Stori Tru Bilong Ol Ensel

Taim yumi laik save gut long wanpela man, yumi laik kisim save tu long famili bilong em, a? Na i olsem tu sapos yumi laik kisim save long God Jehova. Yumi no ken kisim save long nem tasol bilong em, nogat. Yumi mas kisim sampela save tu long “famili” bilong em long heven. (Skelim wantaim Efesus 3:​14, 15.) Baibel i kolim ol ensel olsem “ol pikinini” bilong God. (Jop 1:⁠6, NW) Baibel i tokaut olsem ol ensel i mekim bikpela wok, olsem na yumi mas laik long kisim sampela save long ol na bai yumi ken save, God i mekim wanem wok long ol bilong kamapim laik bilong em.

I GAT wanpela nupela kain tingting nau i wok long kamap. Planti man ol i tok, ol i save bilip long ol ensel; na planti ol i tok, ol ensel i bin mekim sampela samting long ol. Wanpela lain i bin askim 500 manmeri long Amerika, “Wanpela taim yu bin pilim olsem wanpela ensel i stap klostu long yu?” Inap olsem 165 bilong ol i tok, yes. Na yumi kirap nogut long planti yangpela ol i tokaut olsem ol i bilip long ol ensel; wanpela lain i skelim dispela samting long Amerika na ol i tok, inap 76 pesen bilong ol yangpela i bilip olsem. Olsem na yumi save, ol man i save tingting long ol ensel. Tasol tingting bilong ol man bilong nau long ol ensel, em i stret wantaim tok i tru bilong Baibel o nogat?

Ol i Haitim Wok Bilong Satan

Taim yumi stori long ol ensel, yumi no ken lusim tingting long ol ensel nogut, em ol lain bilong heven Baibel i tok ol i bin bikhet long God. Nambawan bilong ol em Satan. Wanpela buk ol man i save laikim (Ask Your Angels) i tok, Satan em i ‘wanpela rot bilong God long kamapim pasin bilong God,’ na em i save wok oltaim long traim ol man bilong helpim ol long strongim “masol bilong ol bilong spirit.” Buk i tok, Satan ‘i laik mekim gut long ol man,’ tasol inap planti handet yia pinis ol man i gat tingting kranki olsem em i wanpela man nogut. Na buk i tok, Satan wantaim Jisas, “maski narapela i no helpim narapela, ol i gat wankain tingting long ol samting ol i laik mekim, na tupela i olsem hap bilong wanpela bodi.” Yumi kirap nogut long dispela tok bilong ol man bilong raitim dispela buk. Tasol Baibel i tok wanem long dispela samting?

Baibel i kamapim klia olsem Satan em i no ‘wanpela rot bilong God long kamapim pasin bilong God’​—⁠em i wanpela birua bilong God. (Luk 10:​18, 19; Rom 16:20) Em i sakim wok bos bilong Jehova, na ol samting em i laik mekim long ol man i no gutpela. Em i save kamapim belhat bilong em long ol wokman bilong God long graun, na em i no sori liklik long ol. Em i save kotim ol long ai bilong God long san na long nait!a (KTH 12:​10, 12, 15-17) Satan i strong long paulim ol, maski em i mas mekim wanem long ol. Em i bin mekim nogut tru long stretpela man Jop, na dispela i kamapim long ples klia olsem em i no sori liklik long ol man i karim pen na hevi, nogat tru.​—⁠Jop 1:​13-19; 2:​7, 8.

Olsem na Satan na Jisas i no gat “wankain tingting long ol samting ol i laik mekim,” nogat. Ol i stap birua birua. Yumi save, Satan yet i bin kirapim Herot long putim lo long kilim i dai olgeta liklik pikinini man​—⁠tingting bilong em, em i laik kilim i dai pikinini Jisas! (Matyu 2:​16-18) Na Satan i mekim nogut long Jisas i go inap long taim Jisas i dai. (Luk 4:​1-13; Jon 13:27) Em nau, Satan na Jisas i no stap “olsem hap bilong wanpela bodi,” nogat tru. Jisas i narapela kain olgeta long Satan. Tok profet bilong Baibel i tok, ol i mas i stap birua birua. (Stat 3:15) Jisas, em i kirap bek pinis long matmat, em bai bagarapim Satan bihain, long taim God i makim, na i stret Jisas yet bai mekim dispela wok.​—⁠KTH 1:18; 20:⁠1, 10.

Yumi Ken Beten Long Husat?

