“Mi Laikim Tumas Tok Yu Givim Mi”

“Olgeta tok bipo ol i bin raitim long buk bilong God, em ol i bin raitim bilong skulim yumi.”​​—ROM 15:​4.

 1. Long wanem ol rot Jehova i save givim ol tok long yumi? Bilong wanem yumi mas i gat ol dispela tok?

JEHOVA i save givim ol tok long lain bilong em bilong helpim ol long karim ol hevi bilong dispela taim nogut. Sampela bilong ol dispela tok yumi save kisim taim yumi yet i ritim Baibel, na sampela tok yumi save kisim long rot bilong ol tok na bekim long ol miting Kristen. Planti samting yumi ritim na harim long dispela kain taim i no nupela samting long yumi. Ating yumi bin harim kain tok olsem pinis. Yumi save lusim tingting long ol samting, olsem na long olgeta taim yumi mas kirapim gen tingting bilong yumi long ol lo na tok bilong Jehova na ol samting em i tingting pinis long mekim. Yumi mas tenkyu long ol tok bilong God. Ol i helpim yumi long tingim as na yumi kirap wokabaut long pasin God i makim, na dispela i strongim yumi. Olsem na man bilong raitim song i tok long Jehova: “Mi laikim tumas tok yu givim mi bilong stiaim lek bilong mi.”​​—Song 119:24.

2, 3. (a) Bilong wanem Jehova i kamapim ol stori bilong ol man na meri long Baibel na yumi ken ritim long nau? (b) Wanem ol stori bilong Baibel bai yumi toktok long en long dispela stadi?

² Maski ol i raitim Tok Bilong God inap planti handet yia i go pinis, em i gat strong. (Hibru 4:12) Em i kamapim ol stori bilong ol man na meri i bin i stap tru. Tru, pasin na tingting bilong ol man long taim ol i raitim Baibel i narapela kain tru long taim bilong yumi, tasol ol hevi bilong yumi long nau i wankain long ol hevi bilong ol dispela manmeri bilong bipo. Planti stori i stap long Baibel bilong helpim yumi, ol i stori long ol man na meri em ol i bin laikim tru Jehova na ol i bin mekim tru wok bilong em maski ol bikpela hevi i painim ol. Sampela narapela stori i tokaut long ol pasin God i nolaik tru long en. Jehova i putim olgeta dispela stori long Baibel, ol gutpela stori na stori nogut, bilong skulim yumi long ol bikpela samting. I olsem aposel Pol i tok: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.”​​—Rom 15:4.

³ Orait nau yumi ken skelim tripela stori long Baibel: stori bilong ol samting Devit i mekim long Sol, bilong Ananaias na Safaira, na bilong pasin Josep i bin mekim long meri bilong Potifar. Olgeta dispela stori i skulim yumi long ol bikpela samting.

Stap Gut Long Rot God i Makim

4, 5. (a) Wanem samting i kamap namel long King Sol na Devit? (b) Devit i mekim wanem taim Sol i birua long em?

⁴ King Sol i no stap gut long Jehova na em i no gutpela inap long em i ken bosim ol lain bilong Em. Olsem na God i sakim em na kirapim profet Samuel long makim Devit long kamap king bilong Israel. Taim Devit i bin kamapim olsem em i wanpela strongpela man bilong pait na ol man i litimapim nem bilong em, Sol i kirap tingim Devit olsem birua bilong em. Sol i wok long traim long kilim em i dai. Long olgeta taim Devit i abrusim bagarap, long wanem, Jehova i lukautim em.​​—1 Samuel 18:​6-12, 25; 19:​10, 11.

⁵ Inap planti yia Devit i mas raun olsem wanpela ranaweman. Taim em i gat rot long kilim i dai Sol, lain bilong Devit i kirapim em long mekim olsem, ol i tok Jehova i givim dispela birua long han bilong Devit. Tasol Devit i no kilim i dai Sol. Pasin bilong stap gut long Jehova na rispektim namba bilong Sol olsem king bilong lain bilong God i kirapim em long bihainim pasin i stret. Jehova i bin makim Sol olsem king bilong Israel. Na sapos Jehova i laik, em bai rausim em long dispela wok. Devit i ting i no wok bilong em long mekim sampela samting. Taim em i mekim pinis olgeta samting em inap long mekim bilong daunim pasin birua bilong Sol, Devit i tok: “Bai Bikpela yet i kilim Sol o Sol yet bai i dai long taim bilong en o ol birua bai i kilim em long pait. Bikpela i no ken larim mi i bagarapim dispela king em i bin makim.”​​—1 Samuel 24:​3-15; 26:​7-20.

