Pret Long God na Bihainim Tru Pasin Holi
“Yumi mas rausim olgeta doti bilong bodi na bilong spirit, na i stap klin. Na yumi mas pret long God na bihainim tru pasin holi oltaim.”−2 KORIN 7:1.
1. Olsem wanem yumi save ol ensel i gat bikpela namba ol i save Jehova em i holi?
JEHOVA em i God holi. Ol ensel long heven i gat bikpela namba ol i tokaut klia long dispela samting. Ol i tok: “Jehova bilong ol ami em i holi, em i holi, em i holi. Olgeta samting bilong graun i save litimapim nem bilong em.” Ol ensel i stap klostu long sia king bilong Jehova ol i mekim dispela singaut long piksa em profet Aisaia i lukim long yia 730 samting paslain long Krais. Long yia 96 C.E. samting aposel Jon i lukim ol piksa i makim sampela samting i mas kamap long “de bilong Bikpela,” em dispela taim nau yumi stap long en. Jon i lukim 4-pela samting i stap laip ol i sanap klostu long sia king bilong Jehova na long olgeta taim ol i save tok: “Bikpela, God I Gat Olgeta Strong, em i holi, em i holi, em i holi. Bipo em i stap, na nau em i stap, na bai em i kam.” Ol dispela ensel Jehova i bin wokim long heven ol i mekim dispela tok tripela taim na dispela samting i kamapim long ples klia olsem Man bilong wokim olgeta samting em i holi tru.−Aisaia 6:2, 3, NW; Revelesen 1:10; 4:6-8.
Stap Holi na Narapela Kain
2 Dispela tok “holi” i makim samting bilong lotu i stap klin na i stret na i tambu, na makim tu samting i stap narapela kain o God i bin makim bilong em yet. Jehova yet em i klin olgeta na stret olgeta, na dispela pasin holi bilong em i makim em i narapela kain tru long olgeta god nogut nogut bilong ol lain man. Moses i kamapim gut dispela samting taim em i tok: “[O Jehova], wanem arapela god i stap na i strongpela olsem yu? I no gat wanpela. Yu nambawan king na yu antap tru na gutpela olgeta.”−Eksodas 15:11.
3 God Jehova em i holi na em i putim lo long ol Isrel bilong bipo, em lain bilong Em long graun, na em i tok ol tu i mas i stap holi. I no ol pris na Livai tasol i mas i stap holi; nogat; lain Isrel olgeta ol i mas i stap holi. Jehova i tokim Moses: “Yu mas toktok wantaim lain Isrel olgeta na yu mas tokim ol, ‘Mi Jehova, mi God bilong yupela, mi stap holi, olsem na yupela tu i mas i stap holi.’ ” (Levitikas 19:2, NW ) Bilong helpim ol long i stap holi, Jehova i givim ol lo long ol bambai ol i ken i stap klin long spirit, na long pasin bilong ol, na long tingting, na long skin, na ol i ken i stap klin bilong mekim lotu long haus lotu sel, na bihain long haus lotu long Jerusalem.
Wanpela Lain i Stap Narapela Kain
4 Taim ol Isrel i bihainim ol lo bilong God ol i stap narapela kain long ol lain i stap klostu long ol, em ol dispela lain i save mekim kain kain pasin doti na pasin i gat sem. Ol i stap narapela kain, olsem wanpela lain holi em God Jehova i bin makim bilong em yet bilong mekim wok bilong em, em i God holi. Moses i tokim ol: “Yupela i lain holi bilong Jehova, em God bilong yupela. Jehova, em God bilong yupela, em i makim yupela bilong kamap lain bilong em yet; long olgeta lain bilong graun, em i makim yupela i bilong em stret.”−Diuteronomi 7:6, NW.