Dispela lain i bilip olsem ol ensel i save was long ol, sampela bilong ol i tok, i gat rot bilong ol man i ken toktok wantaim ol ensel. Wanpela buk i tok, ‘Sapos yumi askim wanpela ensel long givim sampela tok long yumi, na yumi no giaman, em i no ken sakim tok bilong yumi. Askim ol, na bai ol i bekim tok long yu.’ Buk i kolim nem bilong ol ensel yumi ken askim ol long helpim yumi, olsem Maikel, Gebriel, Uriel, Rafael, na sampela moa.b

Tasol Jisas i no tokim ol disaipel long beten long ol ensel​—⁠em i tokim ol long beten long God. (Matyu 6:​9, 10) Pol tu i tok: “Yupela i mas prea long God na tok tenkyu long em, na askim em long helpim yupela.” (Filipai 4:⁠6) Olsem na taim ol Kristen i beten, ol i save beten long Jehova tasol, na ol i mekim long nem bilong Krais Jisas.c​—⁠Jon 14:​6, 13, 14.

Tru Ol Ensel i No Gat Lotu?

Wanpela meri i save lukautim wanpela lain i gat dispela kain bilip long ol ensel (em Eileen Elias Freeman, bilong AngelWatch Network) em i tok, ‘ol ensel i antap tru na i winim olgeta lotu, na olgeta tingting bilong ol saveman, na olgeta bilip. Yumi save, ol ensel i no gat wanpela lotu.’

Tasol Baibel i tokaut klia olsem ol gutpela ensel i gat lotu; ol i save lotuim God tru, em Jehova, em i strong long ol man i no ken lotuim narapela god​—⁠ol i mas lotuim em wanpela tasol. (Lo 5:​6, 7; KTH 7:11) Olsem na taim wanpela ensel i toktok wantaim aposel Jon, em i kolim em yet olsem “wanwok” bilong ol man i save bihainim tok bilong God. (KTH 19:10) I no gat wanpela tok long Baibel i tok, ol gutpela ensel i orait long lotuim ol narapela god, nogat. Ol i lotuim Jehova wanpela tasol.​—⁠Kisim Bek 20:​4, 5.

‘Papa Tru Bilong Tok Giaman’

Ol man i tok ol i bin bungim ol ensel, planti bilong ol i tok ol i bin kisim tok long ol man i dai pinis. Wanpela meri, nem bilong em Elise, em i tok: “Mi bin pilim olsem ankol bilong mi i painim rot pinis long toksave long mi olsem nau em i stap amamas.” Meri hia i tok olsem bihain long taim em i ting em i bin kisim wanpela mak. Kain samting olsem i painim narapela meri, em Terri, taim wanpela gutpela pren bilong em i dai. Terri i tok: “Mipela planim em, na wanpela wik bihain em i kamap long mi long wanpela rot olsem driman. Em i tok, mi no ken krai na bel hevi long em i bin lusim mipela, long wanem, nau em i stap amamas na bel isi.”

Tasol Baibel i tok, “ol man i dai pinis, ol i no inap save long wanpela samting.” (Saveman 9:⁠5) Na Baibel i tok tu olsem taim man i dai, “long dispela de tingting bilong em i pinis olgeta.” (Song 146:⁠4, NW) Tasol Satan em i “papa tru bilong pasin bilong tok giaman.” (Jon 8:44) Em yet i bin kamapim dispela tok giaman olsem ol man i gat tewel, na taim man i dai, tewel bilong em i stap yet. (Skelim wantaim Esekiel 18:⁠4.) Planti man bilong nau ol i bilipim dispela tok, na dispela i helpim laik bilong Satan, long wanem, ol i no gat wok long bilip olsem man i dai pinis bai kirap bek​—⁠em wanpela bikpela bilip bilong lotu Kristen. (Jon 5:​28, 29) Olsem na taim man i singautim ol man i dai pinis o i olsem em i kisim sampela tok long ol, em wanpela pasin moa bilong dispela lain em God i no orait long en.

Ol i Kisim Tok Long Ol Ensel o Spirit Nogut?

Planti manmeri bilong dispela lain ol i save mekim olkain wok bilong ol spirit nogut. Tingim stori bilong Marcia. Em i tok: ‘Long mun Septemba i go inap Disemba 1986, mi kirap long kisim sampela tok i kam long ples antap. Mi lukim ol samting olsem mak bilong man na mi kisim ol narapela kain driman bilong taim mi bin i stap laip long narapela taim bipo. Mi toktok wantaim sampela pren bipo ol i dai pinis, na ol narapela samting tu i painim mi na mi inap save long sampela samting bilong ol manmeri nau tasol mi bungim ol long namba wan taim. Na mi inap raitim ol tok na mi no save mi mekim olsem​—⁠han bilong mi i wok nating; na mi save kisim tok i kam long ol man i no gat skin bilong graun. Sampela em mi no bin bungim ol taim ol i stap laip yet long graun, tasol ol i save salim tok long ol narapela long rot bilong mi.’

