Sapta 26

Yumi Gat Pait Long Mekim Pasin i Stret

 1. I gat wanem tupela samting ol Kristen i mas wok long sakim?

DISPELA graun Seten i bosim em i stap yet, olsem na ol Kristen i mas wok strong bambai ol i ken klia long pasin nogut bilong en. I olsem ol Kristen i gat wanpela pait. Aposel Pol i tok: “Yupela i mas pasim olgeta klospait God i save givim long yumi, na bai yupela inap long sanap strong na sakim olgeta pasin hait bilong Seten.” (Efesas 6:11-18) Yumi gat pait long sakim Seten wantaim dispela graun, na yumi gat pait long sakim tu ol laik nogut bilong yumi yet i laik pulim yumi long mekim pasin i no stret.—Jenesis 8:21; Rom 5:12.

 2. (a) Bilong wanem sampela taim bel bilong yumi i strong long mekim pasin i no stret? (b) Bilong wanem yumi mas wok strong long daunim ol laik nogut bilong bel?

² Yumi olgeta yumi kisim sin long Adam, olsem na sampela taim bel bilong yumi i laik tru long mekim samting i no stret. Tasol sapos yumi no daunim dispela laik nogut bilong bel bai yumi no inap kisim laip i stap oltaim. Olsem na yumi gat pait; yumi mas pait long mekim pasin i stret olsem Pol i mekim. Em i tok: “Mi laik mekim gutpela pasin, tasol pasin nogut i save pasim rot bilong mi.” (Rom 7:21-23) Ating yu tu yu gat hatwok long daunim ol laik nogut bilong bel. Olsem na yu mas mekim wanem?

 3. (a) Planti manmeri i gat wanem pait i stap long skin bilong ol? (b) Maski ol i laik mekim gutpela pasin, tasol ol i mekim pasin nogut, olsem na Baibel i tok stret olsem wanem?

³ Ating yu kisim save pinis long ol tok promis bilong God long givim laip oltaim long yumi long paradais long graun. Yu bilipim ol dispela tok na yu laik kisim ol dispela gutpela samting. Olsem na yu save, sapos yu mekim wok bilong God dispela bai helpim yu inap long olgeta taim bihain. Tasol ating bel bilong yu i save laikim yet sampela samting yu save i no stret. Sampela taim ating bel bilong yu i strong long mekim pasin pamuk, o stil, o mekim narapela pasin nogut. Na sampela manmeri nau ol i lainim ol tok bilong dispela buk, tasol ating ol i save mekim sampela kain pasin nogut olsem, maski ol i save God i tambuim ol dispela pasin. Ol i laik mekim pasin i stret, tasol ol i save mekim pasin nogut. Olsem na Baibel i tok stret, em i tok: “Bel bilong man i save giaman tru, . . . na em i moa strong long mekim ol samting.”—Jeremaia 17:9, NW.

YUMI INAP WINIM DISPELA PAIT

 4. (a) Bilong winim dispela pait em samting bilong husat? (b) Yumi mas mekim wanem na bai yumi inap daunim ol laik nogut na mekim pasin i stret?

⁴ Tasol i no olsem yu no inap bosim bel na daunim ol laik nogut i save kamap long bel. Nogat. Sapos yu laik tru long mekim, yu inap lainim bel bilong yu na bai em i kirapim yu long bihainim pasin i stret. (Sam 26:1, 11) Tasol yu yet yu mas mekim ol samting bambai yu inap winim dispela pait. Olsem na yu mas wok yet long kisim save long tok bilong Baibel, em dispela save inap helpim yu long kisim laip. (Jon 17:3) Tasol sapos yu putim dispela save long het tasol, dispela i no inap helpim yu. Yu mas putim i go daun long bel bambai bel i ken pilim tru na kirapim yu long bihainim ol dispela tok.

 5. Yu mas mekim wanem na bai bel bilong yu i ken pilim tru ol lo bilong God?

⁵ Tasol yu ken mekim wanem na bel bilong yu i ken lain long pilim tru ol lo bilong God? Yu mas tingim gut ol dispela tok. Askim skin bilong yu: Sapos mi bihainim tok bilong God, dispela bai helpim mi olsem wanem? Orait, nau yu ken tingim ol manmeri ol i bin sakim ol lo bilong God. Wanpela yangpela meri olsem em i tok: “Inap 3-pela taim mi bin kisim wanpela sik nogut long pamuk. Long namba tri taim dokta i mas katim bel bilong mi na nau mi no inap karim pikinini.” Tru tumas, taim ol manmeri i sakim ol lo bilong God, bikpela hevi i save painim ol. (2 Samyuel 13:1-19) Wanpela meri i bin mekim pasin pamuk em i bel hevi na i tok: “Mi bikhet na nau mi kisim bikpela pen na hevi long dispela rong mi bin mekim.”