5 Ol Isrel bilong spirit tu ol i mas i stap klin na narapela kain. Aposel Pita i raitim pas long ol manmeri God i bin makim ol bilong kamap ol Isrel bilong spirit na Pita i tok: “Yupela i mas i stap olsem pikinini i save bihainim tok. Bipo yupela i no gat save, na yupela i stap long pasin bilong bel i kirap. Nau yupela i no ken bihainim dispela pasin moa. Nogat. God i singautim yupela pinis, em i holi. Olsem na yupela tu i mas i stap holi long olgeta wokabaut bilong yupela. Baibel i tok olsem, ‘Mi stap holi. Olsem na yupela tu i mas i stap holi.’ ”−1 Pita 1:1, 14-16.
6 Revelesen sapta 7 i stori long ol manmeri bilong ‘bikpela lain’ na i tok, “ol i sanap long pes bilong sia king na long ai bilong Pikinini Sipsip. Ol i bin putim longpela waitpela klos” Ol i bin “wasim klos bilong ol long blut bilong Pikinini Sipsip, na klos i kamap waitpela.” (Revelesen 7:9, 14) Dispela “waitpela klos” bilong ol i makim olsem ol i stap klinpela na stretpela long ai bilong Jehova, long wanem ol i bilip long blut bilong Krais em inap baim bek ol. Olsem na ol Kristen em God i bin makim ol long spirit holi na ol “arapela sipsip” tu ol i mas i stap klin long spirit na long pasin bilong ol bambai Jehova i ken orait long ol samting ol i mekim bilong lotuim em.−Jon 10:16.
7 Orait, nau yumi ken skelim sampela tok Jehova i bin givim long lain bilong em long bipo long ol i mas i stap klin na holi, na yumi ken stori long olsem wanem i stret long lain bilong Jehova long nau tu ol i mas bihainim ol dispela tok.
Stap Klin long Spirit
8 Ol Isrel bilong skin long bipo i mas klia olgeta long ol pasin bilong lotu ol narapela lain i save bihainim, long wanem ol dispela pasin i no klin. Long maus bilong Moses, Jehova i tokim ol Isrel: “Na lukaut gut, yupela no ken mekim kontrak wantaim ol pipel bilong dispela kantri nau yupela i go long en. Nogut ol i pulim yupela na yupela i pundaun na bagarap olgeta. Nogat. Yupela mas bagarapim ol samting bilong lotu bilong ol. Brukbrukim ol alta na ol pos ston na katim ol hap diwai i gat piksa bilong god meri Asera [em bilong mekim lotu nogut, olsem pasin pamuk samting]. Mi Bikpela na yupela mas lotu long mi wanpela tasol. Yupela no ken lotu long ol god giaman. Long wanem, mi no inap larim wanpela god giaman i senisim mi. Yupela no ken mekim kontrak wantaim ol pipel bilong dispela kantri. Ol i save lotuim ol god giaman. Na sapos yupela mekim kontrak wantaim ol bai ol i askim yupela long bung wantaim ol na bai yupela i kaikai ol abus ol i ofaim long ol god giaman.”−Eksodas 34:12-15.
9 Planti handet yia bihain Jehova i kirapim Aisaia long givim tok long liklik hap lain ol i stap gut long Em na ol bai lusim Babilon i go bek long Juda. Aisaia i mekim tok profet long ol, olsem: “Yupela klia long dispela hap; yupela lusim. Na yupela i no ken holim samting i doti. Klia long en na lusim em; yupela ol man i karim ol samting bilong haus lotu bilong Jehova [em ol bai mekim wok long en bilong kirapim gen lotu i tru long haus lotu long Jerusalem] yupela i mas i stap klin”−Aisaia 52:11, NW.