Na ol i save mekim olkain pasin bilong glasman bilong “toktok wantaim” ol ensel. Wanpela buk bilong ol i laik kirapim ol man long mekim wok long ol ston i gat marila long en, na ol kas ol i kolim tarot, na mani I Ching, na lukim ol mak bilong han, na lukim sta. Na buk i tok, ‘Larim bel bilong yu i bringim yu i go long man i gat narapela kain save, na bilip olsem wanpela ensel bai i bungim yu long dispela hap.’

Tasol Baibel i kamapim klia olsem maski wanem samting ‘bai i bungim yu long dispela hap,’ em i no wanpela ensel bilong God. Long wanem, God i nolaik tru long olkain pasin bilong glasman; na ol lain i lotu long God tru​—⁠maski ol i stap long heven o long graun​—⁠ol i klia olgeta long dispela pasin na ol i no insait liklik long en. Long lain Israel bipo, sapos man i mekim olkain pasin bilong glasman, ol i save kilim em i dai. Lo i tok, Jehova “i no laikim tru ol manmeri i save mekim ol dispela kain pasin nogut.”​—⁠Lo 13:​1-5; 18:​10-12.

“Ensel Bilong Lait”

Yumi no ken kirap nogut long save, Satan inap mekim na ol man i ting pasin bilong glasman i save helpim ol man, na ol ensel i as bilong en. Baibel i tok, Satan “i save senisim pasin bilong en na kamap olsem ensel bilong lait.” (2 Korin 11:14) Em inap givim ol mak long man long samting bai painim em bihain, na em inap mekim na ol i kamap tru, na ol man i lukim dispela mak ol i ting em i kam long God. (Skelim wantaim Matyu 7:​21-23; 2 Tesalonaika 2:​9-12.) Tasol olgeta wok bilong Satan​—⁠maski i olsem gutpela wok tru o ol i olsem samting nogut tru​—⁠i gat tupela as na em i mekim, olsem: bilong pulim ol man na bai ol i lusim Jehova, o bilong pasim tingting bilong ol na bai “lait bilong gutnius bilong marimari na sori bilong Krais, em i no inap i go insait long bel bilong ol.” (2 Korin 4:​3, 4) Long dispela namba tu rot bilong giamanim ol man, Satan i pulim planti man tru.

Tingim stori bilong Baibel long wanpela wokmeri i stap long taim bilong ol aposel. Em i save tokaut long ol samting bai kamap bihain, na ol bos bilong em i kisim bikpela mani long wok bilong em. Inap planti de em i bihainim ol disaipel, na em i tokaut olsem: “Ol dispela man ol i wokman bilong God Antap Tru. Ol i save tokim yupela long rot bilong God i kisim bek yupela.” Tok bilong meri i tru. Tasol Baibel i tok em i gat wanpela spirit i stap long em, na dispela spirit i no wanpela gutpela ensel, nogat. Em wanpela spirit i mekim pasin olsem glasman. Orait, bihain Pol “i tanim na i tokim dispela spirit, ‘Long nem bilong Jisas Krais, mi tokim yu, yu lusim dispela meri na yu go.’ Na wantu dispela spirit i lusim meri na i go.”​—⁠Aposel 16:​16-18.

Bilong wanem Pol i rausim dispela spirit? Dispela spirit i bin helpim ol bos bilong dispela meri na ol i kisim bikpela mani. Ating meri i gat strong long tokaut long ol fama long gutpela taim bilong planim ol kaikai, na tokaut long ol yangpela meri long gutpela taim bilong marit, na ol man bilong painim gol insait long graun, ating em i save tokim ol long ples bilong painim. Na dispela spirit i kirapim meri long autim sampela tok i tru, na long ai bilong ol man em i litimapim nem bilong ol disaipel!

Tasol em i wanpela spirit i save mekim pasin olsem glasman. Olsem na i no stret em i autim sampela tok bilong Jehova na bilong samting Jehova i bin mekim bilong kisim bek ol man. Ol gutpela tok em i mekim bilong kirapim ol man long bilipim ol tok bilong meri long samting bai kamap bihain, em i pulim tingting bilong ol man na ol i no putim yau long tok bilong ol disaipel tru bilong Krais. I gat as na Pol i tokim ol Kristen: “I no inap yupela i dring long kap bilong Bikpela na long kap bilong ol spirit nogut tu. Na i no inap yupela i kaikai long tebol bilong Bikpela na long tebol bilong ol spirit nogut tu.” (1 Korin 10:​21) Olsem na ol Kristen long taim bilong ol aposel ol i bin kukim long paia olgeta buk bilong ol i tok long pasin bilong mekim wok olsem glasman samting.​—⁠Aposel 19:⁠19.

