Tok Bilong Jehova i Wok Strong!
“Long dispela pasin tok bilong [Jehova] i wok strong long ol manmeri, na i kamap strong long laip bilong ol.”—APOSEL 19:20.
1. Nau yumi laik skelim sampela tok moa long hap bilong Baibel ol i kolim Wok Bilong Ol Aposel, na bai yumi stori long wanem samting?
JEHOVA i opim dua long ol man bilong mekim wanpela wok. Pol i go pas long mekim dispela wok, long wanem “God i salim [em] i go bilong mekim wok namel long [ol manmeri bilong ol arapela lain].” (Rom 11:13) Nau yumi laik skelim sampela tok moa bilong Wok Bilong Ol Aposel, na bai yumi stori long ol gutpela raun bilong Pol long mekim wok misineri.—Aposel 16:6–19:41.
2. (a) Namel long yia 50 na yia 56 samting, God i givim tingting long Pol na Pol i raitim wanem ol pas? (b) God i blesim wok bilong Pol na ol wanwok bilong em na wanem samting i kamap?
2 Na God i givim tingting long Pol na Pol i raitim planti pas long ol Kristen. Kirap long yia 50 samting i go inap long yia 56 em i bin raitim namba wan na namba 2 pas long ol Tesalonaika taim em i stap long Korin, na em i bin raitim pas bilong ol Galesia taim em i stap long dispela taun o long Antiok long Siria. Long taun Efesus, em i raitim namba wan pas long ol Korin, na long Masedonia, em i raitim namba 2 pas long ol. Na long Korin, em i raitim pas long ol Rom. God i blesim wok bilong Pol na bilong ol wanwok bilong em na “long dispela pasin tok bilong Bikpela i wok strong long ol manmeri, na i kamap strong long laip bilong ol.”—Aposel 19:20.
Kirap long Esia i Go long Yurop
3. Pol wantaim ol poroman bilong em i mekim wanem na ol i makim gutpela pasin yumi mas bihainim bilong larim spirit holi i stiaim yumi?
3 Pol wantaim ol poroman bilong em i save larim spirit bilong God i stiaim ol. (16:6-10) Ating ol i harim wanpela maus i toktok long ol, o ol i lukim ol samting olsem driman o piksa, na long dispela rot spirit bilong God i bin pasim ol long i go autim tok long distrik Esia na long provins Bitinia, tasol bihain tok bilong gutnius i bin go kamap long dispela tupela hap. (Aposel 18:18-21; 1 Pita 1:1, 2) Bilong wanem spirit i pasim ol long pastaim? Long wanem, i no gat planti wokman, na spirit i stiaim ol i go long ol hap bilong Yurop, long wanem planti man bilong ol dispela hap ol i laik harim tok. Olsem tasol long nau, sapos rot i pas bilong autim tok long wanpela hap, ol Witnes Bilong Jehova i save go autim tok long narapela hap. Ol i bilip tru olsem spirit bilong God bai bringim ol i go long ol manmeri i kain olsem sipsip.
4. Long driman samting Pol i lukim wanpela man bilong Masedonia i singautim Pol i go helpim ol, na Pol i mekim wanem?
4 Pol na ol poroman bilong em i “abrusim” Misia, em wanpela distrik long Esia Maina, na ol i no mekim wok misineri long dispela distrik. Tasol long samting olsem driman Pol i lukim wanpela man bilong Masedonia i singautim em na i tok, ‘Yu kam helpim mipela.’ Olsem na kwiktaim ol dispela misineri i go long Masedonia, em wanpela hap long Poin bilong Balkan. Olsem tasol long nau, spirit bilong God i save kirapim planti Witnes long i go autim tok long hap i no gat man bilong autim tok bilong Kingdom long en.
5. (a) Olsem wanem tok bilong Jehova i wok strong long Filipai? (b) Olsem wanem planti Witnes long nau i kain olsem Lidia?
