Husat Bai Abrusim Bagarap?
“Olgeta manmeri i singaut long [nem bilong] Bikpela . . . em bai i kisim bek ol na bai ol i stap gut.”—APOSEL 2:21.
1. Bilong wanem Pentikos bilong yia 33 C.E. em i wanpela bikpela de tru yumi mas tingim?
DE PENTIKOS bilong yia 33 C.E. em wanpela bikpela de tru yumi mas tingim. Bilong wanem? Long wanem, long dispela de wanpela nupela lain i kamap. Pastaim em i no wanpela bikpela lain tru—ol inap olsem 120 tasol, em ol disaipel bilong Jisas ol i bung long wanpela rum long Jerusalem. Tasol dispela lain i bin kamap nupela long dispela rum bipo, ol i stap yet long taim bilong yumi, maski ol man i lusim tingting pinis long planti lain i bin stap long dispela taim bipo. Dispela em i bikpela samting tru long yumi olgeta, long wanem, dispela em lain God i bin makim bilong i stap witnes bilong em, olsem autim tok bilong em long ol man.
2 Taim dispela nupela lain i kirap, sampela bikpela samting i kamap na i truim tok profet bilong Joel. Long Aposel 2:2-4, yumi lukim stori bilong ol dispela samting i bin kamap: “Wantu wanpela nois i kam long heven, em i olsem krai bilong strongpela win, na i pulapim tru dispela haus ol i sindaun i stap long en. Na ol i lukim samting olsem paia i kamap, na i luk olsem planti tang bilong man. Na ol dispela tang i go nabaut na i stap long olgeta bilong ol. Na Holi Spirit i pulap long olgeta dispela manmeri, na ol i stat long mekim tok long ol kain kain tok ples. Holi Spirit i mekim na ol inap mekim ol dispela toktok.” Long dispela rot, ol dispela 120 man na meri ol i kamap wanpela lain bilong spirit, em ol namba wan manmeri bilong dispela lain em bihain aposel Pita i kolim olsem “lain Israel tru bilong God.”—Galesia 6:16.
3. Wanem tok profet bilong Joel i kamap tru long Pentikos bilong yia 33 C.E.?
3 Planti manmeri ol i bung bambai ol i ken save long as bilong dispela “krai bilong strongpela win,” na aposel Pita i tokaut long ol olsem nau truim bilong wanpela tok profet bilong Joel i kamap. Em wanem tok profet? Orait, harim tok bilong em: “God i tok, ‘Klostu long las de bai mi kapsaitim Spirit bilong mi long olgeta manmeri. Na ol pikinini man na pikinini meri bilong yupela bai i autim tok bilong mi olsem ol profet. Na ol yangpela man bilong yupela bai i lukim ol samting olsem driman, na ol lapun man bai i driman. Na long dispela taim bai mi kapsaitim Spirit bilong mi long ol wokboi na ol wokmeri bilong mi, na bai ol i autim tok bilong mi olsem ol profet. Bai mi mekim ol narakain samting i kamap antap long skai, na bai mi wokim ol mirakel long graun daunbilo olsem ol mak bilong dispela De. Blut na paia na bikpela smok bai i kamap. Na bai san i kamap tudak, na mun bai i kamap retpela olsem blut. Na bihain bai De bilong Bikpela i kamap, em de Bikpela bai i soim bikpela strong na lait bilong en. Na long dispela taim olgeta manmeri i singaut long [nem bilong] Bikpela . . . em bai i kisim bek ol na bai ol i stap gut.’ ” (Aposel 2:17-21) Dispela tok Pita i kolim i stap long Joel 2:28-32, na truim bilong dispela tok i makim olsem lain Juda i no gat bikpela hap taim moa—taim i laik pinis. Dispela “De bilong Bikpela,” em taim bilong givim strafe long lain Israel i no bin stap gut long God, em i kam klostu pinis. Tasol husat bai abrusim bagarap? Na dispela i olsem piksa bilong wanem samting i mas kamap bihain?
Tupela Truim Bilong Tok Profet
4, 5. Pita i tingim ol samting bai kamap na em i givim wanem tok long ol manmeri? Olsem wanem na tok bilong em i stret long taim bilong yumi?
