“God i Bin Baim Bek Yupela Long Bikpela Pe”
‘God i bin baim bek yupela long bikpela pe tumas. Olsem na yupela i mas litimapim nem bilong em.’—1 KORIN 6:20.
1, 2. (a) Olsem Lo Bilong Moses i makim, ol bosman i mas mekim wanem kain pasin long ol wokboi nating Israel? (b) Wokboi i laikim tumas bosman bilong em i ken mekim wanem?
WANPELA buk (Holman Illustrated Bible Dictionary) i tok: “Long bipo tru planti man i gat ol lain i stap olsem wokboi nating bilong ol, na i no gat tok long dispela.” Buk i tok moa: “Wok bilong ol wokboi nating i as bilong wok mani bilong Isip, Grik, na Rom. Long taim lotu Kristen i kamap nupela, wanpela bilong olgeta 3-pela 3-pela man long Itali em ol i wokboi nating, na long ol arapela kantri wanpela bilong olgeta 5-pela 5-pela man em ol i wokboi nating.”
2 Long Israel bilong bipo ol man i gat ol wokboi bilong ol, tasol Lo Bilong Moses i lukautim ol wokboi nating Hibru. Olsem: Lo i tok man Israel inap stap wokboi nating inap 6-pela yia tasol. Long namba 7 yia, bosman i mas “lusim em i go. Na em i no ken givim sampela mani long [bos] pastaim.” Tasol ol lo i stiaim bosman long mekim pasin i stret na pasin sori long ol wokboi bilong ol, olsem na Lo Bilong Moses i tok: “Sapos dispela wokboi i tok, ‘Mi laikim tumas bosman bilong mi, na mi laikim tumas meri na ol pikinini bilong mi, na mi no laik lusim ol,’ orait bosman bilong en i mas kisim em i go long haus bilong God. Na wokboi i mas sanap long dua o long pos bilong dua, na bos i mas kisim nil na mekim hul long yau bilong wokboi. Na bai em i stap wokboi nating bilong dispela man inap em i dai.”—Kisim Bek 21:2-6; Wok Pris 25:42, 43; Lo 15:12-18.
3. (a) Ol Kristen long taim bilong ol aposel i bin amamas long kamap wokboi bilong husat? (b) Wanem samting i kirapim yumi long mekim wok bilong God?
3 Lo i givim rot long man i ken stap wokboi long laik bilong em yet, dispela i olsem piksa i makim pasin bilong ol Kristen long stap olsem wokboi nating. Olsem: Ol man bilong raitim Baibel, olsem Pol, Jems, Pita, na Jut i bin tok ol i wokboi bilong God na bilong Krais. (Taitus 1:1; Jems 1:1; 2 Pita 1:1; Jut 1) Pol i tokim ol Kristen long Tesalonaika olsem ‘ol i bin lusim ol giaman god na tanim bel i go long God tru, em God bilong i stap oltaim. Na ol i kamap wokboi bilong God.’ (1 Tesalonaika 1:9) Wanem samting i bin kirapim ol dispela Kristen long amamas long kamap wokboi bilong God? Orait, wanem samting i bin kirapim wanpela wokboi bilong Israel long sakim pasin bilong kamap fri? Em i pasin bilong laikim tumas bosman bilong em, a? Pasin bilong laikim tumas God i as na i gat ol wokboi Kristen. Taim yumi kisim save long trupela God i gat laip na yumi laikim em tru, yumi amamas long givim bel na strong olgeta bilong yumi long mekim wok bilong em. (Lo 10:12, 13) Tasol bilong kamap wokboi bilong God na Krais yumi mas mekim wanem? Dispela i mekim wanem long wokabaut bilong yumi?
‘Mekim Olgeta Samting Bilong Givim Biknem Long God.’
4. Olsem wanem yumi kamap wokboi bilong God na Krais?
4 Wanpela wokboi em i “wanpela man em lo i tok em i bilong narapela man o lain na em i mas bihainim olgeta tok bilong bosman.” Taim yumi dediket na kisim baptais, yumi bilong Jehova. Aposel Pol i tok: “Yupela i no bilong yupela yet. Nogat. God i bin baim bek yupela long bikpela pe tumas.” (1 Korin 6:19, 20) Dispela pe em i ofa bilong Jisas Krais long baim bek ol man. Dispela ofa em i as na God i orait long yumi stap wokboi bilong em, maski yumi ol Kristen God i makim long holi spirit o ol poroman bilong ol i wet long kisim laip oltaim long graun. (Efesus 1:7; 2:13; KTH 5:9) Olsem na kirap long taim yumi baptais, “yumi bilong Bikpela tasol.” (Rom 14:8) Blut bilong Krais i baim yumi, olsem na yumi kamap wokboi bilong em tu na yumi gat wok long bihainim tok bilong em.—1 Pita 1:18, 19.
