Dispela Samting Yumi Bilip na Wetim Bai Kamap Tru

 1. Wai na yumi ken tok olsem Abraham i save tru olsem samting em i bilip na wetim bai kamap tru?

JEHOVA i promisim pren bilong em Abraham olsem olgeta lain bilong graun bai kisim blesing long rot bilong pikinini bilong em. (Stt. 15:5; 22:18) Abraham i gat strongpela bilip long God, olsem na em i save tru olsem tok promis bilong God bai kamap tru. Maski i olsem, taim Abraham i gat 100 krismas na meri bilong em i gat 90 krismas, dispela tupela marit i no kisim yet wanpela pikinini man. (Stt. 21:​1-7) Tasol Baibel i tok: “Abraham i wet na bilip olsem em bai kamap papa bilong planti lain manmeri. . . . Em i bilip long dispela tok.” (Rom 4:18) Yumi save olsem samting Abraham i bilip na wetim i bin kamap tru. Em i kamap papa bilong pikinini man em i bin wetim inap longpela taim, em Aisak. Wai na Abraham i gat strongpela bilip?

 2. Wai na Abraham i save tru olsem tok promis bilong Jehova bai kamap tru?

² Abraham i pas gut wantaim Jehova, olsem na em i “bilip tru olsem samting God i bin promis long mekim” bai kamap tru. (Rom 4:21) Jehova i orait long Abraham na em i kolim em olsem stretpela man bikos long bilip bilong em. (Jems 2:23) Olsem Rom 4:18 i kamapim, Abraham i bilip na dispela i helpim em long wetim ol samting God i tok promis long mekim long em. Nau yumi ken skelim tok aposel Pol i mekim long pasin bilong bilip na wet olsem Rom sapta 5 i stori long en.

 3. Pol i tok wanem long pasin bilong bilip na wet?

³ Pol i stori long risen na yumi ken save tru olsem “dispela samting yumi bilip na wetim i no inap mekim yumi bel hevi.” (Rom 5:5) Na tu, em i helpim yumi long kliagut long hau yumi ol Kristen i ken strongim pasin bilong yumi long bilip na wet. Taim yumi skelim Rom 5:​1-5, tingim olsem wanem pasin bilong yu long bilip na wet long ol gutpela samting bai kamap bihain i bin kamap strong moa insait long sampela haptaim nau. Yumi bai stori tu long hau yu ken mekim dispela pasin bilong bilip na wet i kamap strong moa yet winim long nau. Pastaim yumi bai stori long tok Pol i mekim long dispela samting yumi bilip na wetim we i nambawan tru na i no inap mekim yumi bel hevi.

 4. Tok i stap long Rom 5:​1, 2 i stori long wanem samting?

⁴ Ritim Rom 5:​1, 2. Pol i raitim ol dispela tok i go long ol Kristen long kongrigesen long Rom. Ol brata na sista long Rom i kisim save long Jehova na Jisas, na ol i bilip na kamap ol Kristen. Ol i “bilip na God i kolim [ol] stretpela manmeri,” na em i makim ol long holi spirit. Yes, dispela samting ol i bilip na wetim em i gutpela samting tru ol bai kisim.

 5. Ol Kristen God i bin makim i bilip na wet long wanem samting?

⁵ Bihain Pol i raitim pas i go long ol Kristen God i bin makim em ol i stap long Efesus na em i tokim ol long samting ol i bilip na wetim. Dispela samting ol i bilip na wetim em gutpela samting God i “promis long givim long lain holi.” (Efe. 1:18) Na tu, Pol i tokim ol Kristen God i bin makim em ol i stap long Kolosi long ples we ol bai kisim dispela samting ol i bilip na wetim. Em i tokim ol: “Em samting God i makim bilong yupela long heven, na yupela i bilip na wet long en.” (Kol. 1:​4, 5) So ol Kristen God i bin makim, ol i bilip na wet long kirap bek na kisim laip oltaim long heven we ol bai mekim wok king wantaim Krais.—1 Tes. 4:​13-17; Rev. 20:6.

