Man Bilong Mekim Nogut Long Ol Kristen Em i Lukim Wanpela Bikpela Lait
SOL i kros nogut tru long ol manmeri i bihainim Jisas. Maski em i bin mekim nogut pinis long ol Kristen long Jerusalem, na em i orait long ol i tromoi ston long Stiven na kilim em i dai, em i laik i go moa long ol narapela hap na mekim nogut moa yet long ol Kristen. “Sol i tok strong yet long bagarapim ol disaipel bilong Bikpela na kilim ol i dai. Olsem na em i go long hetpris, na i askim hetpris long raitim ol pas long ol hetman bilong ol haus lotu bilong ol Juda i stap long taun Damaskus. Orait hetpris i raitim ol pas na em i givim long Sol. Ol pas i gat tok olsem, ‘Sapos Sol i lukim sampela man o sampela meri i bihainim rot bilong Jisas, orait em i ken kalabusim ol na bringim ol i kam long Jerusalem.’ ”—Aposel 9:1, 2.
Taim Sol i wokabaut i go long Damaskus, ating em i tingting long olsem wanem em inap mekim gut dispela samting. Namba wan pris i bin givim tok orait long em na dispela inap mekim na ol hetman bilong bikpela lain Juda i stap long taun ol inap wok gut wantaim em long mekim dispela samting em i laik mekim. Sol inap askim ol long helpim em.
Ating Sol i amamas nogut tru taim em i kamap klostu long hap em i laik go long en. Bilong lusim Jerusalem na i go long Damaskus em inap olsem 220 kilomita na man i mas wokabaut 7-pela o 8-pela de, na man bai les tru long wokabaut. Orait long belo samting, wantu wanpela strongpela lait winim lait bilong san i sut i go long Sol, na em i pundaun long graun. Em i harim wanpela nek i toktok long em long tok Hibru olsem: “Sol, Sol, bilong wanem yu wok long bagarapim mi? Yu wok long kikim samting i gat sap, na yu givim pen long yu yet.” Orait Sol i tok: “Bikpela, yu husat?” Na Bikpela i tok, “Mi Jisas, yu wok long bagarapim mi. Tasol yu kirap na sanap. Mi kam long yu nau bilong makim yu bilong holim wok bilong mi. Na bai yu autim tok long ol samting nau yu lukim pinis na long ol samting bihain bai mi soim yu. Bai mi no larim ol man bilong lain bilong yu yet na ol man bilong ol arapela lain i mekim nogut long yu. Nogat. Mi bai salim yu i go long ol.” Sol i tok: “Bikpela, bai mi mekim wanem nau?” Na Bikpela i tokim em olsem: “Yu kirap na yu go insait long taun Damaskus. Na long dispela hap wanpela man bai i tokim yu long olgeta wok mi bin makim bilong yu.”—Aposel 9:3-6; 22:6-10; 26:13-17.
Ol man i go wantaim Sol ol i harim wanpela nek i kamap, tasol ol i no lukim dispela man i mekim toktok o harim tok em i mekim. Lait i strong tumas na taim Sol i kirap sanap em i no inap lukluk, olsem na ol i holim han bilong em na em i wokabaut. Inap ‘tripela de, ai bilong en i stap tudak tasol. Na em i no kaikai na i no dring.’—Aposel 9:7-9; 22:11.
Em i Tingim Tingim Ol Samting Inap Tripela De
Judas i save stap long wanpela rot nem bilong en Stretpela Rot, na em i mekim gut long Sol na lukautim em.a (Aposel 9:11) Long tok ples Arap ol i kolim nem bilong dispela rot olsem Darb al-Mustaqim, na em i bikpela rot ol man i save wokabaut yet long en long Damaskus. Tingim ol samting em Sol i tingting long en long taim em i stap long haus bilong Judas. Samting i bin painim Sol i mekim na ai bilong em i pas na em i kirap nogut long samting i bin kamap. Em nau, em inap tingim ol samting dispela i makim.
Ol samting dispela man bilong mekim nogut long ol Kristen i bin ting em i no inap tru long kamap, nau em i mas senisim tingting bilong em long dispela samting. Bikpela Jisas Krais em ol i bin hangamapim em—ol hetman bilong lotu Juda i bin mekim nogut long em na “ol man i bin givim baksait long em na rabisim em na ol i no laikim em tru”—em i stap laip. Na tu, em i sanap long han sut bilong God “long bikpela lait tru”! Tru tumas, Jisas em i Mesaia. Ol tok Stiven na ol narapela i mekim em i stret. (Aisaia 53:3; Aposel 7:56; 1 Timoti 6;16) Sol i bin kranki stret, long wanem, taim em i mekim nogut long ol Kristen i olsem em i mekim nogut long Jisas! Ol dispela samting i mekim na olsem wanem Sol inap wok yet long “kikim samting i gat sap”? Ol bulmakau tu, taim papa bilong ol i wok long sutim samting i gat sap long skin bilong ol, bihain ol i save kirap na bihainim rot em i laik bai ol i go long en. Sapos Sol i sakim tok bilong Jisas, i olsem em bai i bagarapim em yet.
