Yu Mas Beten Long Jisas o Olsem Wanem?

SAMPELA man i ting i stret yumi beten long Jisas. Planti man long Jemani, taim ol i pikinini yet, ol i bin skul olsem taim ol i laik kaikai, pastaim ol i mas pasim han na tok tenkyu long Krais Jisas.

Baibel i tok, Jisas i holim bikpela namba long heven. Tasol olsem wanem? Dispela i makim olsem yumi mas beten long em? Ating yu wanpela bilong ol man i laikim tru Jisas na i beten long em, tasol Jisas yet i gat wanem tingting long dispela kain beten?

Kain askim olsem i save kamap, long wanem, Baibel i tok, God Jehova em i Man bilong “harim beten.” Long dispela as ol wokboi bilong God long bipo, olsem ol Israel, ol i save beten long Jehova tasol, em God I Gat Olgeta Strong.​—⁠Song 5:​1, 2; 65:⁠2.

Olsem wanem? Taim Jisas, Pikinini bilong God, i kam daun long graun bilong tekewe sin na i dai long ol man, senis i kamap? Nogat. Ol man i beten yet long Jehova. Taim Jisas i stap long graun em yet em i beten planti taim long Papa bilong em long heven, na em i lainim ol narapela man long mekim olsem. Tingim dispela beten em sampela man i save kolim Beten Bilong Bikpela. Jisas i no lainim yumi long beten long em yet, nogat; em i tokim yumi olsem: “Papa bilong mipela, yu stap long heven, nem bilong yu i mas i stap holi.”​—⁠Matyu 6:​6, 9; 26:​39, 42.

Gutpela sapos nau yumi kisim sampela save moa long dispela samting na save beten em i wanem samting tru.

Beten Em i Wanem Samting?

Olgeta beten i olsem wanpela pasin bilong lotu. Buk The World Book Encyclopedia i strongim dispela tok, olsem: “Beten em i wanpela pasin bilong lotu, bilong man i ken litimapim nem bilong God, tok tenkyu long em, autim rong, o askim God long helpim em.”

Jisas i tok: “Yu mas aninit long God, Bikpela bilong yu, na yu mas lotu long em wanpela tasol.” Jisas i bihainim dispela tok i tru olsem: Man i mas lotu na beten long Papa bilong Jisas tasol, em God Jehova.​—⁠Luk 4:8; 6:⁠12.

Tokaut Long Jisas Long Beten

Jisas i givim laip bilong em olsem ofa bilong baim bek ol man, na God i kirapim em bek, na givim bikpela namba tru long em. Ol dispela samting i kamapim wanpela senis long kain beten God i orait long en. Olsem wanem dispela i kamapim senis?

Jisas i gat bikpela namba, na aposel Pol i stori long wanpela bikpela samting dispela i mekim long beten, olsem: “Long dispela as tasol God i litimapim Jisas na mekim em i stap antap tru. Na God i givim em wanpela nem i gutpela tru na i winim olgeta arapela nem. Em i givim dispela nem long Jisas, bai olgeta ensel na olgeta man . . . i ken brukim skru long [“nem,” NW] bilong Jisas na i stap aninit long em. Na olgeta bilong ol i ken tokaut olsem, ‘Jisas Krais em i Bikpela.’ Na long dispela pasin ol bai i givim biknem long God Papa.”​—⁠Filipai 2:​9-11.

Olsem wanem? Dispela tok, olgeta man “i ken brukim skru long [nem] bilong Jisas” i makim olsem yumi mas beten long em? Nogat. Long tok Grik, dispela tok i makim olsem, “long dispela nem, ol man i brukim skru ol i wanbel (πᾶν γόνυ) long mekim lotu. Dispela nem Jisas i kisim, i kirapim ol man long stap wanbel long adorim God.” (A Grammar of the Idiom of the New Testament, bilong G. B. Winer) Tru tumas, bilong God i ken orait long beten, man i mas beten long “nem bilong Jisas,” tasol taim em i beten, em i mas beten long God Jehova na long dispela rot God i kisim biknem. Olsem na Pol i tok: “Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela.”​—⁠Filipai 4:⁠6.

Olsem ol rot i save bringim man i go long wanpela hap, Jisas em i “rot” bilong bringim man i kam long God I Gat Olgeta Strong. Jisas i lainim ol aposel olsem, “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” (Jon 14:⁠6) Olsem na taim yumi beten, yumi mas beten long God long rot bilong Jisas; yumi no ken beten long Jisas yet.a

Ating sampela i gat askim olsem: ‘Baibel i tok, disaipel Stiven na aposel Jon ol i bin toktok long Jisas, em i stap long heven, a?’ Em tru, tasol ol i no beten long Jisas​—⁠Stiven tupela Jon i lukim Jisas long driman na ol i toktok stret long em. (Aposel 7:​56, 59; KTH 1:​17-19; 22:20) Tingim: Man i toktok long God, i no olsem em i beten long em, nogat. Taim Adam tupela Iv i mekim rong long gaden Iden na God i kolim strafe i mas painim ol, Adam tupela Iv i toktok wantaim God na kamapim tok bilong karamapim bikpela rong bilong ol. Tru ol i toktok wantaim God, tasol i no olsem ol i beten long em. (Stat 3:​8-19) Olsem na i no stret yumi tok, taim Stiven tupela Jon i toktok wantaim Jisas, dispela i makim olsem ol i beten long em, nogat.

