Yu Larim Jehova i Stap Olsem Ples Hait Bilong Yu?

 1. Sin i mekim na ol wokman bilong God inap pilim olsem wanem?

APOSEL Pol i tok: “Mi pilim nogut tru!” (Rom 7:24) Planti wokman bilong God i mekim wankain tok olsem aposel Pol. Yumi olgeta i gat sin, olsem na taim yumi no kamapim ol pasin em Jehova i amamas long en, dispela bai mekim yumi bel hevi. Sampela Kristen husat i bin mekim bikpela rong i pilim olsem God i no inap tru long fogivim ol.

 2. (a) Olsem wanem Song 34:22 i kamapim klia olsem ol wokman bilong God i no ken larim bel hevi i daunim ol? (b) Yumi bai stori long wanem samting long dispela stadi? (Lukim blok “Skul Yumi Kisim o Piksa Tru?”)

² Baibel i helpim yumi long save olsem sapos yumi larim Jehova i lukautim yumi, yumi bai i stap bel isi na bel i no inap kotim yumi. (Ritim Song 34:22.) Taim yumi larim Jehova i lukautim yumi, dispela i makim wanem samting? Yumi mas mekim wanem bambai Jehova inap marimari na fogivim yumi? Long taim bilong ol Israel bilong bipo, ol i makim ol taun bilong hait. Taim yumi skelim dispela samting, dispela bai helpim yumi long kisim bekim bilong ol dispela askim. Aninit long kontrak bilong Lo, ol man i popaia na kilim narapela ol i ken i go hait long ol dispela taun. Tasol nupela kontrak long Pentikos 33 C.E. i kisim ples bilong dispela Lo. Jehova yet i kamapim dispela Lo, na dispela i helpim yumi long luksave long tingting Jehova i gat long pasin bilong mekim rong, man i mekim rong, na man i tanim bel. Pastaim yumi laik kliagut long risen na ol i makim ol dispela taun.

 3. Lain Israel i save mekim wanem taim wanpela man i kilim narapela man i dai?

³ Long taim bilong lain Israel bilong bipo, Jehova i no laikim pasin bilong kilim man. Sapos man i kilim narapela man, orait “wanblut bilong man i dai” bai kilim dispela man i dai. (Nam. 35:19) I stret long ol i mekim olsem bikos dispela man i kapsaitim blut bilong narapela man husat i no gat asua. Taim ol i kilim man i gat asua long blut, dispela i lukautim Graun Bilong Promis bikos Jehova i tok: “Pasin bilong kilim man i dai i save mekim kantri i kamap doti.”—Nam. 35:33, 34.

 4. Man i popaia na kilim narapela man i mas mekim wanem?

⁴ Lain Israel i save mekim wanem taim wanpela man i popaia na kilim narapela man? Maski dispela man i popaia na i kilim narapela husat i no bin mekim rong, em bai gat asua long samting em i mekim. (Stt. 9:5) Tasol dispela man inap ranawe i go long wanpela bilong ol 6-pela taun bilong hait na stap long hap. Em bai stap gut long dispela taun i go inap long taim hetpris i dai.—Nam. 35:15, 28.

 5. Olsem wanem ol taun bilong hait inap helpim yumi long kliagut long pasin bilong Jehova?

⁵ Ol man i no kamapim dispela tingting long wokim ol dispela taun bilong ol man i hait long en. Jehova i tokim Josua: “Yu tokim ol Israel, ‘Yupela i mas makim ol sampela taun bilong ol man i ken i go hait insait long ol.’” Ol dispela taun “ol i makim” i bilong lukautim ol man. (Jos. 20:1, 2, 7, 8) Jehova yet i stiaim wok bilong makim ol taun bilong hait, olsem na yumi laik save: Olsem wanem dispela i helpim yumi long luksave long pasin marimari bilong Jehova? Yumi kisim wanem skul long pasin bilong God long lusim ol rong bilong yumi?

