Tupela Bikpela Pasin Bilong Sori i Winim Olgeta Narapela Pasin Bilong Sori
“God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i . . . kisim laip i stap gut oltaim oltaim.”—JON 3:16.
1. Wanem insait bilong dispela tok olsem “God em i as bilong pasin bilong laikim tru ol manmeri”?
APOSEL Jon i tok: “God i save laikim yumi tru.” Na em i tok: “God em i as bilong pasin bilong laikim tru ol manmeri.” (1 Jon 4:8, 16) Tru tumas, Jehova em i as bilong pasin bilong sori. Dispela pasin em i pasin tru bilong Jehova. Em i gat bikpela save na bikpela strong na em i save mekim stretpela pasin, tasol em i save mekim pasin sori moa yet. Gutpela sapos yu askim skin bilong yu yet olsem: ‘Mi save bilong wanem dispela tok i stret? Sapos wanpela man i givim askim long mi long dispela tok i tru, mi inap bekim gut tok? Mi inap kolim sampela samting i kamapim long ples klia olsem God i laikim tru yumi? Dispela pasin bilong God i mas mekim wanem long mi na long ol samting mi mekim?’
2. I gat wanem samting yumi inap lukim na dispela i kamapim long ples klia olsem God i laikim tru yumi?
2 God i laikim tru ol manmeri em i bin wokim ol na putim ol i stap hia long graun! Em i wokim ol i gat ai na ol inap lukluk; em i wokim skin bilong ol i gat strongpela bun na masol; em i wokim han bilong ol inap holim samting na kisim save long en. I gat planti samting i save kirapim yumi long mekim tok wankain olsem man bilong raitim sam, em i tok: “Yu bin wokim olgeta hap bodi bilong mi. . . . Olgeta samting yu wokim i . . . nambawan tru.” Tingim tu ol bikpela maunten God i bin wokim hia long graun, na klinpela wara, na ol planti planti plaua, na gutpela kala i save kamap long skai taim san i go daun. “Bikpela, yu bin wokim planti samting. Yu gat bikpela save na yu wokim olgeta dispela samting. Graun i pulap tru long olgeta samting yu bin wokim.”—Sam 139:13, 14; 104:24.
3, 4. Long hap bilong Baibel ol i raitim long tok Hibru pastaim , ol i kolim Olpela Testamen, i gat wanem ol stori i kamapim sampela gutpela pasin sori God i bin mekim?
3 Sori bilong God i no pinis taim namba wan man na meri i bikhet long Em. Nogat. Em i wok yet long helpim ol man. Olsem: Em i larim namba wan man na meri i kamapim ol pikinini, na bai ‘pikinini’ em i bin tok promis long em, em inap helpim ol. (Jenesis 3:15) Bihain em i tokim Noa long redim wanpela bot bambai ol man na ol animal long graun i no ken bagarap. (Jenesis 6:13-21) Na em i laikim tru Ebraham na mekim bikpela pasin sori long em, na Ebraham i kamap pren bilong Jehova. (Jenesis 18:19; Aisaia 41:8) Em i helpim lain bilong Ebraham na ol i lusim wok kalabus long Isip. Dispela tu i kamapim long ples klia sori bilong God, olsem Diuteronomi 7:8 (NW ) i tok: “Jehova i . . . laikim tumas yupela . . . olsem na long strong bilong em Jehova i helpim yupela long lusim haus kalabus.”
4 Ol Isrel i no pilim gutpela pasin bilong Jehova na planti taim ol i bikhet long em, tasol em i no rausim ol. Nogat. Long pasin sori, em i tokim ol: “O lain bilong Isrel, yupela mas tainim bel na lusim pasin nogut bilong yupela, nogut yupela i dai.” (Esikiel 33:11, NW ) Jehova em i as bilong pasin sori na em i save marimari long ol man, tasol em i save bihainim stretpela pasin tu na em i gat gutpela save na tingting. Olsem na bihain em i no isi moa long dispela lain bilong em, em ol i bikhet long em! Em i larim ol i bikhet i go inap long ol i “no ken orait bek,” na nau em i larim ol Babilon i kisim ol i go kalabus. (2 Kronikel 36:15, 16, NW ) Tasol God i no pasim bel bilong em na inap long olgeta taim bihain em i no sori moa long o1. Nogat. Taim 70 yia i pinis, em i wokim rot bambai liklik hap lain bilong ol, ol i ken i go bek long ples bilong ol. Sam 126 i stori long tingting bilong ol dispela Isrel, em God i helpim ol na ol i go bek long ples. Gutpela sapos yu kaunim ol tok bilong dispela Sam.