Singaut Long Nem Bilong Jisas Olsem Wanem?

Olsem wanem? Yu gat tupela tingting yet long dispela samting, na yu ting i stret yumi beten long Jisas? Wanpela meri i raitim pas long wanpela brens-ofis bilong Sosaiti Was Taua, na i tok: “Sori tru, mi bilip yet olsem ol Kristen bilong pastaim ol i bin beten long Jisas.” Em i tingim tok bilong Pol long 1 Korin 1:​2: “Olgeta man long olgeta ples ol i save lotu na prea long [“singaut long,” NW] nem bilong Jisas Krais, Bikpela bilong yumi.” Tasol long tok Grik, dispela tok “prea long,” o “singaut long,” inap makim sampela narapela samting tu, i no beten tasol.

Olsem wanem ol man long olgeta ples ol i bin “singaut long” nem bilong Krais? Olsem: Ol disaipel bilong Jisas ol i bin tokaut olsem em i Man bilong “kisim bek olgeta manmeri,” na ol i bin wokim planti mirakel long nem bilong em. (1 Jon 4:14; Aposel 3:6; 19:⁠5) Olsem na wanpela Baibel i tok, dispela tok “singaut long nem bilong Bikpela . . . i makim olsem ol man i tokaut em i Bikpela bilong ol​—⁠i no makim olsem ol i beten long em.”​—⁠The Interpreter’s Bible.

Pasin bilong bilip long Krais na long blut bilong em i kapsait pinis na bai sin i ken tekewe, dispela tu i makim olsem man i “singaut long nem bilong Jisas Krais, Bikpela bilong yumi.” (Skelim Aposel 10:43 wantaim Aposel 22:16.) Na taim yumi beten long God long rot bilong Jisas, yumi kolim tru tru dispela nem Jisas. Olsem na Baibel i kamapim klia, i stret yumi ken singaut long nem bilong Jisas, tasol Baibel i no tok yumi ken beten long em.​—⁠Efesus 5:20; Kolosi 3:⁠17.

Ol Samting Jisas Inap Mekim Bilong Helpim Yumi

Jisas i tokim ol disaipel bilong em olsem: “Olgeta samting yupela i askim long nem bilong mi, em bai mi mekim.” Bilong mekim olsem, yu ting yumi mas beten long em? Nogat. Samting yumi laik kisim, yumi mas askim long God Jehova​—⁠tasol long nem bilong Jisas. (Jon 14:​13, 14; 15:16) Yumi beten askim God long Pikinini bilong em, Jisas, i ken mekim wok long bikpela strong na namba bilong em bilong helpim yumi.

Long nau Jisas i mekim wanem bilong salim tok i kam long ol trupela disaipel bilong em? Tingim dispela tok piksa: Pol i tok, kongrigesen Kristen God i makim, i olsem wanpela bodi na Krais Jisas i het bilong en. Long rot bilong “olgeta skru rop samting bilong bodi,” dispela “het” i stiaim lain bilong kongrigesen na givim kaikai bilong spirit long ol. (Kolosi 2:19) Long nau Jisas i mekim wankain pasin​—⁠em i mekim wok long “ol presen,” o ol elda, na ol i go pas long mekim wok insait long kongrigesen, na stretim man sapos ol i mas mekim. Olsem na i no gat rot bilong kongrigesen i ken toktok stret wantaim Jisas o beten long em, tasol i gat rot bilong ol i ken beten long Papa bilong Jisas, em God Jehova, na ol i mas mekim olsem.​—⁠Efesus 4:​8-12.

Givim Biknem Long Jisas

Bilong kisim bek ol manmeri, Jisas i mekim bikpela wok tru! Aposel Pita i tok: “I no gat narapela man i inap kisim bek yumi. Nogat. Long nem bilong Jisas wanpela tasol.” (Aposel 4:12) Olsem wanem? Yu save pinis olsem nem bilong Jisas em i bikpela samting?

Tru yumi no beten long Jisas yet, tasol dispela i no daunim namba em i holim, nogat. Taim yumi beten long nem bilong em, dispela i givim biknem long em. Olsem ol pikinini i save litimapim nem bilong papamama bilong ol taim ol i bihainim tok bilong ol, yumi tu i save litimapim nem bilong Krais Jisas taim yumi bihainim ol lo bilong em, olsem nupela lo bilong laikim tru ol narapela.​—⁠Jon 5:23; 13:⁠34.

Ol Beten God i Orait Long En

Olsem wanem? Yu laik bai God i ken orait long beten bilong yu? Sapos olsem, orait, taim yu beten, beten long God Jehova yet, na mekim long nem bilong Pikinini bilong em, Jisas. Kisim save long laik bilong God, na mekim ol beten i stret long dispela save. (1 Jon 3:​21, 22; 5:14) Kisim strong long ol tok bilong Song 66:20: “Mi litimapim nem bilong God. Long wanem, em i no givim baksait long prea bilong mi, na em i no tekewe sori bilong en long mi.”

Olsem yumi stori pinis, beten i olsem wanpela pasin bilong lotu na yumi mas beten long God wanpela tasol, em God I Gat Olgeta Strong. Taim yumi beten long God Jehova, yumi kamapim klia yumi bihainim pasin bilong beten em Jisas i lainim yumi long en, olsem: “Papa bilong mipela, yu stap long heven.”​—⁠Matyu 6:⁠9.

[Ol Futnot]