Stap Gut Long Wok Bilong Jehova
“Bikpela [Jehova], sapos man i no lusim yu, orait yu no save lusim em.”—2 SAMUEL 22:26.
1. Jehova i save mekim wanem long ol man i stap gut long em?
JEHOVA i bin mekim planti samting bilong helpim lain bilong em. (Song 116:12) Em i bin givim planti samting bilong spirit na bilong skin long yumi olsem presen, na em i mekim pasin marimari long yumi! King Devit bilong lain Israel bilong bipo em i save, God i save lukautim gut ol man i stap gut long em. Devit i tok, Jehova i bin “kisim bek Devit long han bilong Sol na long han bilong olgeta arapela birua bilong en.”—2 Samuel 22:1.
2. Devit i tok wanem olsem 2 Samuel sapta 22 i tok?
2 Devit i litimapim nem bilong Jehova (olsem long Song sapta 18) na em i tok, “em i save kisim bek mi long han bilong ol birua.” (2 Samuel 22:2-7) God i stap long heven na em i bin kisim bek Devit long han bilong ol birua. (Ves 8-19) God i mekim gut long Devit, long wanem, em i bihainim pasin i stret na em i stap gut long Jehova. (Ves 20-27) Na Devit i mekim planti samting long strong bilong Jehova. (Ves 28-43) Na Jehova i helpim Devit long taim ol i sutim tok long Devit (Ves 44) na long taim ol narapela lain i biruaim em, na Devit i litimapim nem bilong Jehova na i tok: “Oltaim em i save mekim mi i winim tru ol birua. Oltaim em i save laikim mi tru.” (Ves 44-51) Sapos yumi tu i bihainim pasin i stret na yumi bilip olsem Jehova bai strongim yumi, Jehova inap helpim yumi na bai yumi abrusim bagarap.
Bilong i Stap Gut
3. Olsem wanem long dispela tok “stap gut”?
3 Wanpela singsing bilong Devit i strongim bel bilong yumi. Em i tok: “Bikpela [Jehova], sapos man i no lusim yu, orait yu no save lusim em.” (2 Samuel 22:26) Tok Hibru cha·sidhʹ i olsem “man i stap gut long narapela” o “man i gat pasin sori” o “bihainim stret.” (Song 18:25) Na tok Hibru cheʹsedh i olsem man i givim bel long wanpela wok o long wanpela man na em i stap olsem inap long dispela wok i pinis. Jehova i laikim tumas lain bilong em, na ol i save mekim olsem long em. Baibel i kolim dispela stretpela pasin holi olsem “mekim gutpela pasin” long man. (Stat 20:13; 21:23) Tok Grik ho·si·oʹtes na hoʹsi·os i olsem “stap gut long” o “pasin holi” o “pasin daun.” I olsem: Yumi mas i stap gut long God na givim bel long em na mekim stret ol wok bilong em na pas strong tru long em, olsem ol samting em glu i save pasim strong wantaim.
4. Jehova i bin mekim wanem ol gutpela pasin?
4 Jehova i save bihainim stretpela pasin na i stap gut long man long olgeta taim. Em i laikim tumas lain bilong em na em i laikim stretpela gutpela pasin tasol, olsem na em i save mekim kot long ol man nogut na daunim ol. (KTH 15:3, 4; 16:5) Em i laik truim tok bilong kontrak em i bin mekim wantaim Abraham, olsem na em i no bin les kwik long ol Israel. (2 King 13:23) Ol man i stap gut long God i go inap long ol i dai, em bai i stap gut long ol tu na tingim ol. (Song 37:27, 28; 97:10) Jisas em i “man bilong [God] yet” na em i save God i “laikim [em] tumas,” na Jisas i tingim dispela samting na dispela tingting i strongim em na em i save, taim em i dai God bai tingim em na kirapim em bek.—Song 16:10; Aposel 2:25, 27.
5. Jehova i laik bai lain bilong em i mas mekim wanem? Yumi mas tingim wanem samting?
5 Lain bilong God Jehova i mas bihainim pasin bilong em na i stap gut long em. (Efesus 4:24) Bilong winim mak bilong kamap elda long kongrigesen, man i mas i stap gut long Jehova. (Taitus 1:8) Orait, lain bilong Jehova i mas tingim wanem ol samting na dispela bai kirapim ol long i stap gut long Jehova?
