Ol Yangpela i Laik Save . . .

Olsem Wanem Sapos Papamama i No Laik Mi Marit?

Lakesha na boipren bilong em i tingting long marit, tasol mama bilong em i no orait long en. Lakesha i tok: “Long dispela yia bai mi gat 19 krismas, tasol mama i laik mipela i wet inap long mi gat 21 krismas.”

SAPOS yu tingting long maritim boipren bilong yu, i stret yu laik papamama bilong yu i amamas wantaim yu. Ating yu bel hevi tru taim papamama i no amamas long man yu laik maritim. Orait yu mas mekim wanem? Bai yu sakim laik bilong ol, na wok long stretim ol samting bilong marit bilong yupela?a

Ating dispela bai kirapim laik bilong yu long marit sapos yu bikpela pinis, na lo i tok yu ken marit maski papamama i no tok orait long dispela. Tasol Baibel i no makim olsem man i mas i gat hamas krismas na bai em i no daun moa long papamama. (Sindaun 1:⁠8) Na sapos yu sakim laik bilong ol, dispela inap mekim na yu no pas gut moa wantaim tupela. Na tu, nogut i gat gutpela as na papamama bilong yu i no laik bai yu marit.

Long Wanem Taim Yu Yangpela Tumas Long Marit?

Olsem wanem? Papamama bilong yu i tok yu yangpela tumas long marit? Tru, Baibel i no makim hamas krismas na man i yangpela tumas long marit. Tasol em i tok taim man o meri i laik marit, gutpela sapos em i abrusim taim em i yangpela yet na bel i strong tumas long mekim maritpasin. (1 Korin 7:36) Bilong wanem i olsem? Long wanem, long dispela taim ol yangpela i lain yet long kisim tingting bilong ol man i bikpela pinis, na ol i lain yet long bosim bel, na bihainim ol pasin bilong spirit, em ol dispela pasin yumi mas i gat na bai marit i ken wok gut.​—⁠Skelim wantaim 1 Korin 13:11; Galesia 5:​22, 23.

Dale i gat 20 krismas na taim em i laik marit em i kirap nogut taim papamama bilong em i no laik em i marit. Em i tok: “Ol i tok mi yangpela tumas na mi no gat planti save. Mi ting olsem mipela i redi long marit na mipela inap lain long ol samting taim mipela i marit pinis, tasol papamama i tingting planti, nogut bel bilong mi i kirap nating na mi laik marit. Ol i givim planti askim long mi. Olsem: Mi redi long skelim gut ol samting i save kamap long olgeta de, na redi long lukautim mani, na redi long lukautim famili long ol samting bilong skin, na tingting, na bel i stap isi, na ol samting bilong spirit? Mi redi long kamap papa? Mi lain pinis long pasin bilong toktok gut wantaim? Mi klia gut long ol samting mi mas mekim bilong amamasim poroman marit bilong mi? Ol i ting olsem mi mas save gut long mi yet pastaim olsem man i bikpela pinis, na bihain mi inap lukautim narapela i bikpela pinis.

“Mipela i no laik wet, tasol mipela i surikim de bilong marit, bambai mipela i ken kamap man i bikpela pinis pastaim. Taim mipela i marit, mitupela i gat ol pasin i helpim marit bilong mipela long i stap gut.”

Taim Tupela i Bilong Narapela Narapela Lotu

Taim Terri i kirap laikim wanpela man i no wanlotu bilong em, em i go lukim dispela man long pasin hait. Taim Terri i tokaut olsem em wantaim dispela man bai marit, em i tingting planti taim mama bilong em i no laik bai tupela i marit. Terri i tok: “Mi no laik mama i no amamas long mi. Mi laik bai mipela i pas gut wantaim, olsem mama na pikinini meri i save mekim.”