Jisas em i Mesaia, olsem na God i no inap givim strafe long em. Tasol Jehova i orait long em i dai olsem wanpela man nogut, na dispela samting i gat bikpela sem long en, olsem Lo i tok: “Bodi i hangamap i stap long diwai em i samting nogut long ai bilong God.” (Lo 21:23) Jisas i dai taim em i hangamap long diwai. I no olsem em i mekim sin na em i kamap olsem man bilong bagarap, nogat, tasol em i kamap olsem man bilong karim sin bilong yumi ol manmeri bilong graun. Bihain Sol i tok: “God bai i bagarapim olgeta man i ting pasin bilong bihainim lo em inap mekim ol i kamap stretpela manmeri long ai bilong God. Long wanem, buk bilong God i gat tok olsem, ‘Sapos wanpela man i no bihainim tru olgeta tok i stap long buk bilong lo, orait God i ken bagarapim dispela man.’ Na . . . i no gat rot bilong wanpela man i bihainim lo na God i kolim em stretpela man. . . . Tasol bilong helpim yumi, Krais yet i kisim dispela nem ‘man bilong bagarap’ na em i kisim bek yumi. Buk bilong God i tok olsem, ‘Olgeta man i hangamap long diwai, God i lukim ol olsem man bilong bagarap tasol.’ ”—Galesia 3:10-13.
Ofa bilong Jisas i gat strong bilong baim bek ol man. Taim Jehova i orait long dispela ofa, i olsem em i nilim Lo long pos diwai. Taim Pol i kisim gut dispela tok, em i tingim olsem taim man i hangamap long pos diwai dispela i olsem samting nogut long tingting bilong ol Juda, tasol em i “gutpela tingting na save bilong [God].” (1 Korin 1:18-25; Kolosi 2:14) Olsem na sapos God inap kisim bek ol man long pasin bilong em long marimari long ol sinman kain olsem Sol, na i no long ol wok bilong lo em i mekim, orait yumi save God inap kisim bek tu ol man i no stap aninit long Lo. Na Jisas i salim Sol i go bilong helpim ol man bilong arapela lain.—Efesus 3:3-7.
Sol i bin save gut long ol dispela samting long taim em i kamap Kristen nupela yet o nogat, em yumi no save. Jisas i mas toktok gen long em, ating planti taim, long dispela raun em bai mekim long ol kantri. Na tu, sampela yia i lus na bihain God i kirapim Sol long raitim olgeta dispela tok. (Aposel 22:17-21; Galesia 1:15-18; 2:1, 2) Tasol i no longtaim na Sol i kisim sampela tok moa long Jisas, nau em i kamap Bikpela bilong Sol.
Ananaias i Kam Lukim Em
Jisas i kamap long Sol pinis, orait bihain em i kamap long Ananaias, na i tokim em olsem: “Yu kirap na yu go long dispela rot, nem bilong en Stretpela Rot. Long haus bilong Judas yu mas askim long wanpela man bilong taun Tarsus, nem bilong en Sol. Nau em i prea i stap. Ai bilong en i tudak, tasol long driman em i bin lukim wanpela man, nem bilong en Ananaias, i kam insait na i putim han antap long en, bilong mekim ai bilong en i lukluk gen.”—Aposel 9:11, 12.
Ananaias i save long Sol, olsem na yumi save em i bin kirap nogut long tok bilong Jisas. Em i tok: “Bikpela, mi harim planti man i toktok long dispela man, long olkain pasin nogut em i bin mekim long ol manmeri bilong yu long Jerusalem. Em i kisim tok orait long ol bikpris, bilong em i ken kalabusim ol manmeri bilong dispela ples ol i save lotu na prea long nem bilong yu.” Tasol Jisas i tokim Ananaias: “Yu go. Nau dispela man em i kamap wokman bilong mi. Mi makim em pinis long i go long ol arapela lain manmeri na long ol king, na long ol Israel tu, na autim nem bilong mi long ol.”—Aposel 9:13-15.