5 Tok bilong Jehova i wok strong long ol manmeri long Masedonia. (16:11-15) Long taun Filipai planti manmeri bilong kantri Rom ol i stap; i no gat planti Juda na i no gat wanpela haus lotu bilong ol Juda long dispela taun. Olsem na ol brata i go long wanpela “ples bilong mekim prea” i stap klostu long wanpela wara ausait long taun. Long dispela ples ol i bungim wanpela meri bilong taun Taiataira, nem bilong em Lidia, ating em i save bihainim lotu bilong ol Juda. Taun Taiataira i stap long Esia Maina na ol man bilong dispela taun i gat wok bisnis long penim laplap. Lidia i save wok bisnis long retpela pen bilong penim laplap o em i wok bisnis long retpela laplap na klos. Em wantaim ol wanhaus bilong em i kisim baptais na bihain em i singautim ol brata i go i stap long haus bilong em. Em i laik tru bai ol i stap long haus bilong em, olsem na Luk i tok: “Em i strong tumas long mipela, na mipela i bihainim tok bilong em.” Yumi save pilim tru gutpela pasin bilong ol sista long nau em ol i mekim wankain pasin.
Wanpela Woda i Bilip
6. Olsem wanem sampela wok bilong ol spirit nogut i mekim na Pol tupela Sailas i go kalabus long Filipai?
6 Ating Satan i belhat long ol gutpela wok bilong spirit i kamap long taun Filipai, olsem na long wok bilong ol spirit nogut Pol tupela Sailas i go kalabus. (16:16-24) Inap planti de wanpela yangpela meri i bihainim tupela. Dispela meri “i gat wanpela spirit i stap long en, . . . i save tokaut long ol samting bai i kamap bihain.” (Long tok Grik, dispela tok i olsem “wanpela spirit bilong snek moran [pyʹthon].”) Ating dispela spirit nogut i laik giamanim ol man na bai ol i ting em i wanpela god giaman ol i save kolim Paition Apolo, ol i bilip olsem em i bin kilim i dai wanpela snek moran. Ol bosman bilong dispela meri i save kisim bikpela mani long wok dispela meri i save mekim long tokaut long ol samting bai i kamap bihain. Ating em i save tokim ol fama long gutpela taim bilong planim kaikai, o em i save tokim ol yangpela meri long gutpela taim bilong ol i ken marit, o em i save tokim ol man bilong painim gol long ples bilong painim! Em i wok long bihainim ol brata na em i singaut olsem: “Ol dispela man ol i wokman bilong God Antap Tru. Ol i save tokim yupela long rot bilong God i kisim bek yupela.” Ating dispela spirit nogut i kirapim meri long mekim tok olsem bambai ol man i ting olsem God i as bilong ol tok dispela meri i mekim long samting bai i kamap bihain. Tasol i no stret ol spirit nogut i autim kain tok olsem long Jehova na long rot bilong em long kisim bek ol man. Bihain Pol i les tru long harim dispela singaut, na long nem bilong Jisas em i rausim dispela spirit nogut long dispela meri. Ol bosman i lukim olsem nau ol i no inap kisim mani moa long rot bilong dispela meri na ol i holimpas Pol tupela Sailas na pulim tupela i go long ples bung, na ol man i paitim tupela long kanda. (2 Korin 11:25) Bihain ol i putim tupela long kalabus na pasim strong lek bilong tupela long plang. Dispela samting inap givim bikpela pen long lek bilong man.
7. Pol tupela Sailas i stap kalabus long Filipai na long dispela rot husat ol i kisim blesing? Olsem wanem ol i kisim blesing?
7 Tupela i kalabus na long dispela rot, woda i bosim haus kalabus wantaim lain bilong em ol i kisim blesing. (16:25-40) Long biknait Pol tupela Sailas i wok long beten na ol i mekim singsing bilong litimapim nem bilong God; tupela i bilip tru olsem God i stap wantaim tupela. (Buk Song 42:8) Wantu bikpela guria i kamap na i sakim haus kalabus. Olgeta dua bilong haus kalabus i op, na ol sen bilong olgeta kalabus i lus. Woda i ting olgeta kalabus i ranawe pinis na em i pret, nogut ol bos bilong em i kilim em i dai. Olsem na em i laik kilim i dai skin bilong em yet, tasol Pol i singaut strong na i tok: “Yu no ken bagarapim yu yet. Mipela olgeta i stap.” Woda i bringim Pol tupela Sailas i go ausait na em i askim tupela: ‘Mi mas mekim wanem na bai God i kisim bek mi?’ Tupela i tok olsem: “Yu mas bilip long Bikpela Jisas.” Woda i harim tok bilong Jehova na kwiktaim “em wantaim olgeta lain bilong en i kisim baptais.” Bikpela amamas tru i kamap!
