Ol Samting God i Wokim i Tokaut Long Glori Bilong Em!
“Skai i soim yumi olsem God em i nambawan tru. Olgeta samting bilong antap i soim yumi gutpela wok bilong em.”—SONG 19:1.
1, 2. (a) Bilong wanem ol man bilong graun i no inap lukim stret glori bilong God? (b) Olsem wanem ol 24 hetman i givim glori long God?
“YU NO inap lukim pes bilong mi, long wanem, sapos wanpela man i lukim pes bilong mi bai em i dai.” (Kisim Bek 33:20) Jehova i mekim dispela tok lukaut long Moses. Bodi bilong ol man bilong graun i no strong tumas, olsem na ol i no inap lukim stret glori bilong God. Tasol long wanpela driman, aposel Jon i bin lukim Jehova i sindaun long sia king bilong Em i lait tumas.—KTH 4:1-3.
2 Ol ensel i stap gut long Jehova ol inap lukluk long pes bilong em, ol man bilong graun nogat. Ol “24 hetman” Jon i lukim long driman, em ol i makim lain 144,000, ol inap lukim em. (KTH 4:4; 14:1-3) Ol i mekim wanem tok taim ol i lukim glori bilong God? Olsem Kamapim Tok Hait 4:11 i kamapim, ol i tok: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.”
Ol i No Inap Tok Ol i “No Gat Asua”
3, 4. (a) Bilong wanem i no stret long tok bilip long God i no bihainim ol wok painimaut bilong saiens? (b) Sampela taim, wanem as na man i no laik bilip long God?
3 Bel bilong yu i save kirapim yu long givim glori long God? Klostu olgeta manmeri i no save mekim, na sampela i tok i no gat God i stap. Olsem wanpela saveman bilong ol sta i tok: “Olsem wanem? God i bin wokim olgeta samting bilong helpim yumi? . . . Kain bilip olsem inap kirapim tru tingting bilong man. Tasol sori tru, mi bilip dispela tingting em i giaman. . . . I no stret long ting God i bin wokim olgeta samting.”
4 Wok painimaut bilong saiens i no inap skelim olgeta samting—em inap skelim tasol ol samting ol man inap lukim o skelim. Olsem na long ol samting ol i no inap lukim o skelim ol i kamapim tingting tasol. “God em i Spirit,” olsem na wok painimaut bilong saiens i no inap skelim em. (Jon 4:24) Olsem na sapos man i tok yumi no ken bilip long God, long wanem, saiens i no inap skelim em, dispela em pasin antap. Saientis Vincent Wigglesworth bilong Cambridge Yunivesiti i tok wok painimaut bilong saiens i kain olsem “samting bilong bilip.” Olsem wanem em i olsem? Em i tok: “Man i mekim wok painimaut bilong saiens i save bilip olsem olgeta samting i kamap long graun i mas bihainim ol lo bilong graun.” Olsem na taim wanpela man i no bilip long God, i olsem em i lusim wanpela bilip na em i kisim narapela. Sampela taim pasin bilong i no bilip i olsem man i no laik bilipim samting i tru. Man bilong raitim song i tok: “Pasin hambak i mekim na man nogut i no laik painimaut; Olgeta tingting bilong em i olsem: ‘I no gat God i stap.’ ”—Song 10:4, NW.
5. Bilong wanem ol man i no bilip long God ol i gat asua?
5 Pasin bilong bilip long God i no olsem man i bilip nating, long wanem, i gat planti samting tru i kamapim klia God i stap. (Hibru 11:1) Saveman bilong ol sta, Allan Sandage i tok: “Mi painim hat long bilip olsem olgeta samting long ples antap, em ol i save ran gut tru, i bin kamap nating long rot bilong samting i paul nabaut. I mas i gat samting i bin stretim gut olgeta samting. Mi no kliagut long God, tasol em i as bilong dispela mirakel i kamapim ol samting, em i as na ol samting i stap.” Aposel Pol i tokim ol Kristen long Rom olsem, “stat long taim God i mekim kamap olgeta samting na i kam inap nau, ol man i lukim ol samting em i bin wokim. Long dispela rot ol man inap save long sampela pasin bilong God i stap hait. Ol inap save long as bilong pasin bilong God, na ol inap save long bikpela strong bilong en i stap oltaim oltaim. Olsem na i no gat man inap long tok olsem, ‘Mi no gat asua, long wanem, mi no bin save long God.’ ” (Rom 1:20) “Stat long taim God i mekim kamap olgeta samting”—moa yet kirap long taim em i wokim ol man husat i ken luksave olsem God i stap—samting i stap ples klia i olsem, i gat wanpela Man Bilong Wokim olgeta samting na em i gat bikpela pawa tru, em i wanpela God i stret yumi lotuim em. Olsem na man i no laik tokaut long glori bilong God em i gat asua. Tasol ol samting long heven na graun i kamapim wanem samting?
