Mekim Wok Bilong Jehova Taim Ol Man i Laik Harim Tok o Ol i No Laik Harim
Em stori bilong Hal Bentley
OL I stretim rot pinis bilong mekim wanpela kibung sekit bilong ol Witnes Bilong Jehova long wanpela liklik ples long kantri Naiasalan (nau ol i kolim Malawi). Wasman sekit na wasman distrik tupela i wok long skelim pletfom ol brata i bin wokim long kunai na mambu na ol haus slip kunai, i redi pinis o nogat. Wantu bikpela lain ol i bin hait long bus klostu, ol i kam banisim tupela. Ol i kukim ol haus slip na pletfom na ol i subim tupela brata hia i go long haus slip bilong tupela.
Meri bilong wasman distrik, em Jois (Joyce Bentley), em i ran i kam bilong lukim wanem samting i kamap. Ol i subim em tu i go bek. Gopas bilong dispela bikpela lain i bikmaus na em i tok, waitman (mzungu) i mas lusim dispela ples nau tasol. Ol i no larim mipela i kisim samting bilong mipela. Ol i subim mipela i go insait long ka bilong mipela. Ol i banisim ka—ol man na meri na pikinini tu wantaim—na ol i bikmaus na singaut strong, olsem: “Waitman, yu go” (“Pitani mzungu”) na “Mipela i laik i stap fri” (“Kwacha”). Mipela i ting bai ol i kapsaitim ka bilong mipela, olsem na long bel mipela i beten long Jehova. Tasol lain ya i wok long i go liklik na kwiktaim mipela i kirapim ensin na draiv i go long polis long aMsimba, i stap longwe inap 50 kilomita.
Bihain mipela i go bek na wanpela plisman tasol i go wantaim mipela. I gat pait i kamap long sampela hap na ol narapela plisman i go stretim dispela, olsem na i gat dispela wanpela plisman tasol em inap i kam wantaim mipela. Taim mipela kamap pinis long dispela ples em bikpela lain i bin banisim mipela, mipela lukim plak bilong pati politik (Malawi Congress Party) i stap, na ol i bin katim tok olsem M.C.P. long banis bilong haus. Tasol taim dispela plisman i toktok wantaim ol man bilong dispela hap, ol i orait long mipela i kisim ol samting bilong mipela na putim long ka.
Mipela lukim tu wasman sekit, em Rightwell Moses. Taim dispela hevi i kamap, meri bilong em i bin ranawe long bus, na ol i bin holim Rightwell na tromoi em long wara na klostu ol i kilim em i dai. Dispela bikpela lain manmeri i bin kisim olgeta kaikai bilong kibung, na ol i tokim ol brata ol i mas wokabaut i go long wanpela hap na ol sista na ol pikinini i mas wokabaut i go long narapela hap. Ol brata sista i wokabaut i go inap sampela kilomita na bihain dispela bikpela lain i les na lusim ol.
Dispela samting i bin kamap na planti narapela samting kain olsem i bin kamap, na bihain gavman bilong Malawi i tambuim wok bilong ol Witnes long hap bilong ol. Nau ol man i kirap mekim nogut tru long ol Witnes Bilong Jehova—ol i kilim i dai sampela Witnes, na paitim nogut tru sampela, na holim sampela sista na bagarapim ol, na putim sampela Witnes long kalabus.
I Gat Wanem As na Mipela i Stap long Malawi?
Mama i karim mi long Jun 28, long yia 1916, long biktaun Lits, long distrik Yoksia, long Inglan. Mama i kamapim 5-pela pikinini na mi liklik bilong ol. Mipela i no lain bilong lotu, olsem na mipela i no save go long lotu.
Paslain long taim Namba 2 Pait Bilong Olgeta Hap i kirap long yia 1939, papamama i dai pinis. Long Jun 1940 mi winim 24 krismas na mi stap long ami. Mi wok long ami long ol trak samting inap 5-pela yia. Long dispela 5-pela yia, long nait mi sindaun long ol ples i gat masin-gan long nambis bilong Inglan long hap not-is, na mi lukluk long skai na was long balus bilong ol birua. Mi save lukim ol sta long gutpela ples antap na mi save tingim God, em Man bilong wokim ol dispela samting, na mi save tingting olsem: Bilong wanem God i larim kain pait olsem i kamap na planti man i kisim bagarap, na planti ol i dai, na ol man i karim bikpela hevi? Taim mi lusim pinis ami, nau mi kisim save long ol dispela planti askim mi bin tingting long en inap longtaim pinis.