8. Ol jas long Filipai i mekim wanem? Sapos ol i tokaut long ai bilong ol man olsem ol i bin popaia, ating dispela inap helpim husat?
8 Long moningtaim ol jas i salim tok long woda na tokim em long lusim Pol tupela Sailas i go. Tasol Pol i tok: ‘Mitupela i man bilong kantri Rom na ol dispela jas i bin tokim ol man long paitim mipela na putim mipela long kalabus na ol i no bin painimaut pastaim olsem mitupela i bin mekim wanpela rong, o nogat. Orait, nau ol yet i ken i kam na bringim mipela i go ausait.’ Sapos ol jas i mekim olsem bai i olsem ol i tokaut long ai bilong ol man olsem ol i bin popaia, na ating dispela samting bai mekim na ol i no ken kirap kwik long paitim ol narapela Kristen o putim ol long kalabus. Ol jas i no inap rausim tupela long taun, long wanem tupela i man bilong kantri Rom, olsem na ol i tok sori long tupela na askim tupela long lusim dispela taun na i go. Tasol tupela i go lukim ol brata pastaim na givim sampela tok long ol bilong strongim bel bilong ol, na bihain tupela i lusim taun na i go. Long nau tu Lain Bilong Bosim Ol Witnes na ol wasman bilong raun, ol i save tingim tru ol brata long olgeta hap na dispela i kirapim ol long i go lukim ol na strongim ol.
Tok Bilong Jehova i Wok Strong long Tesalonaika na Beria
9. Pol i mekim wanem, olsem ol Witnes long nau tu, na em i “autim as bilong tok bilong God” long ol man bambai ol i ken save, Man bilong kisim bek ol i mas karim pen na i dai na kirap bek?
9 Nau Pol tupela Sailas i go autim tok long Tesalonaika, na tok bilong God i wok strong long ol manmeri long dispela taun. Tesalonaika em i nambawan biktaun bilong provins Masedonia na planti sip i kam sua long en. (17:1-9) Pol i toktok wantaim ol Juda long dispela taun na em i “autim as bilong tok bilong God” long ol bambai ol i ken save Man bilong kisim bek ol i mas karim pen na i dai na kirap bek. (Bilong mekim olsem, Pol i bin kamapim sampela tok profet na skelim wantaim ol samting i kamap na i truim dispela tok. Ol Witnes Bilong Jehova i save mekim olsem long nau.) Olsem na sampela Juda, na planti man bilong ol narapela lain em ol i bihainim lotu bilong ol Juda, na sampela man moa, ol i bilip. Ol Juda i bel nogut long dispela samting na ol i bungim planti manmeri na ol i wok long painim Pol tupela Sailas. Tasol ol i no lukim tupela, olsem na ol i pulim Jeson wantaim ol narapela Kristen i go long ol hetman bilong dispela taun, na ol i sutim tok giaman long ol na i tok, ol i kirapim ol man long sakim lo bilong gavman. Long nau tu sampela man i save sutim kain tok giaman olsem long lain bilong Jehova. Tasol ol dispela brata long bipo i “baim kot” na ol hetman i lusim ol i go.
10. Olsem wanem ol Juda long Beria i bin ‘skelim gut’ ol tok bilong Buk bilong God?
10 Bihain Pol tupela Sailas i go long taun Beria. (17:10-15) Long Beria ol Juda i ‘skelim gut’ ol tok i stap long Buk bilong God, olsem ol Witnes Bilong Jehova i kirapim ol man long mekim long nau. Ol Beria i no gat tupela tingting long tok bilong Pol, tasol ol i laik save tru, Jisas em i dispela Man bilong kisim bek ol o nogat. Orait, wanem samting i bin kamap? Planti Juda na sampela Grik long Beria ol i bilip. Tasol bihain sampela Juda bilong Tesalonaika i kam kirapim bel bilong planti manmeri long Beria na paulim tingting bilong ol, olsem na ol brata i bringim Pol i go daun long nambis, na ating sampela wanwok bilong em i kalap long wanpela sip na i go long taun Pairias (nau ol i kolim Piraiévs) i stap long nambis klostu long biktaun Atens.
Tok Bilong Jehova i Wok Strong long Atens
11. (a) Olsem wanem Pol i bin autim strong tok long Atens na em i no pret? Tasol husat ol i bin tok pait wantaim em? (b) Sampela i tok, Pol i “toktok nabaut” na i olsem ol i laik tok wanem?