5. Yumi ol wokboi bilong Jehova, olsem na wanem nambawan bikpela wok bilong yumi? Yumi mekim olsem wanem?
5 Ol wokboi i mas harim tok bilong bosman bilong ol. Long laik bilong yumi yet yumi kamap wokboi, pasin bilong laikim tru bosman i as na yumi mekim olsem. Namba 1 Jon 5:3 i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” Pasin bilong yumi long bihainim tok bilong God i kamapim klia yumi laikim em tru na yumi daun long em. Dispela pasin i stap ples klia long olgeta samting yumi mekim. Pol i tok sapos yumi kaikai o dring o mekim narapela samting, yumi “mas mekim dispela olgeta samting bilong givim biknem long God.” (1 Korin 10:31) Long olgeta wokabaut bilong yumi, na long rot bilong ol liklik samting tu, yumi soim olsem yumi “mekim wok bilong Bikpela.”—Rom 12:11.
6. Yumi ol wokboi bilong God, olsem wanem dispela i mekim bikpela samting long ol disisen yumi mekim? Stori long dispela.
6 Taim yumi makim ol samting yumi laik mekim, yumi mas tingim laik bilong Bosman bilong yumi long heven, Jehova. (Malakai 1:6) Sampela disisen i hatwok tru long mekim, ating ol i traim pasin bilong yumi long bihainim tok bilong God. Olsem: Bai yumi tingim tok bilong em o bai yumi bihainim laik bilong bel bilong yumi “i save tingting oltaim long mekim pasin giaman”? (Jeremaia 17:9) Melisa em i wanpela Kristen singel, em i bin baptais sotpela taim tasol na wanpela yangpela man i kirap laikim em. I luk olsem em i wanpela gutpela man, na em i kirap pinis long stadi wantaim ol Witnes Bilong Jehova. Maski i olsem, wanpela elda i tokim Melisa olsem em i savetingting long bihainim tok bilong Jehova long “maritim man i bilip long Bikpela.” (1 Korin 7:39; 2 Korin 6:14) Melisa i tok: “Mi hatwok long bihainim dispela tok. Tasol mi bin dediketim laip bilong mi long mekim wok bilong Jehova, olsem na bai mi bihainim ol lo bilong em.” Em i tingim bek ol samting i bin kamap na tok: “Mi amamas tru mi bin bihainim tok bilong elda. I no longtaim na man i lusim stadi. Sapos mi bin kirap poromanim em, long nau bai mi marit pinis long man i no bilip.”
7, 8. (a) Bilong wanem yumi no ken tingting planti tumas long amamasim ol man tasol? (b) Stori long olsem wanem yumi ken daunim pasin bilong pret long man.
7 Yumi ol wokboi bilong God, olsem na yumi no ken stap wokboi bilong ol man. (1 Korin 7:23) Tru yumi laik bai ol man i laikim yumi, tasol yumi mas tingim ol lo ol Kristen i bihainim i narapela kain long ol lo ol man bilong graun i bihainim. Pol i tok: “Ating mi wok long grisim ol man tasol, a?” Tingting bilong em i olsem: “Sapos mi wok yet long grisim [“amamasim,” NW ] ol man, orait mi no wokman bilong Krais.” (Galesia 1:10) Yumi no ken bihainim nating laik bilong ol arapela na kisim pasin bilong amamasim man tasol. Olsem na yumi ken mekim wanem taim ol arapela i strong long yumi mas mekim wankain samting olsem ol yet i mekim?
8 Tingim samting Elena i bin mekim, em wanpela yangpela Kristen long Spen. Sampela wanklas bilong em i bin givim blut long haus sik. Ol i save Elena, wanpela Witnes Bilong Jehova, bai i no givim blut o orait long kisim blut long haus sik. Taim rot i op long em long kamapim bilip bilong em long klas olgeta, Elena i volantia long mekim wanpela tok. Elena i tok: “Mi pret tru long mekim dispela samting. Tasol mi bin redi gut, na mi kirap nogut long samting i bin kamap. Planti ol wanklas i kirap rispek long mi, na tisa i tokim mi olsem em i laikim wok mi save mekim. Bikpela samting mi amamas mi bin litimapim nem bilong Jehova na mi inap long kamapim klia bilip bilong mi em Baibel i as bilong en.” (Stat 9:3, 4; Aposel 15:28, 29) I tru yumi ol wokboi bilong God na bilong Krais i stap narapela kain. Tasol ating bai yumi kirapim ol arapela long rispek long yumi sapos yumi redi long tokaut long bilip bilong yumi, na yumi mekim wantaim gutpela pasin.—1 Pita 3:15.