Long yia mi lusim ami, long wanpela apinun long taim bilong kol, wanpela man i kam paitim dua bilong haus bilong mi. Mi opim dua na mi lukim wanpela lapun man i stap. Em i kirap long toktok wantaim mi long Baibel. Bihain mi orait long em i kam lainim mi long ol tok bilong Baibel, na long mun Epril, long yia 1946, mi kisim baptais. Long 1949 mi lusim wok mani bilong mi na mi kirap mekim wok painia bilong ol Witnes Bilong Jehova.
Bihain mi wok long haus Betel long Landon inap 3-pela yia, na long 1953 ol i singautim mi i go long Skul Gileat bilong Sosaiti Wastaua long Saut Lansing, long distrik Nu Yok, long Amerika, na mi lain long kamap wanpela misineri. Skul pinis, na nau ol i salim mi i go long kantri Malawi (em bipo ol i kolim Naiasalan). Bihain mi kirap mekim wok distrik. Mi yangpela na mi singel na inap 5-pela yia mi raun long olgeta hap bilong dispela gutpela kantri. Mi kirap laikim tumas ol man bilong dispela kantri—ol i man bilong amamas, na maski ol i no gat planti samting bilong skin, em ol i gat liklik gaden kon na sampela kakaruk o meme o pik samting, tasol ol i save singautim ol man i go long haus bilong ol na mekim gut tru long ol. Sampela ol i save tru long kisim pis. Mi save slip long haus bilong ol, em haus ol i wokim long mambu na graun malumalum, na mi wokabaut wantaim ol i go autim tok long ol liklik ples i stap klostu. Mi amamas tu long bung wantaim ol long ol kibung mipela save wokim ausait. Ol i save sindaun wantaim meri pikinini bilong ol na putim gut yau long ol tok bilong kibung, maski sampela taim bikpela ren i kam daun!
Taim mi go i stap long wanpela liklik ples, olgeta wan wan long dispela ples, ol lapun wantaim ol yangpela, ol i save kam sekanim mi na ol i tok, “Gude, yu stap i orait?” (“Moni, muli bwanji?”) Taim mi lusim wanpela liklik ples na wokabaut i go long narapela liklik ples, ol man i wok long gaden i save lusim wok bilong ol na tok gude long mi.
Olgeta kongrigesen mi go long en wantaim wasman sekit ol i save wokim nupela haus bilong mi yet. Sampela taim ol i wokim strongpela haus mambu i gat rup morata, na mi laikim tru. Tasol bihain mi save ren i save kam insait long nupela rup morata!
Wanpela taim ol brata i wokim wanpela haus bilong mi long kunai i gat 3-pela sait bilong en na namba 4 sait em ka bilong mi. Ol i wokim dispela haus long ples daun bilong Wara Saia, em ples hat na i gat planti natnat ol i wok long kaikaim man long san na long nait—no gat malolo! Mi no gat taunam o marasin bilong sakim natnat, olsem na i hatwok tru long mi wok long dispela hap.
Mi Marit
Long 1960 mi maritim Jois (Joyce Shaw), em i bin mekim wok misineri long kantri Ekwado. Mi stap singel inap sampela yia na nau mi marit na em i wanpela gutpela blesing mi kisim. Mi marit inap 30 yia pinis, tasol mi pilim yet dispela gutpela blesing. Mi tupela Jois i bin wok wantaim na planti gutpela samting i bin painim mipela.
Wanpela taim ol brata i kisim sampela mambu na kunai na ol i wokim liklik bris bilong brukim wanpela wara. Ol i mekim olsem bambai mi inap brukim dispela wara long ka na i go long liklik ples i stap long narapela hapsait, long wanem ol lain bilong dispela liklik ples i laik lukim piksa wokabaut bilong Sosaiti i stori long wok bilong lain bilong Jehova (The New World Society in Action). Tasol wanpela mambu long bris i pas long wilka em ka bilong mi i pulim na i no inap i go moa. Ol brata i lusim wilka long ka na mi draivim ka i go lusim bris, na bihain ol i subim subim wilka ya i kam. Mipela putim dispela piksa na olgeta i amamas long lukim.