6, 7. (a) Stori long olsem wanem ol hetman i save helpim man husat i popaia na kilim narapela. (Lukim piksa long kirap bilong stadi.) (b) Bilong wanem man i kilim narapela i mas i go lukim ol hetman?

⁶ Taim man i popaia na kilim wanpela i dai, em i mas “i go long ples bilong kot long bikpela dua bilong taun, na tokaut long ol hetman long ol samting em i bin mekim.” Ol hetman i mas mekim gut long em. (Jos. 20:4) Sampela taim bihain, ol i mas salim em i go long taun we em i bin kilim man long en bambai ol hetman i ken skelim rong bilong em. (Ritim Namba 35:24, 25.) Sapos ol hetman i tokaut olsem em i popaia na kilim man i dai, orait em bai go bek long taun em i bin hait long en.

⁷ Bilong wanem ol hetman i mas stretim dispela hevi? Ol i mekim olsem bilong helpim lain Israel long i stap klin, na tu, dispela bai helpim man i gat asua long kisim helpim long pasin marimari bilong Jehova. Wanpela saveman bilong Baibel i tok olsem sapos man i kilim narapela na em i no kisim helpim long ol hetman, “hevi bai painim em.” Em i tok moa: “Blut bilong em i stap long han bilong em bikos em i no laik kisim helpim long God.” I gat rot long man husat i popaia na kilim narapela long kisim helpim, tasol em yet i mas go lukim ol hetman. Sapos em i no ranawe i go long wanpela taun bilong hait em Jehova i makim, orait wanblut bilong man em i kilim i ken kilim em i dai.

8, 9. Bilong wanem Kristen husat i mekim bikpela rong i mas kisim helpim long ol elda?

⁸ Long nau, sapos wanpela Kristen i mekim bikpela rong, orait em i mas i go kisim helpim long ol elda. Bilong wanem em i bikpela samting long em i mekim olsem? Namba 1: Olsem Baibel i kamapim, Jehova yet i stretim rot long ol elda i mas helpim ol lain i mekim ol bikpela rong. (Jems 5:14-16) Namba 2: Taim man i mekim rong i kisim helpim long ol elda, dispela bai helpim em long i stap aninit long lukaut bilong God na bihainim stretpela pasin. (Gal. 6:1; Hib. 12:11) Namba 3: Ol elda i gat wok long mekim gut bel bilong man husat i tanim bel bambai em i no larim bel hevi i daunim em. Jehova i kolim ol elda olsem “ples hait ol manmeri i ken i go na hait long en long taim bilong bikpela win na ren.” (Ais. 32:1, 2) Helpim yumi kisim long ol elda i kamapim klia pasin marimari bilong God.

⁹ Planti wokman bilong God i kisim bel isi taim ol i kisim helpim long ol elda. Daniel em wanpela brata husat i bin mekim bikpela rong, na inap sampela mun em i no go lukim ol elda bilong kisim helpim. Em i tok: “Longpela haptaim i lus na mi ting olsem ol elda i no inap helpim mi. Mi save tingting planti long rong mi bin mekim na mi wet tasol long hevi bai painim mi. Taim mi beten long Jehova, mi pilim olsem mi mas tok sori long rong mi mekim paslain long mi askim em long ol narapela samting.” Bihain, Daniel i kisim helpim long ol elda. Taim em i tingting i go bek, em i tok: “Pastaim mi pret long toktok long ol elda. Tasol bihain mi pilim olsem wanpela i rausim hevipela samting i stap long solda bilong mi. Nau mi pilim olsem mi inap toktok long Jehova na i no gat wanpela samting i pasim mi.” Long nau, maus bilong bel bilong Daniel i stap klin, na ol i makim em long kamap kongrigesen sevan.