Em i Redi Bilong Mekim Nambawan Bikpela Pasin Bilong Sori
5. God i salim Pikinini bilong em i kam daun long graun na bilong wanem yumi ken tok, God i mekim bikpela pasin sori tru?
5 Bihain moa, taim i kamap bilong Jehova i mekim nambawan bikpela pasin bilong sori. Em i mekim bikpela ofa tru. Bilong redi long mekim dispela, em i kisim laip bilong namba wan Pikinini bilong em long heven na em i putim long bel bilong wanpela meri singel bilong lain Juda, nem bilong em Maria. (Matyu 1:20-23; Luk 1:26-35) Jehova na Pikinini bilong em tupela i pas tru wantaim. Baibel i stori long Jisas taim em i no kam daun yet long graun na Baibel i mekim tok piksa na makim Jisas i olsem gutpela na stretpela tingting: “Long taim Bikpela i mekim ol dispela wok, mi stap wantaim em na em i makim mi olsem saveman i bosim wok. Olgeta de mi bin mekim em i amamas, long wanem, mi bin amamas tumas long lukim ol samting em i bin wokim.” (Provep 8:30, 31) Olsem na taim Jehova i salim dispela wanpela Pikinini bilong em i kam na Pikinini i lusim em na i no i stap moa wantaim em long heven, dispela i olsem Jehova i mekim bikpela ofa tru, a?
6. Olsem wanem Papa Jehova i was long Jisas taim em i kamap long graun na taim em i stap yangpela yet?
6 Yumi save, taim Pikinini bilong God i stap long bel bilong Maria, God i was gut long em. Spirit holi bilong God i karamapim Maria bambai i no gat wanpela samting inap bagarapim dispela Pikinini. Jehova yet i stretim ol samting na Josep tupela Maria i go long Betlehem bilong raitim nem bilong ol long buk bilong gavman, na taim ol i stap long Betlehem, Maria i karim Jisas, olsem Maika 5:2 i tok profet pinis. Long rot bilong wanpela ensel, God i toksave long Josep olsem King Herot i laik kilim i dai dispela pikinini, olsem na Josep wantaim meri pikinini ol i ranawe i go long Isip, na ol i stap long dispela hap inap long taim Herot i dai pinis. (Matyu 2:13-15) Oltaim God i save tingim Jisas na was long em. Taim Jisas i gat 12-pela krismas na em i givim askim long ol tisa long haus lotu na em i bekim tok long ol na ol i kirap nogut long em, long dispela taim Jehova i amamas tru long em!—Luk 2:42-47.
7. Wanem tripela tok i kamapim long ples klia olsem God i was i stap na em i save tingim ol wok Jisas i mekim?
7 Wanpela ten et yia bihain, Jehova i lukim Jisas i go long Jon bilong kisim baptais. Jehova i amamas na em i salim spirit holi long Jisas na em i tok: “Dispela em i Pikinini bilong mi. Mi laikim em tumas. Bel bilong mi em i gutpela long em.” (Matyu 3:17) Olgeta papa Kristen ol inap pilim bikpela amamas God i kisim taim em i lukim Jisas i mekim wok bilong Em na oltaim em i litimapim nem bilong Papa bilong em long heven. Wanpela taim Jisas i kisim sampela aposel i go long wanpela maunten i antap moa. Taim ol i stap long maunten, Jehova i mekim skin bilong Krais i lait na Papa Jehova i tok: “Dispela em i Pikinini bilong mi, mi laikim em tumas, na mi belgut long em. Yupela harim tok bilong em.” (Matyu 17:5) Namba tri taim ol man i harim maus bilong Jehova, em Jehova i bekim tok long beten bilong Jisas. Jisas i beten na i tok, Papa i mas mekim nem bilong em i kamap bikpela. Em i tok olsem na nau God Jehova i tok: “Mi mekim nem bilong mi i kamap bikpela pinis, na bai mi mekim gen bikpela moa.” Ating God i laik strongim Jisas na em i mekim dispela tok, long wanem sampela man i stap wantaim Jisas ol i ting wanpela ensel i mekim toktok, na sampela i ting olsem klaut i pairap.—Jon 12:28, 29.
8. Yu ting olsem wanem long sori bilong God?
8 Em nau, yumi bin stori liklik long ol samting God i mekim bilong was long Pikinini bilong em na tingim em, na yu ting olsem wanem long dispela? Dispela i kamapim long ples klia olsem God i laikim tumas dispela Pikinini bilong em, a? Sapos wanpela papa long graun i gat wanpela pikinini tasol na em i givim em bilong i dai na helpim ol narapela man, dispela papa i mekim bikpela ofa tru, a? Orait, tingim dispela samting na tingim samting i kamap bihain, em Jisas i dai olsem ofa.