Ples Antap i Tokaut Long Glori Bilong God
6, 7. Olsem wanem skai i save tokaut long glori bilong God?
6 Song 19:1 i bekim dispela askim olsem: “Skai i soim yumi olsem God em i nambawan tru. Olgeta samting bilong antap i soim yumi gutpela wok bilong em.” Devit i luksave olsem ol sta na ol planet “bilong antap” i kamapim long ples klia olsem God i stap. Em i tok moa olsem: “Olgeta de i save tokaut long dispela samting. Na olgeta nait i tokim yumi gen.” (Song 19:2) Long olgeta de na olgeta nait taim yumi lukluk long ples antap yumi inap lukim savetingting na pawa bilong God long wokim ol samting. I olsem ol dispela samting long ples antap i “tokaut” na litimapim nem bilong God.
7 Tasol bilong harim dispela tokaut man i mas i gat pasin bilong skelim gut ol samting. “Tulait na tudak i no gat maus na i no inap toktok. Yumi no save harim nek bilong dispela tupela samting.” Tasol dispela tokaut ples antap i save mekim, i gat strong. “Tulait na tudak i skulim ol manmeri long olgeta hap bilong graun. Na tok bilong tupela i go inap long olgeta ples.”—Song 19:3, 4.
8, 9. Wanem sampela bikpela samting bilong san?
8 Nau Devit i stori long narapela samting Jehova i bin wokim: “Long skai God i sanapim wanpela haus sel bilong san. San i kam ausait, olsem man i marit na i belgut na i lusim rum bilong en na i kam ausait. San i save amamas na bihainim rot bilong en, olsem man bilong ran i redi long resis. San i save kamap long arere bilong skai na i wokabaut i go long hapsait. I no gat wanpela samting inap hait long hat bilong en.”—Song 19:4-6.
9 Taim yu skelim san wantaim ol arapela sta, em i no bikpela tumas. Tasol em i narakain sta, bikpela bilong en i winim tru ol planet i raunim em. Hevi bilong en i planti planti bilion ton—winim tru hevi bilong olgeta planet samting i raunim em! Strong bilong graviti bilong san i holim graun bilong yumi na graun i stap 150 milion kilomita longwe long san, na em i no go longwe moa o klostu moa long san. Liklik hap tru bilong pawa bilong san i save kam long graun, tasol dispela liklik hap pawa i mekim na olgeta samting inap stap laip.
10. (a) Olsem wanem san i save go insait na kam ausait long “haus sel” bilong em? (b) Olsem wanem em i save ran olsem strongpela “man bilong ran”?
10 Man bilong raitim song i mekim tok piksa long san, olsem strongpela “man bilong ran” na em i kirap long arere bilong skai na i ran i go long hapsait na long nait em i go insait long wanpela “haus sel.” Taim dispela strongpela sta i go daun, i luk olsem em i go insait long “wanpela haus sel” bilong kisim malolo. Long moningtaim em i kam ausait “olsem man i marit na i belgut na i lusim rum bilong en.” Taim Devit i bin wok wasman bilong sipsip em i kisim save long bikpela kol bilong nait. (Stat 31:40) Em i tingim san i bin hatim graun na skin bilong em. San i bin lusim hap is na ran i go olgeta long hap wes, tasol em i no les, em i olsem strongpela “man bilong ran,” na em i redi long mekim gen.
Ol Bikpela Sta na Galaksi
11, 12. (a) Baibel i tok wanem long ol sta na wesan bilong nambis na yumi kirap nogut long en? (b) Ples antap i bikpela olsem wanem?
