Savetingting Bilong Helpim Ol Singel na Ol Marit
“Mi mekim dispela tok . . . bilong kirapim yupela long tingim ol pasin i stret em ol manmeri i no marit i ken bihainim. Olsem ol i ken mekim wok bilong Bikpela oltaim na i no gat wanpela samting i pulim nabaut tingting bilong ol.”—1 KOR. 7:35.
1, 2. Bilong wanem i gutpela long kisim save long tok Baibel i mekim long ol singel na ol marit?
AMAMAS, bel hevi, na wari, i save painim ol singel na ol marit. Olsem na yumi mas askim God long stiaim yumi. Tru tumas, i gat planti as na God i mas stiaim yumi. Olsem, ating sampela Kristen husat i amamas long stap singel i pilim olsem famili o ol pren i putim presa long ol long marit. Na ating sampela i laik marit, tasol ol i no painim poroman i stret long ol. Na sampela i nidim gutpela tok bilong stiaim ol long redi long mekim wok bilong man marit na meri marit. Na tu, ol singel Kristen na ol marit Kristen i mas lukautim ol yet na bai ol i no pundaun long pasin pamuk.
2 Ol dispela samting inap givim hatwok long yumi. Na moa yet, ol inap mekim sampela samting long pasin bilong yumi long pas gut wantaim God. Long 1 Korin sapta 7, aposel Pol i givim gutpela tok long ol singel na ol marit. Pol i laik bai ol Kristen i bihainim stretpela pasin na wok yet long givim bel olgeta long mekim wok bilong God, na ol i no ken larim ol samting i pulim nabaut tingting bilong ol. (1 Kor. 7:35) Tok bilong Pol inap helpim yu tu. Em i laik bai ol singel na ol marit i tingim i stap bilong ol olsem rot bilong mekim gut wok bilong Jehova.
Bikpela Disisen Olgeta i Mas Mekim
3, 4. (a) Wanem samting inap kamap sapos ol pren na famili i putim presa long wanpela long marit? (b) Olsem wanem tok bilong Pol inap helpim yumi long kisim stretpela tingting long marit?
3 Long taim bilong ol aposel, ol Juda i bilip olsem em i bikpela samting tru long marit. Long nau tu planti man i gat wankain tingting. Sapos krismas bilong wanpela man i go antap na em i no marit, famili na ol pren bai wari na pilim olsem ol i mas kirapim em long marit. Ating ol bai tokim em long painim poroman marit. O ol bai tokim em long wanpela meri husat ol i ting em i ken maritim. Na sampela i go pas long stretim rot bilong tupela i ken bung wantaim bikos ol i ting i gutpela long tupela i marit. Taim man i mekim olsem, dispela inap semim tupela singel na mekim ol i les long em. Na em inap bagarapim bel bilong tupela.
4 Pol i no tokim ol man olsem ol i mas marit o ol i mas stap singel. (1 Kor. 7:7) Em yet i amamas long stap singel na mekim wok bilong Jehova, tasol em i no krosim ol Kristen husat i laik marit. Em samting bilong ol wan wan Kristen long nau long makim olsem ol bai marit o ol bai stap singel. Ol arapela i no ken tokim ol long ol samting ol i mas mekim.
Ol Singel Inap Mekim Gutpela Wok
5, 6. Wanem as na Pol i kirapim ol Kristen long i stap singel?
5 Tok Pol i mekim long ol Korin i helpim yumi long kliagut olsem ol singel Kristen i ken mekim gut wok bilong God. (Ritim 1 Korin 7:8.) Sampela hetman bilong lotu i no save marit na ol i ting ol i winim ol man husat i marit. Tasol Pol i no ting olsem. Maski em i stap singel, em i no ting em i winim ol man husat i marit. Pol i stori olsem ol singel Kristen inap mekim sampela wok bilong God em ol marit i no inap mekim. Olsem wanem dispela i tru?
6 Planti taim singel Kristen inap mekim sampela wok bilong Jehova em marit Kristen i no inap mekim. Pol i kisim wanpela spesel wok, em i “wanpela aposel God i salim i go long ol manmeri bilong ol arapela lain.” (Rom 11:13) Long Aposel sapta 13 i go 20, yumi ken ritim stori bilong ol samting i bin kamap long Pol. Pol i bin raun wantaim ol arapela misineri na autim tok long ol nupela hap, na ol i kamapim planti kongrigesen. Planti hevi i bin painim em, em ol samting i no inap painim planti bilong yumi long nau. (2 Kor. 11:23-27, 32, 33) Tasol Pol i orait long karim ol dispela hevi bambai em i ken kamapim ol disaipel, na dispela i givim amamas long em. (1 Tes. 1:2-7, 9; 2:19) Sapos Pol i bin marit, ating em i no inap mekim olgeta samting em i bin mekim.
