Bilip Bilong Yu i Strong o Olsem Wanem?
“Long bilip yupela i sanap strong pinis.”—2 KORIN 1:24.
1, 2. Bilong wanem yumi mas i gat bilip? Olsem wanem yumi ken strongim bilip bilong yumi?
OL WOKMAN bilong Jehova i save ol i mas i gat bilip. “Man i no bilip long God, em i no inap bihainim laik bilong God.” (Hibru 11:6) Olsem na yumi save beten askim God long givim yumi spirit holi na bilip, em wanpela bilong ol gutpela pasin spirit i save kamapim long man. (Luk 11:13; Galesia 5:22, 23) Sapos yumi bihainim strongpela bilip bilong ol wanbilip, dispela tu inap strongim bilip bilong yumi.—2 Timoti 1:5; Hibru 13:7.
2 Bilip bilong yumi bai kamap strong moa sapos yumi strong long bihainim rot Baibel i makim bilong olgeta Kristen. Taim yumi ritim Baibel long olgeta de na wok strong long stadi long Baibel long rot bilong ol buk na nius em “bosboi i gat gutpela tingting” i save givim long yumi, bilip bilong yumi bai kamap strong moa. (Luk 12:42-44; Josua 1:7, 8) Taim yumi go oltaim long ol miting Kristen na ol liklik na bikpela kibung, bilip bilong narapela narapela i save strongim bel bilong yumi. (Rom 1:11, 12; Hibru 10:24, 25) Na taim yumi autim tok, dispela tu i strongim bilip bilong yumi.—Song 145:10-13; Rom 10:11-15.
3. Long ol samting bilong bilip, yumi kisim wanem helpim long ol gutpela elda Kristen?
3 Ol elda Kristen i gat pasin sori ol i save helpim yumi long strongim bilip taim ol i givim ol gutpela tok bilong Baibel long yumi na ol tok bilong strongim bel. Ol i gat wankain tingting olsem aposel Pol, em i tokim ol Korin: “Long bilip yupela i sanap strong pinis. Mipela i save wok wantaim bilong kamapim amamas bilong yupela.” (2 Korin 1:23, 24) Ol stretpela man i save bilip na ol i stap laip. Tru, bilip bilong narapela man i no inap helpim yumi na bai yumi no gat wok long bilip, na wanpela man i no inap subim yumi long i stap gut long God. Long dispela samting, ‘olgeta man wan wan bai i karim hevi bilong ol yet.’—Galesia 3:11; 6:5.
4. Olsem wanem ol stori bilong Baibel long ol bilipman i ken strongim bilip bilong yumi?
4 Baibel i gat planti stori bilong ol man i gat strongpela bilip. Ating yumi save long planti bikpela wok ol i bin mekim, tasol olsem wanem? Yumi save long strongpela bilip ol i kamapim long olgeta wan wan de, em sampela i bin mekim olsem i go inap long taim ol i lapun tru? Orait nau yumi ken tingting long olsem wanem ol i bin kamapim klia dispela gutpela pasin long taim ol i kisim wankain hevi olsem i save painim yumi, na dispela inap strongim bilip bilong yumi.
Bilip i Mekim na Yumi No Pret
5. Wanem stori long Baibel i makim olsem bilip i save strongim yumi long autim tok bilong God na yumi no pret?
5 Bilip i strongim yumi long autim tok bilong God na yumi no pret. Enok i tok profet long taim God bai kamapim kot na givim strafe long ol man nogut. Em i tok: “Mi lukim Bikpela i kam wantaim ol planti tausen ensel bilong en. Em i laik kotim olgeta man na mekim save long ol. Em i laik mekim ol man i no save bihainim em i pilim tru asua bilong olgeta pasin nogut ol i bin mekim.” (Jut 14, 15) Yumi save, taim ol birua bilong Enok i harim dispela tok, ol i laik kilim em i dai. Tasol em i bilip na i autim dispela tok na em i no pret, na God i “kisim em,” olsem taim em i slip, God i mekim na em i dai, na God i no larim Enok i kisim pen bilong indai. (Stat 5:24; Hibru 11:5) Ol dispela kain mirakel i no save painim yumi, tasol Jehova i save harim ol beten bilong yumi, olsem na yumi inap bilip na autim tok bilong em na yumi no pret.—Aposel 4:24-31.