Nambawan Bikpela Pasin Bilong Sori
9, 10. Wanem nambawan bikpela pasin bilong sori God i mekim bilong helpim ol man? Baibel i tok wanem long dispela?
9 Baibel i makim olsem God i gat bikpela sori long ol man. Aisaia 63:9 (NW ) i stori long ol Isrel na i tok: “Taim hevi i painim ol, em i bel hevi. Na em i salim wanpela wokman bilong em yet bilong helpim ol. Em i sori long ol na marimari long ol na em yet i baim bek ol, na em i litimapim ol na karim ol i go long olgeta taim bipo.” Taim Jisas i beten long Papa bilong em “wantaim bikpela singaut, na em i krai planti,” dispela i mekim Jehova i bel hevi moa yet. (Hibru 5:7) Jisas i beten olsem long Getsemani. Ol i holimpas em, na sutim tok giaman long em long kot, na paitim em, na wipim em, na ol i wokim hat long rop i gat nil na putim long het bilong em. Papa bilong em i laikim tumas em na em i lukim ol dispela samting i painim pikinini. Em i lukim Jisas i karim hevipela pos ol i laik nilim em long en na em i laik pundaun; na em i lukim ol i nilim Pikinini bilong em long pos na kilim em i dai. Yumi no ken lusim tingting olsem God inap pasim ol long mekim ol dispela samting na bai Pikinini bilong em i no karim bikpela pen na hevi olsem. Tasol Jehova i no mekim. God Jehova i gat tingting—em i save pilim hevi na pilim amamas—olsem na taim em i lukim dispela bikpela pen na hevi i painim Pikinini bilong em, bel bilong em i pen tru long dispela, winim olgeta taim bipo na bihain tu bel bilong em i no ken pilim bikpela pen na hevi olsem.
10 Taim yumi tingim ol dispela samting yumi stori pinis long en, nau yumi inap pilim as bilong tok Jisas i mekim long Nikodimas, em i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Aposel Jon tu i mekim wankain tok, em Jisas i laikim tumas Jon. Jon i tok: “God i gat wanpela Pikinini tasol, na em i salim dispela Pikinini i kam long graun, bai yumi kisim laip long em. Long dispela yumi save, God i marimari long yumi. . . . God i marimari long yumi na i salim Pikinini bilong en i kam long graun bilong tekewe sin bilong yumi.”—1 Jon 4:9, 10.
11. Pol i tok wanem na dispela i kamapim long ples klia nambawan bikpela pasin sori God i mekim?
11 Olsem na yumi inap pilim tok bilong aposel Pol long Rom 5:6-8. Em i stori gut long bikpela pasin sori God i bin mekim na em i tok: “Bipo yumi no gat strong yet, long dispela taim tasol Krais i bin i dai bilong kisim bek yumi man i bin givim baksait long God. Ating i no gat man i laik i dai bilong helpim stretpela man. Tasol, ating wanpela wanpela man inap long strongim bel na i dai bilong helpim wanpela gutpela man. Tasol yumi stap sinman yet na Krais i dai bilong helpim yumi. Long dispela pasin God i soim yumi, em i givim bel bilong em long yumi.” Tru tumas, taim Jehova i salim dispela wanpela Pikinini bilong em i kam long graun bilong karim pen na i dai olsem man i no gat nem, long dispela taim God Jehova i mekim nambawan bikpela pasin bilong sori, i winim olgeta narapela pasin bilong sori.
Namba Tu Bikpela Pasin Bilong Sori
12, 13. (a) Pasin sori Jisas i mekim em i narapela kain olsem wanem? (b) Pol i tok wanem na em i kamapim long ples klia bikpela pasin sori Jisas i mekim?
12 Orait, ating yu laik save i gat wanem narapela bikpela pasin bilong sori. Krais Jisas i tok: “Sapos wanpela man i lusim laip bilong em yet bilong helpim ol pren bilong em, i no gat pasin bilong laikim arapela man i winim dispela pasin.” (Jon 15:13) Tru, long bipo na long nau tu i gat sampela man ol i bin lusim laip bilong ol bilong helpim narapela man. Tasol laip bilong ol i bilong liklik taim tasol—inap sampela yia tasol—long wanem bihain i dai i mas painim ol. Tasol Krais Jisas em i gutpela man olgeta na i stret em i ken kisim laip. I dai i save painim yumi olgeta narapela manmeri, long wanem Adam i bin mekim rong, dispela kain i dai i no ken painim Jisas; na sapos Jisas i no larim man, orait i no gat wanpela man em inap tekewe laip bilong Jisas. (Jon 10:18; Hibru 7:26) Yu tingim tok em i bin mekim? Em i tok: “Ating yu no save, mi inap askim Papa bilong mi, na em i ken givim mi planti ensel moa, i winim 12-pela lain ami?”—Matyu 26:53; Jon 10:17, 18.