10 Olsem tasol long nau ol Isrel bilong spirit wantaim lain poroman bilong ol, ol i mas klia long ol lotu bilong dispela graun i save bihainim ol god giaman. Aposel Pol i raitim pas long ol Kristen bilong kongrigesen long Korin, em God i bin makim ol long spirit holi, na Pol i tok: “Olsem wanem bai yumi bungim haus holi bilong God wantaim haus tambaran? Yupela i save, yumi yet yumi haus holi bilong God i gat laip, olsem bipo God i bin tok, ‘Bai mi stap wantaim ol na wokabaut namel long ol. Na bai mi stap God bilong ol, na ol bai i stap lain manmeri bilong mi.’ Olsem na [Jehova] i tok moa, ‘Yupela i mas lusim ol, na i go i stap long narapela hap. Na yupela i no ken holim samting i doti. Olsem na bai mi yet mi kisim yupela.’ ”−2 Korin 6:16, 17.
11 Kirap long yia 1919 na bihain long dispela taim, lain remnan, em God i bin stretim ol na ol i kamap klin pinis, ol i lusim ol lotu bilong Bikpela Babilon ol i bin kalabus long en, em ol dispela lotu i no klin na ol i save lotuim ol god giaman. (Malakai 3:1-3) Ol i bihainim singaut i kamap long heven, olsem: “Ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long sin bilong en. Na nogut bai yupela i poroman wantaim em long kisim pe nogut bilong sin.” (Revelesen 18:4) Kirap long yia 1935 na bihain long dispela taim bikpela lain ol “arapela sipsip” tu ol i bin bihainim dispela singaut na ol i lusim ol lotu nogut bilong Bikpela Babilon. Na lain remnan wantaim ol dispela poroman bilong ol i mekim narapela samting tu bilong helpim ol long i stap klin long spirit: Ol i save klia olgeta long ol tingting kranki bilong ol man i lusim pinis tok i tru na ol i lainim ol man long narapela tok.−Jon 10:16; 2 Jon 9-11.
Klinpela Pasin
12 God i mekim kontrak wantaim ol Isrel na ol lo em i givim long ol i helpim ol long bihainim gutpela stretpela pasin i winim tru pasin bilong ol narapela lain, em ol i save mekim pasin sem na pasin i nogut tru. Ol Isrel i gat strongpela lo long marit na bilong lukautim i stap bilong famili. Namba 7 lo bilong ol Tenpela Lo i tambuim pasin bilong bagarapim marit. Man o meri i mekim pasin pamuk o bagarapim marit em i kisim bikpela strafe. (Diuteronomi 22:22-24) Lo i lukautim gut ol meri singel i stap nupela yet. (Diuteronomi 22:28, 29) Ol lo bilong marit bilong ol pris i strongpela moa. Hetpris i mas maritim nupela meri singel tasol, em i stap stret tru, olsem klin tru.−Levitikas 21:6, 7, 10, 13.
13 Olsem tasol bikpela Hetpris, em Krais Jisas, em i gat “meri” bilong em, em lain 144,000, na Baibel i tok ol i olsem ol nupela meri “i stap klin tru.” (Revelesen 14:1-5; 21:9) Ol i save klia olgeta long pasin bilong dispela graun em Seten i bosim, na ol i save bihainim tok i tru tasol, na bihainim pasin i stret, olsem na ol i stap klin. Aposel Pol i raitim pas long ol Kristen long Korin, em God i bin makim ol long spirit holi, na Pol i tok: “God i save tingting tumas long man na i laik makim em bilong em yet, na long dispela pasin tasol mi save tingting tumas long yupela. Yes, mi makim yupela pinis bilong maritim wanpela man tasol. Mi laik givim yupela long Krais, olsem yangpela meri i stap klin tru.” (2 Korin 11:2) Na Pol i tok tu: “Yupela man, yupela i mas sori long ol meri bilong yupela, olsem Krais i sori long sios na i lusim laip bilong em yet bilong helpim sios. Em i mekim olsem bilong wasim sios na i kamap klin long waswas bilong wara wantaim tok. Long dispela pasin em i makim sios bilong em yet. Em i laik mekim sios i kamap naispela tru long ai bilong em, na bai sios i no gat doti na grile na kain samting olsem. Nogat. Sios i ken i stap holi na i no gat asua.”−Efesas 5:25-27.
