‘Mipela i Mas Bihainim Tok Bilong God Tasol, Bilong Ol Man, Nogat’

Autim Gut Tok Long Pasin Bilong “Sanap Strong na No Ken Pret”

WANPELA lain i kros na singaut bikmaus ol i redi long paitim na kilim i dai wanpela gutpela wokman bilong God. Long taim stret, ol soldia Rom i pulim dispela man long han bilong dispela lain na holim em. Dispela i kirapim sampela samting i kamap insait long 5-pela yia bihain. Long dispela rot, planti bikman bilong Rom i harim tok long Jisas Krais.

Man i kisim dispela hevi em aposel Pol. Long 34 C.E. samting, Jisas i kamapim olsem Pol (Sol) bai autim nem bilong Em long “ol king.” (Aposel 9:15) Long yia 56 C.E., Pol i no mekim yet dispela samting. Tasol klostu long taim aposel Pol i pinisim namba 3 raun bilong em, ol samting i laik senis.

Ol i Mekim Nogut Long Em, Tasol Em i Sanap Strong

Pol i raun i go long Jerusalem, na long rot bilong “Holi Spirit” sampela Kristen i tokim em olsem ol birua bai mekim nogut tru long em long dispela taun. Long strongpela bel, Pol i tok: “Mi redi tasol long ol i ken kalabusim mi. Na mi redi tu long i dai long Jerusalem bilong litimapim nem bilong Bikpela Jisas.” (Aposel 21:​4-14) Taim Pol i stap insait long banis bilong tempel long Jerusalem, ol Juda bilong Esia, em ol i save Pol i bin kamapim planti disaipel long hap bilong ol, ol i kirapim ol manmeri long kilim em i dai. Kwiktaim ol soldia Rom i kam helpim em. (Aposel 21:​27-32) Dispela i opim rot long Pol long autim tok i tru long Krais long ol man i birua long em na long ol bikman.

Autim Tok Long Ol Bikman

Ol i kisim Pol i go antap long lata long haus ol i kolim Taua bilong Antonia na em i no kisim bagarap.a Taim em i sanap long dispela lata, Pol i autim strong tok long dispela lain i birua long em. (Aposel 21:33–22:21) Tasol taim em i tokaut olsem God i makim em bilong autim tok long ol manmeri bilong ol arapela lain, ol i singaut bikmaus gen na ol i laik kilim em i dai. Orait nau nambawan ofisa bilong ami, em Lisias, i tok long wipim Pol na askim em long as bilong ol samting ol Juda i kotim em long en. Tasol ol i no wipim em, long wanem, Pol i kamapim olsem em i wanpela man Rom. Long de bihain, Lisias i kisim Pol i go long kaunsil bilong save long as na ol Juda i kotim em.​​—Aposel 22:​22-​30.

Pol i sanap long ai bilong ol kaunsil, na rot i op gen long autim tok long ol wanlain Juda. Em i no pret long autim bilip bilong em long kirap bek. (Aposel 23:​1-8) Pasin birua bilong ol i stap yet, na ol soldia i kisim Pol i go long haus bilong ol soldia. Long nait bihain, Bikpela i givim gutpela tok bilong strongim em, olsem: “Yu mas sanap strong, na yu no ken pret. Yu bin autim strong tok bilong mi long Jerusalem, na long wankain pasin yu mas autim tok bilong mi long Rom.”​​—Aposel 23:​9-11.

Ol i laik kilim Pol i dai, tasol em i abrusim bagarap, long wanem, long pasin hait ol i bringim em i go long Sisaria, em nambawan biktaun we ol Rom i save sindaun long en na bosim Judia. (Aposel 23:​12-24) Long Sisaria, rot i op gen long autim gut tok, na Pol i autim tok long “ol king.” Tasol pastaim aposel Pol i soim Gavena Feliks olsem i no gat as na ol i kotim em. Bihain, Pol i autim tok long em na meri bilong em Drusila long Jisas, pasin bilong bosim gut bel, stretpela pasin, na kot bilong God liklik taim bai kamap. Tasol ol i holim Pol long kalabus inap tupela yia, long wanem, Feliks i ting ol bai givim grismani long em, tasol em i no kisim.​​—Aposel 23:33–​24:27.

Taim Festus i kisim ples bilong Feliks, ol Juda i traim gen long kotim Pol na kilim em i dai. Ol i harim gen kot long Sisaria, na bilong kot i no ken go long Jerusalem, Pol i tok: “Dispela haus hia, nau mi sanap long en, em i haus kot bilong Sisar . . . Mi laik bai Sisar yet i mas harim kot bilong mi.” (Aposel 25:​1-11, 20, 21) Sampela de bihain, taim aposel Pol i autim tok long King Herot Agripa Namba 2, dispela king i tok: “Olsem wanem? Long dispela sotpela taim tasol, yu ting yu bai mekim mi i kamap Kristen?” (Aposel 26:​1-28) Long 58 C.E. samting, ol i salim Pol i go long Rom. Long dispela hap em i kalabus inap tupela yia, tasol em i painim rot bilong autim tok bilong Krais. (Aposel 28:​16-31) I luk olsem bihain Pol i bin sanap long ai bilong Empera Niro, na Niro i tok Pol i no gat asua, na nau em i stap fri gen bilong mekim wok misineri. I no gat wanpela stori i kamapim olsem i gat narapela aposel i gat rot long autim tok bilong gutnius long ol bikman olsem Pol i bin mekim.

Olsem yumi kisim save long dispela stori, aposel Pol i bihainim bikpela stiatok ol wanlain Kristen bilong em i bin kamapim long ol kaunsil Juda, olsem: “Mipela i mas bihainim tok bilong God tasol. Mipela i no ken bihainim tok bilong ol man.” (Aposel 5:29) Man! Em gutpela pasin em i bin mekim bilong yumi ken bihainim, a? Maski planti taim ol birua i traim long stopim dispela aposel, em i bihainim tru lo bilong God long autim gut tok. Em i bihainim tru tok bilong God, na long dispela rot em i stap “wokman” tru bilong God na i autim nem bilong Jisas long “ol arapela lain manmeri na long ol king, na long ol Israel tu.”​​—Aposel 9:​15.

[Futnot]

[Blok/Ol Piksa long pes 9]

POL I LAIK HELPIM EM YET TASOL?

Man bilong raitim buk, Ben Witherington Namba 3, i toktok long dispela askim na em i tok: “Long tingting . . . bilong Pol, i no bikpela samting long em i helpim em yet, nogat, tasol em i laik autim tok bilong gutnius long ol bikman bilong ol Juda na ol narapela lain. . . . Tru tumas, em gutnius yet i stap long kot.”