4 Long ol yia bihain long yia 33 C.E., lain Israel bilong spirit i kamap strong, tasol lain Israel bilong skin nogat. Long yia 66 C.E., ol Israel bilong skin i mekim pait wantaim ol Rom. Orait long yia 70 C.E. i olsem lain Israel i no stap moa, na Jerusalem wantaim haus lotu bilong en i paia olgeta. Long Pentikos bilong yia 33 C.E., Pita i givim sampela gutpela tok long ol manmeri long ol samting ol i mas mekim bilong abrusim dispela bagarap i laik kamap. Em i kamapim gen tok bilong Joel na em i tok: “Olgeta manmeri i singaut long [nem bilong] Bikpela . . . em bai i kisim bek ol na bai ol i stap gut.” Em nau, olgeta wan wan Juda i mas skelim samting ol i laik mekim—ol i mas singaut long nem bilong Jehova. Bilong mekim olsem, ol i mas bihainim narapela tok bilong Pita, olsem: “Yupela olgeta wan wan i mas tanim bel na kisim baptais long nem bilong Jisas Krais, na God bai i lusim ol sin bilong yupela.” (Aposel 2:38) Ol man i harim dispela tok bilong Pita ol i mas bilip olsem Jisas em i Mesaia, em lain Israel i bin rausim em.
5 Dispela tok profet bilong Joel i bikpela samting tru long ol manmeri i gat pasin daun long taim bilong ol aposel. Tasol dispela tok profet i bikpela samting moa long taim bilong yumi, long wanem, ol samting i kamap nau long dispela taim i makim olsem i gat namba tu truim bilong dispela tok profet bilong Joel i bin kamap. Orait nau yumi ken skelim dispela samting.
6. Taim yia 1914 i wok long kam klostu, lain Israel bilong God i kirap long kamap ples klia olsem wanem?
6 Bihain long taim ol aposel i dai pinis, lotu Kristen giaman, olsem gras nogut, i karamapim lain Israel bilong God na ol i no stap ples klia. Tasol long taim bilong las de, em i kirap long yia 1914, dispela lain Israel bilong spirit i kamap ples klia gen. Dispela i truim wanpela tok piksa bilong Jisas long wit na gras nogut. (Matyu 13:24-30, 36-43) Klostu long taim bilong 1914, ol Kristen God i bin makim long spirit holi ol i kirap lusim ol lotu i gat nem Kristen tasol ol i no stap gut long God, na ol i strongim bel na sakim ol bilip giaman bilong ol dispela lotu na ol i autim tok olsem taim bilong “ol man bilong ol arapela lain” i laik pinis. (Luk 21:24) Tasol dispela namba wan pait bilong olgeta hap i kirap long 1914, em i kamapim sampela bikpela traim ol i no bin redi long en. Ol man i givim bikpela hevi tru long ol, olsem na planti ol i slek long mekim wok bilong God, na sampela i no stap gut long bilip bilong ol. Long 1918, i olsem ol i pinis long mekim wok bilong ol long autim tok.
7. (a) Wanem samting i kamap long 1919 na i kain olsem samting i bin kamap long Pentikos bilong yia 33 C.E.? (b) Kirap long 1919, taim God i kapsaitim spirit bilong em i kam daun, dispela i mekim wanem long ol wokboi bilong Jehova?