14 Lain o “meri” bilong Krais ol i mas i stap klin tru long spirit na ol i mas i stap klin long pasin bilong ol tu. Olgeta wan wan i mas wok strong long bihainim klinpela stretpela pasin. Aposel Pol i tok: “Nogut yupela i giamanim bel bilong yupela yet. Ol man i save mekim pasin pamuk, na ol man i save bihainim god giaman, na ol man i save bagarapim marit, . . . bai ol i no kisim kingdom bilong God. Na bipo yupela sampela i stap kain man olsem. Tasol yupela i waswas pinis. God i makim yupela pinis bilong em.”−1 Korin 6:9-11.
15 Ol “arapela sipsip” tu i mas bihainim klinpela stretpela pasin. Dispela samting i kamap ples klia taim yumi tingim wanem kain man Jehova i no ken larim ol i stap long nupela skai na nupela graun em i tok promis long kamapim. Baibel i tok: “Tasol ol man i save . . . mekim kain kain pasin nogut tru, na ol man i kilim man i dai, na ol man i mekim pasin pamuk, . . . ol bai i kisim ples bilong ol long bikpela hul i gat hatpela paia i lait long ston salfa. Dispela em i namba tu dai.”−Revelesen 21:1, 8.
Pasin Bilong Marit Em i Klinpela Tru
16 Lain o “meri” bilong Krais na ol “arapela sipsip” tu ol i mas bihainim klinpela pasin, tasol i no olsem ol i mas i stap singel. Nogat. Pasin bilong tambuim marit i no stret long tok bilong Baibel. (1 Timoti 4:1-3) Sapos man tupela meri i marit na tupela i mekim maritpasin, ol i no mekim pasin doti. Baibel i tok: “Marit em i gutpela samting. Long yupela olgeta, pasin bilong marit em i mas i stap olsem samting i klinpela tru long ai bilong God. Nogut yupela i mekim doti. Yupela i save, bihain bai God i bekim pe nogut long ol manmeri i mekim pasin pamuk na ol manmeri i bagarapim marit.”−Hibru 13:4.
17 Tasol sapos Kristen i laik “pret long God na bihainim tru pasin holi,” orait em i no ken ting olsem em i ken maritim wanem kain poroman em yet i laikim. Aposel Pol i tokim ol brata Kristen bilong em, ol i mas ‘rausim olgeta doti bilong skin na spirit na ol i stap klin, na ol i mas pret long God na bihainim tru pasin holi.’ Na paslain liklik long dispela tok, Pol i bin raitim tok, olsem: “Yupela i no ken wokabaut wantaim ol [man i no bilip] . . . Olsem wanem stretpela pasin na pasin bilong sakim lo tupela i ken pren wantaim? . . . Olsem wanem bilipman na man i no bilip tupela i ken holim wanpela kain tingting?” (2 Korin 6:14, 15; 7:1) Lain bilong Jehova ol i stap narapela kain na i stap klin, na sapos wanpela Kristen long dispela lain i laik marit em i mas “marit Kristen” tasol, olsem aposel i tok−em i mas maritim wanpela Kristen em i dediket na baptais pinis na em i stap gutpela wokman bilong God Jehova. (1 Korin 7:39) Sapos wanpela Kristen long lain bilong God long bipo o long nau em i dediket pinis na em i sakim dispela tok i stap long Baibel, em i no bihainim gutpela tingting. (Lukim Diuteronomi 7:3, 4; Niemaia 13:23-27.) Em i no pret long Bikpela Bos bilong yumi, em Jehova−Malakai 1:6.