7. Olsem wanem tupela singel Witnes i mekim bikpela wok moa bilong autim tok bilong Kingdom?
7 Planti singel Kristen i tingim i stap bilong ol olsem rot bilong mekim bikpela wok moa bilong autim tok. Sara na Limbania em tupela singel sista husat i mekim wok painia long Bolivia. Ol i go sindaun long wanpela liklik ples we ol Witnes i no bin autim tok long en inap planti yia. Dispela ples i no gat pawa, na tupela i tok ol manmeri i no bisi long lukim TV o harim redio; ol i amamas long ritim ol buk. Sampela i ritim yet ol olpela buk na nius bilong ol Witnes Bilong Jehova. Long klostu olgeta haus, tupela i bungim ol man husat i laik kisim sampela save moa long Baibel, olsem na ol i lusim bikpela haptaim bilong pinisim dispela teritori. Wanpela lapun meri i tokim ol: “Pinis i mas klostu bikos ol Witnes Bilong Jehova i kamap pinis long mipela.” I no longtaim na ol man bilong dispela ples i kirap kam long ol miting bilong kongrigesen.
8, 9. (a) Bilong wanem Pol i tok olsem i gutpela long stap singel na mekim wok bilong God? (b) Wanem sampela gutpela samting i kamap long ol singel i mekim wok bilong God?
8 Tru, ol gutpela samting i save kamap taim ol marit Kristen i autim tok long ol hap i gat hatwok long en. Tasol ol singel painia inap kisim sampela asainmen em ol marit o ol famili i no inap mekim. Taim Pol i raitim ol pas long ol kongrigesen, em i save olsem i gat planti wok yet long autim gutnius. Na em i laik bai olgeta i kisim wankain amamas olsem em i bin kisim long helpim ol arapela long kamap disaipel. Long dispela as Pol i tok em gutpela long stap singel na mekim wok bilong Jehova.
9 Wanpela painia sista long Amerika i kamapim tingting bilong em long stap singel. Em i tok sampela i ting ol singel i no inap i stap amamas. Tasol em i save olsem pasin bilong stap pren bilong Jehova em i rot bilong i stap amamas tru. Tru, em i mas daunim sampela laik bilong em yet, tasol em i ting olsem sapos singel Kristen i tingim i stap bilong em olsem rot bilong mekim ol gutpela wok, orait pasin bilong i stap singel i olsem wanpela gutpela presen. Sapos wanpela i stap singel, dispela i no makim olsem em i no inap stap amamas, nogat. Em wanpela rot bilong i stap amamas. Sista i tok: “Mi save olsem Jehova i save laikim tumas olgeta manmeri, maski ol i singel o marit.” Long nau dispela sista i mekim wok bilong Jehova long wanpela kantri we ol i sot long ol man bilong autim gutnius. Olsem wanem? Sapos yu stap singel, yu inap mekim bikpela wok moa long skulim ol arapela long tok i tru? Sapos yu inap mekim olsem, orait pasin bilong yu long stap singel bai stap olsem wanpela gutpela presen i kam long Jehova.
Ol Singel Husat i Laik Marit
10, 11. Olsem wanem Jehova i save helpim ol lain husat i laik marit em ol i no painim yet poroman i stret long ol?
10 Ating bihain wanpela Witnes husat i stap singel inap sampela yia bai i gat laik long marit. Em i save olsem em i mas kisim sampela helpim. Olsem na em bai askim Jehova long helpim em long painim wanpela poroman husat em i ken maritim na stap amamas wantaim.—Ritim 1 Korin 7:36.
11 Sapos yu laik maritim wanpela husat i givim bel olgeta long lotuim Jehova, orait wok yet long beten na kamapim laik bilong yu long Jehova. (Fili. 4:6, 7) Maski yu pilim olsem yu wet longpela taim, no ken bel hevi. Jehova i save long ol samting yu nidim, na sapos yu trastim em, em bai helpim yu long karim dispela hevi.—Hib. 13:6.
12. Sapos wanpela i askim yu long maritim em, yu mas tingting gut long wanem samting paslain long yu tok orait long dispela?