6. Bilip na strongpela bel God i givim long Noa i helpim em olsem wanem?
6 Noa i bilip long God na “em i wokim wanpela sip. Na em wantaim meri pikinini bilong en ol i go insait long sip na ol i stap gut, na ol i no bagarap.” (Hibru 11:7; Stat 6:13-22) Na tu, Noa em i man bilong “tokaut long stretpela pasin,” na em i givim tok lukaut bilong God long ol man, na em i no pret. (2 Pita 2:5) Taim em i autim tok long Bikpela Tait bai kamap, yumi ken ting ol i bin tok bilas long em, olsem sampela long nau i mekim taim yumi soim ol long Baibel olsem klostu nau God bai pinisim dispela pasin nogut bilong graun. (2 Pita 3:3-12) Tasol olsem Enok na Noa i bin mekim, yumi inap autim kain tok olsem long ol man, long wanem, God bilong yumi i bin givim yumi pasin bilong bilip na strongpela bel.
Bilip i Mekim na Yumi No Les Kwik
7. Olsem wanem Abraham na sampela moa i bin kamapim pasin bilong bilip long God na i no les kwik?
7 Yumi mas bilip na i no les kwik, na holim strong moa dispela pasin nau long taim yumi wetim pinis bilong dispela pasin nogut bilong graun. Wanpela bilong ‘ol man i bilip tru na i no les kwik na ol bai kisim olgeta samting bipo God i tok long givim long ol,’ em Abraham, man bilong pret long God. (Hibru 6:11, 12) Abraham i bilip long God na em i lusim taun Ur i gat ol gutpela samting bilong skin, na em i kamap man bilong narapela kantri long wanpela graun God i tok promis long givim long em. Aisak na Jekop ol i bilong kisim dispela wankain promis. Tasol “ol i bilip long God i go inap long taim ol i dai . . . [na] ol i no kisim ol dispela gutpela samting God i bin promis long givim ol.” Ol i bilip na “ol i laikim tumas long kisim narapela graun, em i gutpela moa yet.” Olsem na God ‘i redim pinis wanpela taun bilong ol i ken i stap long en.’ (Hibru 11:8-16) Em nau, Abraham, Aisak, na Jekop, na ol meri bilong ol i save pret long God, ol i no les—ol i wetim Kingdom bilong God long heven, em ol bai stap aninit long en taim ol i kirap bek na i stap laip gen long graun.
8. Abraham, Aisak na Jekop i bilip na i no les kwik, maski ol i no inap mekim wanem?
8 Abraham, Aisak na Jekop ol i no lusim bilip. Ol i no bin kisim Graun Bilong Promis, na ol i no bin lukim olgeta lain bilong graun i kisim blesing long rot bilong pikinini bilong Abraham. (Stat 15:5-7; 22:15-18) Dispela ‘taun God i redim,’ em i no kamap long taim bilong ol—em bai kamap planti handet yia bihain—tasol ol i bilip yet na i no les kwik, inap long olgeta yia ol i bin i stap laip. Orait yumi tu i mas mekim olsem, long wanem, nau Kingdom bilong Mesaia i kamap pinis long heven.—Song 42:5, 11; 43:5.
Bilip na Ol Mak Yumi Laik Winim
9. Olsem wanem bilip i save helpim yumi long winim ol mak yumi bin putim?
9 Ol dispela gutpela bilipman i no kisim ol pasin nogut bilong ol Kenan, long wanem, ol i bin putim ol gutpela mak tru bilong winim. Na bilip i mekim na yumi tu i putim ol mak long ol samting bilong spirit yumi laik winim, em inap helpim yumi long sakim pasin bilong go insait long ol lain bilong dispela graun i stap aninit long strong bilong dispela man nogut, Satan.—1 Jon 2:15-17; 5:19.
