Bihainim Laik Bilong Holi Spirit na Kisim Laip
“Yumi no bihainim ol laik bilong bodi . . . nogat, yumi bihainim laik bilong holi spirit.”—ROM 8:4.
1, 2. (a) Wanem hevi inap kamap taim draiva i larim ol samting i pulim tingting bilong em? (b) Wanem hevi inap kamap taim yumi larim ol samting i pulim tingting bilong yumi na yumi no pas gut wantaim Jehova?
WANPELA wokman bilong gavman long Amerika i tok, planti draiva i save larim ol samting i pulim nabaut tingting bilong ol. Dispela hevi i go bikpela tru long olgeta yia. Olsem: Taim ol draiva i yusim mobail fon na draiv, dispela inap pulim tingting bilong ol. Planti i tok, eksiden i painim ol o klostu ol i insait long eksiden, long wanem, draiva bilong narapela kar i yusim mobail fon taim em i draiv. Ating ol man i ting ol i seivim taim sapos ol i yusim mobail fon taim ol i draiv, tasol bikpela eksiden inap kamap long dispela rot.
2 Draiva husat i larim ol samting i pulim tingting bilong em, ating em i no inap luksave long ol samting we inap kamapim hevi long rot. Wankain samting tu inap kamap long pasin bilong yumi long pas gut wantaim Jehova. Sapos yumi larim ol samting i pulim tingting bilong yumi na yumi no mekim wok bilong God na wokabaut stret, dispela inap kamapim bikpela hevi. Aposel Pol i tok, bilip bilong yumi inap bagarap olsem sip i bruk long rip. (1 Tim. 1:18, 19) Pol i tok lukaut long dispela samting taim em i raitim pas i go long ol brata long Rom, olsem: “Sapos tingting bilong man i stap long ol laik bilong bodi, orait dispela man bai dai. Tasol sapos tingting bilong man i stap long ol samting bilong holi spirit, orait dispela man bai i stap laip na i stap bel isi.” (Rom 8:6) Wanem insait bilong tok Pol i mekim? Olsem wanem yumi inap abrusim pasin bilong ‘tingting i stap long ol laik bilong bodi’? Na olsem wanem yumi inap wok strong long ‘tingting i stap long ol samting bilong holi spirit’?
Ol i “No Gat Kot”
3, 4. (a) Pol i stori long wanem hevi bilong em? (b) Bilong wanem yumi mas i gat laik long save long hevi bilong Pol?
3 Long pas Pol i raitim i go long ol brata long Rom, em i stori long wanpela hevi em i gat. Em i tok, em i pilim olsem tingting bilong em i pait wantaim ol laik bilong bodi bilong em. (Ritim Rom 7:21-23.) Pol i no mekim dispela tok bilong givim eskius long ol pasin em i mekim o bikos em i sori long em yet, nogat. Tok bilong em i no makim olsem em i no inap tru long mekim samting i stret. Em i wanpela strongpela Kristen we God i bin makim long holi spirit, na em i “wanpela aposel God i salim i go long ol manmeri bilong ol arapela lain.” (Rom 1:1; 11:13) So bilong wanem Pol i stori long dispela hevi?
4 Pol i laik tok olsem em i no inap mekim stret laik bilong God long mak stret em i laik mekim. Bilong wanem? Em i tok: “Olgeta man i bin mekim sin na ol i sot long kamapim ol gutpela pasin bilong God.” (Rom 3:23) Olsem olgeta pikinini bilong Adam, Pol tu i gat sin na em i gat ol laik nogut. Yumi inap pilim tru tingting bilong em. Long olgeta de, yumi tu i hatwok tru long daunim ol pasin kranki na ol laik nogut bilong yumi yet. Na i gat planti samting inap pulim tingting bilong yumi na yumi lusim liklik rot i go long laip. (Mat. 7:14) Tasol i gat rot bilong helpim Pol, na yumi tu.
