. Sapos yu mekim olsem, plis raitim tupela pepa na salim wanpela i kam long Asosiesen.
Sapos yu laik kisim sampela save moa long dispela samting, orait yu ken raitim pas long brens-ofis long hap bilong yu. Atres em olsem: International Bible Students Association of P.N.G., Inc., Box 636, Boroko, N.C.D., Papua New Guinea.