11 Pol i autim strong tok long Atens na em i no pret. (17:16-21) Em i tokim ol manmeri long Jisas na long pasin bilong kirap bek long matmat, na dispela i kirapim ol saveman long tok pait wantaim em. Sampela saveman ol i bilong lain Epikurian, em ol i strong long kirapim ol man long kisim ol amamas bilong skin. Na sampela saveman ol i bilong lain Stoik, em ol i strong long kirapim ol man long daunim ol laik bilong skin. Sampela i tok: “Dispela man bilong toktok nabaut em i laik tok wanem?” (Long tok Grik, “toktok nabaut” i makim olsem wanpela pisin i kisim nabaut kaikai.) Taim ol i tok olsem, ol i laik tok Pol i bin kisim nabaut ol liklik hap save na nau em i laik givim long ol man, tasol em i sot long gutpela save na tingting. Na sampela i tok: “Ating em i autim tok bilong ol god bilong narapela ples.” Dispela kain tok em nogut; em inap bagarapim Pol, long wanem ol i bin sutim kain tok olsem long Sokratis na long dispela as ol man i bin kilim Sokratis i dai. I no longtaim na ol i kisim Pol i go long maunten Areopagus, em nambawan bikpela kaunsil i save bung long dispela ples klostu long bikpela maunten Akropolis.
12. (a) Taim Pol i mekim bikpela tok bilong em long maunten Areopagus, em i bihainim wanem ol gutpela pasin bilong mekim tok long ol man? (b) Pol i kamapim wanem ol tok long God? Na dispela i kirapim ol man long mekim wanem?
12 Bikpela tok Pol i mekim long maunten Areopagus i makim gutpela pasin bilong mekim tok long ol man olsem ol Witnes Bilong Jehova i save lainim ol man long mekim long Skul Bilong Wok Autim Tok—bilong kirapim tok, Pol i mekim ol gutpela tok bilong kirapim tingting bilong ol man, na em i skruim gut narapela hap tok i go long narapela hap tok, na em i kamapim gut as bilong tok bambai ol man i ken bilipim. (17:22-34) Pol i tok, ol Atens i strong moa long mekim olgeta kain pasin bilong lotu, winim ol narapela man. Em i lukim ol i gat wanpela alta tu bilong “wanpela god [ol] i no save long en.” Ating ol i pret, nogut ol i abrusim wanpela god! Pol i autim tok long ol long God i bin wokim olgeta samting, na Pol i tok, “long wanpela tumbuna tasol [God] i bin mekim olgeta lain manmeri i kamap,” na “em yet i bin makim taim bilong ol i ken i stap, na em i bin putim mak bilong graun bilong ol”—olsem em i bin makim taim bilong rausim ol Kenan long graun bilong ol. (Stat 15:13-21; Daniel 2:21; 7:12) Pol i tok, yumi inap wok long painim dispela God, long wanem, “yumi tu i stap pikinini bilong em.” Pol i mekim dispela tok bilong makim olsem God Jehova i bin wokim ol man, na Pol i laik kamapim sampela tok bilong ol saveman bilong ol Grik yet, em Aratus na Kleantes. Man bilong wokim olgeta samting em i gutpela olgeta, olsem na yumi ol pikinini bilong em yumi no ken ting em i olsem wanpela god ol man bilong sin i wokim long han na tingting bilong ol yet. Nogat. Bipo ol man i no gat save na ol i bin wokim ol dispela samting, na God i no bin toktok planti long dispela, tasol nau em i tokim olgeta man long olgeta ples ol i mas tanim bel, long wanem em i makim pinis de bilong skelim ol manmeri long kot long han bilong dispela Jas em i bin makim. Pol i “autim gutnius bilong Jisas,” olsem na ol man i harim dispela tok bilong em ol i save em i laik tok olsem Krais Jisas em i dispela Jas. (Aposel 17:18; Jon 5:22, 30) Ol Epikurian i harim dispela tok long tanim bel na ol i no amamas; na ol saveman bilong ol Grik ol inap bilip olsem ol man i gat tewel, tasol ol i no laik bilipim tok long man i dai na kirap bek. Sampela i mekim pasin olsem planti man long nau i save mekim—ol i no laik harim dispela tok bilong “gutnius” na ol i tok, ‘Mipela ken harim tok bilong yu long narapela taim.’ Tasol wanpela memba bilong dispela kaunsil, em Dionisius, na sampela moa ol i bilip.