Tasol husat tru i mekim na ol i no pas gut wantaim? Olsem wanem? Mama bilong Terri i gat hatpela pasin o em i no tingting gut? Nogat, em i laik strongim tasol tok bilong Baibel long ol Kristen i “mas maritim man i bilip long Bikpela.” (1 Korin 7:39) Baibel i tok strong: “Ol haiden ol i narakain, olsem na yupela i no ken pas wantaim ol na wok bung wantaim ol.” (2 Korin 6:​14, 15) Bilong wanem i olsem?

Wanpela bikpela samting bilong i stap amamas na marit i wok gut, em tupela i mas wanbel long samting bilong lotu. Ol saveman i tok, taim tupela i no bilong wankain lotu dispela i save kamapim ol bikpela hevi, na planti marit olsem i save katim marit. Wanpela bikpela hevi moa inap kamap i olsem narapela inap subim narapela long sakim bilip bilong em​—⁠o lusim bilip bilong em olgeta. Maski poroman marit i no pasim yu long bihainim lotu bilong yu, tasol bai yu bel hevi, long wanem, yu no inap toktok wantaim em long ol bilip bilong yu. Yu ting dispela i kamapim amamas insait long marit?

Olsem na Terri i hatwok long skelim samting em bai mekim. Terri i tok: “Mi laikim tru God Jehova, tasol mi no laik lusim boipren bilong mi.” Yu no inap mekim tupela samting wantaim. Yu no inap sakim lo bilong God, na em i ken orait yet long yu na mekim gut long yu.

Tasol, ating yu laik maritim wanpela man Kristen, tasol papamama i no laik bai yu maritim em. Olsem wanem? Ating sampela taim i no gutpela long pas wantaim wanpela wanbilip, olsem maritim em? Yes, sapos em i no putim wankain mak bilong ol samting bilong spirit olsem yu, o em i no givim bel olgeta long God. Sapos olsem, o sapos long kongrigesen bilong em ol i tok em i no “gutpela man,” i stret papamama bilong yu i tingting planti.​—⁠Aposel 16:⁠2.

Olsem Wanem Sapos Em i Bilong Narapela Skin o Ples?

I gat narapela as na papamama bilong Lynn i no laik bai em i marit: Em i laik maritim man bilong narapela skin. Baibel i tok wanem long dispela samting? Em i tok “God i save mekim wankain pasin long olgeta manmeri” na “long wanpela tumbuna tasol em i bin mekim olgeta lain manmeri i kamap.” (Aposel 10:​34, 35; 17:26) Ol manmeri i kamap long wanpela tumbuna na long ai bilong God ol i wankain tasol.

Tru, olgeta marit i “painim planti hevi long laip bilong ol,” tasol ating ol marit bilong narapela narapela skin i painim sampela hevi moa. (1 Korin 7:28) Bilong wanem i olsem? Long wanem, long dispela graun i gat pasin birua i pulap long en, na ol man i no gat wankain tingting olsem God long ol narapela narapela skin. Long sampela kantri long hap bilong Wes, planti manmeri moa i maritim man o meri bilong narapela skin, tasol long sampela hap ol man i gat tingting nogut long ol dispela kain marit. Olsem na ating papamama bilong yu i ting yu no inap karim ol dispela kain hevi.

Lynn i tok: “Papamama bilong mi i ting dispela bai putim bikpela hevi long mipela.” Lynn i bihainim savepasin na em i tingim laik bilong ol, na em i wet pastaim. Taim papamama i luksave olsem Lynn i gat pasin bilong meri i bikpela pinis, na ol i kisim save moa long dispela man em i laikim tru, isi isi ol i bilip olsem em inap karim ol hevi bilong dispela marit. Lynn i tok: “Taim ol i ting mipela inap i stap amamas tru wantaim, ol tu i amamas wantaim mipela.”