18 Ol lo bilong Isrel i makim tu stretpela pasin bilong marit em man i mas mekim taim em i go klostu long meri bilong em. Lo i tok, man i no ken slip wantaim meri bilong em taim mun i painim meri. (Levitikas 15:24; 18:19; 20:18) Olsem na ol man marit long lain Isrel ol i mas bihainim pasin sori na tingim gut meri bilong ol na bosim gut skin. Orait, ol Kristen tu i mas mekim wankain gutpela pasin long meri bilong ol, a? Aposel Pita i tok, ol man marit long lain Kristen i mas “kisim gutpela save” na stap stret wantaim meri bilong ol. Tru tumas, man i mas kisim gutpela save long pasin bilong meri bilong em na em i i mas save “bodi bilong meri em i no strong tumas.”−1 Pita 3:7.
Wokabaut long “Rot i Holi”
19 Ol samting yumi bin stori long en i kamapim klia olsem ol manmeri long lain bilong Jehova ol i narapela kain tru long manmeri bilong dispela graun, em Seten i bosim ol. Ol manmeri bilong dispela graun i orait long kain kain pasin nogut na strong moa long bihainim laik bilong ol yet. Jisas i tok: Yupela mas i go insait long liklik dua. Rot i go long ples bilong lus, em i bikpela na i op tumas. Na planti manmeri i save bihainim dispela rot.” (Matyu 7:13) Bikpela lain tru ol i bihainim dispela bikpela rot.” Aposel Pita i tok dispela rot em i rot bilong “pasin pamuk, na pasin bilong bel i kirap long ol samting nogut, na pasin bilong spak nabaut, na sindaun longtaim long bikpela kaikai, na dringim planti strongpela dring na mekim pasin nogut, na sakim lo bilong God na mekim lotu long god giaman.” Ol dispela pasin em “pasin nogut.” (1 Pita 4:3, 4) Ol manmeri i bihainim dispela rot bai ol i bagarap.
20 Tasol lain bilong God ol i bihainim narapela kain rot; em klinpela rot na ol manmeri i wokabaut long en ol i klinpela manmeri, olsem ol i bihainim pasin i stret. Profet Aisaia i bin mekim tok profet na makim olsem dispela rot bai op long ol long taim bilong pinis. Aisaia i tok: “Na bai i gat wanpela bikrot i stap, em wanpela rot; na ol bai kolim Rot i Holi, na man i no klin em i no ken wokabaut long dispela rot.” (Aisaia 35:8, NW) Wanpela buk (Worldwide Security Under the “Prince of Peace”) i stori long dispela tok profet na i tok: “Long yia 1919 i olsem wanpela bikrot i op long ol wokboi bilong God i stap amamas. Ol manmeri i laik i stap holi long ai bilong Jehova, em ol i wokabaut long dispela ‘bikrot,’ em ‘Rot i Holi’ . . . . Nau, klostu long pinis bilong ‘las taim,’ dispela ‘bikrot’ i op i stap yet. Planti planti manmeri . . . ol i wokabaut long ‘Rot i Holi’ i go insait long paradais bilong spirit.”a
21 Tru tumas, long nau hap lain Isrel bilong spirit ol i stap yet long graun, em lain remnan, wantaim ol poroman bilong ol, em ol “arapela sipsip,” ol i bihainim pasin i makim ol i narapela kain tru long ol manmeri bilong dispela graun Seten i bosim, em ol dispela manmeri i no tingting liklik long i stap holi. Ol i lain bilong Seten na long ai bilong ol i no gat wanpela samting em i holi. Ol dispela planti manmeri ol i wokabaut long rot “i bikpela na i op tumas,” em dispela rot “i go long ples bilong lus.” Ol i no stap klin long spirit o long pasin bilong ol, na planti ol i no stap klin long skin tu−ol i no save kom gut o mekim gut skin bilong ol. Tasol aposel Pol i tok: “Yumi mas rausim olgeta doti bilong bodi na bilong spirit, na i stap klin. Na yumi mas pret long God na bihainim tru pasin holi oltaim.” (2 Korin 7:1) Lain bilong God i mas mekim wanem bambai ol i ken i stap klin long tingting na long skin? Orait, tok i kamap bihain long dispela bai stori long dispela samting.
