Baibel i Tok Wanem?
Baibel i Laik Pasim Yumi Long Skul Gut?
“Ol man i no gat save, ol tasol i no laik skul.”—Publilyus Sirus, long buk Moral Sayings, yia 50 B.C.E samting.
BAIBEL i tok yumi mas “holim strong gutpela tingting na save.” (Sindaun 3:21) Jehova em God i gat bikpela save, em i laik bai ol manmeri i lotuim em, ol i mas skul gut na kisim save. (1 Samuel 2:3; Sindaun 1:5, 22) Tasol ating yumi gat sampela askim long sampela tok bilong Baibel. Olsem: Taim Pol i stori long ol samting em i bin mekim bipo na tu long bikpela skul em i bin kisim, em i tok: “Mi lukim olgeta dispela samting i olsem samting nating.” (Filipai 3:3-8) Long narapela pas, em i tok: “Gutpela save bilong dispela graun em i olsem longlong pasin tasol long ai bilong God.”—1 Korin 3:19.
Olsem wanem? Yumi ken tok Baibel i pasim yumi long skul gut na kisim save? I stret Kristen i skul inap planti planti yia o nogat? Yumi mas skul inap long gret 6 tasol o yumi mas kisim sampela skul moa?
Skul Long Taim Bilong Ol Aposel
Ol Kristen long taim bilong ol aposel, ol i bin go long kain kain skul bilong kisim save. Sampela bikman long bipo ol i ting tupela aposel bilong Galili, em Pita na Jon ol i “man nating tasol” i no bin skul. (Aposel 4:5, 6, 13) Olsem wanem? Dispela i makim olsem tupela i no gat save na ol i no bin skul? Nogat. Dispela i makim olsem, tupela i no bin skul long ol bikpela skul bilong ol Hibru long Jerusalem. Ol tok dispela tupela strongpela man bilong tokaut long lotu Kristen i bin raitim i kamapim klia olsem tupela i bin skul gut na ol i gat bikpela save na ol inap tru long kamapim gut insait bilong ol tok bilong Baibel. Ol i bin skul tu long pasin bilong mekim ol samting bilong lukautim famili bilong ol long samting bilong skin. Tupela i bin wok wantaim long wok bisnis bilong kisim ol pis.—Mak 1:16-21; Luk 5:7, 10.
Tasol Luk i bin go long bikpela skul na em i bin raitim wanpela bilong ol Gutnius, na Buk Aposel tu. Em wanpela dokta. (Kolosi 4:14) Ol tok em i raitim i kamapim klia dispela save bilong em long wok dokta.—Lukim Luk 4:38; 5:12; Aposel 28:8.
Taim Pol i no kamap Kristen yet, em i bin skul long lo bilong ol Juda, na Gamaliel, wanpela bikpela saveman long dispela taim em i bin skulim em. (Aposel 22:3) Pol i bin go long skul i wankain olsem skul yunivesiti long nau. Na tu, long ol Juda bipo, em i gutpela samting long ol yangpela i mas kisim save long mekim wanpela wok, maski bihain ol i go long wanpela bikpela skul. Ating taim Pol i yangpela yet em i bin lain long pasin bilong samapim ol haus sel. Kain save olsem i bin helpim em long lukautim em yet taim em i mekim wok autim tok long olgeta de.
Tasol taim Pol i skelim gutpela save bilong God wantaim save ol man i kisim long skul—em save yumi mas kisim—dispela save i no helpim yumi tumas. Olsem na Baibel i makim olsem em i bikpela samting tru long kisim save bilong God na bilong Krais. Gutpela sapos ol Kristen bilong nau i kisim dispela stretpela tingting long skul.—Sindaun 2:1-5; Jon 17:3; Kolosi 2:3.
Skelim Gut Dispela Samting
Sampela Kristen i kisim save olsem taim ol i skul moa, olsem long haiskul o vokesenel skul, dispela i bin helpim ol long lukautim famili bilong ol long ol samting bilong skin. I stret man i mas lukautim famili bilong em, long wanem, wok bilong ‘lukautim ol wanblut tru bilong yumi’ em wanpela wok God i givim long yumi. (1 Timoti 5:8) Taim yumi lainim sampela wok bambai yumi inap mekim olsem, yumi bihainim gutpela tingting na save.
Tasol sapos wanpela man i laik skul moa bambai em i ken mekim dispela samting, em i mas skelim ol gutpela samting na ol samting nogut inap kamap. Wanpela bilong ol gutpela samting inap kamap em i olsem, em inap painim wanpela wok mani em inap helpim em long lukautim gut em yet na famili bilong em na em i givim bel yet long autim tok. Na tu, ating em inap helpim ol narapela long ol samting bilong skin olsem “helpim ol man i sot long ol samting.”—Efesus 4:28.