 6. (a) Ating man inap kisim amamas long mekim pasin nogut, tasol dispela i giamanim em olsem wanem? (b) Moses inap kisim wanem ol kain amamas long Isip?

⁶ Tasol sampela manmeri i save tok, pamuk na spak na kisim drak em i samting bilong amamas. Tasol dispela kain amamas em i bilong sotpela taim tasol. Yu no ken larim dispela kain amamas i giamanim yu na yu bihainim rot nogut na bai yu no inap amamas tru oltaim. Tingim Moses, em i go bikpela long haus bilong king bilong Isip. Em i gat ol gutpela samting bilong Isip. Tasol Baibel i tok, taim Moses i bikpela pinis em i “laik kisim hevi wantaim lain bilong God. Em i no laik bihainim pasin bilong sin na painim amamas bilong sotpela taim tasol.” (Hibru 11:24, 25) Olsem na ating ol manmeri i stap long haus bilong king bilong Isip ol i bin kisim amamas long mekim pasin pamuk na ol kain pasin nogut olsem. Orait, bilong wanem Moses i givim baksait long olgeta dispela kain amamas?

 7. Bilong wanem Moses i no laik kisim ol amamas “bilong sotpela taim” em inap kisim long haus bilong king bilong Isip?

⁷ Long wanem, Moses i bilip long God Jehova. Na em i save long wanpela samting i winim tru ol dispela kain amamas em inap kisim long haus bilong king bilong Isip na i bilong sotpela taim tasol. Baibel i tok: “Em i ting long dispela gutpela pe bambai God i givim em.” Oltaim Moses i tingim ol samting God i tok promis long en. Em i bilip long tok bilong God long kamapim nupela taim long graun. Bel bilong Moses i pilim tru bikpela pasin sori God i mekim long ol man. I no olsem Moses i harim o kaunim tasol sampela tok i stori long Jehova. Nogat. Baibel i tok: “Moses i olsem i lukim God, olsem na em i stap strong.” (Hibru 11:26, 27) Moses i bilip tru olsem Jehova em i stap na em bai truim ol tok promis bilong em.

 8. (a) Bilong sakim ol samting i laik pulim yumi long mekim pasin i no stret, yumi mas mekim wanem? (b) Gutpela sapos yumi kisim wanem tingting olsem bilong wanpela yangpela man?

⁸ Yu tu yu tingim Jehova em i stap tru na em i save laikim yu tru? Taim yu kaunim ol tok promis bilong em, yu save lukim olsem piksa long tingting bilong yu olsem yu yet yu stap long dispela gutpela ples Paradais? (Lukim pes 156 i go inap 162.) Bilong winim pait na sakim ol samting i laik pulim yumi long mekim rong, yumi mas pas gut wantaim Jehova. Na yumi mas bihainim tingting bilong Moses, “em i ting long dispela gutpela pe bambai God i givim em.” Wanpela yangpela man i bihainim tingting bilong Moses na em i winim wanpela traim bilong pamuk. Em i tok, “Mi wet long kisim gutpela pe olsem laip oltaim, na mi no laik tromoi bilong kisim amamas sotpela taim tasol long rot bilong pamuk.” Yangpela man i gat stretpela tingting, a?

POPAIA BILONG NARAPELA INAP LAINIM YUMI

 9. Devit i mekim wanem na em i no sanap strong na winim pait bilong mekim pasin i stret?

⁹ Yu no ken malolo long dispela pait olsem King Devit i mekim. Wanpela taim em i lukim wanpela meri i waswas, em Batsiba. Skin bilong meri i gutpela tru. Tasol Devit i no tanim het. Em i lukluk i stap na tingting nogut i kamap long bel bilong em. Bel bilong em i kirap long mekim pasin pamuk. Dispela laik nogut i kamap strong tru na em i salim boi bilong em i go kisim Batsiba i kam long haus bilong em. Bihain Batsiba i gat bel na rong bilong Devit i kamap ples klia. Olsem na em i wokim rot na ol birua i kilim i dai man bilong Batsiba long pait.—2 Samyuel 11:1-17.

10. (a) Devit i kisim wanem strafe long rong bilong em? (b) Devit inap mekim wanem na em i no ken trabel?