10. Olsem wanem yumi save ol mak Josep i laik winim i gutpela moa na i winim mak bilong kisim biknem long graun?
10 God i stiaim ol samting na pikinini bilong Jekop, em Josep, i kisim bikpela wok long bosim olgeta kaikai bilong Isip. Tasol em yet i no bin putim mak long kamap wanpela bikpela man long dispela graun, nogat. Josep i bilip tru olsem Jehova bai truim ol tok promis bilong em, olsem na taim Josep i gat 110 krismas em i tokim ol brata bilong em: “Klostu bai mi dai. Tasol God bai i lukautim yupela, na bihain em bai i bringim yupela i go lusim dispela kantri. Na bai em i bringim yupela i go long kantri bipo em i bin mekim strongpela promis long givim long Abraham na Aisak na Jekop.” Josep i tokim ol long planim em long Graun Bilong Promis. Taim em i dai, ol i putim olkain marasin long bodi bilong em na bai i no ken bagarap kwik, na ol i putim em long wanpela bokis long Isip. Tasol taim God i kisim bek ol Israel long Isip, profet Moses i tok na ol i kisim ol bun bilong Josep na karim i go bilong planim long Graun Bilong Promis. (Stat 50:22-26; Kisim Bek 13:19) Strongpela bilip kain olsem bilong Josep i mas kirapim yumi long putim ol mak i winim tru mak bilong kisim biknem long dispela graun.—1 Korin 7:29-31.
11. Olsem wanem Moses i kamapim olsem ol mak em i laik winim, em ol samting bilong spirit?
11 Moses i ting “mobeta em i kisim hevi wantaim ol lain bilong God. Em i no laik bihainim pasin bilong sin na kisim amamas bilong sotpela taim tasol” olsem man i bin skul gut na i insait long famili bilong king bilong Isip. (Hibru 11:23-26; Aposel 7:20-22) Dispela i mekim na em i lus long kisim biknem long dispela graun na ol bilaspasin bilong planim em long ples matmat bilong ol man i gat bikpela nem long Isip. Tasol dispela em i samting nating taim yumi skelim wantaim ol gutpela samting Moses i kisim, olsem em i wanpela “man bilong God,” na namelman bilong kontrak bilong Lo, na profet bilong Jehova, na wanpela man bilong raitim Baibel. (Esra 3:2) Olsem wanem long yu? Yu gat laik long kisim bikpela namba long wok mani, o bilip i bin helpim yu long putim ol mak long ol samting bilong spirit i winim tru bikpela namba long dispela graun?
Bilip i Mekim na Yumi Stap Gutpela
12. Bilip i mekim wanem long i stap bilong Rahap?
12 Bilip i helpim yumi long putim ol gutpela mak bilong winim, na tu, bilip i mekim na i stap bilong yumi i gutpela. Taim Rahap i bin stap pamukmeri, ating em i pilim olsem i stap bilong em i no gat as bilong en. Tasol taim em i bilip long God na mekim ol wok bilong bilip, em i kisim gutpela samting. “God i kolim em stretpela meri” taim ‘em i lukautim ol man Josua i bin salim i kam na Rahap i salim ol i go bek long narapela rot’ bambai ol i ken abrusim ol birua long Kenan. (Jems 2:24-26) Rahap i luksave olsem Jehova i God tru, olsem na em i kamapim bilip bilong em long narapela rot tu—em i lusim pasin pamuk. (Josua 2:9-11; Hibru 11:30, 31) Em i maritim wanpela wokman bilong Jehova—i no wanpela Kenan i no bilip long God. (Lo 7:3, 4; 1 Korin 7:39) Rahap i kisim gutpela prais tru—em i kamap tumbuna bilong Mesaia. (1 Stori 2:3-15; Rut 4:20-22; Matyu 1:5, 6) Olsem sampela em ol i bin lusim pasin pamuk, na ol narapela tu, Rahap bai kisim narapela gutpela prais—em bai kirap bek long matmat na stap long Paradais long graun.