Sampela taim ol wara i bikpela tumas, na ol brata i no inap wokim bris. Sapos mipela i kamap long bikpela wara olsem, ol brata i save rausim olgeta samting i stap long ka—jenereta, na samting bilong putim piksa wokabaut, na ol piksa wokabaut, na bet samting—na ol i karim i go brukim wara. Wanpela strongpela brata i save karim mi long sol bilong em i go brukim wara, na tupela sista i karim Jois. Tasol sampela wara i daun tumas. Taim mipela i kamap long kain wara olsem, mipela i save sindaun long wanpela kain bot i olsem bet plang antap long 8-pela o 10-pela bikpela dram na i gat tupela man bilong holim baklain na pulim i go. Mipela i brukim dispela kain wara long dispela rot.
Ol brata bilong Malawi i save mekim gut tru long mipela—ol i save helpim gut mipela na tingim gut mipela. Long wanpela ples ol asples i tok ol bai kukim haus mipela i slip long en, olsem na ol brata i no slip—long nait olgeta ol i was long mipela. Gavman bilong Malawi i tambuim wok bilong ol Witnes Bilong Jehova long yia 1967, tasol paslain long dispela taim sampela taim bagarap i laik painim mipela, olsem long dispela taim mi bin stori long en long kirap bilong dispela stori. Planti brata sista bilong Malawi ol i redi long i dai tu bilong helpim mipela.
Wanpela taim mi wok wantaim wanpela brata na mipela i go long ol haus na autim tok na mi lukim em i gat bikpela solap long het bilong em. Wanpela man i bin paitim em nogut sampela de bipo. Long wanpela haus em i stap isi na em i autim tok long man bilong haus, tasol taim mipela i lusim pinis dispela haus, em i tokim mi: “Em dispela man tasol i bin paitim mi nogut!” Mi tingim tok bilong Pol, em i bin tok: “Sapos ol i mekim pasin nogut long yupela, orait yupela i no ken bekim pasin nogut long ol. . . . Yu mas mekim gutpela pasin na bai yu daunim pasin nogut.”—Rom 12:17-21.
Mipela i Wok i Go Moa
Taim mipela i stap long Malawi, planti taim mitupela Jois i save go long kantri Mosambik i stap klostu. Taim Jois i stap long Ekwado em i bin lain long mekim tok Spen na dispela i helpim em long autim tok long Mosambik, long wanem ol man bilong dispela ples i mekim tok Potyugal na ol inap harim tok Spen. Bihain mitupela wantaim i lain long mekim tok Potyugal. Taim mipela lusim Malawi na i go i stap long kantri Simbabwe, mipela i wok yet long i go long Mosambik. Long dispela kantri Misin Katolik i birua tru long wok bilong autim tok na i kirapim ol man long mekim nogut long mipela. Tasol mipela i go autim tok long dispela hap inap 10-pela yia na Jehova i save was long mipela na lukautim mipela taim mipela i wok long painim ol man i kain olsem sipsip.
Wanpela taim mipela i go long Mosambik na mipela i go lukim wanpela meri i laik harim tok, em i stap klostu long taun Beira long hap not. Sista bilong em long Potyugal i bin raitim pas long em na tokim em long ol gutpela save bilong Baibel em i kisim taim ol Witnes Bilong Jehova i stadi wantaim em na lainim em long ol dispela tok. Dispela meri i opim Baibel na skelim ol dispela tok bambai em i ken save, tru ol dispela gutpela tok i stap long Baibel, na em i kirap autim ol dispela tok long ol manmeri i stap klostu long em. Tasol mipela i no save haus bilong em i stap we; mipela i kisim tasol nem bilong ples bensin em man bilong em i wok long en.