Wanem sampela samting nogut inap kamap? Wanpela em olsem: Man i mas skul long ol save nogut em inap daunim bilip bilong em long God na long Baibel. Pol i bin tokim ol Kristen long was gut long “olkain toktok nabaut i no bihainim tingting bilong God,” na “olkain giaman save na toktok nating.” (1 Timoti 6:20, 21; Kolosi 2:8) Tru tumas, sampela kain skul na save inap bagarapim bilip bilong wanpela Kristen. Sapos sampela i gat tingting long kisim sampela skul moa, ol i mas tingim ol samting nogut ol kain skul olsem inap kamapim.
Moses i bin kisim “skul long olgeta gutpela save bilong ol Isip,” na maski em i mas lain long bilip bilong planti god giaman na dispela i daunim nem bilong God, em i bin sanap strong long bilip. (Aposel 7:22) Olsem tasol, ol Kristen long nau i save was gut bambai ol save nogut i no ken paulim ol, maski ol i stap long wanem wanem kain skul.
Narapela samting nogut inap kamap long pasin bilong go long sampela skul moa em olsem: Save inap kirapim pasin bilong hambak, o inap mekim man i ting em yet i gat bikpela save moa. (1 Korin 8:1) Planti i go long skul bilong kisim save bambai ol i ken kisim planti samting bilong ol yet, na maski i gat gutpela as na sampela i go long skul, dispela i ken mekim na sampela inap pilim olsem ol i winim ol narapela. God i no save amamas long kain pasin olsem.—Sindaun 8:13.
Tingim ol Farisi. Dispela lain bilong lotu i gat biknem ol i bin hambak long save bilong ol na ol i ting ol i stretpela man. Ol i save gut long planti lo bilong ol tumbuna, na ol i bin ting ol man nating em ol i no bin skul gut, ol i tingim ol i olsem ol man i no gat save, na pipia lain tasol, na ol i ting God i makim ol pinis bilong bagarap. (Jon 7:49) Na tu, ol i save laikim tumas mani. (Luk 16:14) Pasin bilong ol i kamapim klia olsem sapos man i go long skul bilong kisim save bilong inapim ol laik bilong em, dispela inap mekim na man i hambak o em i kamap man bilong laikim tumas mani. Olsem na taim Kristen i laik skelim wanem kain skul em i laik kisim o hamas yia em i laik skul, i gutpela long em i ken askim em yet olsem: “Wanem samting i kirapim mi na mi laik skul?”
Laik Bilong Wan Wan Yet
Wankain olsem ol Kristen long taim bilong ol aposel, ol Kristen bilong nau tu i bin i go long kain kain skul. Taim ol yangpela i pinisim skul inap long mak gavman i putim, na ol i laik kisim sampela skul moa, orait ol papamama i ken stiaim ol. Olsem tasol, ol man i bikpela pinis, ol i ken ting, kisim skul moa em i gutpela rot bilong helpim ol long lukautim famili bilong ol long samting bilong skin.a Long sampela kain skul bilong bipo, ol i strong long ol man i mas lain na kisim save na ol i no bin tingting long skulim ol man long sampela wok samting. Olsem na maski man i lusim bikpela hap taim bilong kisim kain bikpela skul olsem, em i no save long mekim wanpela wok samting bilong kisim mani. Long dispela as, sampela i save go long skul vokesenel o skul koles samting, long wanem, long dispela rot ol inap painim wok mani hariap.
Em samting bilong wan wan yet i ken skelim. Ol Kristen i no ken sutim tok o skelim ol narapela long dispela samting. Jems i tok: “Yu husat na yu sutim tok long ol arapela manmeri?” (Jems 4:12) Sapos wanpela Kristen i tingting long i go long sampela skul moa, i gutpela sapos em i skelim bel bilong em yet, nogut em i laik go long skul bilong kisim planti samting bilong skin.
Baibel i kirapim yumi long kisim stretpela tingting long pasin bilong skul na kisim save. Ol papamama Kristen i save, skul long ol samting bilong spirit long rot bilong Baibel em i bikpela samting moa, na sapos ol pikinini i laik stadi na kisim sampela skul moa ol inap givim stretpela tingting long ol. (2 Timoti 3:16) Ol i save, i gutpela ol pikinini i skul na kisim save long mekim sampela wok bambai ol inap lukautim ol yet na famili bilong ol long bihain. Olsem na bilong skelim ol i laik kisim sampela skul moa o nogat, na ol i mas skul inap hamas yia, olgeta wan wan Kristen i mas larim pasin bilong givim bel long Jehova i mas i stap olsem as bilong ol samting olgeta wan wan Kristen i mekim, long wanem, ‘dispela bai helpim ol moa yet. Em inap long helpim ol long dispela laip nau ol i stap long en, na long laip yumi bai kisim bihain.’—1 Timoti 4:8.
[Futnot]
a Bilong kisim sampela save moa long dispela samting, lukim Wastaua, Novemba 1, 1992, pes 10-21, na buklet Jehovah’s Witnesses and Education, em Sosaiti Wastaua bilong Nu Yok i wokim.
[Rait long pes 19]
“Holim strong gutpela tingting na save.”—Sindaun 3:21
[Rait long pes 20]
Taim Kristen i tingting long kisim sampela skul moa, gutpela em i ken askim em yet olsem: “Wanem samting i kirapim mi na mi laik skul moa?”