11 Devit i no gat teleskop, olsem na em inap lukim sampela tausen sta tasol. Tasol wanpela wok painimaut long nau i tok namba bilong ol sta ol man inap lukim long ol gutpela teleskop bilong nau em samting olsem 70 sekstilion—dispela namba em 7 wantaim 22 siro! Jehova i soim olsem i gat planti sta moa yet i stap taim em i tok namba bilong ol sta i kain olsem “wesan bilong nambis.”—Stat 22:17.
12 Inap planti yia ol saveman bilong ol sta i bin lukim samting long ples antap i luk olsem “ol liklik hap i lait liklik, tasol i no klia tumas, i olsem smok samting,” na ol i kolim nebiula. Ol saientis i bin ting dispela samting i stap insait long Milkiwe galaksi bilong yumi. Long 1924, ol i kisim save olsem nebiula i stap klostu long yumi, nem bilong en Andromeda, em i no insait long galaksi bilong yumi—em yet i wanpela galaksi i stap 2 milion lait yia longwe! Long nau ol saientis i tok i gat planti bilion galaksi i stap na olgeta wan wan i gat planti tausen sta—sampela i gat planti bilion sta. Tasol Jehova “i makim pinis namba bilong ol sta, na em i save kolim nem bilong ol sta wan wan.”—Song 147:4.
13. (a) Wanem samting i narakain long ol lain sta? (b) Olsem wanem yumi save olsem ol saientis i no “save long ol lo em ol sta bilong skai i save bihainim”?
13 Jehova i bin askim Jop: “Ating yu inap long bungim wanpela lain sta na pasim ol i stap wantaim long wanpela hap bilong skai, a? Na ating yu inap lusim rop i pasim wanpela lain sta, na larim ol i go nabaut?” (Jop 38:31) Kain lain sta olsem i stap long skai na i luk olsem ol i makim piksa bilong wanpela samting. Ol sta i stap longwe longwe long ol arapela sta, tasol taim yumi lukim, ol i luk olsem ol i sanap i stap, narapela i no lusim narapela. Hap ol i stap long en i no save senis, olsem na ‘ol man i save lukluk long ol sta na stiaim sip na balus samting, na bilong luksave long ol sta.’ (The Encyclopedia Americana) Tasol i no gat man i save wanem samting i “pasim” ol dispela lain sta na ol i stap wantaim. Tru tumas, ol saientis i no inap bekim askim i stap long Jop 38:33: “Ating yu save long ol lo em ol sta bilong skai i save bihainim, laka?”
14. Olsem wanem na pasin bilong lait long lusim wanpela hap i go long narapela em samting ol man i no save tumas long en?
14 Ol saientis i no inap bekim narapela askim God i bin givim long Jop, olsem: “We stap rot i go long ples lait bilong san i save kirap long en na i go nabaut?” (Jop 38:24) Wanpela man bilong raitim buk i tok dispela askim long lait em i “wanpela askim bilong ol man bilong saiens bilong nau.” Ol saveman Grik i bin ting olsem lait i save lusim ai bilong man na i kam ausait. Long taim bilong yumi ol man i bin ting lait i gat ol liklik liklik hap bilong en. Sampela narapela i ting lait i save wokabaut olsem si i save meknais. Long nau ol saientis i ting tupela tingting wantaim i stret. Tasol ol samting lait i save mekim na olsem wanem em “i go nabaut,” em ol samting ol man i no save tumas long en.
15. Olsem Devit, yumi mas pilim olsem wanem taim yumi tingim ol samting bilong ples antap?
15 Taim yumi tingim ol dispela samting yumi inap pilim olsem Devit, em i tok: “Taim mi lukim skai yu bin wokim, na taim mi lukim mun na olgeta sta yu bin putim i stap antap, mi save ting olsem. Mipela man i wanem samting na yu save tingting long mipela? Mipela i samting nating. Bilong wanem yu save was gut long mipela?”—Song 8:3, 4.
Graun na Ol Animal i Givim Glori Long Jehova
16, 17. Olsem wanem ol animal bilong “solwara” i litimapim nem bilong Jehova?