9. Yumi kisim wanem save long dispela ensel i bin kam long aposel Jon?
9 Yumi no lusim tingting olsem yumi stap wokboi nating bilong God, dispela i helpim yumi long mekim pasin daun. Aposel Jon i laikim tru gutpela driman em i bin lukim long Jerusalem i stap long heven, olsem na em i brukim skru long dispela ensel i stap olsem mausman bilong God. Ensel i tokim em: “Yu no ken mekim olsem! Mi tu mi wanwok bilong yu wantaim ol brata bilong yu, em ol profet. Na mi wanwok bilong olgeta man i save bihainim tok bilong dispela buk. Yu mas lotu long God wanpela tasol.” (KTH 22:8, 9) Tru tumas, ensel i makim gutpela pasin olgeta wokboi bilong God i mas bihainim! Sampela Kristen i holim bikpela wok insait long kongrigesen. Tasol Jisas i tok: “Man i laik i stap bikman namel long yupela, em i mas i stap wokman bilong yupela. Na man i laik i stap namba wan bilong yupela, em i mas i stap olsem wokboi nating bilong yupela.” (Matyu 20:26, 27) Yumi ol disaipel bilong Jisas, olsem na yumi olgeta i stap wokboi nating.
“Samting Mipela i Mekim, em i Wok Tasol Bilong Mipela”
10. Kamapim ol tok bilong Baibel i soim olsem sampela taim ol gutpela wokboi bilong God i bin hatwok long bihainim laik bilong em.
10 Sampela taim ol man bilong graun i hatwok long bihainim laik bilong God. Profet Moses i bin surik liklik long bihainim tok taim Jehova i askim em long helpim ol Israel long lusim kalabus long Isip. (Kisim Bek 3:10, 11; 4:1, 10) Taim Jona i bin kisim wok long autim tok olsem kot bai painim ol Ninive, em “i laik lusim Bikpela na ranawe i go long taun Tarsis.” (Jona 1:2, 3) Baruk, kuskus bilong profet Jeremaia, i bin toktok planti olsem skin bilong em i les pinis. (Jeremaia 45:2, 3) Bai yumi mekim wanem taim laik bilong yumi yet i pait wantaim laik bilong God? Wanpela tok piksa bilong Jisas i bekim dispela askim.
11, 12. (a) Mekim liklik stori long tok piksa bilong Jisas long Luk 17:7-10. (b) Tok piksa bilong Jisas i lainim yumi long wanem samting?
11 Jisas i stori long wanpela wokboi i bin lukautim ol sipsip bilong bosman bilong em inap de olgeta. Taim wokboi i kamap long haus, em i bin wok 12-pela aua pinis na skin i les, tasol bosman bilong em i no tokim em long sindaun na kisim gutpela kaikai. Nogat. Bosman i tok: “Yu redim kaikai bilong mi, na yu pasim laplap na sutim kaikai bilong mi na kisim i kam. Mi kaikai na dring pastaim, orait bihain yu ken kaikai na dring.” Wokboi i ken kisim ol samting bilong helpim em yet bihain long em i lukautim pinis bosman bilong em. Long pinis bilong stori Jisas i tok: “Olsem na yupela tu, sapos yupela i mekim pinis olgeta samting olsem God i tokim yupela, orait yupela i mas tok, ‘Mipela i no gutpela wokboi. Samting mipela i mekim, em i wok tasol bilong mipela.’ ”—Luk 17:7-10.
12 Jisas i no mekim dispela tok piksa bilong soim olsem Jehova i no tingim ol wok bilong em yumi save mekim. Baibel i tok: “God em i no man nogut, na bai em i lusim tingting long ol gutpela wok yupela i bin mekim. Nogat.” (Hibru 6:10) Stori bilong Jisas i lainim yumi olsem wanpela wokboi i no ken tingting long amamasim em yet o tingting tasol long ol samting bilong helpim em yet. Taim yumi dediket long God na makim olsem yumi laik stap wokboi bilong em, yumi bin wanbel long putim laik bilong em olsem namba wan samting, winim laik bilong yumi yet. Yumi mas daunim laik bilong yumi yet na tingim laik bilong God.
