Sol i Bungim Ol Pren na Ol Birua Bilong Bipo

SOL, bihain em i kamap aposel Pol​—i mas pret liklik taim em i kam bek long namba wan taim long Jerusalem bihain long em i kamap wanpela Kristen.a Inap tripela yia i go pinis em i bin lusim Jerusalem na em i go bagarapim ol disaipel bilong Jisas na kilim ol i dai. Em i kisim tok orait bilong holim na kalabusim ol Kristen em inap painim long Damaskus.​—Aposel 9:​1, 2; Galesia 1:18.

Taim Sol i kamap wanpela Kristen, em i no pret long tokaut long bilip bilong em olsem Mesaia i kirap bek pinis. Dispela i mekim na ol Juda long Damaskus i laik kilim em i dai. (Aposel 9:​19-​25) Olsem wanem? Ol pren Juda bilong em long bipo long Jerusalem bai amamas long lukim em gen? Bikpela samting long tingting bilong Sol, em bilong painim na bungim ol disaipel bilong Krais i stap insait long Jerusalem. Dispela i no isi long mekim.

“Bihain Sol i go long Jerusalem, na em i laik bung wantaim ol disaipel. Tasol olgeta i pret long em, na ol i no bilip olsem em i bin kamap disaipel.” (Aposel 9:26) Yu ken pilim tingting bilong ol. Ol i save long em olsem wanpela man i no gat sori liklik na em i save mekim nogut long ol. Taim em i tok em i kamap wanpela Kristen, ol inap ting em giaman bilong em i ken bagarapim kongrigesen. Olsem na ol Kristen long Jerusalem i no laik toktok gut wantaim em.

Tasol wanpela bilong ol i helpim Sol. Baibel i tok Barnabas i kisim dispela man bipo em i save mekim nogut long ol Kristen na “bringim em i go long ol aposel,” ating em Pita (Sifas) na Jems, em brata bilong Jisas, na Barnabas i tokim ol olsem Sol i bin kamap Kristen na i mekim wok autim tok long Damaskus. (Aposel 9:27; Galesia 1:​18, 19) Baibel i no stori long olsem wanem Barnabas i save long Sol. Ating tupela i save long ol yet na dispela i mekim na Barnabas i skelim gut Sol na bihain em i tokim ol narapela olsem em i gat gutpela bel. O ating Barnabas i save long sampela Kristen long Damaskus na ol i stori long em olsem Sol i bin tanim bel na kamap Kristen. Wanem samting i kamap em yumi no save, tasol Barnabas i mekim na ol i no pret moa long Sol. Orait, Sol i stap wantaim aposel Pita inap 15 de.

Stap Fiftin De Wantaim Pita

Sol i kamapim klia long ol Galesia olsem wok em i kisim i kam stret long Jisas na i no gat wanpela man i tokim em long mekim. (Galesia 1:​11, 12) Tasol em i luksave olsem em i bikpela samting long em i mas save gut long wok bilong Jisas. Taim em i stap wantaim Pita dispela i opim rot long em inap kisim dispela save. (Luk 24:12; 1 Korin 15:​3-8) Ating i gat planti samting Sol i mas askim Pita na Jems bilong kisim save long en, na ating ol tu i laik askim Sol long driman na wok bilong em.

Olsem Wanem Sol i Abrusim Bagarap?

Stiven em i namba wan Kristen i bin kisim bagarap long han bilong ol birua. Dispela ol man em Stiven i bin tok pait wantaim ol, “ol i man bilong wanpela haus lotu bilong ol Juda, ol i kolim haus lotu bilong ol friman. Ol i man bilong taun Sairini na taun Aleksandria na bilong tupela provins Silisia na Esia.” Nau Sol i “wok long toktok wantaim ol Juda i save tok Grik, na em i pait long toktok wantaim ol,” na em i no pret long autim tok long ol. Ol i gat wanem tingting long em? Ol i laik kilim em i dai.​—Aposel 6:9; 9:​28, 29.

Ating Sol i gat laik long stori long bikpela senis i bin kamap long em na em i laik tokim ol pren bilong em long bipo long Mesaia. Tasol ol dispela man Juda i birua tru long em na ol i tingim em i olsem wanpela man i bikhet long lotu.