5. Pol i kisim helpim we?
5 Pol i tok: “Husat bai kisim bek mi long dispela bodi em bilong i dai.” Na bihain em i tok: “Mi tenkyu long God long rot bilong Jisas Krais, Bikpela bilong yumi!” (Rom 7:24, 25) Orait nau Pol i stori long ol Kristen God i bin makim ol long holi spirit, em ol lain “husat i pas wantaim Krais Jisas.” (Ritim Rom 8:1, 2.) Long rot bilong holi spirit, Jehova i adoptim ol olsem ol pikinini bilong em. Em i mekim ol i “kamap wanlain wantaim Krais na kisim ol samting long papa.” (Rom 8:14-17) Holi spirit bilong God na bilip bilong ol long ofa bilong Jisas long baim bek ol man, i helpim ol long winim dispela hevi em Pol i stori long en. Olsem na maski ol i gat sin, God i no kotim ol moa. Na ol i no kalabus moa “long lo bilong sin na dai.”
6. Bilong wanem olgeta wokman bilong God i mas tingim tok bilong Pol?
6 Tru, Pol i mekim dispela tok i go long ol Kristen God i bin makim. Tasol tok em i mekim long holi spirit bilong God na ofa bilong Jisas bilong baim bek ol man, dispela inap helpim olgeta wokman bilong Jehova, maski ol i wet long kisim laip long heven o long graun. Spirit bilong God i kirapim Pol long mekim dispela tok, olsem na em i bikpela samting long olgeta wokman bilong God i kliagut na bihainim ol tok Pol i bin raitim.
Olsem Wanem God i “Kotim Sin i Stap Long Skin Bilong Ol Man”?
7, 8. (a) Olsem wanem “Lo i no inap kisim bek ol” manmeri? (b) Long rot bilong holi spirit na pe bilong baim bek man, God i bin inapim wanem samting?
7 Long Rom sapta 7, Pol i tok olsem ol man i gat sin ol i stap aninit long strong bilong sin. Na long sapta 8, em i stori long strong bilong holi spirit. Em i tok, holi spirit bilong God inap helpim ol Kristen long daunim strong bilong sin. Holi spirit inap helpim ol long mekim ol samting Jehova i laikim na bai em i ken orait long ol. Pol i kamapim olsem God i yusim holi spirit na ofa bilong Jisas long baim bek ol man long mekim samting em Lo Bilong Moses i no inap mekim.
8 Lo i kotim ol man i gat sin, long wanem, ol i no inap bihainim olgeta tok i stap long Lo. Ol hetpris bilong Israel i stap aninit long Lo na ol i gat sin na ol i no inap mekim ol ofa bilong rausim sin, olsem na “Lo i no inap kisim bek ol” man. Tasol God i bin salim Pikinini bilong em i kam long graun “long kain bodi olsem ol sinman i gat” na God i givim em olsem pe bilong baim bek ol man, na long dispela rot God “i kotim sin i stap long skin bilong ol man.” Ofa bilong Jisas i kisim bek ol man long sin. Ol Kristen God i bin makim, ol i bilip long ofa bilong Jisas, olsem na Jehova inap kolim ol stretpela man. Tok bilong Pol i kirapim ol Kristen God i bin makim long ‘ol i no ken bihainim ol laik bilong bodi, nogat, ol i mas bihainim laik bilong holi spirit.’ (Ritim Rom 8:3, 4.) Ol i mas mekim olsem i go inap long taim ol i dai na pinisim wok bilong ol hia long graun na bai ol i kisim “prais bilong laip.”—Rev. 2:10.
9. Long Rom 8:2, dispela tok “lo” i makim wanem samting?
9 Na tu, Pol i stori long “lo bilong dispela spirit” na “lo bilong sin na dai.” (Rom 8:2) Ol dispela lo i makim wanem samting? Tok em i yusim long dispela ves i no makim ol lo tru tru, olsem i stap long Lo Bilong Moses. Wanpela buk i tok, long tok Grik, “lo” long dispela ves i makim ol gutpela samting o samting nogut em ol man i save mekim na i save bosim ol olsem wanpela lo. Na em inap makim tu ol stiatok em ol yet i makim bilong bihainim.