10. Man i popaia na kilim narapela i mas mekim wanem?

¹⁰ Man i popaia na kilim narapela i dai i mas mekim sampela samting bambai God i ken marimari long em. Em i mas ranawe i go long taun i stap klostu na hait long en. (Ritim Josua 20:4.) Dispela man i mas ranawe i go kwik long dispela taun bilong hait bambai ol i no ken kilim em! Dispela i makim olsem em i mas lusim sampela samting bilong em yet na go hait. Em i mas lusim wok mani bilong em, haus bilong em, na fridom bilong em long raun. Em bai stap long dispela taun bilong hait inap long hetpris i dai.a (Nam. 35:25) Em i mas mekim olsem bambai em inap lukautim laip bilong em. Sapos em i lusim taun bilong hait, i olsem em i no tingim laip bilong man em i bin kilim, na tu, em i no tingim laip bilong em yet.

11. Kristen i tanim bel i mas mekim wanem bilong soim olsem em i pilim tru pasin marimari bilong God?

¹¹ Sapos Kristen i mekim rong na em i laik bai God i marimari long em, orait em i mas mekim sampela samting. Em i mas tanim bel na lusim pasin nogut em i bin mekim, dispela i makim tu ol liklik rong we inap kirapim em long mekim ol bikpela rong. Holi spirit i kirapim aposel Pol long stori long pasin bilong ol Kristen long Korin husat i tanim bel. Em i tok: “Dispela bel hevi i stret wantaim laik bilong God i kamapim ol gutpela samting. Yupela i bin kirap kwik long stretim dispela hevi, yes yupela i kamapim olsem yupela i no gat asua, na yupela i bin kros long dispela rong i bin kamap, yupela i pret long God, na yupela i laik tru long tanim bel, na yupela i givim bel tru, na yupela i stretim rong!” (2 Kor. 7:10, 11) Taim Kristen i mekim ol samting bilong soim olsem em i tanim bel, em i kamapim klia long Jehova olsem em i pilim tru pasin marimari bilong em.

12. Kristen i mas lusim wanem ol samting bambai God inap marimari long em?

¹² Kristen i mas lusim wanem ol pasin bambai God inap marimari long em? Em i mas redi long lusim sampela samting em i laikim tumas bambai em inap abrusim pasin bilong mekim rong. (Mat. 18:8, 9) Sapos sampela pren i save kirapim yu long mekim ol samting em Jehova i no amamas long en, yu bai stap yet olsem pren bilong ol? Sapos yu wok strong long daunim pasin bilong dring spak, yu redi long abrusim ol samting we inap kirapim yu long dring planti? Sapos yu wok strong long daunim ol laik bilong mekim pasin pamuk, yu wok long sakim ol muvi, ol Web-sait, o ol narapela samting we inap kirapim yu long kisim ol laik nogut? Tingim olsem Jehova i luksave long hatwok bilong yu long lusim ol dispela pasin na stap gut long em. Yu bai bel hevi tru sapos God i no orait long yu. Tasol taim yu save olsem God i “laikim yu tru na mekim gut long yu,” dispela bai mekim yu amamas.—Ais. 54:7, 8.

13. Bilong wanem man i go i stap long taun bilong hait i no ga wok long pret long ol birua?

¹³ Taim man i ranawe i go hait long taun, ol birua i no inap bagarapim em. Jehova i tok, sapos wanpela man i popaia na kilim narapela, orait “em i ken ranawe i go long wanpela bilong ol dispela taun na hait.” (Jos. 20:2, 3) Jehova i tokaut olsem ol hetman i no ken kotim dispela man long wankain rong em i bin mekim. Na tu, wanblut bilong man i dai i no ken kam insait long taun na kilim i dai dispela man. Olsem na man i hait long taun i no gat wok long pret olsem ol birua bai kilim em. Taim em i stap long dispela taun, Jehova i lukautim em na em i stap gut. Dispela taun i no olsem wanpela haus kalabus. Dispela man inap mekim ol wok, helpim ol narapela, na mekim wok bilong Jehova. Tru tumas, em bai stap amamas na laip bilong em bai gutpela!