Tok Bilong God i Wok Strong long Korin
13. Pol i mekim wanem bilong lukautim em yet long ol samting bilong skin, na bai em inap mekim wok bilong autim tok? Husat ol i save bihainim wankain pasin long nau?
13 Nau Pol i go long Korin, em nambawan biktaun bilong provins Akaia. (18:1-11) Long taun Korin em i bungim Akwila na Prisila, em tupela i bin kam long Korin long taim Sisar Klodius i bin tokim olgeta Juda i no man bilong kantri Rom ol i mas lusim biktaun Rom na i go long narapela hap. Pol i wok wantaim dispela tupela Kristen long wokim ol haus sel bambai em inap lukautim em yet long ol samting bilong skin na mekim wok bilong autim tok. (1 Korin 16:19; 2 Korin 11:9) Wok bilong katim na samapim strongpela skin meme bilong wokim ol haus sel em hatwok. Long nau tu ol Witnes Bilong Jehova i save mekim wok mani bilong lukautim ol yet long ol samting bilong skin, tasol wok bilong God em i nambawan bikpela wok bilong ol.
14. (a) Ol Juda long Korin i wok long birua long Pol, olsem na Pol i mekim wanem? (b) Olsem wanem Pol i save em i no ken lusim Korin? Tasol long wanem rot God i stiaim tingting bilong lain bilong em long nau?
14 Ol Juda long Korin i tok bilas long Pol taim em i tokim ol, Jisas em i Man God i makim bilong kisim bek ol manmeri bilong em. Olsem na Pol i mekim olsem em i rausim pipia graun i stap long klos bilong em na dispela i makim olsem em i no gat wok moa long helpim ol, na sapos ol i lus, i no asua bilong em. Na em i kirap long mekim ol bung o miting long haus bilong Titius Jastus, ating em i wanpela man bilong Rom. Planti man i bilip na kisim baptais (Krispus, bipo em i hetman bilong haus lotu bilong ol Juda, em tu i kisim baptais wantaim olgeta wanhaus bilong em). Ol Juda long Korin i birua long Pol, na ating em i tingting long lusim Korin, tasol bihain Bikpela i kamap long Pol olsem long driman na em i tokim Pol, ‘Yu no ken pret. Yu mas wok yet long autim tok, long wanem mi stap wantaim yu na i no inap wanpela man i mekim nogut long yu. Planti manmeri bilong mi i stap long dispela taun.’ Olsem na Pol i stap long Korin inap wanpela yia na 6-pela mun, na em i lainim ol man long tok bilong God. Long nau God i no save givim tok long lain bilong em long rot bilong driman, tasol ol i save beten na ol i larim spirit bilong God i stiaim tingting bilong ol na dispela i helpim ol long tingim gut ol wok ol i mas mekim long wok bilong Kingdom.
15. Taim ol i kisim Pol i go kot long namba wan gavman Galio, wanem samting i kamap?
15 Ol Juda i bringim Pol i go kot long namba wan gavman bilong provins Akaia, em Junius Galio. (18:12-17) Ol i tok Pol i brukim lo na em i lainim ol man long mekim lotu long God long narapela kain pasin. Long nau tu ol pris long kantri Grik i save sutim kain tok giaman olsem long ol Witnes Bilong Jehova. Galio i save Pol i no bin mekim wanpela pasin nogut na ol Juda i no tingting tru long helpim gavman na lo bilong Rom, olsem na em i rausim ol i go. Na taim ol i holimpas Sostenes, em nupela hetman bilong haus lotu bilong ol Juda, na ol i paitim em long ai bilong Galio, Galio i no mekim wanpela samting. Ating em i ting olsem man i bin kirapim ol narapela man long birua long Pol em i kisim pe long pasin nogut em i bin mekim.
