Bilong Wanem Yu Mas Tingim Kaikai Bilong Bikpela?
KRAIS JISAS i bin kirapim Kaikai Bilong Bikpela long laspela nait em i bin i stap long graun. Em Fonde long apinun, long Mas 31, na Jisas i dai long Fraide long apinun, long Epril 1. Long kalenda bilong ol Juda, de i save kirap long apinun na i pinis long narapela apinun, olsem na dispela Kaikai Bilong Bikpela na dai bilong Jisas i bin kamap long wanpela de tasol, long Nisan 14, long yia 33.
Bilong wanem Jisas i kirapim dispela kaikai? Na dispela bret na wain i makim wanem samting? Husat i mas kaikai na dring long en? Hamas taim ol i mas mekim dispela kaikai? Olsem wanem dispela kaikai em i wanpela bikpela samting yu mas tingim?
Bilong Wanem Jisas i Kirapim?
Jisas i tokim ol disaipel long dispela Kaikai Bilong Bikpela olsem: “Yupela i mas mekim olsem bilong tingim mi.” (1 Korin 11:24) Sampela taim ol i kolim dispela Kaikai Bilong Bikpela olsem Bung Bilong Tingim i Dai Bilong Krais.
Inap long taim em i dai, Jisas i holimpas bilip na em i strong long helpim wok king bilong Jehova, olsem na em i kamapim long ples klia tok giaman bilong Satan, em i bin sutim tok long ol stretpela man na i tok, ol i save tingim skin bilong ol yet na ol i mekim wok bilong God. (Jop 2:1-5) Dai bilong Jisas i mekim gut bel bilong Jehova.—Sindaun 27:11.
Taim Jisas i dai, em i “givim laip bilong em bilong baim bek planti manmeri.” (Matyu 20:28) Taim namba wan man i mekim rong, em i tromoi nambawan gutpela laip na gutpela sindaun na laip oltaim. Tasol “God i laikim tumas olgeta manmeri bilong graun, olsem na em i givim dispela wanpela Pikinini long ol . . . bai ol i kisim laip i stap gut oltaim oltaim.” (Jon 3:16) “Sin i save givim pe long ol wokboi bilong en. Dispela pe em dai tasol. Tasol God i save givim nating presen long yumi, em laip i stap oltaim . . . yumi kisim long wok bilong Jisas Krais, Bikpela bilong yumi.”—Rom 6:23.
“Mi Kisim Long Bikpela”
Tok bilong Pol long dispela bung bilong tingim i dai bilong Krais em inap givim sampela save long yumi. Em i tok: “Dispela tok mi bin givim long yupela, em mi kisim long Bikpela tasol. Dispela tok i olsem: . . . Jisas i kisim bret, na i tenkyu long God, na i brukim, na i tok, ‘Dispela em i bodi bilong mi, mi givim bilong helpim yupela. Yupela i mas mekim olsem bilong tingim mi.’ Na taim ol i kaikai pinis, em i kisim kap wain na i mekim wankain pasin long en. Em i tok olsem: ‘Dispela kap wain em i nupela kontrak mi mekim long blut bilong mi yet. Olgeta taim yupela i dring long dispela kap, yupela i mas mekim olsem bilong tingim mi.’ Dispela tok bilong Jisas i soim olsem, olgeta taim yupela i kaikai dispela bret na dring long dispela kap, yupela i save tokaut long pen na i dai bilong Bikpela, inap long taim em i kam bek.”—1 Korin 11:23-26.
Pol i no bin i stap wantaim Jisas na 11-pela aposel long Nisan 14 long yia 33, olsem na ol dispela tok em i bin “kisim long Bikpela,” ating Bikpela Jisas yet i bin kamapim long em na em i raitim ol dispela tok. Long nait Judas i redi long putim Jisas long han bilong ol birua, Jisas i kamapim dispela bung bilong tingim i dai bilong em. Ol man em ol inap long kisim dispela bret na wain, ol i mekim olsem bilong tingim em.
Mekim Inap Hamas Taim?
Pol i bin tok, “Olgeta taim yupela i kaikai dispela bret na dring long dispela kap, yupela i save tokaut long pen na i dai bilong Bikpela, inap long taim em i kam bek.” Orait, wanem insait bilong dispela tok? Ol Kristen em God i bin makim ol na ol i bilong i go long heven, ol bai kisim dispela bret na wain long “olgeta taim” i go inap long ol i dai, na bihain bai ol i kirap bek na i go i stap long heven. Long ai bilong God na ol man, long olgeta taim ol bai kamapim bilip bilong ol, ol i bilip long ofa bilong Jisas. Pol i tok, ol i mas mekim “inap long taim em i kam bek.” Ating Pol i laik tok, wok bilong kisim bret na wain bilong tingim i dai bilong Jisas, em bai stap inap long taim Jisas i kam bilong kirapim bek lain bilong em, na em bai kisim ol i go long heven. (1 Tesalonaika 4:14-17) Dispela i stret wantaim tok Jisas i bin givim long 11-pela aposel, olsem: “Sapos mi go redim ples bilong yupela, bai mi kam bek na kisim yupela i go i stap wantaim mi.”—Jon 14:3.