16 Song 148 i kolim sampela rot moa ol samting God i bin wokim i kamapim glori bilong em. Ves 7 i tok “ol traipela pis na ol samting i stap long as bilong solwara i daun moa” i save litimapim nem bilong Jehova. Yes, “solwara” i gat planti gutpela gutpela samting long en i kamapim savetingting na pawa bilong God i stap long “solwara.” Hevi bilong blu weil i olsem 120 ton—em hevi bilong 30 elefan! Hevi bilong klok bilong en em 450 kilogram na em i save pamim 6,400 kilogram blut i go long olgeta hap bodi bilong em! Yu ting ol dispela traipela animal i swim isi isi na ol i no swim gut? Nogat. Wanpela lain (European Cetacean Bycatch Campaign) i tok “ol i spit raun long solwara.” Long rot bilong satelait ol i bihainim wanpela weil olsem, na “insait long 10-pela mun em i bin swim inap 16,000 kilomita.”
17 Ol botolnus dolfin i save daiv i go daun aninit long solwara longwe olsem 45 mita, tasol ol i bin lukim wanpela dolfin i daiv i go daun 547 mita! Olsem wanem dispela animal inap mekim olsem? Taim em i daiv klok bilong em i ran isi isi, na ol blut i ran i go long klok, waitlewa, na kru. Na tu, ol masol bilong en i gat wanpela kain kemikal i save bungim win oksijen. Ol sil na ol spem weil i save daiv i go daun tru, winim dolfin. Magasin Discover i tok: “Ol i larim hevi bilong wara i mekim waitlewa bilong ol i go liklik.” Bikpela hap bilong ol oksijen ol i mas kisim ol i bungim insait long ol masol. Ol samting ol dispela animal i mekim i tokaut long savetingting bilong wanpela God i gat olgeta strong!
18. Olsem wanem solwara i soim savetingting bilong Jehova?
18 Solwara yet i save kamapim savetingting bilong Jehova. Magasin Scientific American i tok: “Olgeta wan wan liklik hap wara bilong solwara i antap na i go daun inap 100 mita i gat planti tausen tausen samting i kain olsem plaua samting i stap insait, na ol i liklik tru, em ai i no inap lukim.” Dispela plaua samting i save klinim win bilong yumi long rot bilong rausim planti bilion ton win kabon daioksait. Dispela plaua samting i save wokim winim 50 pesen bilong olgeta oksijen yumi save pulim.
19. Olsem wanem paia na sno i mekim laik bilong Jehova?
19 Song 148:8 i tok: “[“Paia,” NW ] na ren ais na [“sno na,” NW ] ol klaut nabaut na strongpela win i save bihainim tok bilong Bikpela.” Yes, Jehova i save yusim ol strong bilong graun bilong kamapim laik bilong em. Tingim paia. Inap planti yia ol man i ting ol paia bilong bikbus em samting nogut tasol. Tasol nau ol saveman i ting paia em i bikpela samting long helpim bus i stap gut. Paia i save rausim ol olpela diwai o ol diwai i wok long i dai, na i kirapim ol nupela sid long putim kru, na i givim strong i go bek long graun, na i mekim na ol bikpela bikpela paia i no inap kamap. Sno tu i gat bikpela wok, em i givim wara na ol samting bilong strongim graun, na givim wara long ol wara i ran, na helpim ol plaua na diwai samting na ol animal long ol i no ken i dai long kol.
20. Olsem wanem ol maunten na ol diwai i helpim ol man?
20 Song 148:9 i tok: “Yupela ol bikpela maunten na ol liklik maunten, na ol diwai i save karim kaikai na ol diwai bilong bus.” Ol bikpela maunten i tokaut long bikpela strong bilong Jehova. (Song 65:6) Tasol ol i save mekim gutpela wok tu. Wanpela lain (Institute of Geography long Bern, Swiselan) i ripot olsem: “Het bilong olgeta bikpela wara long graun i kirap long ol maunten. Winim 50 pesen bilong ol manmeri bilong graun i kisim wara bilong ol long ol wara i kamap long ol maunten . . . Ol maunten i bikpela samting long ol man i ken i stap gut.” Ol diwai nating tu i save givim glori long Man i Bin Wokim em. Wanpela lain bilong Yunaitet Nesen (United Nations Environment Programme) i tok olsem ol diwai i “bikpela samting bilong ol man long olgeta kantri i ken i stap gut . . . Ol narapela narapela kain diwai i bikpela samting long mani ol man i kisim, long wanem, ol i wokim ol plang, kisim prut na ol arapela samting long ol dispela diwai. Long olgeta hap bilong graun, 2 bilion man i save yusim paiawut bilong kukim kaikai na bilong hatim haus.”