 6. Bilong wanem em i bikpela samting long yumi save long stori bilong Devit na Sol?

⁶ Dispela stori i skulim yumi long wanpela bikpela samting. Olsem wanem? Sampela taim yu tingting pinis long i gat wanem as na sampela hevi i kamap insait long kongrigesen Kristen? Ating wanpela brata i mekim sampela pasin i no stret. Samting em i mekim i no bikpela rong, tasol em i bagarapim bel bilong yu. Gutpela yu mekim wanem? Yu laik soim olsem yu tingim dispela brata Kristen na yu laik stap gut long Jehova, olsem na yu bai toktok gut wantaim dispela brata, na yu laik stap wanbel gen wantaim em. Tasol olsem wanem sapos dispela hevi i stap yet? Taim yu mekim pinis olgeta samting yu inap long mekim bilong stretim dispela hevi, ating yu laik larim dispela hevi i stap long han bilong Jehova. Devit i mekim olsem.

 7. Olsem Devit, yumi mas mekim wanem taim ol man i mekim pasin i no stret long yumi o ol i bel nogut long yumi?

⁷ O yu gat hevi olsem sampela i mekim pasin i no stret long yu o ol i bel nogut long lotu bilong yu. Ating yu no inap mekim wanpela samting bilong stretim ol dispela hevi long nau. Kain samting olsem i hatwok long karim, tasol pasin Devit i mekim long dispela i skulim yumi long wanpela bikpela samting. Ol song Devit i raitim i kamapim klia olsem Devit i beten strong long God i ken helpim em long abrusim bagarap long han bilong Sol, na ol i kamapim tu olsem Devit i stap gut long Jehova na em i tingting strong long litimapim nem bilong God. (Song 18:​1-6, 25-27, 30-32, 48-50; 57:​1-11) Devit i stap gut long Jehova maski Sol i mekim pasin i no stret long em inap planti yia. Yumi tu i mas i stap gut long Jehova na oganaisesen bilong em maski ol man i mekim pasin i no stret long yumi na maski ol narapela i mekim wanem pasin. Yumi ken save tru olsem Jehova i save gut long samting i painim yumi.​​—Song 86:2.

 8. Ol Witnes Bilong Jehova long Mosambik i bin mekim wanem taim ol samting i traim pasin bilong ol long i stap gut long Jehova?

⁸ Sampela Kristen long Mosambik i olsem gutpela piksa long nau long man i stap gut long Jehova long taim bilong traim. Long 1984, planti taim ol paitman i holim gan i go insait long ol ples bilong ol, na stilim ol samting, kukim ol haus, na kilim i dai sampela man. I no gat planti samting ol dispela trupela Kristen i ken mekim bilong lukautim ol yet. Ol paitman i laik subim ol man long dispela hap long ol i mas insait long lain bilong pait o ol i mas helpim ol long sampela narapela rot. Ol Witnes Bilong Jehova i ting dispela i no stret wantaim bilip Kristen bilong ol olsem ol i mas klia long ol samting bilong pait. Ol paitman i belhat tru long ol. Long dispela taim nogut ol i kilim i dai 30 Witnes, tasol maski ol i tokaut olsem ol bai kilim ol i dai ol i no inap mekim na ol Witnes i lusim God.a Olsem Devit, ol i karim hevi bilong ol man i mekim pasin i no stret long ol, tasol bihain ol i win.

Wanpela Stori Bilong Givim Tok Lukaut

9, 10. (a) Sampela stori long Baibel i ken helpim yumi olsem wanem? (b) Ananaias na Safaira i mekim wanem pasin i no stret?

⁹ Stori bilong sampela man na meri long Baibel i olsem wanpela tok lukaut long yumi long ol pasin yumi mas abrusim. Tru tumas, Baibel i stori long planti man, na sampela wokman bilong God tu, em ol i bin mekim rong na kisim ol hevi long dispela. (1 Korin 10:11) Wanpela stori olsem em bilong Ananaias na Safaira, em tupela marit i stap long kongrigesen Kristen bilong Jerusalem long taim bilong ol aposel.