Taim mipela i kam klostu long dispela ples bensin bilong painim man bilong dispela meri, wanpela man i kam na em i tok, “Yes, olsem wanem?” Mipela i tokim em, mipela i kam painim man bilong dispela meri. Dispela man i makim long han wanpela mekenik i wok long wanpela ka, na wantu em i lusim mipela i go. Mipela i go sekanim dispela mekenik na mipela i tokim em mipela i laik i go lukim meri bilong em. Em i pret, tasol em i kisim mipela i go long haus bilong em, na taim mipela i wokabaut long rot em i tokim mipela, dispela man mipela i bin toktok wantaim em pastaim em i ran i go long hetman bilong lain polis ol i save wok hait (ol i kolim P.I.D.E.) bilong toksave long em olsem mipela i kam pinis. Ol i save mipela bai kam na ol i laik holim mipela! Man bilong dispela meri i tok, ol polis i save was long meri bilong em, long wanem em i save autim tok, na ol i bin opim dispela pas i tokim em olsem mipela bai kam lukim em. Ol i kisim pinis Baibel bilong em, tasol em i gat gutpela tingting na em i gat narapela Baibel em i haitim pinis! Na ol i bin kisim bisop Katolik i kam lukim em bilong pulim tingting bilong em na bai em i no autim tok moa long Jehova na long Kingdom!
Taim mipela i bungim dispela meri, em i amamas nogut tru na em i holimpas Jois. Em i krai long man bilong em bambai em i orait long mipela i slip long haus bilong tupela, tasol man i no laik na em i go bek long wok. Mipela i toktok wantaim em inap liklik taim tasol. Mipela givim sampela tok bilong Baibel long em bilong strongim bel bilong em, na mipela i tokim em, “Yu mekim gutpela wok,” long wanem em i karim hevi na sanap strong. Mipela i no laik i stap longtaim wantaim em na bai em i kisim narapela hevi gen long dispela, olsem na mipela i tokim em, taim i no gat ol dispela hevi, bai mipela i kam lukim em gen. Mipela i lusim haus bilong em na mipela kalap long ka i go long dispela ples bensin na kisim bensin. Mipela lukim sampela plisman i was long mipela, tasol ol i no holim mipela. Mipela lusim dispela ples na i go long Beira bilong lukim liklik kongrigesen i stap long dispela taun, na bihain mipela i go bek long Simbabwe. Sampela mun bihain, rot i op na mipela i go bek lukim dispela meri, na dispela taim mipela inap kaikai wantaim em na man bilong em na pikinini meri bilong em. Bihain, wanpela taim em i go long Potyugal na em i kisim baptais, na em i kamap wanpela meri bilong wok strong long autim tok bilong Kingdom.
Mipela save go moa long hap bilong not na lukim ol man long hap bilong Kelimane, na Nampula, na Nakala, em wanpela liklik taun long nambis. Long Nakala mipela i save go lukim famili Soares. Papa bilong dispela famili em i bin harim tok i tru pastaim long Potyugal. Bihain em i lusim Potyugal na em i go sindaun long hap bilong Mosambik, na ol brata long taun Lorenko Markes i stadi wantaim em na meri pikinini bilong em. Taun Lorenko Markes i nambawan biktaun bilong kantri Mosambik na nau ol i kolim Maputo. Mipela i kam longwe rot tru bilong lukim dispela famili tasol, na ol i pilim tru dispela samting. Ol i kamap strong long bilip. Bihain ol i lusim Mosambik na i go sindaun long Saut Afrika, na nau pikinini meri bilong em, em Manuela, em i wok long Betel long Saut Afrika na tanim tok i go long tok Potyugal.
Mipela bin i go lukim kongrigesen long Lorenko Markes planti taim. Bilong i go lukim ol, mipela lusim Blantaia na raun long ol rot nogut inap 1,100 kilomita. Tupela taim ka i bagarap na narapela ka i mas pulim mipela i go long biktaun Salisberi (nau ol i kolim Harare). Maski mipela i hatwok, mipela i amamas long lukim dispela liklik lain long Lorenko Markes i kamap wanpela gutpela kongrigesen maski i gat tambu long wok bilong ol. Ol i save mekim ol liklik kibung sekit, tasol ol i mekim long bus olsem ol i bung wantaim bilong mekim piknik samting. Sampela taim ol i stretim rot bilong brukim boda na mekim kibung long Nelspruit, long hap bilong Saut Afrika. Dispela samting i helpim ol brata long Lorenko Markes long save gut long oganaisesen bilong Jehova na long kamap strong long spirit.