¹⁰ Dispela em i bikpela rong tru. Na Devit i kisim bikpela hevi moa long en. Bel bilong em i bagarap tru na em i pilim tru rong bilong em. Na tu Jehova i givim strafe long em na inap long taim em i dai hevi i stap long lain bilong em. (Sam 51:3, 4; 2 Samyuel 12:10-12) Bel bilong Devit i giamanim em; ol laik nogut i kamap strong long bel na winim em. Bihain em i tok: “Mi stap yet long bel bilong mama, na mi man bilong sin.” (Sam 51:5) Devit inap ranawe long dispela traim na bai em i no ken trabel long Batsiba. Tasol nogat. Em i lukluk i stap na em i larim bel bilong em i kirap long mekim pasin pamuk wantaim meri bilong narapela man.

11. (a) Ol samting i painim Devit i mas lainim yumi olsem wanem? (b) Wanem sampela samting em inap kirapim bel bilong yumi? (c) Gutpela sapos yumi klia long wanem samting, olsem wanpela yangpela man i tok?

¹¹ Dispela samting i bin painim Devit em i mas givim tingting long yumi na yumi mas was gut long ol samting i laik kirapim bel bilong yumi long mekim pasin nogut. Olsem: Sapos yu kaunim ol buk na lukim ol piksa wokabaut i kamapim stori bilong maritpasin na pilai nogut, yu ting dispela bai mekim wanem long yu? Ating bai “bel i kirap.” Olsem na yu mas klia long ol dispela samting. (Kolosi 3:5; 1 Tesalonaika 4:3-5; Efesas 5:3-5) Na nogut man na meri tupela tasol i stap na traim i painim ol. Wanpela yangpela man i tok: “Tru yumi save yumi mas bosim skin, tasol hamas manmeri ol inap mekim? Gutpela sapos yumi klia long ol kain samting olsem em inap traim yumi.”

12. Yumi mas tingim wanem pasin Josep i mekim?

¹² Sapos Devit i bin tingim pasin bilong Josep, em i no inap mekim dispela bikpela rong long God. Taim Josep i stap long Isip, ol i putim em olsem bosboi long haus bilong Potifa. Taim Potifa i no i stap long haus, meri bilong em i wok long pulim yangpela man Josep na em i tokim Josep: “Yu kam slip wantaim mi.” Tasol Josep i no laik. Orait wanpela taim meri i holim Josep na em i strong long Josep i mas slip wantaim em. Tasol Josep i no tingting long kisim amamas long bihainim laik nogut bilong bel. Em i tingting long mekim ol samting i stret long ai bilong God. Olsem na Josep i stap strong na sakim dispela meri na em i ranawe.—Jenesis 39:7-12.

SAMTING BILONG HELPIM YUMI LONG WINIM PAIT

13, 14. (a) Yumi mas mekim wanem na bai yumi inap winim pait na daunim ol laik nogut? (b) Ol Korin i kamap Kristen ol i senisim pasin bilong ol olsem wanem? Husat i helpim ol long senisim pasin? (c) Bipo Pol tupela Taitas i wanem kain man?

¹³ Bilong winim dispela pait yu mas larim ol tok bilong Baibel i go daun long bel bilong yu bambai bel i ken kirapim yu long bihainim dispela tok. Tasol yu mas bung wantaim ol manmeri bilong God tu, em lain bilong Jehova. Ol inap helpim yu long senisim pasin bilong yu. Pol i stori long sampela Kristen bilong Korin ol i bin senisim pasin bilong ol. Em i tok, ol man i save pamuk, na bihainim god giaman, na bagarapim marit, na mekim pasin sem, na stil, na mangal, na spak, na tok bilas, “olgeta dispela kain man bai ol i no kisim kingdom bilong God. Na bipo yupela sampela i stap kain man olsem. Tasol yupela i waswas pinis.”—1 Korin 6:9-11.

¹⁴ Tingim dispela samting! Sampela Kristen bilong bipo, pastaim ol i bin pamuk na bagarapim marit, na mekim pasin sem, na stil, na spak. Tasol lain Kristen i bin helpim ol na ol i lusim ol dispela pasin nogut. Bipo Pol tu i bin mekim pasin nogut. (1 Timoti 1:15) Em i tokim Taitas: “Yu save, bipo yumi tu i no gat gutpela tingting, na yumi . . . bin wok kalabus long kain kain pasin bilong bel i kirap na bilong bodi i amamas.”—Taitas 3:3.

15. (a) Olsem wanem yumi save, Pol i hatwok long mekim pasin i stret? (b) Sapos yumi bihainim pasin bilong Pol, dispela inap helpim yumi olsem wanem?