Olsem wanem? Yumi mas mekim bung long olgeta de o long olgeta wik bilong tingim i dai bilong Jisas? Tingim dispela: Jisas i kirapim Kaikai Bilong Bikpela na em i dai long de bilong Pasova, em bung bilong tingim taim God i bin kisim bek ol Israel long Isip. (1 Korin 5:7) Ol i bin mekim Pasova long wanpela taim tasol long olgeta yia, long Nisan 14. (Kisim Bek 12:6, 14; Wok Pris 23:5) Olsem na dispela bung bilong tingim i dai bilong Jisas, yumi mas mekim long wanpela taim tasol long olgeta yia.
Inap planti handet yia, planti Kristen ol i bin mekim dispela bung long wanpela taim long olgeta yia, long Nisan 14. Wanpela man bilong raitim buk (J. L. von Mosheim) i tok, ‘Ol Kristen long Esia Maina ol i save mekim dispela bung bilong tingim dai bilong Krais Jisas long wankain taim em ol Juda i save kaikai sipsip bilong Pasova, em long apinun bilong namba fotin de bilong namba wan mun [Nisan]. Ol i ting ol i mas bihainim stret pasin bilong Jisas, wankain olsem ol i mas bihainim wanpela lo.’
Samting Bret na Wain i Makim
Pol i tok, Jisas “i kisim bret, na i tenkyu long God, na i brukim.” Dispela bret i kain olsem bisket, na ol i bin wokim long plaua na wara tasol, na i no gat yis long en; olsem na ol i mas brukim na bai ol i ken kaikai. Baibel i save mekim tok piksa long yis bilong makim sin. Pol i bin strong long ol Kristen long Korin i mas rausim wanpela man bilong kongrigesen em i bin mekim pasin pamuk, na Pol i tok: “Ating yupela i no save olsem, liklik yis tasol i save mekim olgeta bret i solap? Olsem na yupela i mas rausim olgeta olpela yis, bai yupela i ken i stap olsem nupela bret i no gat yis. . . . Yumi mas rausim olgeta sin na pasin nogut long laip bilong yumi. . . . Na yumi mas bihainim pasin bilong klinpela bel na tok tru, na dispela pasin bai i stap olsem nupela bret i no gat yis.” (1 Korin 5:6-8) Liklik hap yis tasol i save mekim olgeta bret i solap, na olsem tasol sapos ol i no rausim man nogut long kongrigesen, bai kongrigesen i stap olsem doti long ai bilong God. Ol i mas rausim dispela “yis” i stap namel long ol, olsem ol Israel i no ken larim hap yis i stap long haus bilong ol long Bikpela De Bilong Bret i No Gat Yis, em i save kamap bihain long Pasova.
Taim Jisas i kisim bret long bung bilong tingim i dai bilong em, em i tok olsem: “Dispela em i bodi bilong mi, mi givim bilong helpim yupela.” (1 Korin 11:24) Dispela bret i makim gutpela skin bilong Jisas. Pol i tok: “Taim Krais i kam long graun, em i tok olsem, ‘Yu no laik bai ol i kilim abus na mekim ofa. Tasol yu bin redim wanpela bodi bilong givim long mi. Ol ofa em ol i save kukim olgeta long paia, na ol ofa bilong tekewe sin, em tu yu no laikim. Orait nau mi tok olsem, “God, mi kam pinis. . . . bilong bihainim laik bilong yu.” ’ . . . Krais i . . . givim bodi bilong em yet olsem ofa wanpela taim tasol.” (Hibru 10:5-10) Nambawan gutpela bodi bilong Jisas i no gat sin long en, olsem na em inap givim olsem ofa bilong helpim ol manmeri bilong graun.—Hibru 7:26.
Taim Jisas i beten pinis long kap wain, em i tok: “Dispela kap wain em i nupela kontrak mi mekim long blut bilong mi yet.” (1 Korin 11:25) Blut bilong ol bulmakau na meme ol i bin mekim ofa long en, em i bin strongim kontrak bilong Lo em God i bin wokim wantaim ol Israel, na olsem tasol blut bilong Jisas i strongim nupela kontrak. Jisas i toktok long dispela nupela kontrak, na dispela i helpim yumi long save, husat ol i mas kisim bret na wain long bung bilong tingim i dai bilong Jisas.
Husat i Mas Kisim?
Lain bilong Jisas em God i bin makim ol na ol i insait long nupela kontrak, ol tasol i ken kisim dispela bret na wain. God i bin wokim dispela nupela kontrak wantaim lain Israel bilong spirit. (Jeremaia 31:31-34; Galesia 6:16) Tasol bihain dispela nupela kontrak bai mekim gut long olgeta lain em ol i bihainim tok bilong God. Yu tu yu inap kisim ol gutpela samting bilong en.