Amamas Long Save Yumi Kisim
6. Yumi mas ting olsem wanem long ol save yumi kisim long Baibel? Yumi kisim dispela save long wanem rot?
6 Yumi mas amamas long ol save bilong Baibel yumi lainim pinis, na dispela i mas kirapim yumi long givim bel long Jehova. Aposel Pol i tokim Timoti: “Yu mas holim strong dispela tok yu bin kisim na yu save bilip strong long en. Yu save gut long mipela ol manmeri i bin skulim yu long dispela tok. Na yu save, taim yu bin i stap liklik pikinini yet, yu stat long kisim save long ol buk i gat tok bilong God. Dispela ol buk ol inap long givim gutpela tingting long yu, na bai yu bilip long Krais Jisas, na bai God i kisim bek yu.” (2 Timoti 3:14, 15) Yumi bin kisim dispela save long rot bilong ‘gutpela wokboi.’—Matyu 24:45-47.
7. Ol elda i mas ting olsem wanem long ol save God i salim long yumi long rot bilong ‘gutpela wokboi’?
7 Ol elda i mas amamas na tenkyu long ol gutpela save olsem kaikai bilong spirit God i givim long ol long rot bilong dispela ‘gutpela wokboi.’ Bipo sampela elda i no amamas long en, na wanpela man i lukim dispela pasin bilong ol na em i tok, ol i no ting tok bilong Wastaua em i tok tru bilong God, na ol i laik kirapim ol man long bihainim tingting bilong ol yet. Tasol ol elda i stap gut long God ol i no save wok long kirapim ol man long sakim sampela tok bilong God em i givim long yumi long rot bilong ‘gutpela wokboi.’
8. Sapos yumi no klia long sampela tok bilong Baibel i kam long rot bilong ‘gutpela wokboi,’ yumi mas mekim wanem?
8 Yumi ol Witnes i dediket pinis yumi mas i stap gut long em na long oganaisesen bilong em. Yumi no ken tingting liklik long lusim gutpela save bilong God na bikhet long em na lusim bilip na givim baksait long ol samting bilong spirit na bihain yumi bagarap. (Jeremaia 17:13) Orait, olsem wanem sapos yumi no klia long sampela tok bilong Baibel em oganaisesen i tokim yumi long en? Yumi mas mekim pasin daun na save olsem yumi kisim we tok i tru, na yumi mas beten long God i ken helpim yumi long wetim taim bihain na bai sampela tok i kamap long ol buk samting bilong givim save moa long yumi na bai yumi klia gut long dispela tok.—Jems 5:1-8.
Amamas Long Ol Brata Kristen
9. 1 Jon 1:3-6 i tok wanem long ol Kristen i mas i stap wanbel na pren gut wantaim?
9 Mas amamas long gutpela pasin sori i stap namel long ol brata bilong yumi, na dispela tu i mas kirapim yumi long givim bel long wok bilong Jehova. Sapos yumi no pas gut wantaim ol brata Kristen na wanbel na pren gut wantaim ol, yumi no inap pas gut wantaim God na Krais. Aposel Jon i bin tokim ol Kristen olsem: “Mipela i lukim na harim pinis, na mipela i save tokaut long yupela tu, bai yupela inap long i stap wanbel wantaim mipela. Na yumi stap wanbel wantaim Papa, na wantaim Pikinini bilong en Jisas Krais. . . . Sapos yumi tok, ‘Mi wanbel wantaim em,’ tasol yumi wokabaut long tudak, orait dispela tok bilong yumi em i tok giaman, na yumi no wokabaut long pasin i tru.” (1 Jon 1:3-6) Olgeta Kristen, maski ol i bilong i go long heven o bilong i stap long graun, ol i mas bihainim dispela lo.