¹⁰ Bihain long Pentikos 33 C.E., ol Kristen i mas helpim ol nupela bilipman long ol samting bilong skin bambai ol i ken stap long Jerusalem na bung yet wantaim ol aposel. Sampela Kristen long kongrigesen i bin salim hap graun bambai ol i ken helpim ol narapela na ol i no sot. (Aposel 2:​41-45) Ananaias na Safaira i salim hap graun bilong ol na ol i kisim hap mani tasol i kam long ol aposel, tasol ol i tok ol i kisim olgeta mani i kam. Tru, Ananaias na Safaira i ken givim mani inap long laik bilong ol yet, tasol tingting bilong ol i no stret, na ol i giaman. Ol i laik ol narapela i litimapim nem bilong ol na i ting ol i givim planti samting. Holi spirit i stap long aposel Pita, na em i kamapim klia giaman bilong ol, na Jehova i kilim ol i dai.​​—Aposel 5:​1-​10.

11, 12. (a) Wanem sampela gutpela tok long pasin bilong mekim stretpela pasin? (b) Taim yumi bihainim stretpela pasin bai yumi inap kisim wanem ol gutpela samting?

¹¹ Sapos yumi gat tingting long giaman bambai ol narapela i ken tingting olsem yumi gutpela man, stori bilong Ananaias na Safaira i givim bikpela tok lukaut long yumi. Ating yumi inap giamanim ol narapela man, tasol yumi no inap giamanim Jehova. (Hibru 4:13) Planti taim Baibel i kirapim yumi long mekim stretpela pasin long ol narapela, long wanem, ol man bilong giaman bai i no inap i stap long graun i no gat ol pasin nogut long en. (Sindaun 14:2; KTH 21:8; 22:15) Yumi mas save long as na yumi no ken giaman. Man bilong olgeta pasin giaman em Satan tasol.​​—Jon 8:​44.

¹² Taim yumi bihainim stretpela pasin long i stap bilong yumi, dispela bai helpim yumi long planti samting. Olsem: Bai bel bilong yumi i no gat tok na bai yumi amamas long ol narapela i bilip long yumi. Planti taim sampela Kristen i bin kisim wok mani, o ol inap holim wanpela wok mani, long wanem, ol i bihainim stretpela pasin. Tasol bikpela samting moa, sapos yumi bihainim stretpela pasin bai yumi inap i stap pren bilong God i Gat Olgeta Strong.​​—Song 15:​1, 2.

No Ken Mekim Pasin Pamuk

13. Wanem samting i painim Josep? Em i mekim wanem?

¹³ Taim Josep, wanpela pikinini bilong Jekop, i gat 17 krismas, ol i bin salim em olsem wanpela wokboi nating. Bihain em i stap long haus bilong Potifar, wanpela ofisa bilong king bilong Isip, na meri bilong Potifar i aigris long em. Josep i gat strongpela bodi na em i luk nais tru na meri i laik slip wantaim em, na long olgeta de em i askim em: “Yu kam slip wantaim mi.” Josep i stap longwe long famili bilong em na em i stap long wanpela kantri we ol man i no save long em. Em inap slip wantaim dispela meri na ol narapela i no save long en. Tasol taim meri bilong Potifar i holimpas em, Josep i ranawe.​​—Stat 37:​2, 18-​28; 39:​1-​12.

14, 15. (a) Bilong wanem stori bilong Josep i bikpela samting long yumi? (b) Bilong wanem wanpela meri Kristen i amamas long em i bin bihainim tok bilong God?

¹⁴ Josep i kamap bikpela long wanpela famili i aninit long God, na em i save olsem i no stret long wanpela man i slip wantaim wanpela meri i no poroman marit bilong em. Em i tok: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” Ating em i save long tingting God i bin kamapim long gaden Iden olsem wanpela man i mas i stap wantaim wanpela meri tasol, na dispela tingting i stiaim em. (Stat 2:24) Lain bilong God long nau i ken kisim gutpela tingting sapos ol i tingim pasin Josep i bin mekim long dispela taim. Long sampela hap, tingting bilong ol man long maritpasin i no stret liklik, na sapos ol yangpela i no slip wantaim narapela, ol wanlain i save tok bilas long ol. Planti man na meri marit ol i save slip wantaim poroman ol i no marit long ol. Olsem na stori bilong Josep i gutpela tok bilong skulim yumi long nau. Lo bilong God i no senis, sapos man o meri i pamuk em i mekim sin. (Hibru 13:4) Planti em ol i bin larim ol narapela i pulim ol long mekim pasin pamuk ol i tokaut olsem i gat as tru long abrusim dispela pasin. I gat planti samting nogut i painim ol olsem ol i sem, bel i gat tok, pasin jeles, kisim bel, na sik bilong pamuk. Olsem Baibel i tokim yumi, man i mekim pasin pamuk “em i mekim nogut long bodi bilong em yet.”​​—1 Korin 5:​9-​12; 6:​18; Sindaun 6:​23-​29, 32.