13, 14. (a) Ating yumi mas daunim laik bilong yumi yet long wanem kain taim? (b) Bilong wanem laik bilong God i mas stap olsem nambawan bikpela samting long yumi?
13 Ating sampela i hatwok liklik long stadi oltaim long Baibel na ol buk na nius i kam long “wokboi i gat gutpela tingting,” na ol i mas taitim bun na mekim. (Matyu 24:45) Moa yet sapos yumi save hatwok long rit o sapos buk i stori long sampela “tingting hait bilong God.” (1 Korin 2:10) Tasol i stret yumi makim taim bilong yumi yet i ken stadi, a? Ating yumi mas skulim yumi yet long sindaun na stap isi na no ken mekim hariap stadi bilong yumi. Sapos yumi no mekim, bai yumi no lain long laikim ol “strongpela kaikai em i bilong ol man i kamap bikpela pinis.”—Hibru 5:14.
14 Tasol olsem wanem long taim yumi wok de olgeta na kam bek long haus na skin i les? Ating yumi mas subim yumi yet long go long miting Kristen. O ating pasin bilong autim tok long ol man yumi no save long ol em i no samting yumi gat laik long mekim. Pol yet i tok sampela taim bai yumi autim gutnius tasol yumi ‘no mekim long laik bilong yumi yet.’ (1 Korin 9:17) Tasol yumi mekim ol dispela samting long wanem Jehova—bosman bilong yumi long heven em yumi laikim tumas—em i tokim yumi olsem yumi mas mekim. Tru tumas, yumi pilim amamas na kisim nupela strong taim yumi taitim bun na mekim stadi, go long ol miting, na autim tok.—Song 1:1, 2; 122:1; 145:10-13.
No Ken “Lukluk i Go Long Baksait”
15. Olsem wanem Jisas i stap gutpela piksa long pasin bilong stap daun long God?
15 Pasin bilong Jisas Krais long daun long Papa bilong em long heven em i nambawan olgeta. Jisas i tokim ol disaipel bilong em olsem: “Mi no lusim heven na kam daun bilong bihainim laik bilong mi yet. Nogat. Mi kam daun bilong bihainim laik bilong Papa, em i bin salim mi na mi kam.” (Jon 6:38) Taim em i stap bel hevi tru long gaden Getsemani, em i beten olsem: “Papa bilong mi, sapos inap, orait mi laik bai yu rausim dispela kap long mi. Tasol yu no ken bihainim laik bilong mi. Nogat. Yu mas bihainim laik bilong yu tasol.”—Matyu 26:39.
16, 17. (a) Yumi mas i gat wanem tingting long ol samting yumi lusim pinis? (b) Stori long olsem wanem tingting bilong Pol i stret taim em i tok ol namba em inap winim long graun i olsem “pipia nating.”
16 Jisas Krais i laik bai yumi stap gut long disisen bilong yumi long stap wokboi bilong God. Em i tok: “Man i holim stia, tasol oltaim em i lukluk i go long baksait, em i no inap long mekim wok bilong kingdom bilong God.” (Luk 9:62) Yumi ol wokboi i mekim wok bilong God, olsem na i no stret long tingting oltaim long ol samting yumi lusim pinis. Mobeta yumi amamas tru long ol gutpela samting yumi bin kisim long rot bilong stap wokboi bilong God. Pol i tokim ol Filipai: “Mi save long Krais Jisas, em i Bikpela bilong mi, na mi lukim dispela save tasol em i samting tru, na olgeta gutpela samting bilong dispela graun ol i olsem pipia nating. Mi laik bihainim Krais tasol, na mi lusim pinis olgeta arapela samting, bai mi ken holimpas Krais.”—Filipai 3:8.
17 Tingim ol samting Pol i tok i olsem pipia na em i lusim, long wanem, em i laikim ol gutpela samting bilong spirit em ol wokboi bilong God bai kisim. Em i bin lusim ol gutpela samting bilong dispela graun na rot bilong kamap lida bilong lotu Juda. Sapos Pol i no bin lusim lotu Juda, ating bai em i kisim wankain namba olsem Simeon, pikinini man bilong tisa bilong Pol, em Gamaliel. (Aposel 22:3; Galesia 1:14) Simeon i kamap lida bilong ol Farisi na maski em i gat tupela tingting olsem em bai mekim o nogat, em i mekim bikpela wok insait long pait bilong ol Juda long sakim gavman Rom long 66-70 C.E. Dai i painim em long dispela pait, ating ol bikhet Juda i mekim o ami bilong Rom.