10. Tru, i gat wanpela hevi i kamap namel long Yuodia na Sintike, tasol Pol i ting olsem wanem long tupela?
10 Mas wok strong long i stap wanbel, maski i hatwok. Tupela meri Kristen, em Yuodia na Sintike, ol i no stap wanbel, na kros i stap namel long tupela, olsem na Pol i tokim tupela: “Yutupela meri wantaim i bilong lain bilong Bikpela, olsem na yutupela i mas kamap wanbel.” Na Pol i tokim wanpela brata olsem: “Na yu, wanwok tru bilong mi, mi tokim yu, yu mas helpim dispela tupela meri. Tupela i bin poroman gut wantaim mi long wok bilong autim gutnius. Na Klemen na ol arapela wanwok bilong mi, ol tu i bin wok wantaim mipela. Nem bilong olgeta dispela lain i stap long buk bilong laip.” (Filipai 4:2, 3) Dispela tupela gutpela meri i bin mekim gutpela wok wantaim Pol na ol narapela brata long autim tok, olsem na Pol i gat strongpela tingting olsem nem bilong tupela “i stap long buk bilong laip.”
11. Sapos wanpela gutpela Kristen i gat wanpela hevi, yumi mas ting olsem wanem long em?
11 Kristen i no save pasim wanpela mak samting long skin o klos bilong em bilong makim wok o namba em i holim insait long oganaisesen bilong Jehova o bilong makim olsem em i bin i stap gut long Jehova inap planti yia. Olsem na maski em i bin mekim pasin kranki, yumi mas sori long em na tingim ol gutpela wok bilong Jehova em i bin mekim inap longtaim. Pol i bin toktok long “wanwok tru bilong mi,” ating em wanpela gutpela brata i laik helpim ol narapela brata. Sapos yu wanpela elda, yu save sori long ol brata na redi long helpim ol? Yumi olgeta i mas tingim ol gutpela pasin bilong ol brata na ol gutpela wok ol i bin mekim, olsem God i save mekim, na yumi mas helpim ol long karim hevi bilong ol.
No Gat Narapela Gutpela Rot
12. Taim sampela long lain bilong Jisas i hevi long tok bilong em na ol i lusim em, olsem wanem long Pita?
12 Sapos yumi save i no gat narapela rot yumi ken bihainim bilong painim laip oltaim, dispela tingting bai kirapim yumi long stap gut long wok bilong Jehova. Sampela long lain bilong Jisas i bin hevi long sampela tok em i mekim, olsem na ol i lusim em, na em i tokim ol aposel: “Ating yupela tu i laik lusim mi na i go?” Pita i tok: “Bikpela, bai mipela i go long husat? Tok bilong yu tasol i save givim laip i stap gut oltaim oltaim. Na mipela i bilip, na i save gut olsem, yu dispela gutpela stretpela man God i bin makim bilong em yet.”—Jon 6:66-69.
13, 14. (a) Bilong wanem God i no orait long lotu Juda long taim bilong Jisas? (b) Wanpela Witnes i bin tok wanem long oganaisesen bilong God?
13 Ol Juda long taim bilong Jisas ol i no gat dispela gutpela ‘tok i save givim laip oltaim’ long man. Ol i givim baksait long Jisas na ol i no bilip olsem em i Mesaia. Ol i no bihainim olgeta tok bilong Baibel. Na ol saveman bilong lo i no bilip long ol ensel o long man i dai pinis em bai kirap bek. Ol Farisi i no wanbel wantaim ol long dispela samting, tasol ol i bihainim tok bilong ol tumbuna, na Baibel nogat. (Matyu 15:1-11; Aposel 23:6-9) Ol dispela samting i bin paulim ol Juda na i hatwok long ol i bilip long Krais Jisas. (Kolosi 2:8) Na pastaim Pol tu i strong long bihainim ol dispela pasin na em i wok long bagarapim ol Kristen.—Galesia 1:13, 14, 23.
14 Jehova i no orait long lotu Juda, tasol em i bin mekim gut long oganaisesen o lain i bihainim Jisas, em ol i “wok strong long mekim olgeta kain gutpela pasin.” (Taitus 2:14) Dispela oganaisesen i stap yet, na wanpela Witnes Bilong Jehova bilong longtaim em i tok: “Bikpela samting bilong mi i olsem: Mi save stap klostu long oganaisesen bilong Jehova. Sampela samting i bin painim mi bipo, na nau mi save, yumi no ken bihainim tingting bilong yumi yet. Olsem na mi bin pasim tok long bel bilong mi long i stap klostu long gutpela oganaisesen bilong Jehova na bai em i ken orait long mi na mekim gut long mi.” I no gat narapela rot yumi ken bihainim na bai God i ken orait long yumi na givim laip oltaim long yumi.