10. Olsem wanem lo bilong sin na lo bilong dai i bosim yumi?
10 Aposel Pol i tok: “Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.” (Rom 5:12) Yumi olgeta i pikinini bilong Adam, olsem na lo bilong sin na dai i bosim yumi. Sin i stap long skin bilong yumi i save kirapim yumi oltaim long mekim ol pasin em God i no orait long en. Na ol dispela pasin inap bringim yumi i go long dai. Long pas Pol i raitim i go long ol Galesia, em i tok olsem ol dispela pasin em ol “laik nogut bilong bel.” Em i tok: “Ol man i save mekim ol kain pasin olsem ol i no inap kisim kingdom bilong God.” (Gal. 5:19-21) Ol man husat i save mekim ol dispela pasin, ol i save “bihainim ol laik bilong bodi.” (Rom 8:4) Ol i larim laik bilong bodi i stiaim ol long mekim ol samting. Olsem wanem? Yu ting ol man husat i mekim pasin pamuk, lotuim imis, mekim olkain wok bilong ol spirit nogut, na ol arapela sin, ol tasol i bihainim ol laik bilong bodi? Nogat. Long Buk Galesia, dispela tok “laik nogut bilong bel” inap makim tu ol pasin olsem jeles, belhat tumas, kamapim kros, na bel nogut—em ol pasin we sampela man i gat na ol i ting em ol liklik pasin kranki tasol. Yumi no ken ting olsem yumi no gat wok long sakim ol laik nogut bilong bodi.
11, 12. Jehova i bin mekim wanem na yumi no kalabus moa long lo bilong sin na dai? Yumi mas mekim wanem na bai God i ken orait long yumi?
11 Yumi amamas olsem Jehova i bin opim rot na yumi no kalabus moa long lo bilong sin na dai! Jisas i tok: “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.” Sapos wokabaut bilong yumi i soim olsem yumi laikim tru Jehova na yumi bilip long ofa bilong Jisas long baim bek ol man, orait yumi inap abrusim strafe bilong sin. (Jon 3:16-18) Yumi pilim wankain olsem Pol taim em i bin tok: “Mi tenkyu long God long rot bilong Jisas Krais, Bikpela bilong yumi!”
12 Samting i kamap long yumi i kain olsem yumi kisim wanpela bikpela sik na yumi kamap orait. Yumi inap kamap orait olgeta sapos yumi mekim ol samting dokta i tokim yumi long mekim. Bilip bilong yumi long pe bilong baim bek man inap mekim yumi i kamap fri long lo bilong sin na dai, tasol yumi gat sin yet na yumi no gutpela olgeta. Bilong pas gut yet wantaim Jehova na bai em i ken orait long yumi, i gat wanpela samting yumi mas mekim. Pol i tok, yumi mas bihainim laik bilong holi spirit.
Olsem Wanem Yumi Inap Bihainim Laik Bilong Holi Spirit?
13. Yumi mas mekim wanem bilong bihainim laik bilong holi spirit?
13 Taim yumi laik go long wanpela hap, yumi save wok strong long wokabaut yet i go inap long yumi kamap long dispela hap. Olsem tasol, bilong bihainim laik bilong holi spirit na wokabaut yet i go, yumi mas wok long kamap strong long pasin bilong yumi long pas gut wantaim God. (1 Tim. 4:15) Maski yumi no inap bihainim stret laik bilong holi spirit, long olgeta wan wan de yumi mas wok strong long larim spirit bilong God i stiaim yumi. Sapos yumi “larim holi spirit i bosim yet wokabaut bilong [yumi],” bai yumi mekim God i amamas.—Gal. 5:16.
14. Ol man i “bihainim ol laik bilong bodi,” ol i gat wanem tingting na pasin?
14 Long pas Pol i raitim i go long ol Rom, em i stori long 2-pela kain lain em ol i gat narapela narapela tingting. (Ritim Rom 8:5.) Long dispela pas, em i no stori long bodi tru tru. Sampela taim long Baibel, dispela tok “bodi” inap makim ol pasin kranki bilong yumi. Ol pasin kranki bilong yumi inap mekim na yumi gat hatwok long bosim ol laik na tingting bilong yumi, olsem Pol i bin stori long en. Pol i bin wok strong long daunim ol pasin kranki bilong em. Tasol planti man long nau i “bihainim ol laik bilong bodi,” na ol i no wok strong long sakim. Ol i no tingim ol samting em God i laik ol i mas mekim, na ol i no save askim em long helpim ol long sakim ol laik nogut. Planti taim “ol i tingting long ol samting bilong bodi,” na ol i larim ol laik bilong bodi i bosim ol. Tasol ol man husat i “bihainim laik bilong holi spirit,” ol i larim Jehova i stiaim ol.