Ol man i kisim bret na wain long dispela bung ol i mas insait long kontrak bilong Kingdom em Jisas i bin wokim. Taim Jisas i kamapim dispela kaikai, em i tokim ol gutpela aposel bilong em: “Papa bilong mi em i givim kingdom long mi, olsem tasol mi givim kingdom long yupela.” (Luk 22:29) God i bin wokim kontrak bilong Kingdom wantaim King Devit, na dispela i makim wanpela man bai kamap bihain, em Jisas, na em bai holim wok king long heven inap oltaim oltaim. I gat 144,000 Israel bilong spirit ol bai mekim wok king wantaim Jisas, na Baibel i tok piksa long ol i sanap wantaim Pikinini Sipsip, em Krais Jisas, long Maunten Saion long heven. Taim ol i kirap bek pinis, ol bai mekim wok wantaim Krais olsem ol nambatu king na pris. (2 Samuel 7:11-16; KTH 7:4; 14:1-4; 20:6) Ol man i insait long nupela kontrak, na ol i insait long kontrak bilong Kingdom em Jisas i bin wokim wantaim ol, ol tasol inap kisim bret na wain long Kaikai Bilong Bikpela.
Spirit holi bilong God i helpim spirit bilong ol man em God i bin makim ol na i tokaut olsem ol i pikinini bilong Em na ol i bilong kisim ol samting em Krais i kisim pinis. Pol i tok: “Holi Spirit yet i save helpim spirit bilong yumi na yumi save tokaut ples klia olsem yumi stap pikinini bilong God. Orait . . . bihain bai yumi kisim ol gutpela samting . . . Krais, brata bilong yumi, i kisim pinis.” (Rom 8:16, 17) Spirit o strong bilong God i save kirapim laik long bel bilong ol man em God i bin makim ol, na ol i gat strongpela laik long i stap long heven. Olgeta tok Baibel i mekim long i stap laip long heven, ol i tingim olsem dispela tok i makim ol yet, na ol i orait long lusim olgeta samting bilong graun, na laip bilong ol bilong graun, bambai ol i ken i stap long heven. Bilong i stap long Paradais bilong graun, em bai gutpela samting tru. Tasol ol i no gat dispela laik. Ol i gat strongpela tingting long i stap long heven (em ol i no bin kisim long bilip giaman bilong sampela lotu), olsem na i stret ol i ken kisim bret na wain long bung bilong tingim i dai bilong Jisas.
Sapos wanpela man i tok nating olsem em i bilong i go long heven na mekim wok king na pris, tasol Jehova i no bin singautim em, Jehova i no ken amamas long em. (Rom 9:16; KTH 22:5) Bipo God i bin kilim i dai Kora, long wanem, em i laik mekim wok pris tasol God i no bin makim em. (Kisim Bek 28:1; Namba 16:4-11, 31-35) Orait, sapos bel bilong man i kirap nating o em i holim yet sampela tingting bilong lotu giaman na em i kisim dispela bret na wain, em i mas mekim wanem? Em i no ken kisim moa, na em i mas beten askim God long lusim dispela rong bilong em.—Song 19:13.
Olsem Wanem Long Yu?
Tasol i no olsem yumi mas kisim dispela bret na wain bambai ofa bilong Jisas i ken helpim yumi na yumi ken kisim laip oltaim long graun. Nogat. Baibel i no tok, ol manmeri bipo ol i stap aninit long God, olsem Abraham, Sara, Aisak, Rebeka, Boas, Rut, Devit, ol bai kisim dispela bret na wain. Tasol dispela lain wantaim ol narapela man i laik i stap oltaim long graun ol i mas bilip long God na Krais na long ofa bilong Krais. (Jon 3:36; 14:1) Bung bilong tingim i dai bilong Krais em i save helpim man long tingim dispela bikpela ofa Krais i bin mekim bilong helpim ol man.
Aposel Jon i tok: “Sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais . . . Em yet i bin mekim [ofa] bilong tekewe sin bilong yumi. Na em i . . . mekim bilong helpim olgeta manmeri i stap long graun.” (1 Jon 2:1, 2) Ol Kristen em God i bin makim ol bilong i go long heven, ol inap tok, Jisas ‘em i mekim ofa bilong tekewe sin bilong ol.’ Tasol ofa bilong em i bilong helpim olgeta man bilong graun, na bai ol man i bihainim tok bilong God ol inap i stap oltaim long Paradais, em liklik taim bai kamap long graun!
Sapos yu kam long dispela bung bilong tingim i dai bilong Krais, bai yu harim wanpela tok bilong Baibel em bai kirapim tingting bilong yu. Bai yu tingim bikpela samting God na Krais Jisas i bin mekim bilong helpim yumi. Na taim yu bung wantaim ol man i save daun long God na Krais na ol i bilip tru long ofa bilong Krais, dispela bai strongim yu long spirit. Na ating bai yu gat laik long mekim ol samting bambai God i ken orait long yu, na bai yu ken kisim laip i stap oltaim. Mipela i laik tru long singautim yu i kam bung wantaim ol Witnes Bilong Jehova long bung bilong tingim i dai bilong Krais, em bai kamap long Epril 6, 1993, taim san i go daun pinis. Dispela Kaikai Bilong Bikpela em inap helpim yu tru.