Olsem wanem? Sol i luksave long hevi i laik painim em? Yumi ritim stori bilong em long em i beten i stap insait long tempel, na em i lukim samting olsem driman na em i lukim Jisas i tokim em: “Yu mas kirap kwiktaim na lusim Jerusalem na yu go. Sapos yu autim tok bilong mi long dispela taun, ol bai i no inap harim.” Na Sol i tok: “Bikpela, ol yet i save, bipo mi bin i go long olgeta haus lotu na mi kalabusim ol manmeri i bilip long yu, na mi wipim ol. Na taim ol i kilim i dai Stiven, dispela man bilong autim tok bilong yu, mi bin sanap klostu, na long ai bilong mi dispela pasin ol i mekim em i gutpela.”​—Aposel 22:​17-​20.

Sampela i ting tok bilong Sol i makim olsem em i orait long karim hevi. Sampela narapela i ting em i laik tok: ‘Mi save mekim nogut long ol narapela olsem ol i save mekim, na ol i save long dispela. Olsem na ol bai luksave olsem tru tru mi kamap Kristen. Ating mi inap helpim ol long kliagut long tok tru.’ Jisas i save olsem ol dispela man Juda bai i no inap harim tok em dispela man bilong birua long ol Kristen i autim. Na em i tokim Sol: “Yu go. Bai mi salim yu na yu go long ol manmeri bilong ol arapela lain i stap ol longwe ples.”​—Aposel 22:​21, 22.

Taim ol wanlain Kristen i save long bagarap i laik painim Sol, kwiktaim ol i kisim em i go daun long nambis bilong Sisaria na ol i salim em i go long asples bilong em long Tarsus, em longwe inap 500 kilomita. (Aposel 9:30) Bihain long sampela yia i go pinis, Sol i kam bek long Jerusalem.

Ol i salim em wantu tasol i go na ating dispela i lukautim kongrigesen Kristen. Sapos em i stap, dispela inap kamapim bikpela hevi. Bihain long Sol i lusim dispela ples, “olgeta hap bilong Judia na Galili na Samaria ol manmeri bilong sios, ol i stap gut. Ol arapela man i no mekim nogut long ol, na sios i kamap strong. Ol i bihainim pasin bilong aninit long Bikpela, na Holi Spirit i strongim bel bilong ol. Na planti manmeri i kam insait long sios.”​—Aposel 9:31.

Skulim Yumi Long Was Gut

Olsem ol Kristen bilong pastaim, sampela taim ol hevi inap kamap na yumi mas bihainim gutpela tingting. I no gat as na yumi kisim tingting kranki long ol man yumi no save long ol. Tasol sampela taim, ol man nogut i bin traim long bagarapim ol lain bilong Jehova, ol i mekim olsem bilong helpim ol yet o ol i gat tingting long bagarapim kongrigesen. Olsem na yumi laik bihainim gutpela tingting na bai yumi no larim ol man bilong giaman i giamanim yumi.​—Sindaun 3:27; 2 Timoti 3:13.

Pasin Sol i bihainim long wok autim tok long Jerusalem i soim narapela rot em ol Kristen i ken bihainim bilong abrusim hevi. Taim yumi autim tok long sampela ples o long sampela man, na long ol pren bilong yumi long bipo, hevi inap kamap, ol inap bagarapim yumi long skin o long ol samting bilong lotu o bagarapim stretpela pasin bilong yumi. Olsem na yumi mas bihainim gutpela tingting taim yumi makim ples na taim bilong autim tok.​—Sindaun 22:3; Matyu 10:16.

Yumi ken bilip tru olsem ol bai autim gutnius bilong Kingdom Bilong God paslain long pinis bilong pasin nogut bilong dispela graun. Sol i stap olsem gutpela piksa long mekim olsem, “em i no pret, na em i wok strong long tokaut long nem bilong Bikpela” long ol pren na ol birua bilong em long bipo.​—Aposel 9:28.

[Futnot]

[Piksa long pes 16]

Taim Sol i kamap long Jerusalem, em i no pret long autim tok long ol Juda i save mekim tok ples Grik