13 Na yumi inap pilim moa yet bikpela pasin sori Jisas i mekim sapos yumi tingim dispela samting, olsem: Taim em i no kam daun yet long graun, em i wanpela ensel long heven na em i gat biknem, na em i stap olsem poroman tru na wanwok bilong Nambawan Bikpela bilong heven na graun, em i King bilong oltaim. Taim em i kam daun long graun, em i lusim olgeta dispela samting. Em i redi long lusim olgeta samting bilong em yet bambai em inap helpim ol narapela man. Dispela sori bilong em i kirapim em long mekim ol samting olsem Pol i stori long en, em Pol i tok: “Em i no ting long holimpas dispela pasin bilong i stap wankain olsem God. Nogat. Em i lusim dispela pasin, na em i kamap man, na em i kisim pasin olsem wokboi nating. Ol man ol i lukim em i stap man tru. Na em i daunim em yet na i bihainim tok bilong God, i go inap long em i dai, yes, inap long em i dai long diwai.”—Filipai 2:6-8.
14. Olsem wanem tok bilong Aisaia i kamapim bikpela pasin sori Jisas i mekim?
14 Jisas i mekim bikpela pasin sori tru, a? Tru tumas. No gat narapela bikpela pasin sori olsem—pasin sori God Jehova i bin mekim, em tasol. Aisaia sapta 53 i tok profet long pen na hevi Krais i mas karim, em i tok: “Olgeta manmeri i lukim na nau ol i tok bilas long em, ol i givim baksait long em. Em i man bilong karim pen na em i save sik; . . . Em yet i karim ol sik bilong yumi, na em i karim pen bilong yumi. Tasol yumi ting olsem God i givim pen na hevi long em na givim baksait long em. Yumi bin brukim lo, olsem na ol i sutim em long spia; yumi bin mekim pasin kranki, olsem na ol i bagarapim em. . . . ol i bagarapim skin bilong em, na dispela samting i oraitim skin bilong yumi. . . . em i lusim laip bilong em na em i dai.”—Aisaia 53:3-5, 12, NW.
15, 16. Jisas i mekim wanem tok na yumi save, em i givim bikpela ofa tru?
15 Jisas i save, taim em i dai, dispela inap mekim bikpela wok, olsem na long Getsemani em i beten long God na em i tok: “Papa bilong mi, sapos inap, orait yu tekewe dispela kap long mi. Tasol yu no ken bihainim laik bilong mi. Nogat. Yu mas bihainim laik bilong yu tasol. (Matyu 26:39) Taim Jisas i beten na tok olsem, em i laik bai God i mekim wanem? Yu ting Jisas i no laik kamap olsem “Pikinini Sipsip Bilong God. Em i tekewe sin bilong olgeta manmeri long graun”? (Jon 1:29) Nogat tru. Long wanem oltaim Jisas i save tokim ol disaipel bilong em, em i mas karim bikpela pen na hevi na i dai. Em i tokim ol tu wanem kain i dai bai painim em. (Matyu 16:21; Jon 3:14) Olsem na taim Jisas i beten na mekim dispela tok, em i no tingting long abrusim dispela pen na i dai. Nogat. Em i tingting long narapela samting.
16 Em i tingting long tok ol bai sutim long em, em ol bai tok em i tok bilas long God. Long lo bilong ol Juda, dispela i bikpela rong tru. Tasol dispela tok ol i sutim long em i tok giaman, olsem na bilong wanem em i tingting planti long en? Long wanem sapos ol i tok em i tok bilas long God na ol i kilim em i dai, dispela bai bagarapim tru nem bilong Papa bilong em long heven. Em, Jisas i tingim dispela samting na em i beten olsem. Dispela Pikinini Bilong God i no gat rong long em, em i laikim tumas stretpela pasin na em i givim baksait tru long pasin bilong sakim lo, em i bin i kam long graun bilong litimapim nem bilong Papa bilong em, tasol nau lain bilong God yet i tok em i tok bilas long God Jehova na ol i laik kilim em i dai.—Hibru 1:9; Jon 17:4.