13. Olsem wanem Devit i bin mekim sin long ol samting em i bin mekim long Batseba? Tasol em i kamapim wanem pasin?
13 Taim Rahap i lusim pasin nogut olsem pamukmeri, yumi ken ting em i bihainim stretpela rot long olgeta samting em i mekim. Tasol sampela em ol i bin dediket long God inap longtaim, ol i bin mekim bikpela rong. King Devit i mekim pasin pamuk wantaim Batseba, na em i wokim rot na ol i kilim i dai man bilong Batseba long pait, na nau Devit i maritim em. (2 Samuel 11:1-27) Tasol Devit i bel hevi nogut tru long dispela na em i tanim bel na i beten long Jehova olsem: “Spirit bilong yu yet i stap long mi, na yu no ken rausim long mi.” God i no tekewe spirit bilong em long Devit. Devit i bilip olsem, long marimari bilong Em Jehova i no ken givim baksait long “man i pilim hevi long sin na i daunim em yet.” (Song 51:11, 17; 103:10-14) Bilip bilong Devit na Batseba i mekim na tupela i kisim gutpela prais—tupela i kamap tumbuna bilong Mesaia.—1 Stori 3:5; Matyu 1:6, 16; Luk 3:23, 31.
Yumi Bilip Olsem God Bai Helpim Yumi
14. Olsem wanem Gideon i save tru olsem God i stap wantaim em? Dispela stori inap mekim wanem long bilip bilong yumi?
14 Tru, yumi bilip na wokabaut, tasol sampela taim yumi laik save tru tru olsem God bai helpim yumi o nogat. I olsem tu long Hetman Gideon, em wanpela namel long ol man “ol i bilip long God, olsem na ol i winim pait na daunim ol ami bilong planti king.” (Hibru 11:32, 33) Taim ol Midian na sampela kantri moa i kam pait long lain Israel, spirit bilong God i kam i stap long Gideon. Em i laik save tru tru olsem Jehova i stap wantaim em, olsem na em i tokim God olsem em i laik mekim sampela traim long gras bilong sipsip em bai putim i stap long graun long nait na i go inap tulait. Long namba wan traim, kol bilong nait i mekim na wara i kamap long gras bilong sipsip, tasol long graun, nogat. Long namba tu traim, wara i kamap long graun tasol, na long gras bilong sipsip, nogat. Em nau, Gideon i save tru tru olsem God i stap wantaim em, na dispela i strongim bilip bilong em, olsem na em i kirap mekim pait long ol birua bilong Israel na daunim ol. (Hetman 6:33-40; 7:19-25) Taim yumi mas skelim wanem samting yumi bai mekim na yumi laik save tru olsem God bai soim rot long yumi, dispela i no makim olsem yumi no gat bilip. Taim yumi mas skelim wanem samting yumi bai mekim, na yumi lukim Baibel na ol buk na nius Kristen, na yumi beten long spirit holi i ken soim rot long yumi, yumi kamapim olsem yumi bilip long God.—Rom 8:26, 27.
15. Sapos yumi wok long tingim strongpela bilip bilong Barak, dispela inap helpim yumi olsem wanem?
15 Hetman Barak i bin kisim sampela tok bilong strongim bel bilong em, na dispela i strongim bilip bilong em. Profet meri Debora i bin strongim em long go pas na kisim bek ol Israel long han bilong King Jabin bilong Kenan. Barak i bilip na em i save tru olsem God bai helpim em, olsem na em i kisim 10,000 man i no gat planti samting bilong pait, na ol i winim bikpela lain ami bilong Jabin, em Sisera i kepten bilong ol. Long dispela taim Debora na Barak i mekim wanpela gutpela singsing bilong winim pait. (Hetman 4:1–5:31) Debora i strongim Barak long i stap lida bilong Israel em God i bin makim em, na Barak em i wanpela namel long ol wokman bilong Jehova i bilip long God na ol i “ranim ol bikpela ami bilong ol arapela lain.” (Hibru 11:34) God i bin mekim gut long Barak, long wanem, em i bilip na i kirap mekim wok, na sapos yumi wok long tingim dispela samting, em inap kirapim yumi long mekim wok sapos yumi bin ting wanpela wok bilong Jehova yumi kisim i hatwok tumas long mekim.