7 Tasol ol i no stap olsem inap longpela taim, nogat. Kirap long 1919, Jehova i kirap long kapsaitim spirit bilong em long lain bilong em long wanpela rot i kain olsem samting i bin kamap long Pentikos bilong yia 33 C.E. Tru, long 1919 ol i no mekim tok long kain kain tok ples, na i no gat wanpela krai bilong strongpela win i kamap. Tok bilong Pol long 1 Korin 13:8 i givim save long yumi olsem taim bilong wokim ol mirakel i pinis longtaim. Tasol samting i kamap long 1919 i makim klia olsem spirit bilong God i stap long lain bilong em. Long dispela taim, long wanpela kibung long Sida Poin, Ohaio, Yunaitet Stets, ol Kristen i stap gut long God ol i kisim strong gen na ol i kirap gen long mekim wok bilong autim gutnius bilong Kingdom. Long 1922 ol i bung gen long Sida Poin na ol i harim wanpela tokaut olsem, “Autim tok, autim tok, autim tok long King na Kingdom bilong em,” na dispela tokaut i kirapim ol tru. Olsem samting i bin kamap long taim bilong ol aposel, ol man bilong dispela graun i mas lukim ol samting i kamap taim God i kapsaitim pinis spirit bilong em long lain bilong em. Olgeta Kristen i dediket pinis—ol man na meri, ol lapun na yangpela—ol i kirap na ‘autim tok olsem profet,’ olsem ol i “autim tok bilong ol strongpela wok bilong God.” (Aposel 2:11) Olsem Pita i bin mekim, ol tu i tok strong long ol manmeri i gat pasin daun: “Yupela i mas was gut, nogut yupela i bagarap wantaim ol dispela lain man bilong mekim ol kain kain pasin nogut.” (Aposel 2:40) Ol man i givim bel long dispela tok, olsem wanem ol inap mekim olsem? Ol i mas bihainim tok bilong Joel i stap long Joel 2:32 (NW): “Olgeta manmeri i singaut long nem bilong Jehova ol i no ken bagarap.”
8. Kirap long 1919, lain Israel bilong God i wok long kamap strong olsem wanem?
8 Kirap long dispela taim bipo, lain Israel bilong God i wok long kamap strong. Yumi ken ting olsem wok bilong God long putim mak long ol manmeri em i bin makim, klostu nau bai i pinis, na kirap long 1935 samting wanpela bikpela lain i gat pasin daun na ol i gat tingting long i stap oltaim long graun, ol i kamap ples klia. (KTH 7:3, 9) Olgeta i pilim tru olsem taim i sot pinis, long wanem, namba tu truim bilong Joel 2:28, 29 i soim yumi olsem wanpela bikpela De tru bilong Jehova i kam klostu pinis, na long dispela taim em bai bagarapim olgeta lotu, na wok politik, na ol bikpela wok bisnis bilong dispela graun na ol bai pinis olgeta. I gat as tru na yumi mas “singaut long nem bilong Jehova” na bilip tru olsem em bai lukautim yumi na yumi no ken bagarap!
Olsem Wanem Yumi Ken Singaut Long Nem Bilong Jehova?
9. Bilong singaut long nem bilong Jehova, yumi mas mekim wanem?
9 Bilong singaut long nem bilong Jehova, yumi mas mekim wanem? Ol tok i stap klostu long Joel 2:28, 29 i helpim yumi long bekim dispela askim. Olsem: Jehova i no save harim olgeta man i singaut long em. Long maus bilong narapela profet, em Aisaia, Jehova i tokim lain Israel: “Taim yupela i apim han na prea long mi, bai mi no ken lukim yupela. Maski yupela i prea planti taim, bai mi pasim yau bilong mi.” Bilong wanem Jehova i no laik harim beten bilong lain bilong em yet? Em yet i bekim dispela askim, olsem: “Blut bilong ol man yupela i bin kilim, em i pas yet long ol han bilong yupela.” (Aisaia 1:15) Ol man i gat asua bilong kilim man i dai o ol i man bilong mekim rong, Jehova i no inap harim beten bilong ol. Olsem na Pita i tokim ol Juda long Pentikos long tanim bel. Ol tok i stap klostu long Joel 2:28, 29 i soim yumi olsem Joel tu i tok ol man i mas tanim bel. Olsem: Joel 2:12, 13 i tok: “Bikpela i tok, ‘Tru, dispela olgeta samting bai i kamap, tasol nau yupela i mas tanim bel tru na kam bek long mi. Na yupela i mas tambu long kaikai na yupela i mas bel sori na krai na kam bek long mi. Maski long brukim nating ol klos bilong yupela, bilong makim sori bilong yupela. Long bel bilong yupela yet yupela i mas sori tru long ol sin bilong yupela.’ Yupela i mas kam bek long God, Bikpela bilong yumi. Em i pulap long marimari na em i save mekim gutpela pasin long yumi. God i save isi long yumi na i save laikim yumi tumas.” Kirap long 1919, ol Kristen God i bin makim ol i mekim ol samting i stret wantaim dispela tok. Bel bilong ol i sori tru long ol i bin pundaun, na ol i tanim bel na tingting strong long ol i no ken lusim Jehova liklik o slek long mekim wok bilong ol olsem bipo ol i bin mekim. Dispela i opim rot long God i ken kapsaitim spirit bilong em i kam daun long ol. Olgeta manmeri wan wan i laik singaut long nem bilong Jehova na em i ken harim ol, ol i mas bihainim dispela wankain rot.