15. Bilong wanem yumi mas wok gut wantaim oganaisesen bilong Jehova na ol elda?
15 Spirit bilong God i stap long oganaisesen bilong em tasol, na yumi mas wok gut wantaim ol long kamapim nem na laik bilong Jehova long ol man. Tru, lain bilong en i save popaia na ol i no gutpela olgeta. (Rom 5:12) Tasol yumi mas daun na bihainim tok bilong oganaisesen na no ken bihainim pasin bilong Aron na Miriam. Tupela i bin sutim tok long Moses, na “Bikpela i kros nogut tru long tupela.” God i bin makim Moses long bosim ol samting, na tupela nogat. (Namba 12:7-9) Long nau ol Kristen i stap gut long Jehova ol i bihainim tok bilong “ol lida [elda] bilong [kongrigesen]” na wok gut wantaim ol, long wanem, ol i save Jehova i laikim olsem. (Hibru 13:7, 17) Bilong i stap gut long God, yumi mas go oltaim long miting na mekim tok i save “kirapim ol long laikim ol arapela na mekim gutpela pasin long ol” na long “wok strong moa long strongim bel bilong ol arapela.”—Hibru 10:24, 25.
Strongim Ol Narapela
16. Yumi mas i gat laik long mekim wanem long narapela man na dispela bai helpim yumi long i stap gut long wok bilong Jehova?
16 Bel bilong yumi i mas i gat laik long strongim ol narapela na long i stap gut long Jehova na mekim wok bilong em. Pol i tok: “Save nating em i save kirapim pasin bilong bikhet. Tasol pasin bilong givim bel . . . long ol arapela man, dispela i save mekim yumi i kamap strongpela Kristen.” (1 Korin 8:1) Sampela saveman i gat pasin antap, tasol pasin bilong sori i save strongim man. Buk bilong Profesa Wais na Profesa Inglis i tok: ‘Sapos man i mekim pasin sori long ol man, ol bai bekim pasin sori long em. Sapos man i tingim ol narapela man na helpim ol, dispela bai mekim gut long em wantaim ol.’ Tru tumas, sapos yumi mekim pasin sori long narapela man, dispela bai strongim em na yumi tu wantaim, olsem Jisas i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.”—Aposel 20:35.
17. Olsem wanem pasin sori i ken strongim man? Sapos yumi gat pasin sori yumi no ken mekim wanem?
17 Long 1 Korin 8:1, Pol i kolim tok Grik a·gaʹpe na i stori long pasin sori yumi mas mekim long olgeta man. Sapos yumi gat dispela pasin sori, bai yumi wok long strongim man, na yumi no les kwik long em, na bai yumi karim hevi, na yumi no kros o bel nogut long man, o mekim pasin antap. (1 Korin 13:4-8) Na sapos yumi gat pasin sori olsem, yumi no ken toktok planti long ol brata; ol i no nambawan, olsem yumi tu i no nambawan. Na yumi no ken kamap man bilong “givim baksait long God” olsem sampela man bipo “ol i bin hait i kam insait” long kongrigesen bilong ol Kristen tru na ol i “bikhet long Bikpela” na “tok nogut long ol nambawan ensel” na long ol wasman Kristen. (Jut 3, 4, 8) Yumi mas i stap gut long Jehova na no ken larim kain man olsem i pulim yumi long bihainim pasin bikhet bilong ol.
Sakim Satan!
18. Satan i laik mekim wanem long lain bilong Jehova? Bilong wanem em i no inap mekim olsem?
18 Yumi save pinis, Satan i laik bagarapim pasin wanbel bilong lain bilong God, olsem na dispela save i mas kirapim yumi long i stap gut long Jehova. Satan i laik bagarapim na pinisim lain bilong God. Lain bilong Satan i bin kilim i dai sampela man i bin lotu tru long God, tasol God i no ken larim Satan i pinisim olgeta manmeri long lain bilong em. Jisas i bin i dai na bai “em i ken bagarapim Satan, em dispela man i gat strong bilong mekim ol manmeri i dai.” (Hibru 2:14) Bipo Satan i gat bikpela strong long taim em i stap yet long heven, tasol taim Krais i kamap King long 1914 em i rausim Satan long heven na nau em i no gat bikpela strong olsem bilong pastaim. Na long taim Jehova yet i makim, Jisas bai bagarapim Satan wantaim oganaisesen bilong em.