 6. Wanpela brata em God i bin makim em long holi spirit i tok wanem long samting em i bilip na wet long en?

⁶ Ol Kristen God i bin makim i laikim tru dispela samting ol i bilip na wet long en. Wanpela bilong ol em Brata Frederick Franz, em i tok: “Mipela i save olsem bai mipela i kisim tru dispela samting mipela i wetim. Mipela i save God bai truim tok promis bilong em na mekim gut tru long mipela olgeta wan wan bilong lain 144,000 winim tru samting mipela ting bai em i mekim.” Brata Franz i stap gut long mekim wok bilong God inap planti yia, na long 1991 em i tok olsem: “Mipela i tingting strong yet olsem samting mipela i wetim em i gutpela samting tru. . . . Maski mipela i wet longtaim, dispela i helpim mipela long laikim tru dispela samting mipela i wetim. Dispela samting mipela i wetim em i dia tumas, maski mipela i mas wet longpela taim tru long kisim. Mi laikim tru dispela samting mipela i bilip na wet long en winim long pastaim.”

7-8. Planti Kristen i bilip na wet long wanem samting? (Rom 8:​20, 21)

⁷ Planti manmeri i lotuim Jehova long nau, ol tu i bilip na wetim gutpela samting. Ol i bilip na wetim samting em Abraham tu i bin bilip na wetim, em long stap laip oltaim long graun aninit long wok bos bilong Kingdom Bilong God. (Hib. 11:​8-10, 13) Pol i tok dispela samting ol i bilip na wetim em samting i nambawan tru. (Ritim Rom 8:​20, 21.) Long fes taim yu kisim save long tok promis Baibel i mekim long ol samting bai kamap bihain, yu bin amamas tru long wanem samting? Yu bin amamas tru long save olsem bihain yu bai kamap gutpela olgeta na yu bai no gat sin moa? O yu bin amamas long save olsem ol famili na ol pren bilong yu i dai pinis, ol bai stap laip gen long Paradais long graun? Ol dispela samting yu lainim i strongim yu long “bilip na wet” long dispela gutaim bai kamap bihain.

⁸ Maski yumi wet long kisim laip oltaim long heven o long graun, dispela samting yumi bilip na wetim em i nambawan tru na dispela i mekim yumi amamas. Na yumi inap strongim pasin bilong yumi long bilip na wet. Pol i mekim sampela tok moa bilong stori long hau yumi ken mekim olsem. Yumi ken skelim tok em i mekim long pasin bilong bilip na wet. Ol tok bilong em bai helpim yumi long save tru olsem samting yumi bilip na wet long en bai kamap tru.

9-10. Olsem eksampel bilong Pol i soim, wanem samting bai painim olgeta Kristen? (Rom 5:3) (Lukim tu ol piksa.)

⁹ Ritim Rom 5:3. Pol i tok taim yumi karim pen na hevi, dispela inap strongim pasin bilong yumi long bilip na wet. Ating yumi kirap nogut long dispela tok, a? Tasol yumi save olsem olgeta disaipel bilong Krais bai karim pen na hevi. Tingim eksampel bilong Pol. Em i tokim ol Kristen long Tesalonaika olsem: “Taim mipela i bin stap wantaim yupela, mipela i bin tokim yupela olsem yumi bai karim pen na hevi. Na dispela samting i kamap.” (1 Tes. 3:4) Na em i tokim ol Kristen long Korin olsem: “Ol brata, mipela i laik bai yupela i save long pen na hevi i bin painim mipela. . . . Mipela i ting laip bilong mipela bai lus.”—2 Kor. 1:8; 11:​23-27.

¹⁰ Ol Kristen long nau tu i mas redi long karim olgeta kain hevi. (2 Tim. 3:12) Olsem wanem long yu? Taim yu bilip long Jisas na kamap disaipel bilong em, yu bin karim sampela hevi? Ating ol pren na ol wanblut bilong yu i tok bilas long yu. Na ating ol i mekim nogut long yu. Olsem wanem? Yu tingting strong long mekim onest pasin long olgeta samting yu mekim long ples wok na dispela i mekim na ol wanwok i birua long yu? (Hib. 13:18) O gavman i birua long yu bikos yu autim bilip bilong yu long ol narapela? Maski yumi karim wanem ol hevi, Pol i tok yumi mas amamas. Bilong wanem?