10. (a) Bilong tanim bel tru, yumi mas mekim wanem? (b) Taim yumi tanim bel tru, Jehova i save mekim wanem long yumi?
10 Tasol yumi mas save, bilong tanim bel tru, i no olsem yumi tok tasol olsem “Mi sori tru.” Bipo ol Israel i save brukim klos bilong ol bilong makim olsem ol i bel hevi nogut tru. Tasol Jehova i tok: “Maski long brukim nating ol klos bilong yupela, bilong makim sori bilong yupela. Long bel bilong yupela yet yupela i mas sori tru long ol sin bilong yupela.” Pasin bilong tanim bel tru, dispela i save kirap long bel bilong yumi. Na yumi mas givim baksait long ol pasin nogut, olsem yumi lukim long Aisaia 55:7: “Ol manmeri bilong mekim ol pasin nogut i mas lusim ol pasin nogut bilong ol na ol i no ken tingting moa long mekim ol dispela pasin. Na ol i mas kam bek long God.” Na tu, yumi mas nolaik tru long pasin nogut, olsem Jisas i bin mekim. (Hibru 1:9) Orait nau yumi inap bilip olsem Jehova bai lusim tingting long ol rong bilong yumi long rot bilong dispela ofa bilong baim bek yumi, long wanem, Jehova i save “marimari na em i save mekim gutpela pasin long yumi. God i save isi long yumi na i save laikim yumi tumas.” Em bai orait long lotu yumi mekim long em na ol kaikai na wain bilong spirit yumi givim long em olsem ofa. Bai em i putim yau taim yumi singaut long nem bilong em.—Joel 2:14.
11 Long bikpela tok bilong em long maunten, Jisas i mekim wanpela tok na yumi mas tingim gut dispela samting tu. Em i tok: “Yupela i mas wok pastaim long painim kingdom bilong God wantaim stretpela pasin bilong em.” (Matyu 6:33, Nupela Testamen na Ol Sam, bilong 1978) Yumi no ken ting olsem yumi ken mekim nating long lotuim Jehova, olsem wanpela samting yumi mekim na bai bel bilong yumi i no kotim yumi. Yumi mas putim wok bilong God olsem namba wan samting bilong yumi. Olsem na long maus bilong Joel, Jehova i tok moa olsem: “Yupela i mas winim biugel long maunten Saion. . . . Bungim olgeta manmeri, na tokim ol long redi long mekim bikpela lotu. Bringim olgeta lapun manmeri na olgeta pikinini na ol liklik pikinini i dring susu yet i kam. Na ol nupela marit tu i mas lusim haus na i kam.” (Joel 2:15, 16) Taim man na meri i marit nupela, dispela i save pulim nabaut tingting bilong ol, na narapela i save tingting tasol long narapela. Tasol ol nupela marit tu i mas putim wok bilong Jehova i stap olsem namba wan samting bilong ol. Yumi no ken larim wanpela samting i go pas long wok bilong yumi long lotuim God bilong yumi na singaut long nem bilong em.
12. Taim yumi lukim ripot bilong Memorial bilong 1997, olsem wanem dispela i soim yumi olsem lain bilong autim tok bilong Kingdom em inap i go bikpela moa?