21. Stori gut long olsem wanem lip bilong diwai i soim olsem i gat man i bin wokim?
21 Taim yumi skelim diwai yumi inap luksave olsem man i gat save i bin wokim. Tingim lip bilong diwai. Ausait bilong lip i gat wanpela kain gris long en na dispela i mekim na lip i no inap drai. Aninit long dispela gris i gat ol sel i gat ol kloroplas insait long en. Insait long ol dispela sel i gat marasin klorofil, na dispela marasin i save pulim pawa bilong lait. Long rot bilong wanpela wok ol i kolim fotosintesis, ol lip i kamap olsem “ol faktori bilong kamapim kaikai.” Rop bilong diwai i save pulim wara na pamim i go long ol lip. Long baksait bilong ol lip i gat ol liklik valv i save op na pas bilong larim win kabon daioksait i kam insait. Lait i saplaim pawa bilong mekim kabon daioksait na wara i bung wantaim bilong kamapim ol kabohaidret, olsem kaikai. Orait nau diwai inap yusim kaikai em yet i bin wokim. Tasol dispela “faktori” i luk nais tru na i no mekim nois. Na em i no kamapim ol samting i bagarapim win o wara, nogat, em i kamapim gutpela win oksijen!
22, 23. (a) Sampela ol pisin na animal inap mekim wanem ol samting? (b) Wanem ol arapela askim yumi mas skelim?
22 Song 148:10 i tok: “Olgeta abus ol man i save bosim na ol wel abus, na ol pukpuk na ol pisin.” Planti animal na pisin inap mekim kain kain samting. Pisin Laysan albatros inap flai longwe tru (wanpela i bin flai 40,000 kilomita insait long 90 de tasol). Pisin ol i kolim blackpoll warbler i save flai i stap antap inap 80 aua stret taim em i lusim Not Amerika na i flai i go long Saut Amerika. Kamel i save bungim wara insait long bel bilong em, i no insait long baksait bilong em olsem planti man i ting, na em inap raun longtaim tru na em i no bagarap long no gat wara. Olsem na yumi no kirap nogut taim ol ensinia i skelim skelim ol animal taim ol i laik kamapim ol masin na ol nupela samting. Gail Cleere, meri bilong raitim buk, i tok: “Sapos yu laik wokim wanpela samting em bai mekim gut wok bilong en . . . na em i no bagarapim graun, win, na wara, orait ating yu mas skelim gut pasin bilong wanpela animal o diwai samting long mekim wok na bihainim pasin bilong en taim yu wokim dispela samting.”
23 Tru tumas, ol samting God i wokim i tokaut long glori bilong Em! Ol sta, ol diwai samting, na ol animal, olgeta wan wan i save litimapim Man Bilong Wokim em. Tasol olsem wanem long yumi man? Olsem wanem yumi ken bungim nek wantaim ol sta, diwai, animal samting na litimapim nem bilong God?
Yu Tingim Yet?
• Ol man husat i tok i no gat God, bilong wanem ol i gat asua?
• Olsem wanem ol sta na ol planet i givim glori long God?
• Olsem wanem ol animal bilong solwara na bilong graun i kamapim klia olsem i gat gutpela Man Bilong Wokim ol, na em i gat pasin laikim?
• Olsem wanem ol strong i stap long graun na ples antap i save mekim laik bilong Jehova?
[Piksa long pes 10]
Ol saientis i tok namba bilong ol sta em 70 sekstilion!
[Kredit Lain]
Frank Zullo
[Piksa long pes 12]
Botolnus dolfin
[Piksa long pes 13]
Snoflek
[Kredit Lain]
snowcrystals.net
[Piksa long pes 13]
Yangpela Laysan albatros