‘Ensel i Flai Namel Long Skai’

Olsem yumi lukim pinis, Baibel i kamapim long ples klia olsem planti samting bilong dispela lain i helpim Birua bilong God, em Satan. Tasol olsem wanem? Dispela i makim olsem ol gutpela ensel i no mekim sampela wok long graun? Nogat, i no olsem. Nau ol i mekim wanpela bikpela wok tru long graun. Em wanem wok? Bilong bekim dispela askim, yumi mas lukim hap bilong Kamapim Tok Hait long Baibel. Em i stori planti taim tru long ol ensel, winim olgeta narapela hap bilong Baibel.

Long Kamapim Tok Hait 14:​6, 7, aposel Jon i tokaut long wanpela piksa em i kisim long ol samting bai kamap bihain. Em i tok: “Mi lukim narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long . . . olgeta lain man na bilong olgeta kantri na bilong olgeta tok ples na bilong olgeta kain skin. Em i singaut strong olsem, ‘Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.’ ”

Dispela skripsa i kamapim klia nambawan bikpela wok bilong ol ensel long nau. Ol i kisim bikpela wok bilong autim gutnius bilong Kingdom bilong God. Jisas i tingim dispela wok na em i tok promis long ol disaipel: “Mi save stap wantaim yupela olgeta de, i go inap long dispela taim i pinis.” (Matyu 28:​18-20) Olsem wanem Jisas i stap wantaim ol disaipel bilong em? Wanpela rot em olsem: Em i salim ol ensel long helpim ol bambai ol i ken inapim tru dispela bikpela wok ol i mas mekim.

Ol Witnes Bilong Jehova i save lusim wan bilion aua samting long olgeta yia long autim gutnius bilong Kingdom. Taim ol i mekim dispela wok, ol i lukim ol samting i makim olsem ol ensel i stiaim ol. Taim ol i go long ol haus na autim tok, planti taim ol i save bungim ol manmeri nau tasol ol i bin beten na askim God long salim wanpela i kam bilong helpim ol long kisim save long laik bilong God. Dispela wok bilong ol ensel long stiaim ol, na pasin bilong ol Witnes tu, em ol i strong long painim ol kain man olsem, dispela i mekim na long olgeta yia inap sampela handet tausen manmeri ol i kisim save long Jehova!

Olsem wanem long yu? Yu putim yau long tok bilong dispela ensel i flai i go namel long skai? Taim ol Witnes Bilong Jehova i go long haus bilong yu, i gutpela sapos yu toktok moa wantaim ol long tok bilong dispela ensel.

[Ol Futnot]

[Blok long pes 8]

OL ENSEL OL I HUSAT?

PLANTI man i bilip olsem ol ensel em tewel bilong ol man i dai pinis, tasol dispela tok i no stret. Baibel i tokaut klia olsem ol man i dai pinis “ol i no inap save long wanpela samting.” (Saveman 9:⁠5) Orait, ol dispela ensel ol i kam we? Baibel i makim olsem God i bin wokim olgeta wan wan ensel taim em i no bin wokim yet graun. (Jop 38:​4-7) Ating dispela famili bilong God long heven ol inap olsem planti handet milion, o planti bilion! Sampela ensel ol i bihainim Satan na ol tu i bikhet long God.​—⁠Daniel 7:10; KTH 5:⁠11; 12:​7-9.

Jehova em i God bilong mekim stret ol samting, olsem na yumi save, em i bin stretim gut wok bilong dispela traipela lain ensel, olsem famili bilong em.​—⁠1 Korin 14:⁠33.

• Wanpela ensel i gat bikpela strong na namba, winim ol narapela ensel, em nambawan ensel, Krais Jisas, narapela nem bilong em, Maikel. (1 Tesalonaika 4:16; Jut 9) Aninit long em i gat ol serafim, na serap, na ensel.

• Ol serafim i save stap klostu long sia king bilong Jehova na ol i mekim wok bilong em. Hap wok bilong ol, em ol i save tokaut olsem God i holi, na ol i mekim wok bilong helpim lain bilong em long i stap klin.​—⁠Aisaia 6:​1-3, 6, 7; lukim sta daunbilo, bilong ves 2.

• I gat ol serap tu i stap klostu long Jehova. Ol i gat wok long karim sia king bilong God, olsem na ol i save litimapim nem bilong Jehova, em i bikpela King.​—⁠Song 80:1; 99:1; Esekiel 10:​1, 2.

• Ol ensel (olsem man bilong bringim tok) ol i olsem maus o wokman bilong Jehova. Ol i save mekim laik bilong God, na sampela wok bilong ol em bilong kisim bek lain bilong God, na bagarapim ol man nogut.​—⁠Stat 19:​1-26.

[Ol Piksa long pes 7]

Yu putim yau long tok bilong dispela ensel i flai namel long skai?