¹⁵ I gat as na Jenny,b wanpela Witnes Bilong Jehova i singel, i tenkyu long God long helpim em long tingim wanem samting em i mas mekim. Long ples wok, wanpela wanwok i gat naispela skin i laik grisim em. Taim Jenny i no laik bihainim laik bilong dispela man, em i wok strong moa long grisim em. Em i tok: “Mi hatwok long bihainim stretpela pasin, long wanem, ol meri i save amamas taim wanpela man i soim olsem em i laikim ol.” Tasol Jenny i save olsem dispela man i slip pinis wantaim planti meri na em i laik slip tasol wantaim wanpela meri moa. Taim Jenny i pilim olsem em i laik pundaun, em i beten strong long Jehova bilong helpim em long stap gut long Em. Ol samting Jenny i lainim taim em i mekim wok painimaut long Baibel na ol buk na nius Kristen ol i olsem ol tok lukaut i strongim em long was gut. Wanpela bilong ol dispela tok i bin helpim em, em stori bilong Josep na meri bilong Potifar. Em i tok: “Taim mi wok long tingim olsem mi laikim tru Jehova, mi no ken pret long mi bai mekim wanpela bikpela rong na mekim sin long em.”

Bihainim Tok Bilong God!

16. Taim yumi skelim gen na tingim tingim long bel stori bilong sampela man o meri em Baibel i toktok long ol, olsem wanem dispela inap helpim yumi?

¹⁶ Yumi olgeta i ken mekim ol samting bilong amamas moa long ol lo bilong Jehova taim yumi wok long kliagut moa long as na sampela stori i stap long Baibel. Ol i skulim yumi long wanem samting? Wanem pasin bilong sampela man o meri em Baibel i stori long ol yumi mas bihainim o abrusim? Baibel i stori long planti handet man na meri. Olgeta man i laikim tru tok bilong God ol i mas lain long laikim tru savetingting i bilong givim laip long ol, na ol i mas laikim ol samting ol inap lainim long ol stori Jehova i bin putim long Baibel. Planti taim dispela nius i bin kamapim ol stori bilong sampela man o meri na ol stori inap skulim yumi long sampela samting. I gutpela long skelim gen ol dispela stori.

17. Yu ting olsem wanem long ol tok bilong Jehova? Bilong wanem yu ting olsem?

¹⁷ Yumi amamas tru long gutpela pasin sori Jehova i soim long ol man i wok strong long bihainim laik bilong em, a? Yumi no gutpela olgeta, olsem ol man na meri em Baibel i stori long ol, ol i no bin gutpela olgeta. Tasol stori bilong ol long Baibel long ol samting ol i bin mekim i helpim tru yumi. Taim yumi bihainim ol tok bilong Jehova, dispela inap helpim tru yumi long abrusim ol bikpela rong, na yumi inap bihainim ol gutpela pasin bilong ol manmeri i bin bihainim stretpela pasin. Sapos yumi mekim olsem, yumi inap tokaut olsem man bilong raitim song, em i tok: “Ol man i bihainim tru olgeta tok bilong God, ol i ken amamas. Mi save bihainim ol lo bilong yu. Mi laikim tumas ol dispela lo.”​​—Song 119:​2, 167.

[Ol Futnot]

Bai Yu Bekim Olsem Wanem?

• Tingting bilong Devit long Sol inap lainim yumi long wanem samting?

• Stori bilong Ananaias na Safaira inap skulim yumi long wanem samting?

• Bilong wanem stori bilong Josep i bikpela samting long yumi long nau?

[Piksa long pes 26]

Bilong wanem Devit i no larim ol man i kilim i dai Sol?

[Piksa long pes 27]

Stori bilong Ananaias na Safaira i skulim yumi long wanem samting?

[Piksa long pes 28]

Wanem samting i kirapim Josep long ranawe long meri bilong Potifar taim em i traim Josep long slip wantaim em?