18. Kamapim wanpela ekspiriens i soim olsem wanem ol mak bilong spirit yumi winim i gat gutpela pe bilong en.
18 Planti ol Witnes Bilong Jehova i bihainim pasin bilong Pol. Jean i tok: “Sampela yia bihain long mi lusim skul, mi kisim wok olsem kuskus i gat namba long ofis bilong wanpela bikpela loya long London. Mi laikim dispela wok na pe i gutpela, tasol long bel bilong mi, mi save mi inap mekim bikpela wok moa long wok bilong Jehova. Mi lusim wok na kirap long painia. Mi amamas tru long dispela samting mi bin mekim inap 20 yia i go pinis! Fultaim sevis bilong mi i bin mekim bikpela samting long laip bilong mi, winim tru samting dispela wok bilong kuskus inap mekim. No gat wanpela samting i winim amamas bilong lukim olsem wanem Tok Bilong Jehova i kamapim bikpela senis long laip bilong man. Pasin bilong helpim man long mekim olsem em i gutpela tumas. Ol samting yumi kisim long Jehova i winim tru ol samting yumi givim long em.”
19. Bikpela tingting bilong yumi em long mekim wanem samting? Bilong wanem i olsem?
19 Ating sindaun bilong yumi i save senis. Tasol samting i no save senis em dediket bilong yumi. Yumi stap yet olsem wokboi bilong Jehova, na em i larim yumi long makim olsem wanem yumi ken mekim gutpela wok long taim, strong, save, na ol arapela gutpela samting bilong yumi. Olsem na ol dispela samting yumi makim i ken kamapim olsem wanem yumi laikim tumas God. Na tu, ol i soim olsem wanem yumi redi long lusim ol samting bilong yumi yet. (Matyu 6:33) Maski yumi gat wanem kain sindaun, yumi mas strong long givim nambawan gutpela samting bilong yumi i go long Jehova. Pol i tok: “Sapos man i laikim tumas long givim samting, orait God i laikim tumas long kisim. God i save ting long ol samting ol wan wan man ol inap long givim, na em i kisim ol samting ol i givim. Em i no save ting long ol samting man i no gat, na em i skelim pasin bilong en.”—2 Korin 8:12.
“Yupela i Kisim Ol Dispela Gutpela Samting”
20, 21. (a) Pasin bilong stap wokboi bilong God i save karim wanem kain kaikai? (b) Olsem wanem Jehova i praisim ol man i mekim ol wok bilong em inap tru long skel bilong ol?
20 Yumi i stap wokboi bilong God, dispela i no daunim yumi, nogat. Dispela i helpim yumi long abrusim pasin bilong stap wokboi nating long ol samting i pinisim amamas bilong yumi. Pol i tok: “God i kisim bek yupela pinis long kalabus bilong sin, na i mekim yupela i kamap wokboi bilong em yet. Na bai yupela i kisim ol dispela gutpela samting long em. Em bai i mekim yupela i kamap holi na bai yupela i mekim ol pasin em i save laikim. Na bai yupela i kisim laip i stap oltaim oltaim.” (Rom 6:22) Yumi mekim ol wok bilong God na dispela i karim kaikai i holi, olsem yumi kisim ol gutpela helpim em pasin holi, o klinpela pasin, i as bilong en. Na tu, em i bringim yumi long laip oltaim long bihain.
21 Jehova i save givim planti samting long ol wokboi bilong em. Taim yumi mekim ol wok bilong em inap tru long skel bilong yumi, em i save ‘givim planti gutpela samting long yumi na yumi i no ken sot.’ (Malakai 3:10) Bai i gat bikpela amamas long stap wokboi bilong Jehova inap oltaim oltaim!
Yu Inap Tingim?
• Bilong wanem yumi kamap wokboi bilong God?
• Olsem wanem yumi soim olsem yumi save daun long laik bilong God?
• Bilong wanem yumi mas redi long daunim laik bilong yumi yet na tingim laik bilong Jehova pastaim?
• Bilong wanem yumi no ken “lukluk i go long baksait”?
[Piksa long pes 16, 17]
Long Israel man i ken i stap wokboi nating long laik bilong em yet, dispela em i piksa long olsem wanem Kristen i stap wokboi nating
[Piksa long pes 17]
Yumi kamap wokboi bilong God taim yumi baptais
[Ol Piksa long pes 17]
Ol Kristen i putim laik bilong God olsem namba wan bikpela samting
[Piksa long pes 18]
Moses i bin surik liklik long mekim wok God i givim em