¹⁵ Taim Pol i kamap Kristen, yu ting em i no gat hatwok moa long bihainim pasin i stret? Nogat. Long olgeta taim Pol i gat pait long daunim ol laik nogut bilong bel bipo i bin kalabusim em. Pol i tok: “Mi save paitim tru bodi bilong mi na mekim em i bihainim laik bilong mi. Nogut mi autim gutnius long sampela man na bihain mi yet mi lus.” (1 Korin 9:27) Taim skin bilong Pol i laik mekim pasin i no stret, Pol i “paitim tru,” em i subim skin long mekim pasin i stret. Na sapos yu bihainim pasin bilong Pol, bai yu tu yu inap winim dispela pait.

16. Sampela man bilong nau i mekim wanem bilong winim dispela pait na yumi ken bihainim pasin bilong ol?

¹⁶ Sapos yu hatwok long lusim wanpela pasin nogut, yu mas go long wanpela bikpela kibung bilong Ol Witnes Bilong Jehova. Long dispela kibung bai yu lukim ol manmeri ol i bihainim klinpela pasin na ol i amamas. Tasol planti bipo ol i insait long pasin bilong dispela graun; ol i bin pamuk o spak o mekim pasin sem o smok o stil o giaman o pilai laki, tasol ol i lusim pinis. (1 Pita 4:3, 4) Na taim yu bung wantaim Ol Witnes long ol miting bilong kongrigesen tu, bai yu stap namel long ol manmeri ol i winim pinis dispela pait. Ol i daunim pinis ol laik nogut bilong bel na ol i lusim pinis ol pasin nogut ating nau yu hatwok long lusim. Olsem na yu mas strongim bel! God bai helpim yu na yu tu inap winim dispela pait.

17. (a) Yumi mas bung wantaim husat bilong helpim yumi long winim dispela pait? (b) Sapos yumi gat sampela hatwok o hevi, husat ol inap helpim yumi?

¹⁷ Sapos longtaim liklik yu bin lainim tok bilong Baibel wantaim Ol Witnes Bilong Jehova, ating yu bin i go long sampela miting long Haus Kingdom. Tasol gutpela sapos yu go long olgeta taim. Dispela pasin i save helpim na strongim olgeta Kristen. (Hibru 10:24, 25) Gutpela sapos yu save long “ol hetman” o elda bilong kongrigesen. Ol i gat wok long ‘lukautim lain sipsip bilong God.’ (1 Pita 5:1-3; Aposel 20:28) Olsem na sapos yu hatwok long lusim wanpela pasin i kalapim lo bilong God, orait yu no ken pret long askim ol elda long helpim yu. Ol i laik helpim yu.—1 Tesalonaika 2:7, 8.

18. Yumi tingim wanem samting bilong bihain na dispela i strongim yumi long winim pait?

¹⁸ Ol manmeri Seten i bosim ol na ol laik nogut bilong skin i wok strong long pundaunim yumi. Olsem na long olgeta taim yumi gat pait. Tasol bihain bai dispela pait i pinis! Liklik taim bai Seten i kalabus na bai olgeta manmeri nogut i bagarap. Bai nupela taim i kamap na bai stretpela pasin tasol i stap. Long dispela taim bai i no hatwok tumas long bihainim pasin i stret. Na bai sin i tekewe olgeta long yumi, olsem na bai yumi no gat pait moa.

19. Bilong wanem yumi laik wok strong long i stap gut long Jehova?

¹⁹ Oltaim yu mas tingim dispela nupela taim. Yu mas strong long wetim God i kisim bek yu na putim dispela olsem “hat kapa.” (1 Tesalonaika 5:8) Yu mas kisim tingting wankain olsem bilong wanpela yangpela meri, em i tok: ‘Mi save tingim olgeta samting Jehova i bin mekim bilong helpim mi na ol tok promis bilong em. Em i no les long mi. Em i mekim gut tru long mi. Olsem na mi laik wok strong long i stap gut long Em bambai mi inap kisim laip i stap oltaim.’ Sapos yumi strong long bihainim pasin i stret, orait bai Jehova “inapim tru olgeta gutpela promis em i bin mekim” long ol manmeri i laikim tumas em.—Josua 21:45.

[Piksa long pes 219]

Ol lsip bilong bipo i gat ol amamas bilong ol, tasol bilong wanem Moses i sakim?

[Ol Piksa long pes 220, 221]

Devit i lukluk i stap; em i no abrusim dispela samting i laik pulim em long mekim pasin pamuk

[Piksa long pes 222]

Taim meri bilong Potifa i laik pulim Josep, Josep i ranawe