17. Dispela kain i dai i laik painim Jisas, bilong wanem dispela i olsem em i karim bikpela hevi tru?
17 Paslain liklik Jisas i bin tok: “Mi mas kisim wanpela baptais. Nau mi no kisim yet, na bel bilong mi em i hevi tru.” (Luk 12:50) Nau taim i kamap pinis bilong em i mas kisim dispela baptais. Olsem na taim em i beten, tuhat bilong em i kamap olsem blut na i pundaun long graun. (Luk 22:44) Bikpela traim tru. i painim Jisas, long wanem i dai bilong em inap mekim bikpela wok. Yumi no inap pilim bikpela hevi em i karim. Tasol em i save, em i mas karim dispela hevi na i stap gut long God. Sapos nogat, dispela bai daunim tru Jehova! Bai Seten i tok, ‘Em nau, mi tok stret! Mi inap pundaunim olgeta man!’ Tasol Jisas i stap gut long God i go inap long em i dai na dispela i daunim tru Seten! Long dispela rot em i kamapim long ples klia olsem Seten em i man nogut; em i man bilong giaman tru.—Provep 27:11.
18. Long dispela nait, olsem wanem Jisas i karim bikpela hevi tru?
18 God Jehova i bilip tru olsem Pikinini bilong em bai i stap gut long em, olsem na em i mekim tok profet na tok olsem. (Aisaia 53:9-12) Tasol Jisas i save em wok bilong em yet long i stap gut long God. Em inap pundaun. Em inap mekim sin. (Luk 12:50) Sapos long dispela nait em i pundaun, bai em yet na olgeta manmeri long graun i no inap kisim laip i stap oltaim. Em i karim bikpela hevi tru! Sapos Jisas i no sanap strong na em i mekim sin, i no gat wanpela ofa bilong helpim em, olsem bilong yumi ol sinman, na bai em i singaut long God i mas marimari long em. Nogat.
19. Jisas i no tingim skin bilong em yet, em i sori long ol narapela man, na long dispela rot em inap mekim wanem?
19 Tru tumas, Jisas i karim bikpela hevi tru. long Naisan 14 long yia 33 C.E., tasol em i sanap strong. Em i mekim bikpela pasin sori tru, winim olgeta narapela man. Pasin sori bilong God Jehova tasol i winim dispela. Na i dai bilong em i kamapim gutpela wok tru! Em i dai na long dispela rot em i kamap “Pikinini Sipsip Bilong God. Em i tekewe sin bilong olgeta manmeri long graun.” (Jon 1:29) Em i opim rot bambai 144,000 disaipel bilong em ol inap kamap king na pris na mekim wok king wantaim em inap 1,000 yia. (Revelesen 20:4, 6) Na tu, bikpela lain “arapela sipsip” long nau ol i kisim ol gutpela samting long ofa bilong Krais, na ol inap wet long abrusim bagarap taim olpela pasin i pinis na bai ol i stap laip. Ol i namba wan lain bilong kisim ol blesing long paradais long graun. Na long rot bilong dispela samting Jisas i bin mekim bai planti milion milion manmeri i kirap bek long matmat. Ol tu inap kisim laip i stap oltaim long paradais long graun. (Revelesen 7:9-14; Jon 10:16; 5:28, 29) Tru tumas, “i gat planti promis bilong God, na Krais i save tok ‘Yes’ long dispela olgeta promis”—ol dispela promis bai kamap tru long rot bilong Krais.—2 Korin 1:20
20. God Jehova na Krais Jisas i mekim bikpela pasin sori tru long yumi na i stret yumi mas mekim wanem?
20 God Jehova na Krais Jisas i mekim bikpela pasin sori tru bilong helpim yumi na i stret yumi mas tenkyu long tupela. Yumi mas tenkyu long tupela, tasol sapos yumi laik bai ol samting tupela i bin mekim i helpim tru yumi, orait yumi mas mekim sampela samting bilong kamapim bel bilong yumi olsem yumi pilim tru gutpela samting ol i bin mekim na yumi laik tenkyu long tupela. Narapela tok i kamap bihain bai makim gutpela rot yumi ken bihainim bilong mekim olsem.
Yu Tingim?
◻ Olgeta man inap lukim wanem samting i kamapim sori bilong God?
◻ Jehova i lukim Pikinini bilong em i karim bikpela pen na olsem wanem yumi inap save, dispela i givim hevi long bel bilong Jehova?
◻ Ating sampela man i bin lusim laip bilong ol bilong helpim narapela man, tasol olsem wanem samting Jisas i mekim i narapela kain?
◻ Jehova tupela Jisas i mekim bikpela pasin sori tru long yumi, olsem na yumi mas mekim wanem?