[Futnot]
a Sapta 16, pes 134-5.
Sampela Tok Bilong Tingim Gen
◻ Dispela tok “holi” i makim wanem tupela samting? Olsem wanem na yumi ken tok, Jehova em i holi tru?
◻ Ol Isrel i mas i stap holi long wanem tupela samting?
Ol Isrel bilong spirit na ol poroman bilong ol, em ol arapela sipsip, ol i mas mekim wanem?
◻ Sapos yumi pret long God bai yumi maritim wanem kain poroman?
◻ I gat wanem tupela rot ol man inap bihainim long nau? Bilong wanem yu mas skelim gut wanem rot yu laik bihainim?
2. (a) Dispela tok “holi” i makim wanem tupela samting? Olsem wanem Jehova yet em i stap holi olsem? (b) Moses i tok wanem na em i kamapim gut olsem Jehova em i holi?
3. Olgeta Isrel i mas i stap holi long wanem ol samting? Jehova i mekim wanem bilong helpim ol long i stap holi olsem?
4, 5. (a) Olsem wanem lain Isrel bilong skin i stap narapela kain? (b) Ol Isrel bilong spirit i mas i stap olsem wanem? Aposel Pita i tok wanem na yumi save, ol i mas i stap olsem?
6, 7. (a) Revelesen sapta 7 i stori olsem wanem long ol manmeri bilong ‘bikpela lain’? Olsem na ol i mas mekim wanem? (b) Ol paragraf bihain long dispela bai stori long wanem samting?
8. I gat wanem as na ol Isrel i mas klia long ol lotu bilong Kenan?
9. God i givim wanem tok long liklik hap lain ol i stap gut long em na ol i lusim Babilon long yia 537 paslain long Krais?
10, 11. (a) God i givim wanem wankain tok long ol Isrel bilong spirit long taim bilong ol aposel? (b) Olsem wanem lain bilong God i bin bihainim gut dispela tok kirap long yia 1919 na 1935? Lain remnan wantaim ol poroman bilong ol i mekim wanem samting moa na ol i stap klin long spirit?
12. (a) Jehova i givim wanem ol lo long ol Isrel na dispela i helpim ol long bihainim gutpela stretpela pasin i winim tru pasin bilong ol lain i stap klostu long ol? (b) I gat wanem ol strongpela lo bilong ol pris?
13. Baibel i tok, “meri” bilong Krais i olsem wanem samting? Bilong wanem Baibel i tok olsem?
14, 15. (a) Lain o “meri” bilong Krais ol i mas i stap klin long spirit na ol i mas mekim wanem samting moa? (b) Olsem wanem yumi save, ol arapela sipsip tu i mas i stap klin long pasin bilong ol?
16, 17. (a) Wanem ol tok bilong Baibel i makim olsem ol manmeri i laik bihainim klinpela pasin i no olsem ol i mas i stap singel? (b) Kristen i mas maritim wanem kain poroman na bai em i kamapim long ples klia olsem em i pret long God? Wanpela aposel i tok yumi mas “maritim Kristen” tasol, na sapos Kristen i sakim dispela tok, olsem wanem em i no bihainim gutpela tingting?
18. I gat wanem narapela samting ol Kristen i ken mekim na bai marit bilong ol i stap klinpela?
19, 20 (a) Stori long bikpela rot em planti man i bihainim. (b) Lain bilong Jehova ol i mas i stap narapela kain olsem wanem long lain bilong Seten? (c) Lain bilong God ol i wokabaut long wanem bikrot? Wanem taim dispela rot i op long ol? Husat tasol ol i ken wokabaut long dispela rot?
21.Ol wokboi bilong Jehova i mas i stap narapela kain olsem wanem long lain bilong Seten? Bilong wanem ol i mas i stap narapela kain olsem? Tok i kamap bihain long dispela bai stori long wanem samting?
[Piksa long pes 14]
Baibel i tok: “Marit em i mas i stap olsem samting i klinpela tru”