Yu Ting Yu Mas Bihainim Sabat Long Olgeta Wik?

LONG 1988 samting, sampela liklik lain bilong lotu Metodis ol i banisim Suva, em biktaun bilong Fiji. Ol man, meri, na pikinini​—⁠em olgeta i pasim klos bilong lotu​—⁠ol i wokim 70 rotblok na sanap was i stap. Ol i stopim olgeta ka bilong ol kampani i ran long rot na ol i pasim olgeta balus na bai ol i no inap raun insait long kantri na go long ol narapela kantri. Wanem samting i kirapim ol long mekim olsem? Ol i strong long kantri i mas kirap gen long bihainim lo bilong de Sabat.

Long Israel, olgeta nupela haus i gat planti plua long en, em ol i bin wokim kirap long 2001 na i kam, ol i mas i gat wanpela eleveta i save stop nating long olgeta wan wan plua. Bilong wanem? Ol i mekim olsem bambai ol Juda husat i strong long bihainim Sabat kirap long Fraide apinun i go inap long Sarere apinun, ol i no ken mekim “wok” bilong presim baten bilong eleveta.

Long Tonga, em wanpela ailan long Saut Pasifik, i tambu long mekim olgeta kain wok long Sande. Ol balus i no inap pundaun, na ol sip i no inap sua. Sapos man i sainim wanpela kontrak long Sande, dispela kontrak bai i no gat strong. Mama Lo o konstitiusen bilong Tonga i tok Sande i mas i stap olsem “de holi” long olgeta manmeri, maski ol i gat wanem lotu. Bilong wanem? Long wanem, ol i laik bai olgeta manmeri long Tonga i mas bihainim lo bilong Sabat.

Olsem ol dispela stori i kamapim, planti man i ting God i laik bai ol i mas bihainim Sabat long olgeta wik. Sampela i tok dispela lo bilong Sabat em i bikpela samting tru, ol i ting long dispela rot bai yumi kisim laip i stap oltaim oltaim. Sampela i ting nambawan bikpela lo God i bin givim long ol man, em long bihainim lo bilong Sabat. Orait Sabat em i wanem samting? Na yu ting Baibel i strong long ol Kristen i mas bihainim lo bilong de Sabat long olgeta wik o olsem wanem?

Sabat Em i Wanem Samting?

Dispela tok “Sabat” i kam long wanpela tok Hibru mining bilong en “malolo, stopim, lusim.” Tru, stori bilong Buk Stat i tok, long de namba seven God Jehova i malolo long wok bilong em. Tasol bihain, long taim bilong Moses, God i tokim lain bilong em long malolo inap wanpela de olgeta i gat 24 aua long en, olsem Sabat. (Stat 2:⁠2) Bihain long ol Israel i lusim Isip long 1513 B.C.E., Jehova i wokim mirakel na givim mana long ol long ples drai nating. Jehova i tokim ol long lo bilong kisim dispela mana, olsem: “Long 6-pela de bilong olgeta wik, yupela i mas kisim dispela kaikai. Na de namba 7 em i de bilong malolo, olsem na long dispela de bai i no gat kaikai i stap long graun.” (Kisim Bek 16:26) Baibel i tok moa olsem “bihain ol i malolo long de namba 7,” kirap long taim san i go daun long Fraide apinun i go inap long taim san i go daun long Sarere apinun.​—⁠Kisim Bek 16:⁠30.

Bihain liklik long taim Jehova i givim dispela tok long ol, em i givim lo long ol olsem ol i mas malolo long de Sabat, na em i putim dispela lo wantaim Tenpela Lo em i givim long Moses. (Kisim Bek 19:⁠1) Namba 4 lo i tok olsem: “Yupela i mas tingim gut de Sabat na makim olsem de bilong mi yet. Yupela i gat 6-pela de bilong mekim wok insait long wanpela wik. Tasol de namba 7, em i bilong mi God, Bikpela bilong yupela. Em i de bilong malolo.” (Kisim Bek 20:​8-10) Olsem na pasin bilong bihainim de Sabat i kamap bikpela samting long laip bilong ol Israel.​—⁠Lo 5:⁠12.

Yu Ting Jisas i Bihainim Lo Bilong Sabat?

Yes, Jisas i bin bihainim lo bilong Sabat. Baibel i tok long em olsem: “Long taim stret God i bin makim, em i salim Pikinini bilong en i kam. Meri i karim em, na em i kamap man i stap aninit long lo.” (Galesia 4:⁠4) Jisas i kamap insait long lain Israel, olsem na em i stap aninit long Lo, na wanpela bilong ol dispela lo em lo bilong Sabat. Bihain long taim Jisas i dai, long dispela taim tasol kontrak bilong Lo i pinis. (Kolosi 2:​13, 14) Sapos yumi save long taim stret ol dispela samting i bin kamap, dispela bai helpim yumi long kliagut long tingting bilong God long dispela samting.​—⁠Lukim sat long pes 15.