Bilip i Kamapim Pasin Wanbel
16. Abraham i mekim wanem gutpela pasin bilong i stap wanbel wantaim Lot?
16 Bilip i save helpim yumi long mekim sampela wok bilong God i hatwok long mekim, na olsem tasol bilip i save kamapim pasin wanbel na bel isi. Taim kros i kamap namel long ol wasman bilong lain sipsip bilong Abraham na bilong Lot, em pikinini bilong brata bilong em, na tupela i mas bruk na stap narapela narapela, orait lapun Abraham i larim yangpela man Lot i makim gutpela hap graun tru bilong em yet. (Stat 13:7-12) Long bilip ating Abraham i bin beten long God i ken helpim em long stretim dispela hevi. Abraham i no putim laik bilong em yet i go pas, nogat. Em i stretim dispela hevi long pasin sekan. Sapos yumi gat kros wantaim wanpela brata Kristen, orait long pasin bilong bilip yumi mas beten na “wok long kamap wanbel” wantaim em, na tingim gutpela pasin Abraham i bin mekim long Lot.—1 Pita 3:10-12.
17. I gat wanem as na yumi ken tok, kros i stap namel long Pol na Barnabas na Mak, ol i bin stretim long gutpela pasin isi?
17 Yumi ken tingting long olsem wanem pasin bilong bilip na bihainim ol stiatok bilong Baibel inap helpim yumi long kamapim pasin wanbel. Taim Pol i redi long mekim namba 2 raun bilong wok misineri bilong em, Barnabas i wanbel long ol bai go lukim gen ol kongrigesen long Saiprus na Esia Maina. Tasol Barnabas i laik kisim kasen brata bilong em, Mak, i go wantaim ol. Pol i no orait long dispela, long wanem, Mak i bin lusim ol taim ol i stap long Pamfilia. “Tupela i tok kros planti,” na nau tupela i bruk. Barnabas i kisim Mak i go wantaim em long Saiprus, na Pol i makim Sailas olsem poroman bilong em na tupela “i wokabaut i go nabaut long provins Siria na Silisia, na Pol i wok long strongim ol manmeri bilong ol sios i stap long dispela hap.” (Aposel 15:36-41) Yumi ken ting bihain dispela kros i dai, long wanem, taim Pol i stap long Rom, Mak i stap wantaim em, na Pol i mekim gutpela tok long em. (Kolosi 4:10; Filemon 23, 24) Taim Pol i stap kalabus long Rom long 65 C.E. samting, em i tokim Timoti: “Yu mas kisim Mak na bringim em i kam wantaim yu. Em i gutpela man bilong helpim mi long wok.” (2 Timoti 4:11) Taim Pol i beten long God, ating em i save kamapim dispela hevi i stap namel long em na Barnabas na Mak, na dispela i kamapim pasin wanbel i wankain olsem dispela “bel isi God i save givim.”—Filipai 4:6, 7.
18. Yumi ken ting Yuodia na Sintike i bin mekim wanem?
18 Yumi gat sin, olsem na ‘planti taim yumi save popaia.’ (Jems 3:2) Hevi i bin kamap namel long tupela meri Kristen, em Pol i tok long ol olsem: “Yuodia na Sintike, yutupela harim. Yutupela meri wantaim i bilong lain bilong Bikpela, olsem na yutupela i mas kamap wanbel. Na yu, wanwok tru bilong mi, mi tokim yu, yu mas helpim dispela tupela meri. Tupela i bin poroman gut wantaim mi long wok bilong autim gutnius.” (Filipai 4:1-3) Yumi ken ting, dispela tupela meri i save pret long God ol i stretim hevi bilong ol long gutpela pasin isi, long rot bilong bihainim ol tok olsem i stap long Matyu 5:23, 24. Sapos yumi bilip na bihainim ol stiatok bilong Baibel, dispela bai helpim yumi tru long kamapim pasin wanbel long nau.