11. Wai na yumi mas tingting strong long sanap strong na karim olgeta kain hevi?

¹¹ Yumi ken amamas taim yumi karim pen na hevi bikos dispela bai kamapim gutpela samting. Olsem Rom 5:3 i tok: “Pasin bilong karim pen na hevi i save kamapim pasin bilong sanap strong.” Olgeta Kristen bai karim pen na hevi, olsem na olgeta i mas kisim pasin bilong sanap strong. Yumi mas tingting strong long sanap strong na karim olgeta kain hevi i painim yumi. Long dispela rot tasol, yumi bai kisim ol samting yumi bilip na wet long en. Yumi no laik stap olsem ol man em Jisas i tingim ol taim em i stori long ol sid i pundaun long hap bilong ston. Pastaim ol i amamas long ol tok ol i harim, tasol “hevi na pasin birua i kamap” na dispela i mekim ol i pundaun. (Mat. 13:​5, 6, 20, 21) Yumi no save amamas taim i gat pasin birua na ol hevi, tasol pasin bilong yumi long sanap strong bai kamapim ol gutpela samting. Em wanem ol samting?

12. Wanem gutpela samting i kamap taim yumi sanap strong na karim ol hevi?

¹² Jems i stori long ol gutpela samting i kamap long pasin bilong sanap strong na karim hevi. Em i tok: “Yupela i mas larim pasin bilong sanap strong i inapim wok bilong en, olsem bai yupela inap stap gutpela olgeta na inap tru long olgeta samting, na yupela i no sot long wanpela samting.” (Jems 1:​2-4) Jems i tok pasin bilong sanap strong i gat wok bilong en. Em bai inapim wanem wok? Dispela pasin i ken helpim yu long strongim moa yet pasin bilong yu long i no les kwik, bilip, na trastim God. Tasol pasin bilong sanap strong i kamapim narapela gutpela samting tu.

13-14. (a) Wanem samting i kamap taim yumi sanap strong? (b) Olsem wanem dispela i strongim pasin bilong yumi long bilip na wet? (Rom 5:4)

¹³ Ritim Rom 5:4. Pol i tok pasin bilong sanap strong i save kamapim “ol pasin God i orait long en.” Taim yu sanap strong na karim hevi, Jehova bai orait long yu. Tasol dispela i no makim olsem Jehova i amamas long lukim yu karim pen na hevi, nogat. God i amamas long yu. Pasin bilong yu long sanap strong i mekim na God i orait long yu. Dispela em gutpela blesing tru yu inap kisim!—Sng. 5:12.

¹⁴ Tingim, Abraham i bin sanap strong na karim ol hevi na God i bin orait long em. Jehova i tingim em olsem pren bilong Em na em i kolim em olsem stretpela man. (Stt. 15:6; Rom 4:​13, 22) Dispela samting i ken kamap long yumi tu. I no olsem God i orait long yumi bikos yumi mekim planti wok bilong em o yumi holim ol wok i gat namba insait long oganaisesen, nogat. Em i orait long yumi bikos yumi sanap strong long taim bilong hevi na yumi stap gut yet long em. Na maski yumi gat wanem krismas, sindaun, na save, yumi olgeta i ken sanap strong. Olsem wanem? Yu wok long sanap strong na karim wanpela hevi long nau? Sapos olsem, orait yu ken kisim bel isi long save olsem God i orait long yu. Taim yumi save olsem God i orait long yumi, dispela i ken strongim tru yumi. Em i ken strongim pasin bilong yumi long bilip na wet.

15. Pol i mekim wanem tok moa, na wai na sampela inap kirap nogut long dispela tok?

¹⁵ Olsem Pol i tok, Jehova bai orait long yumi taim yumi sanap strong na karim ol hevi. Lukim tok Pol i mekim bihain, em i tok: “Ol pasin God i orait long en i save kamapim pasin bilong bilip na wet. Na dispela samting yumi bilip na wetim i no inap mekim yumi bel hevi.” (Rom 5:​4, 5) Sampela inap kirap nogut long dispela tok. Bilong wanem? Bikos long Rom 5:​2, Pol i bin tok olsem ol Kristen long Rom i gat pinis samting em ol i bilip na wet long en, ol i “bilip na wet long kisim dispela glori bilong God.” Olsem na wanpela inap mekim dispela askim, ‘Sapos ol dispela Kristen i gat pinis samting ol i bilip na wet long en, orait wai na Pol i stori gen long pasin bilong bilip na wet long ol tok em i mekim bihain?’