16. Bilong wanem i stret Pol i ken katim gras bilong em bilong makim olsem em i bin mekim wanpela tok promis long God?
16 Bihain Pol i go long taun Senkria long hap bilong solwara Ajian na em i kalap long wanpela sip na i go long Efesus, em wanpela biktaun long Esia Maina. (18:18-22) Taim em i no kalap yet long sip, “em i katim gras bilong en, long wanem, em i bin mekim wanpela promis long God.” Baibel i no tok Pol i bin mekim dispela tok promis paslain o bihain long taim em i kamap wanpela disaipel bilong Jisas, na Baibel i no tok em i katim gras bilong makim olsem taim bilong inapim dispela promis i kirap o i pinis. Tru ol Kristen i no aninit long Lo bilong Moses, tasol God yet i bin givim dispela Lo long ol Israel na i holi, na i no gat rong long mekim kain tok promis olsem long God. (Rom 6:14; 7:6, 12; Galesia 5:18) Long Efesus Pol i toktok wantaim ol Juda, na em i tok promis long ol olsem sapos God i laik, orait bai em i kam bek lukim ol gen. (Bihain em i truim dispela tok promis bilong em.) Nau em i go bek long taun Antiok long Siria na namba 2 raun bilong em long mekim wok misineri i pinis.
Tok Bilong Jehova i Wok Strong long Efesus
17. Apolos na sampela moa ol i sot long wanem save long baptais na ol disaipel i mas skulim ol long dispela?
17 I no longtaim na Pol i kirap mekim namba 3 raun bilong em long mekim wok misineri (yia 52-56 samting). (18:23–19:7) Tasol wanpela man, nem bilong em Apolos, em i kam long Efesus na em i skulim ol manmeri long Jisas, tasol em i save long baptais bilong Jon tasol, em baptais bilong makim olsem man i hevi long rong em i bin mekim long kontrak bilong Lo na em i tanim bel. Prisila tupela Akwila i “tokim em long Rot bilong God, bai em i ken klia gut long en,” na ating ol i tokim em, sapos man i laik kisim baptais wankain olsem Jisas, em i mas baptais long wara na spirit holi i mas kam daun long em. Long de Pentikos long yia 33, spirit holi i bin kam daun long ol disaipel na i olsem ol i baptais long spirit holi, olsem na bihain long dispela taim, ol man i bin kisim baptais bilong Jon na ol i laik kamap disaipel bilong Jisas, ol i mas baptais gen—ol i mas kisim baptais long nem bilong Jisas. (Matyu 3:11, 16; Aposel 2:38) Bihain Pol i kam long Efesus na inap olsem 12-pela man bilong lain Juda, em ol i bin kisim baptais bilong Jon, “ol i kisim baptais long nem bilong Bikpela Jisas.” Long dispela wanpela taim tasol Baibel i stori long sampela man i baptais gen. Taim Pol i putim han antap long ol, ol i kisim spirit holi na ol inap mekim tupela samting i makim olsem God i orait long ol—ol inap mekim tok long ol kain kain tok ples, na ol i autim tok olsem profet.
18. Taim Pol i stap long Efesus, em i autim tok we? Na wanem samting i bin kamap?
18 Pol i mekim bikpela wok long Efesus, em wanpela biktaun i gat inap olsem 300,000 manmeri i stap long en. (19:8-10) Ol man i save makim 7-pela samting bilong dispela taim bipo i olsem bikpela samting na ol manmeri i save kirap nogut long en, na bikpela haus lotu bilong god meri Artemis i stap long Efesus em wanpela bilong ol dispela 7-pela samting. Na i gat wanpela bikpela ples kibung long dispela taun em inap long 25,000 manmeri i ken pulap long en. Long haus lotu bilong ol Juda, Pol i tokaut strong long gutnius na “kirapim tingting” bilong ol man. Tasol taim sampela i kirap na tok nogut long Rot bilong Bikpela, olsem ol pasin man i bilip long Krais i save bihainim, nau Pol i no i go moa long haus lotu bilong ol Juda. Long olgeta de em i save autim tok insait long haus skul bilong Tiranus. Em i mekim olsem i go inap tupela yia. Long dispela rot ol manmeri long olgeta hap bilong provins Esia ol i harim “tok bilong Bikpela.”