14. Taim Kristen i tanim bel, em i ken bilip tru long wanem samting?

¹⁴ Sampela wokman bilong God i mekim ol bikpela rong na ol i tanim bel, tasol ol i pilim olsem maus bilong bel i kotim ol yet na oltaim Jehova bai tingim rong ol i mekim. Sapos yu pilim olsem, yu ken bilip tru olsem taim Jehova i fogivim yu, em bai no tingim gen rong yu mekim! Daniel em yumi stori pinis long en, em i pilim tru dispela tok. Bihain long em i kisim helpim long ol elda na maus bilong bel i stap klin, em i tok: “Mi pilim olsem mi inap pulim win gen. Bihain long ol elda i helpim mi, bel i no kotim mi moa. Taim God i lusim rong bilong yu, em i lusim olgeta. Jehova i tok olsem em bai lusim rong bilong yu na putim i go longwe tru. Yu no inap tingim gen dispela samting.” Taim man i ranawe i go long wanpela taun, i no gat wok long em i pret long ol birua bai kam kilim em. Olsem tasol, maski yumi mekim wanpela bikpela rong, sapos yumi tanim bel long rong yumi mekim, Jehova bai fogivim yumi. Em i no inap tru long tingim gen dispela rong o kotim yumi gen long dispela rong.—Ritim Song 103:8-12.

15, 16. Olsem wanem wok bilong Jisas olsem Man Bilong Baim Bek yumi na Hetpris i strongim bilip bilong yu olsem God bai fogivim yu?

¹⁵ Yumi ken bilip tru olsem Jehova bai marimari long yumi olsem em i bin mekim long lain Israel. Bihain long Pol i kamapim bel hevi bilong em long em i no bihainim olgeta tok bilong Jehova, em i tok: “Mi tenkyu long God long rot bilong Jisas Krais, Bikpela bilong yumi!” (Rom 7:25) Maski Pol i tanim bel, em i bin pilim nogut tru. Tasol em i bilip tru olsem long rot bilong Jisas, God bai fogivim em. Jisas i stap Man Bilong Baim Bek yumi, olsem na em bai mekim maus bilong bel bilong yumi i kamap klin na yumi bai i stap bel isi. (Hib. 9:13, 14) Jisas i stap olsem Hetpris bilong yumi, “olsem na em inap tru long kisim bek ol manmeri i kam long God long rot bilong em, long wanem, oltaim em i stap laip bai em i ken beten bilong helpim ol.” (Hib. 7:24, 25) Ol hetpris long taim bilong Israel i save helpim ol manmeri bambai God i fogivim ol. Olsem na yumi ken bilip tru olsem long rot bilong Hetpris bilong yumi Jisas, “[God] i ken marimari long yumi na mekim bikpela pasin helpim long yumi long taim stret.”—Hib. 4:15, 16.

¹⁶ Yumi mas bilip long ofa bilong Jisas bambai Jehova inap fogivim yumi. Ofa bilong Jisas i gat strong long helpim olgeta manmeri. Yu ken bilip tru olsem pe bilong baim bek man em bilong helpim yu. (Gal. 2:20, 21) Yu mas bilip olsem long rot bilong pe bilong baim bek man, God bai fogivim ol rong bilong yu. Na tu, yu ken bilip tru olsem pe bilong baim bek man bai helpim yu long kisim laip oltaim. Ofa bilong Jisas i olsem presen Jehova i givim long yu.

17. Bilong wanem yu laik larim Jehova i stap olsem ples hait bilong yu?

¹⁷ Ol taun bilong hait i kamapim klia pasin marimari bilong Jehova. Na tu, ol i kamapim klia olsem God i tingim laip olsem bikpela samting, wok ol elda i mekim bilong helpim yumi, ol samting yumi mas mekim bilong tanim bel tru, na risen na yumi mas bilip long pasin bilong Jehova long fogivim yumi. Olsem wanem? Yu larim Jehova i stap olsem ples hait bilong yu? Yumi ken bilip tru olsem God wanpela tasol bai lukautim yumi na banisim yumi! (Sng. 91:1, 2) Long neks stadi, yumi bai stori long olsem wanem ol taun bilong hait inap helpim yumi long bihainim stretpela pasin na pasin marimari bilong Jehova.