16. Long wanem rot wanpela inap strongim pasin bilong em long bilip na wet? (Lukim tu ol piksa.)

¹⁶ Yumi ken kliagut long tok Pol i mekim taim yumi luksave olsem yumi ken strongim pasin bilong yumi long bilip na wet. Tingim dispela: Yu inap tingim bek fes taim yu bin harim tok Baibel i mekim long ol gutpela samting yu ken bilip na wet long en? Ating long dispela taim, yu ting dispela tok promis bilong i stap laip oltaim long Paradais long graun em i wanpela driman nating. Tasol taim yu kisim save moa long Jehova na long ol tok promis bilong Baibel, nau yu save tru olsem tok promis bilong i stap oltaim long Paradais long graun em bai kamap tru.

17. Olsem wanem pasin bilong yu long bilip na wet i kamap strong moa bihain long yu dediket na baptais?

¹⁷ Bihain long yu dediket na baptais, yu wok long kisim sampela save moa na yu kamap strong long bilip, na long dispela rot pasin bilong yu long bilip na wet i kamap strong moa. (Hib. 5:13–6:1) Ating yu yet i lukim truim bilong ol tok i stap long Rom 5:​2-4. Yu bin bungim sampela hevi, tasol yu sanap strong na karim ol dispela hevi na yu luksave olsem God i orait long yu. Yu save olsem God i amamas long yu, na dispela i helpim yu long save tru olsem yu bai kisim ol samting Em i tok promis long en. Pasin bilong yu long bilip na wet i kamap strong moa winim long pastaim. Yu bilip tru olsem dispela samting yu wetim, em bai kamap tru. Na dispela i mekim sampela samting long yu, em i stiaim ol samting yu mekim long laip bilong yu na pasin yu mekim long famili bilong yu, hau yu mekim ol disisen, na hau yu yusim taim bilong yu.

18. Jehova i tok promis long mekim wanem?

¹⁸ Aposel Pol i tok gutpela samting bai kamap taim God i orait long yu, na dispela em i wanpela bikpela tok. Pol i strongim yu olsem samting yu bilip na wet long en, em bai kamap tru. Wai na yu ken bilip tru long dispela? Pol i tokim ol Kristen long tok promis bilong God olsem: “Dispela samting yumi bilip na wetim i no inap mekim yumi bel hevi; long wanem, God i bin givim yumi holi spirit, olsem na pasin laikim bilong God i pulap long bel bilong yumi.” (Rom 5:5) Yes, i gat gutpela risen long yu ken save tru olsem dispela samting yu bilip na wetim, em bai kamap tru.

19. Yu ken bilip tru long wanem samting?

¹⁹ Tingim tingim long bel tok promis Jehova i mekim long Abraham na olsem wanem God i orait long em na tingim em olsem pren bilong Em. Dispela samting Abraham i bilip na wetim i bin kamap tru. Baibel i tok: “Abraham i wet na i no les kwik, na bihain em i kisim samting God i bin promis long givim em.” (Hib. 6:15; 11:​9, 18; Rom 4:​20-22) Tru tumas, Abraham i no bin bel hevi. Olsem tasol, yu ken bilip tru olsem taim yu holimpas pasin bilong yu long stap gut long God, yu bai kisim ol samting yu bilip na wetim. Dispela samting yu bilip na wetim bai kamap tru, na em bai mekim yu amamas tru! (Rom 12:12) Pol i tok: “God em i as bilong ol gutpela samting yumi bilip na wetim, na em i ken mekim amamas na bel isi i pulap long yupela, long wanem, yupela i bilip long em. Na long strong bilong holi spirit pasin bilong bilip na wetim gutpela samting i ken pulap tru long yupela.”—Rom 15:13.