12 Taim yumi tingim dispela samting, yumi ken skelim tu wanpela samting em Ripot Bilong Wok Bilong Ol Witnes Bilong Jehova Long 1997 i kamapim. Long yia i go pinis, inap olsem 5,599,931 manmeri ol i autim tok bilong Kingdom—em wanpela bikpela lain tru ol i litimapim nem bilong Jehova! I gat 14,322,226 manmeri ol i bung long Memorial—em i winim namba bilong ol pablisa inap olsem 8 milion 500 tausen samting. Dispela namba i soim yumi olsem lain bilong autim tok bilong Kingdom em inap i go bikpela moa. Planti namel long dispela 8 milion 500 tausen ol i kirap pinis long stadi long Baibel wantaim ol Witnes Bilong Jehova—sampela em ol manmeri i gat laik long harim tok bilong Baibel na sampela em ol pikinini, papamama bilong ol i baptais pinis. Planti bilong ol, em namba wan taim bilong ol long go long wanpela miting. Ol i kam long dispela bung, na em i gutpela rot bilong ol Witnes Bilong Jehova i ken save gut long ol na tokim ol olsem ol i laik helpim ol bambai ol i ken wok yet long kamap strong. Na i gat sampela man em ol i save kam long Memorial long olgeta yia na ating ol i kam long wan wan miting, tasol ol i no wok long kamap strong—ol i stap olsem tasol. Yumi amamas tru long ol i kam long ol miting. Tasol yumi laik kirapim ol long tingim gut tok profet bilong Joel na tingim ol narapela samting ol i mas mekim bambai Jehova i ken harim ol taim ol i singaut long nem bilong em.
13. Sapos yumi kirap pinis long singaut long nem bilong Jehova, yumi gat wok long mekim wanem long ol narapela man?
13 Aposel Pol i toktok long narapela samting yumi mas mekim bilong singaut long nem bilong Jehova. Long pas em i raitim long ol Rom, em i kamapim tok profet bilong Joel, i tok: “Olgeta manmeri i singaut long nem bilong Jehova, bai em i kisim bek ol.” (NW) Orait bihain long dispela Pol i tok: “Tasol sapos ol i no bilip long em, olsem wanem bai ol i askim em long helpim ol. Na sapos ol i no harim tok long em, olsem wanem bai ol i bilip long em? Na sapos i no gat wanpela i autim tok long ol, olsem wanem bai ol i harim?” (Rom 10:13, 14) Yes, planti ol narapela man em ol i no save yet long Jehova ol tu i mas singaut long nem bilong em. Ol man i save pinis long Jehova, ol i gat wok long autim tok na ol i mas wok strong long helpim ol dispela man.
Wanpela Paradais Bilong Spirit
14, 15. Lain bilong Jehova i save singaut long nem bilong em long pasin em i laikim, olsem na ol i kisim wanem ol gutpela samting olsem bilong paradais?
14 Dispela lain God i bin makim, na ol arapela sipsip tu, ol i gat dispela kain tingting, olsem na Jehova i save mekim gut long ol. “Bikpela i tingting planti long graun bilong en, na em i marimari long ol manmeri bilong en.” (Joel 2:18) Long 1919, Jehova i mekim pasin marimari long lain bilong em na em i kisim bek ol na bringim ol long ples bilong mekim wok bilong em bilong spirit. Em i wanpela gutpela paradais tru bilong spirit, na Joel i stori long en olsem: “Graun, yu no ken pret. Yu mas amamas na belgut, long wanem, mi Bikpela, mi mekim planti gutpela pasin long yu. Ol animal, yupela i no ken pret. Long wanem, gras i kamap gen. Na ol diwai i karim kaikai, na i gat planti pikinini bilong diwai fik na diwai wain. Ol manmeri bilong Saion, yupela i mas amamas. Yupela i mas amamas long ol samting mi God, Bikpela bilong yupela, mi mekim bilong helpim yupela. Mi givim yupela inap ren long taim bilong planim kaikai, na mi salim planti ren i kam long yupela long namba wan mun. Ol pikinini bilong wit bai i pulap tru long ol ples bilong rausim lip samting bilong wit. Na long ol hul bilong wokim wain na wel bilong diwai oliv, wain na wel bai i pulap tru na bai i kapsait.”—Joel 2:21-24.
15 Em gutpela piksa tru bilong paradais, a? Tripela bikpela samting bilong ol Israel—wit, wel bilong oliv, wain—Jehova bai givim planti tru long ol wantaim planti sipsip. Long taim bilong yumi dispela tok profet i kamap tru long ol samting bilong spirit. Jehova i save givim planti kaikai bilong spirit long yumi inap tru long skel bilong yumi. Yumi olgeta i amamas tru long ol dispela planti kaikai God i save givim long yumi, a? Tru tumas, olsem Malakai i tok profet long en, God bilong yumi i bin ‘givim planti gutpela samting long yumi na yumi no sot.’—Malakai 3:10.