Kongrigesen long Beira tu i kamap strong. Tasol i gat kain kain hevi bilong gavman long Mosambik, olsem na ol brata i go nabaut na nau ol i stap long Potyugal, Saut Afrika, Kanada, Brasil, Amerika, na long sampela kantri moa. Yumi mas litimapim nem bilong Jehova, long wanem em yet i save “mekim kaikai i kamap.” (1 Korin 3:6, 7) Em nau, inap 10-pela yia mipela i wok long helpim ol brata long Mosambik taim gavman bilong Potyugal i bosim ples. Taim mipela i tingim dispela wok mipela i bin mekim, mipela kirap nogut long strong bilong Jehova long opim rot long mipela bambai mipela inap mekim dispela wok.
Wanpela taim mipela i go long Nampula long hap bilong not, na wanpela plisman bilong dispela lain polis i save wok hait em i holim mipela. Em i kisim olgeta buk na nius, na ol Baibel bilong mipela tu, na em i tokim mipela i tambu tru long mipela i kam bek gen long Mosambik. Tasol maski, Jehova i helpim mipela na bihain mipela i go bek long dispela kantri planti taim. Taim mipela kamap long boda, mipela save beten askim Jehova long helpim mipela na soim rot long mipela bambai mipela inap i go insait long dispela kantri, na bai mipela inap bihainim laik bilong em na helpim na strongim ol brata bilong dispela hap.
Long 1979 Sosaiti i salim mipela i go wok long kantri Botswana. Dispela kantri i gat bikpela graun, inap olsem hap bilong graun bilong Saut Afrika. Tasol bikpela hap bilong dispela graun i ples wesan nating, ol i kolim Kalahari. Ol man bilong dispela kantri i no planti; lain bilong ol i no winim wan milion. Long dispela hap tu i gat gutpela wok mipela inap mekim. Mipela i bin helpim ol brata long wokim wanpela Haus Kingdom na haus misineri long Gaborone, em nambawan biktaun bilong dispela kantri. Na mipela inap helpim ol man i save long tok ples Potyugal, em ol i bin ranawe lusim kantri Angola; mipela lainim ol long ol tok bilong Baibel.
Na mipela inap helpim tupela yangpela i bin lusim Simbabwe na i kam long Botswana. Long Simbabwe sampela skul i orait long ol Witnes Bilong Jehova i lainim ol skulmanki long ol tok bilong Baibel. Long dispela rot dispela tupela yangpela i bin harim tok. Taim ol i kam i stap long Botswana mipela i bungim tupela na tupela i tok, ol i laik stadi na lainim ol tok bilong Baibel. Tasol papamama i no laik, olsem na tupela i save kam long haus misineri na stadi. Tupela i kamap strong long bilip na kisim baptais, na nau ol i stap Witnes Bilong Jehova.
Taim mi tingim ol wok bilong Jehova mi bin mekim inap 41 yia pinis long 8-pela kantri, mi tenkyu tru long Jehova long ol planti planti blesing mi bin kisim. Maski i gat hatwok, mitupela Jois i amamas long mipela inap helpim planti long kamap strong long wok bilong Kingdom, na mipela i amamas long lukim wok bilong Jehova i go bikpela maski i gat planti hevi na ol birua i stap. Tru tumas, ‘maski ol man i laik harim o ol i no laik harim, mipela i bin wok strong long autim tok.’ Mipela i bin mekim wok bilong Jehova long olgeta de na planti gutpela samting i bin painim mipela. Em gutpela wok tru yumi inap mekim, na mipela i laik kirapim ol narapela brata sista long mekim sapos ol inap stretim rot, na bai ol inap kisim amamas bilong mekim dispela wok.—2 Timoti 4:2.
[Mep long pes 25]
(Bilong save ol dispela rait i stap we long pes, lukim buk o magasin)
ANGOLA
SAMBIA
MALAWI
aMsimba
Blantaia
MOSAMBIK
Nakala
Beira
Maputo
SIMBABWE
Harare
NAMIBIA
BOTSWANA
Gaborone
SAUT AFRIKA
SOLWARA INDIAN
600 km
[Piksa long pes 28, 29]
Taim wara i daun tumas, tupela man bai holim baklain na pulim mipela i go
[Piksa bilong Hal na Joyce Bentley long pes 27]