Bilip i Helpim Yumi Long Karim Hevi
19. Wanem bikpela hevi i no bin bagarapim bilip bilong Aisak na Rebeka?
19 Long rot bilong bilip yumi inap karim ol hevi tu. Ating yumi bel hevi long wanpela long famili bilong yumi i bin sakim tok bilong God na maritim wanpela i no bilip. (1 Korin 7:39) Aisak na Rebeka i kisim hevi, long wanem, pikinini bilong ol, Iso, em i bin maritim ol meri i no save pret long God. Pasin bilong ol meri bilong em bilong lain Hit i mekim na “Aisak na Rebeka i bel pen tru long tupela.” Olsem na Rebeka i tokim Aisak: “Sapos Jekop tu i maritim wanpela meri bilong lain Hit olsem dispela tupela meri i stap hia, orait mobeta mi dai.” (Stat 26:34, 35; 27:46) Tasol dispela hevi i no bagarapim bilip bilong Aisak na Rebeka. Orait yumi tu i mas holim yet strongpela bilip sapos hevi i painim yumi na i hatwok long karim dispela hevi.
20. Olsem wanem Naomi na Rut i stap olsem gutpela piksa long pasin bilong bilip?
20 Lapun meri Naomi, man bilong en i dai pinis, em i wanpela Juda na em i save pinis olsem sampela meri Juda bai karim ol pikinini man em ol bai kamap tumbuna bilong Mesaia. Tasol ol pikinini man bilong em i dai pinis na ol i no gat pikinini, na em i lusim pinis taim bilong karim pikinini, olsem na i luk olsem i no gat wanpela long famili bilong em bai kamap tumbuna bilong Mesaia. Tasol tambu meri bilong em, Rut, em man bilong en i dai pinis, em i kamap meri bilong lapun Boas na karim pikinini man, na Rut i kamap wanpela tumbuna bilong Jisas, em Mesaia! (Stat 49:10, 33; Rut 1:3-5; 4:13-22; Matyu 1:1, 5) Bilip bilong Naomi na Rut i stap strong na i winim ol hevi bilong ol, na ol i kisim bikpela amamas. Yumi tu bai kisim bikpela amamas sapos yumi holimpas bilip long taim hevi i painim yumi.
21. Bilip i save helpim yumi olsem wanem? Yumi mas tingting strong long mekim wanem?
21 Tru, yumi no inap save wanem samting bai painim yumi wan wan long olgeta de, tasol long bilip yumi inap karim ol hevi i kamap long yumi. Bilip i mekim na yumi gat strongpela bel na yumi no les kwik. Bilip i mekim na yumi putim ol mak bilong ol samting bilong spirit yumi laik winim, na i stap bilong yumi i gat as bilong en. Bilip i save helpim yumi long i stap wanbel wantaim ol narapela na em i save winim ol hevi. Olsem na yumi mas i stap olsem “ol manmeri bilong bilip na kisim laip.” (Hibru 10:39) Long strong bilong gutpela God Jehova, yumi mas wok yet long holim strongpela bilip, na dispela bai givim biknem long em.
Bai Yu Bekim Olsem Wanem?
• Olsem wanem Baibel i kamapim klia olsem bilip inap mekim na yumi gat strongpela bel?
• I gat wanem as na yumi ken tok, bilip i mekim na i stap bilong yumi i gat as bilong en?
• Olsem wanem bilip i save kamapim pasin wanbel?
• Wanem samting i kamapim klia olsem bilip i save helpim yumi long karim ol hevi i painim yumi?
[Ol Piksa long pes 16]
Bilip i mekim na Noa na Enok i no pret long givim tok bilong Jehova long ol man
[Ol Piksa long pes 17]
Bilip kain olsem bilong Moses i save kirapim yumi long putim ol mak bilong ol samting bilong spirit yumi laik winim
[Ol Piksa long pes 18]
Barak, Debora, na Gideon i save tru olsem God bai helpim ol, na dispela i strongim bilip bilong ol