Tasol sampela papamama ol i no tingting planti long man i gat narapela kain skin​—⁠ol tingting planti long pasin bilong ples. Ating papamama bilong yu i ting olsem bihain bai yu hatwok long i stap amamas wantaim wanpela man i gat narapela kain pasin, na em i no gat wankain tingting long ol samting, na em i no laikim wankain kaikai, na musik na amamas olsem yu. Tru tumas, sapos yu maritim wanpela man o meri bilong narapela skin o ples, ol bikpela hevi inap painim yu. Olsem wanem? Yu inap karim ol dispela hevi?

No Gat As na Papamama i Laik Pasim Yu

Tasol olsem wanem sapos yu ting i no gat gutpela as na papamama i laik pasim yu long marit? Wanpela yangpela meri, nem bilong em Faith, em i stori long mama bilong em olsem: “Mama i bin katim marit planti taim. Em i save tok, yu no inap save gut long man yu laik maritim, taim yu maritim em pinis nau yu save, tasol sori tru, yu marit pinis long em. Em i ting olsem mi no inap stap amamas taim mi marit.” Planti papamama em marit bilong ol yet i no bin kamap gutpela, ol i no inap tingting stret long marit bilong ol pikinini bilong ol. Sampela papamama i no gat gutpela as na ol i no laik pikinini bilong ol i marit, ating ol i laik bosim laip bilong pikinini.

Sapos papamama bilong yu i no laik harim tok bilong yu, yu ken mekim wanem? Namel long ol Witnes Bilong Jehova, i gat ol elda long kongrigesen yu ken askim ol long helpim yupela long stretim ol hevi bilong famili. Ol i mekim wankain pasin long olgeta manmeri, na ol i ken helpim famili long toktok wantaim long dispela samting long pasin isi, na long pasin i save kamapim gutpela kaikai.​—⁠Jems 3:⁠18.

Painim Bel Isi

Tru, i gat ol narapela samting inap mekim na papamama bilong yu i pasim yu long marit, kain olsem hevi bilong mani o pasin bilong dispela man o meri yu laik maritim. Na long dispela taim bilong sik AIDS na bilong ol narapela sik bilong pamuk, i stret papamama bilong yu i tingting planti long skin bilong yu, sapos dispela man o meri yu laik maritim i bin insait long pasin pamuk samting paslain long taim em i kamap Kristen.b

Taim yu stap yet long haus bilong papamama bilong yu, yu mas daun long ol. (Kolosi 3:20) Tasol maski sapos yu stap long haus bilong yu yet, na yu bikpela pinis na yu yet inap skelim ol samting yu mas mekim, no ken hariap long sakim tingting bilong papamama bilong yu. Yu mas amamas long harim tok bilong ol. (Sindaun 23:22) Skelim gut ol hevi inap kamap taim yu marit.​—⁠Skelim wantaim Luk 14:⁠28.

Taim yu mekim olsem pinis, ating yu gat laik yet long marit. Tru, taim yu pasim tok long bel long marit yu mas karim hevi bilong dispela. (Galesia 6:⁠5) Sapos yu bin wok strong long skelim gut tingting bilong papamama bilong yu, ating dispela inap kirapim ol long wanbel wantaim yu long samting yu laik mekim, maski ol i no amamas tumas long mekim olsem. Tasol sapos ol i wok long pasim yu, no ken bel nogut o kros long ol. Tingim: Papamama bilong yu ol i laikim yu tru, na ol i laik bai yu stap amamas long bihain. Wok strong long stap wanbel wantaim ol. Taim marit bilong yu i kamap gutpela, ating tingting bilong ol bai senis.

Tasol, sapos yu tingim gut ol tok papamama bilong yu i mekim, na yu skelim gut yu yet na dispela man o meri yu gat bikpela laik long maritim, yu no ken kirap nogut sapos yu kisim save olsem, ating tingting bilong papamama bilong yu i stret.

[Ol Futnot]

[Piksa long pes 21]

Ating papamama bilong yu i ting yu yangpela tumas long marit