12 Olsem wanem sapos wanpela husat i no pas gut wantaim God o wanpela husat i no Witnes i askim yu long maritim em? Ating yu gat bikpela laik long marit. Tasol sapos yu no makim gut poroman, pen na hevi bilong dispela bai nogut moa, winim bel hevi yu bin pilim taim yu singel na stap wanpis. Tingim, taim yu marit pinis, yu no ken lusim poroman. Samting yu makim long nau bai mekim bikpela samting long laip olgeta bilong yu. (1 Kor. 7:27) No ken orait long maritim wanpela, long wanem, yu ting bai i nogat narapela i askim yu. Nogut bihain yu bel hevi long disisen bilong yu.—Ritim 1 Korin 7:39.
Redim Yu Yet Paslain Long Marit
13-15. Paslain long tupela i marit, ating ol i mas toktok long wanem ol samting em inap givim hevi long ol long bihain?
13 Pol i tok em i gutpela long stap singel na mekim wok bilong Jehova. Tasol em i no ting olsem em i winim ol lain husat i marit. Em i raitim ol tok i helpim ol long kliagut long ol samting bai painim ol bihain long ol i marit na ol samting ol i mas mekim bilong lukautim gut marit bilong ol.
14 Ating sampela i mas senisim tingting bilong ol long sait bilong ol samting bilong marit. Taim narapela i kirap prenim narapela ol i ting pasin pren bilong ol i spesel tru, na i no gat narapela i bin pilim olsem. Na taim ol i marit, ol i no ting marit bilong ol bai i gat sampela hevi long bihain. Tasol laip i no olsem. Yumi no inap stap amamas long olgeta taim. Tru, pasin bilong prenim narapela em samting bilong amamas. Tasol dispela i no inap stretim ol hevi i save kamap insait long marit.—Ritim 1 Korin 7:28.a
15 Bihain long tupela i marit pinis, ol i kirap nogut o bel hevi taim ol i no wanbel long sampela bikpela samting. Olsem, ating ol i no wanbel long ol bai yusim mani olsem wanem. O ol bai mekim wanem bilong kisim amamas, o ol bai sindaun long wanem hap, o ol bai visitim ol famili long wanem taim? Na tupela wantaim i gat ol pasin kranki em inap sikirapim bel bilong poroman. Taim tupela i kirap long pren, ol inap ting olsem ol i no gat wok long toktok long ol dispela bikpela samting. Tasol sapos ol i no toktok long ol dispela samting, hevi inap kamap bihain. Olsem na i gutpela moa sapos tupela i toktok gut wantaim long ol dispela samting paslain long ol i marit.
16. Bilong wanem tupela marit i mas wanbel long pasin bilong ol long stretim ol hevi?
16 Sapos tupela marit i laik stap amamas, ol i mas wanbel long olsem wanem ol bai mekim ol wok bilong ol, na stretim ol pikinini bilong ol, na long samting ol bai mekim bilong lukautim papamama bilong ol taim papamama i go lapun. Hevi i save painim olgeta famili. Tasol tupela marit i no ken larim ol dispela hevi i bagarapim pasin wanbel i stap namel long ol. Tok bilong Baibel inap helpim tupela long stretim sampela hevi, karim ol hevi i hatwok long stretim, na long stap amamas.—1 Kor. 7:10, 11.
17. Bilong wanem ol marit i save “tingim ol samting bilong graun”?
17 Pol i stori moa long ol marit long 1 Korin 7:32-34. (Ritim.) Ol marit i save “tingim ol samting bilong graun.” Em ol samting olsem kaikai, klos, haus, na ol arapela samting ol i nidim. Bilong wanem ol i mekim olsem? Tingim: Taim brata i singel, ating em i bin lusim bikpela haptaim na strong long autim tok. Tasol bihain long em i marit, em i mas yusim sampela haptaim na strong bilong em bilong lukautim meri bilong em. Na meri i mekim wankain samting long man bilong em. Jehova i save olsem man na meri marit i laik bai poroman bilong ol i stap amamas. Em i save olsem tupela marit bai i no gat wankain taim na strong bilong mekim wok bilong em olsem ol i bin mekim taim ol i singel. Nau ol i mas yusim sampela haptaim na strong bilong ol long strongim marit bilong ol.
18. Bihain long marit, ating tupela i mas mekim wanem ol senis long sait bilong kisim amamas?
18 Tasol olsem wanem long haptaim tupela marit i bin lusim bilong painim amamas na mekim ol arapela samting taim ol i bin stap singel? Sapos tupela marit i mas daunim haptaim bilong ol long mekim wok bilong Jehova na bai ol i ken strongim marit bilong ol, orait ol i mas daunim tu haptaim ol i bin lusim bilong painim amamas taim ol i bin stap singel. Sapos man marit i tromoi wankain taim long insait long pilai spot wantaim ol pren bilong em olsem em i bin mekim paslain long em i marit, orait meri bilong em bai pilim olsem wanem? O man bai pilim olsem wanem sapos meri bilong em i tromoi wankain taim long mekim ol samting wantaim ol pren bilong em olsem em i bin mekim paslain long ol i marit? Ating dispela inap mekim na poroman marit i pilim olsem em i stap wanpis, bel hevi, na i no gat wanpela i laikim em. Bilong abrusim dispela hevi, tupela i mas wok strong tru long strongim marit bilong ol.—Efe. 5:31.