Pinis Bilong Wanpela Taim
16 Taim Joel i stori pinis long paradais bilong spirit em lain bilong God i stap long en, em i tok profet long Jehova bai kapsaitim spirit bilong em i kam daun. Taim Pita i kamapim dispela tok profet long Pentikos em i tok, truim bilong dispela tok profet i kamap “klostu long las de.” (Aposel 2:17) Taim God i kapsaitim spirit bilong em long dispela taim bipo, dispela i makim olsem taim bilong las de bilong lain Juda i kirap pinis. Na God i bin kapsaitim spirit bilong em long lain Israel bilong God long taim bilong yumi, na dispela i makim olsem nau yumi stap long taim bilong las de bilong dispela graun. Olsem na yumi laik save, wanem samting bai kamap bihain? Tok profet bilong Joel i tok moa olsem: “Bai mi mekim ol narakain samting i kamap long graun na long skai olsem ol mak bilong dispela De. Blut na paia na bikpela smok bai i kamap. Na san bai i kamap tudak na mun bai i kamap retpela olsem blut. Na bihain bai De bilong Bikpela i kamap. Long dispela bikpela De olgeta manmeri bai i pret nogut tru.”—Joel 2:30, 31.
17, 18. (a) Wanem bikpela De bilong Jehova i bin painim Jerusalem? (b) Yumi save, bikpela De bilong Jehova bai kamap tru long bihain, na dispela i kirapim yumi long mekim wanem?
17 Long yia 66 C.E., dispela tok profet i kirap long kamap tru long Judia taim ol samting i wok long kamap i go i go na bihain bikpela De bilong Jehova i kamap long yia 70 C.E. Long dispela taim, ol manmeri i no insait long dispela lain i litimapim nem bilong Jehova, ating ol i pret nogut tru! Long nau tu, ol samting bilong pret nogut tru long en bai kamap, taim Jehova i bagarapim olgeta samting bilong dispela graun. Tasol i gat rot bilong abrusim bagarap. Dispela tok profet i tok moa olsem: “Samting bai kamap olsem, olgeta manmeri i singaut long nem bilong Jehova ol i no ken bagarap; ol man i bin abrusim bagarap ol bai stap long maunten Saion na long Jerusalem, olsem Jehova i tok pinis, na ol man Jehova i bin singautim ol, ol i stap namel long ol man i winim bagarap.” (Joel 2:32, NW) Ol Witnes Bilong Jehova i tenkyu tru long ol i save long nem bilong Jehova, na ol i bilip tru olsem taim ol i singaut long em bai em i lukautim ol na ol i no ken bagarap.
18 Tasol wanem samting bai kamap taim dispela bikpela De bilong Jehova i painim ol lain bilong dispela graun na i mekim save long ol? Bai yumi toktok long dispela long laspela stori bilong stadi long en.
Yu Inap Tingim?
◻ Wanem namba wan taim Jehova i bin kapsaitim spirit bilong em i kam daun long lain bilong em?
◻ Wanem sampela samting yumi mas mekim bilong singaut long nem bilong Jehova?
◻ Wanem taim bikpela De bilong Jehova i painim lain Israel bilong skin?
◻ Olsem wanem Jehova i save mekim gut long ol manmeri i singaut long nem bilong em long nau?
2. Wanem ol bikpela samting olsem mirakel i bin kamap na i makim olsem wanpela nupela lain i kamap?
11. Lotu i tru i mas i stap olsem wanem long yumi?
16. (a) Jehova i bin kapsaitim spirit bilong em na dispela i makim wanem samting bilong taim bilong yumi? (b) Wanem samting bai kamap bihain?
[Piksa long pes 15]
Wanpela nupela lain i bin kamap long Pentikos bilong yia 33 C.E.
[Piksa long pes 16, 17]
Long 1919 Jehova i kirap gen long kapsaitim spirit bilong em i kam daun long lain bilong em na dispela i truim tok bilong Joel 2:28, 29
[Piksa long pes 18]
Yumi mas helpim ol man long singaut long nem bilong Jehova