19. Wanem samting i bin kamap long Efesus na ‘tok bilong Jehova i wok strong’ long ol manmeri bilong dispela taun?
19 God i amamas long ol wok Pol i mekim na em i givim strong long Pol bilong oraitim sik na rausim ol spirit nogut. (19:11-20) Tasol taim 7-pela pikinini man bilong hetpris Skeva i laik rausim spirit nogut long wanpela man long nem bilong Jisas, ol i no inap mekim, long wanem ol i no lain bilong God na Krais. Na dispela man i gat spirit nogut em i bagarapim skin bilong ol nogut tru! Bikpela pret i kamap long ol man, na ol i “litimapim nem bilong Bikpela Jisas.” Sampela man bipo ol i bin wokim posin na marila samting, ol i bilip na ol i lusim ol dispela pasin, na long ai bilong ol man ol i kukim ol buk bilong ol i stori long dispela. Olsem na Luk i tok: “Long dispela pasin tok bilong Bikpela i wok strong long ol manmeri, na i kamap strong long laip bilong ol.” Long nau tu ol wokboi bilong God i save helpim ol man long lusim ol wok marila na posin na ol narapela wok bilong ol spirit nogut.—Lo 18:10-12.
Pasin Birua Ol i Mekim long Ol Kristen i Lus Nating
20. Ol man bilong wokim samting long silva, em ol i stap long Efesus, bilong wanem ol i kirapim ol man long bung bung na bikmaus nabaut? Dispela samting i pinis olsem wanem?
20 Planti taim bikpela lain i save bung na birua long ol Witnes Bilong Jehova, na wankain samting i bin painim ol Kristen long Efesus long bipo. (19:21-41) Lain bilipman i go bikpela, olsem na wok bisnis bilong Demitrius na ol narapela man bilong wokim samting long silva i laik bagarap, long wanem, nau wan wan man tasol i baim ol liklik piksa bilong haus lotu bilong god meri Artemis ol i save wokim. Dispela god meri i gat planti susu na ol i tok em i god meri bilong helpim ol manmeri long kamapim pikinini. Demitrius i bungim planti man na dispela bikpela lain i holim tupela poroman bilong Pol, em Gaius na Aristarkus, na pulim tupela i go insait long ples kibung. Pol yet i laik go insait, tasol ol brata i pasim em. Na sampela gavman bilong Esia ol i pren bilong Pol, ol tu i tok strong long em i no ken i go insait. Inap tupela aua samting dispela bikpela lain i wok long bikmaus na singaut strong olsem: “Artemis bilong yumi Efesus em i nambawan tru.” Bihain kuskus bilong taun Efesus (em hetman bilong kaunsil bilong taun) em i sarapim ol manmeri na em i tok, ol dispela man bilong wokim ol piksa samting long silva ol i mas i go long namba wan gavman na em i ken harim kot na stretim tok, o ol i ken stretim long kibung “long taim bilong kibung stret.” Sapos nogat, bai ol ofisa bilong gavman bilong Rom inap kotim ol na tok ol i laik kirapim bikpela trabel, long wanem i no gat as tru na ol i kam bung na bikmaus nabaut. Em i tok pinis na em i salim ol i go.
21. Olsem wanem God i bin blesim wok bilong Pol? Olsem wanem God i blesim wok bilong ol Witnes Bilong Jehova long nau?
21 God i helpim Pol long karim ol dispela hevi na sanap strong, na God i blesim ol wok Pol i mekim bilong helpim ol man long sakim lotu giaman na bihainim tok i tru. (Lukim tu Jeremaia 1:9, 10.) Yumi save tenkyu long Papa bilong yumi long heven, long wanem, em i save blesim wok bilong yumi tu! Olsem na long nau tu, wankain olsem long taim bilong ol Kristen bilong pastaim, ‘tok bilong Jehova i kamap strong na i wok strong long ol manmeri.’
Bai Yu Bekim Wanem Tok?
◻ Pol i makim wanem gutpela pasin long larim spirit holi i stiaim em?
◻ Pol i bihainim wanem pasin bilong “autim as bilong tok bilong God” long ol man na lain bilong Jehova long nau i bihainim wankain pasin?
◻ Long nau sampela man i mekim wanem taim ol Witnes Bilong Jehova i autim tok long ol, olsem sampela man i bin mekim taim Pol i autim tok long ol long maunten Areopagus?
◻ Pol i mekim wanem bilong lukautim em yet long ol samting bilong skin, na bai em inap mekim wok bilong autim tok? Husat ol i mekim wankain pasin long nau?
◻ Olsem wanem God i blesim wok bilong ol Witnes Bilong Jehova long nau wankain olsem em i bin mekim long wok bilong Pol?
[Ol Piksa long pes 14, 15]
Tok bilong Jehova i wok strong long
1. Filipai
2. na 3. Atens
4. na 6. Efesus
5. Rom
[Kredit Lain]
Photo No. 4: Manley Studios