Ananaias i harim dispela tok pinis na em i kirap i go bilong mekim samting em Jisas i tokim em long mekim. Ananaias i lukim Sol na tok gude long em, na em i putim han antap long Sol. Baibel i stori olsem: “Wantu samting olsem grile i stap long ai bilong Sol i lusim ai na i pundaun na em inap lukluk gen.” Nau Sol i redi long harim tok. Yumi ken save em i bin kisim gut tok bilong Jisas, long wanem, dispela i kamap ples klia long tok Ananaias i mekim, em i tok: “God bilong ol tumbuna bilong yumi em i bin makim yu bai yu ken save long laik bilong em, na yu ken lukim dispela Man bilong mekim stretpela pasin na yu ken harim tok em i mekim long maus bilong em yet. Yu bai autim tok bilong en na tokim olgeta manmeri long ol samting yu bai lukim na harim. Orait bilong wanem yu wet moa? Yu kirap na kisim baptais. Yu kolim nem bilong en, na em bai i wasim yu na rausim ol sin bilong yu.” Orait wanem samting i kamap? Sol “i kirap na i kisim baptais. Na bihain Sol i kaikai na i kamap strong gen.”—Aposel 9:17-19; 22:12-16.
Taim Ananaias i mekim pinis wok em i kisim, wantu Baibel i no stori moa long em, na yumi no harim ol stori bilong em. Tasol olgeta man i bin harim tok bilong Sol ol i bin kirap nogut! Dispela man bilong mekim nogut long ol man long bipo, em i bin kam long Damaskus bilong holimpas ol disaipel bilong Jisas, nau em i kirap autim tok long haus lotu na kamapim olsem Jisas em i Krais.—Aposel 9:20-22.
Wok Aposel Long Ol Narapela Lain
Samting i bin painim Sol long taim em i laik i go long Damaskus i bin pasim em long mekim nogut long ol Kristen. Sol i kisim save long Mesaia, olsem na em inap save olsem planti samting na planti tok profet long Ol Skripsa Hibru i makim Jisas. Sol i save Jisas i bin kamap long em na Jisas ‘i bin holimpas em’ na tokim em long mekim wok aposel namel long ol narapela lain, na dispela i bin senisim pasin bilong Sol. (Filipai 3:12; Rom 11:13) Orait nau em i kamap aposel Pol, na em i kisim gutpela wok na namba na dispela i bin helpim em i go inap long olgeta yia em i stap long graun, na tu, dispela i stiaim wok Kristen kirap long dispela taim bipo na i kam inap nau.
Sampela yia bihain, taim ol man i tok pait long wok Pol i mekim olsem aposel, em i bin tokim ol long namba em i holim na em i stori long samting i bin painim em long rot i go long Damaskus. Em i askim ol olsem: “Mi wanpela aposel, o nogat? Ating mi bin lukim Jisas, Bikpela bilong yumi, o nogat?” Na taim Sol (Pol) i tokim ol narapela pinis long Jisas i kirap bek pinis na i kamap long ai bilong sampela man, orait em i tok: “Las tru em i kamap long ai bilong mi tu, olsem long wanpela nupela pikinini mama i karim hariap tumas na i no taim yet bilong karim.” (1 Korin 9:1; 15:8; NW ) Taim Sol i kisim driman na i lukim Jisas i stap long bikpela lait long heven, i olsem em i kamap nupela gen, o kirap bek pinis, na em i kisim laip olsem spirit hariap tru na i no taim yet bilong em i mekim olsem.
Sol i orait long mekim wok em i kisim na em i wok strong tru long mekim dispela wok. Em i tok: “Mi liklik tumas namel long ol aposel. Na i no inap ol man i kolim mi aposel, long wanem, pastaim mi bin wok long bagarapim sios bilong God. Tasol . . . marimari bilong [God] long mi, em i no lus nating. Nogat tru. Mi save wok strong tumas, na mi winim ol arapela aposel.”—1 Korin 15:9, 10.
Olsem Sol, ating yu tu yu tingim taim yu bin kisim save olsem: Bilong God i ken orait long yu, yu mas stretim tingting bilong yu long sampela bilip bilong lotu em yu bin holim. Yu bin amamas olsem Jehova i helpim yu long kisim save long tok i tru. Taim Sol i lukim lait na em i kisim save long ol samting em i mas mekim, em i no bin les long mekim. Na em i givim bel long mekim dispela wok na em i gat laik long mekim long olgeta taim long i stap bilong em long graun. Em i stap olsem gutpela piksa tru bilong ol man i laik bai Jehova i orait long ol!
[Futnot]
a Wanpela saveman i ting olsem Judas i wanpela hetman bilong ol lain Juda long dispela ples o em i lukautim wanpela haus pasindia bilong ol Juda.
[Piksa long pes 27]
Rot ol i kolim Stretpela Rot long Damaskus bilong nau
[Kredit Lain]
Photo by ROLOC Color Slides