15, 16. (a) Olsem wanem pasin bilong tingting long samting yumi laik mekim, inap stiaim laik bilong yumi? (b) Planti man long nau i tingting long wanem samting?
15 Ritim Rom 8:6. Paslain long ol man i mekim gutpela pasin o pasin nogut, ol i save tingting long ol samting ol i laik mekim. Sapos ol man i tingim ol samting bilong bodi, orait ol bai bihainim ol laik bilong bodi. Bai tingting, bel na laik bilong ol i stap long ol dispela samting.
16 Planti man long nau i save tingting long wanem samting? Aposel Jon i tok: “Olgeta samting bilong dispela graun, olsem laik nogut bilong bel na pasin bilong aigris na pasin bilong hambak long mani kago, ol i no kam long Papa, nogat, ol i kam long dispela graun.” (1 Jon 2:16) Ol samting olsem pasin pamuk, laik bilong kisim namba na biknem, na laik bilong kisim planti mani kago, ol i insait long ol samting Jon i stori long en. Ol buk, magasin, muvi, ol program long TV, na Intenet i save strongim dispela kain laik. Dispela em ol samting planti man i save tingting long en, long wanem, em ol samting ol i laikim tumas. Pol i tok: “Sapos tingting bilong man i stap long ol laik bilong bodi, orait dispela man bai dai.” Dispela inap mekim na yumi lusim pasin bilong yumi long pas gut wantaim God, na long bihain yumi inap lus long kisim laip. Bilong wanem i olsem? “Long wanem, sapos tingting bilong man i stap long ol laik bilong bodi, dispela i mekim man i kamap birua bilong God. Ol laik bilong bodi i no stap aninit long lo bilong God, nogat. Na ol i no inap tru. Olsem na ol man i bihainim ol laik bilong bodi ol i no inap mekim ol pasin God i laikim.”—Rom 8:7, 8.
17, 18. Olsem wanem yumi inap larim holi spirit i stiaim yumi? Wanem samting bai kamap sapos yumi mekim olsem?
17 “Sapos tingting bilong man i stap long ol samting bilong holi spirit, orait dispela man bai i stap laip na i stap bel isi.” Dispela i makim olsem yumi bai kisim laip oltaim long bihain. Na long nau, bel na tingting bilong yumi bai stap isi na bai yumi stap wanbel wantaim God. Olsem wanem yumi inap soim olsem yumi bihainim laik bilong holi spirit? Sapos oltaim yumi larim God na holi spirit bilong em i stiaim yumi, orait bai yumi kisim tingting wankain olsem bilong God. Yumi laik bai tingting bilong yumi i “stap aninit long lo bilong God.” Taim traim i painim yumi, bai yumi save long samting yumi mas mekim. Bai yumi gat laik long wokim disisen i stret em spirit bilong Jehova i stiaim.
18 Olsem na em i bikpela samting long yumi mas putim tingting long ol samting bilong God. Yumi mekim olsem long rot bilong ‘redim tingting bilong yumi long mekim’ ol wok Kristen olsem beten oltaim, ritim Baibel na stadi, go long ol miting, na mekim wok autim tok. (1 Pita 1:13) Yumi no ken larim ol laik nogut i bosim yumi, nogat, yumi mas larim tingting bilong God na holi spirit bilong em i stiaim yumi. Sapos yumi mekim olsem, bai yumi kisim planti blesing, na bai yumi kisim laip oltaim na stap bel isi.—Gal. 6:7, 8.
Yu Inap Stori Long Dispela?
• Lo Bilong Moses i no inap mekim wanem? God i mekim wanem bilong stretim dispela samting?
• “Lo bilong sin na dai” i makim wanem? Olsem wanem yumi no kalabus moa long lo bilong sin na dai?
• Yumi mas mekim wanem bilong kisim pasin bilong ‘tingting i stap long ol samting bilong holi spirit’?
[Ol Piksa long pes 12]
Yu save bihainim laik bilong bodi o laik bilong holi spirit?