Tru, Jisas i bin tok: “Yupela i no ken ting mi kam bilong rausim tok bilong lo na tok bilong ol profet. Nogat. Mi no kam bilong rausim, mi kam bilong inapim tru.” (Matyu 5:17) Tasol wanem mining bilong dispela tok “inapim”? Yumi ken tok piksa olsem: Bilong inapim kontrak bilong wokim haus i go inap long haus i pinis, man bilong wokim haus i no save brukbrukim kontrak pepa, nogat, em i save pinisim wok bilong sanapim haus. Tasol taim wok i pinis na papa bilong haus i amamas long haus, orait man bilong wokim haus i inapim pinis dispela kontrak na em i no gat wok moa long bihainim. Na olsem tasol, Jisas i no brukbrukim “kontrak” bilong Lo, nogat, em i inapim tru Lo long rot bilong bihainim stret olgeta tok bilong en. Taim “kontrak” bilong Lo em inap pinis, lain bilong God i no gat wok moa long bihainim.

Ol Kristen i Mas Bihainim o Nogat?

Krais em inapim pinis Lo, olsem na yumi laik save, ol Kristen i gat wok long bihainim lo bilong de Sabat bilong olgeta wik? Holi spirit i kirapim aposel Pol long tok: “Yupela i no ken larim wanpela man i sutim tok long yupela, na tok yupela i no bihainim ol lo bilong kaikai na dring na ol lo bilong ol bikpela de bilong lotu na bilong ol lotu bilong nupela mun na bilong de Sabat. Dispela ol samting ol i olsem ol piksa nating bilong ol samting i laik kamap bihain. Tasol Krais em i samting tru.”​—⁠Kolosi 2:​16, 17.

Dispela tok bilong Pol i makim olsem i gat senis i kamap long ol samting God i laik bai ol wokman bilong em i mas mekim. Bilong wanem senis i kamap? Long wanem, ol Kristen i aninit long nupela lo, em “lo bilong Krais.” (Galesia 6:⁠2) Olpela kontrak bilong Lo em God i bin givim long ol Israel long rot bilong Moses, em i pinis taim indai bilong Krais i inapim dispela Lo. (Rom 10:4; Efesus 2:15) Yu ting dispela i pinisim tu lo bilong de Sabat? Yes, dispela lo tu i pinis. Pol i tok, “lo i no pasim yumi moa,” na bihain long en Pol i toktok long wanpela bilong Tenpela Lo. (Rom 7:​6, 7) Olsem na Tenpela Lo​—⁠na lo bilong Sabat i insait long en​—⁠ol i hap bilong dispela Lo em i pinis. Olsem na ol manmeri i lotuim God, ol i no gat wok long bihainim lo bilong Sabat long olgeta wik, nogat.

Senis i kamap, olsem pasin ol Israel i bin bihainim long mekim lotu i pinis na pasin ol Kristen i bihainim bilong mekim lotu i kamap, na yumi ken tok piksa long en olsem: Wanpela kantri inap senisim konstitiusen bilong en. Orait taim ol i strongim nupela konstitiusen bilong kantri, ol man i no gat wok moa long bihainim olpela konstitiusen. Ating sampela lo insait long nupela konstitiusen i wankain olsem olpela konstitiusen, tasol sampela i narapela kain. Olsem na man i mas skelim gut nupela konstitiusen bambai em i ken save long ol lo em i mas bihainim long nau. Na tu, man i stap gut long kantri bilong em, em bai i gat laik long save long wanem taim nupela konstitiusen i kirap.

Na olsem tasol, God Jehova i bin givim planti lo long lain Israel, winim 600 lo, na 10-pela bikpela lo i insait long en. I gat ol lo bilong stretpela pasin, ol ofa, ol lo bilong helt, na long de Sabat. Tasol Jisas i tok ol disaipel bilong em bai kamap olsem wanpela nupela “lain manmeri.” (Matyu 21:43) Kirap long 33 C.E., dispela lain i gat nupela “konstitiusen,” na as bilong en em tupela bikpela lo​—⁠ol i mas laikim tru God na laikim tru ol narapela man. (Matyu 22:​36-40) Tru, aninit long “lo bilong Krais” i gat ol lo i wankain olsem ol Lo em God i bin givim long ol Israel, tasol sampela i narapela kain tru na sampela i pinis na i no gat wok moa long bihainim. Lo i tok ol man i mas bihainim lo bilong de Sabat long olgeta wik, em wanpela bilong ol dispela lo ol i no gat wok moa long bihainim.

Yu Ting God i Senisim Ol Lo Bilong Em?