Jehova i Tok Yumi Mas Bihainim Klinpela Pasin
19, 20. (a) Bilong wanem ol marit i mas was gut, nogut ol i pundaun na mekim pasin adaltri? (b) Wanem hevi inap kamap sapos tupela marit i stap longwe long narapela narapela inap longpela taim?
19 Ol wokboi bilong Jehova i save wok strong tru long bihainim klinpela pasin. Sampela i save marit bilong abrusim pasin pamuk. Tasol maski ol i marit, dispela samting tasol i no inap lukautim ol na ol i no mekim pasin pamuk. Ol marit tu i mas was gut na bihainim klinpela pasin. Long bipo tru ol taun i gat ol strongpela banis, na sapos man i stap insait long taun em bai stap gut. Tasol ausait long banis hevi inap painim man bikos i gat ol raskol i stap. Ol lo Jehova i putim long ol marit i kain olsem dispela strongpela banis i raunim taun. Ol marit inap abrusim pasin pamuk sapos ol i strong long bihainim ol lo Jehova i givim long ol.
20 Pol i stori long ol dispela lo long 1 Korin 7:2-5. Meri marit tasol i gat rait long slip wantaim man bilong em. Na man marit tasol i gat rait long slip wantaim meri bilong em. God i tok man na meri marit i mas givim “ol samting i stret” long givim long poroman, dispela i stori long maritpasin. Sapos man o meri marit i lusim poroman inap longpela taim, orait em i no inap givim dispela “samting i stret” long poroman. Sampela man o meri marit i save go holide ol yet na poroman marit i no go wantaim ol. Na wok skin i mekim na sampela i no stap wantaim poroman inap longpela taim. Satan inap yusim kain sindaun olsem bilong bagarapim marit. Sapos ol marit i no tingim laik bilong poroman bilong ol long mekim maritpasin, dispela inap kirapim wanpela bilong ol long mekim pasin adaltri. Jehova bai blesim ol het bilong famili husat i save lukautim gut famili bilong ol na ol i no mekim samting em inap bagarapim marit bilong ol.—Sng. 37:25.
Bihainim Tok Bilong Baibel
21. (a) Bilong wanem i hatwok long wokim ol disisen long ol samting bilong i stap singel o bilong marit? (b) Olsem wanem tok bilong 1 Korin sapta 7 inap helpim yumi?
21 Em i hatwok tru long wokim ol disisen long ol samting bilong i stap singel o bilong marit. Maski yu wokim disisen bilong i stap singel o yu pasim tok long marit, sampela hevi bai painim yu, long wanem, yumi no gutpela olgeta. Na maski Jehova i givim ol blesing long ol lain bilong em, sampela taim ol bai bel hevi long ol samting i kamap long ol. Tasol savetingting Pol i kamapim long 1 Korin sapta 7 inap helpim yumi long abrusim planti bilong ol dispela hevi yumi bin stori long en. Maski yumi stap singel o marit, yumi inap mekim ol samting i amamasim Jehova. (Ritim 1 Korin 7:37, 38.) Sapos God i orait long yumi, dispela em i nambawan gutpela blesing yumi inap kisim. God inap orait long yumi long nau, na long bihain tu, taim yumi stap long nupela taim em i promis long kamapim. Long nupela taim, ol man na meri bai i no gat ol presa na ol hevi olsem ol i gat long nau.
[Futnot]
a Bilong kisim sampela save moa, lukim buk Famili i Ken Stap Amamas, sapta 2, paragraf 16-19.
Yu Inap Bekim?
• Bilong wanem yumi no ken putim presa long ol singel long marit?
• Olsem wanem wanpela singel Kristen inap mekim gutpela wok long i stap bilong em?
• Olsem wanem tupela husat i pren ol inap redi long sampela hevi i save kamap insait long marit?
• Bilong wanem ol marit i mas was gut, nogut ol i mekim pasin adaltri?
[Ol Piksa long pes 14]
Ol singel Kristen i kisim amamas taim ol i mekim bikpela wok moa bilong autim tok
[Piksa long pes 16]
Ating sampela i mas mekim wanem ol senis bihain long ol i marit?