Dispela senis olsem Lo Bilong Moses i pinis na lo bilong Krais i kamap, yu ting dispela i makim olsem God i bin senisim ol lo bilong em? Nogat. Papa i save stretim stretim sampela lo em i putim long ol pikinini bilong em, long wanem, em i tingim krismas bilong ol na sindaun bilong ol. Na olsem tasol, Jehova i bin stretim stretim ol lo em i laik bai ol manmeri bilong em i mas bihainim. Aposel Pol i stori long dispela olsem: “Taim bilong bilip i no kamap yet, orait lo i kalabusim yumi i stap. Na yumi stap kalabus inap taim bilong bilip i kamap ples klia pinis. Lo i stap olsem waspapa bilong yumi, bilong bringim yumi i kam long Krais, bai yumi ken bilip long gutnius na God i ken kolim yumi ol stretpela manmeri. Na nau taim bilong bilip i kamap pinis, na yumi no i stap aninit long dispela waspapa moa.”​—⁠Galesia 3:​23-25.

Olsem wanem dispela tok bilong Pol i stret wantaim ol samting bilong Sabat? Tingim dispela tok piksa: Taim sumatin i stap long skul, ating em i mas lain long mekim sampela samting, olsem wokim ol samting long diwai, long wanpela de ol i makim long olgeta wik. Tasol taim em i lusim skul na em i kisim wok, ating long olgeta de bilong wik em i mas mekim wok long dispela save em i bin kisim, na i no long wanpela de tasol long wik. Na olsem tasol, taim ol Israel i stap aninit long Lo, ol i mas i gat wanpela de long olgeta wik long malolo na mekim lotu. Tasol ol Kristen i mas lotuim God long olgeta de, na i no long wanpela de tasol long wik.

Olsem wanem? I gat rong long makim wanpela de long olgeta wik long malolo na mekim lotu? Nogat. Baibel i larim olgeta wan wan yet long wokim disisen long dispela samting, na i tok: “Wanpela man i ting wanpela de em i bikpela moa na i winim ol arapela de. Na narapela man i ting olgeta de i wankain tasol. Tasol olgeta man wan wan ol i mas save gut long wanem tingting em i stret long bel bilong ol.” (Rom 14:⁠5) Tru, ating sampela i tingim wanpela de olsem em i holi moa, winim ol narapela de, tasol Baibel i kamapim klia olsem God i no tokim ol Kristen long ol i mas bihainim lo bilong de Sabat.

[Rait long pes 12]

“Long 6-pela de bilong olgeta wik, yupela i mas kisim dispela kaikai. Na de namba 7 em i de bilong malolo, olsem na long dispela de bai i no gat kaikai i stap long graun.”​​—⁠KISIM BEK 16:⁠26

[Rait long pes 14]

“Lo i stap olsem waspapa bilong yumi, bilong bringim yumi i kam long Krais, bai yumi ken bilip long gutnius na God i ken kolim yumi ol stretpela manmeri. Na nau taim bilong bilip i kamap pinis, na yumi no i stap aninit long dispela waspapa moa.”​​—⁠GALESIA 3:​24, 25

[Blok/Sat long pes 13]

Intenesenel Det Lain na Sabat

Intenesenel det lain i givim hatwok long ol man husat i ting ol i mas bihainim lo bilong de Sabat long wankain de olsem ol i save mekim long olgeta hap. Dispela det lain i kain olsem wanpela mak i katim solwara Pasifik i go tupela hap. Ol kantri i stap long hap wes bilong dispela mak ol i stap wanpela de paslain long ol kantri i stap long hap is bilong dispela mak.

Olsem: Taim em i Sande long Fiji na Tonga, em i Sarere long Samoa na Nue. Olsem na sapos man i bihainim lo bilong Sabat long Fiji long Sarere, ol wanlotu bilong em long Samoa​—⁠em ol i stap longwe inap 1,145 kilomita tasol​—⁠ol bai mekim wok bilong ol, long wanem, em i Fraide long Samoa.

Ol lain bilong lotu Sevende long Tonga ol i save bihainim lo bilong Sabat long Sande, long wanem, ol i ting taim ol i mekim olsem, ol i mekim long wankain de olsem ol wanlotu bilong ol long Samoa, em ol i stap longwe inap 850 kilomita. Tasol long dispela wankain taim, ol Sevende long Fiji, em ol i stap longwe inap 850 kilomita samting, ol i no malolo, long wanem, em i Sande long hap bilong ol, na ol i save bihainim lo bilong Sabat long Sarere!

[Sat]

(Bilong save ol dispela rait i stap we long pes, lukim buk o magasin)

  \

  \

  \

\ SAMOA

  \

​—⁠ ― ― ― ― ― ― ―

FIJI   \

Sande \ Sarere

  \

  \

TONGA   \

  \

  \

  \

[Sat long pes 15]

(Bilong save ol dispela rait i stap we long pes, lukim buk o magasin)

Ol Samting Bilong Sabat Yumi Ken Tingim:

Tru, ating wanpela ves bilong Baibel i tok ol man i mas bihainim lo bilong Sabat long olgeta wik, tasol yumi mas skelim gut wanem taim dispela tok i bin kamap.

2010 C.E.

[Piksa long pes 11]

Ol niuspepa i stori long ol rotblok ol lain Metodis i wokim na i strong long Fiji i mas bihainim gen lo bilong de Sabat

[Kredit Lain]

Courtesy of the Fiji Times