19. (a) Wastaua i bin tok wanem long Satan? (b) Yumi no ken larim Satan i kirapim yumi long mekim wanem long ol brata?
19 Wastaua i bin tok: “Sapos Satan inap mekim na bai lain bilong God i bruk na kros pait na ol i tingim ol yet tasol na lusim pasin bilong laikim tru ol brata, orait, long dispela rot em bai bagarapim ol.” (Wastaua tok Inglis, Me 1, 1921, pes 134) Yumi no ken larim Satan i bagarapim pasin wanbel i stap namel long yumi. No ken tok baksait o kros pait wantaim narapela. (Wok Pris 19:16) Was gut na bai Satan i no ken giamanim yumi na yumi mekim tok nogut o pasin nogut long ol brata i stap gut long wok bilong Jehova o putim hevi long ol. (Lukim 2 Korin 2:10, 11.) Yumi mas bihainim tok bilong Pita, em i tok: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai. Tasol yupela i mas i stap strong long bilip na sakim em.” (1 Pita 5:8, 9) Sapos yumi strong long givim baksait long Satan, bai yumi inap i stap wanbel olsem lain bilong Jehova i mas mekim.—Song 133:1-3.
Beten na Tingim God
20, 21. Sapos yumi beten long Jehova, olsem wanem dispela i ken helpim yumi long mekim gut wok bilong em?
20 Mas beten askim Jehova long helpim yumi long i stap strong na stap gut long wok bilong em. Na taim em i harim beten bilong yumi, bai yumi go klostu moa long em. Aposel Pol i tok strong long yumi mas tingim Jehova na wetim em i helpim yumi. Pol i tok: “Mi laik bai ol man bilong olgeta ples i mas . . . mekim [beten]. Mi laik bai ol i ken givim laip bilong ol long God na i stap holi, na lusim pasin bilong belhat na kros, na long dispela pasin ol i ken mekim [beten].” (1 Timoti 2:8) Ol elda i mas beten askim God long helpim ol long mekim wok bilong ol. Sapos ol i laik miting wantaim bilong toktok long ol samting bilong kongrigesen, na ol i beten askim Jehova long stiaim ol tok ol i kamapim, ating ol i no inap tok pait o tok kros samting.
21 Na sapos yumi beten askim God Jehova long helpim yumi, bai yumi lukautim gut wok bilong em i stap long han bilong yumi. Wanpela man i bin i stap gut long Jehova inap planti yia, na em i tok: “Sapos yumi givim bel long wok ol i givim long yumi insait long oganaisesen bilong God, na yumi stap gut long dispela wok, God bai amamas long wok yumi mekim. Maski wok bilong yumi i olsem wanpela wok nating, yumi mas mekim gut, long wanem, sampela taim dispela wok i mas kamap pastaim na bihain bai ol narapela bikpela wok i ken kamap. Olsem na yumi mas i gat pasin daun na tingting long mekim wok bilong litimapim nem bilong Jehova, olsem Pol i tok: “Yupela i mas i stap strong, na i no ken surik liklik. . . . Oltaim yupela i mas wok strong long mekim wok bilong Bikpela.”—1 Korin 15:58.
22. Jehova i bin mekim gut tru long yumi, olsem na yumi mas mekim wanem?
22 Maski yumi mekim wanem kain wok bilong Jehova, yumi no inap bekim long em olgeta gutpela samting em i bin mekim long yumi, long wanem, em i bin givim planti tumas samting long yumi, na yumi no inap baim em long dispela. Nau yumi stap gutpela tru insait long oganaisesen bilong God wantaim ol pren bilong em! (Jems 2:23) Jehova i mekim gut long yumi, olsem na nau yumi stap wanbel olsem ol brata brata, na strongpela pasin sori i stap namel long yumi, na Satan i no inap tekewe dispela samting long yumi. Olsem na yumi mas pas gut wantaim Papa bilong yumi em i stap long heven, na wok gut wantaim lain bilong em. Long nau na i go inap long olgeta taim bihain yumi mas i stap gut long Jehova na mekim wok bilong em.
Bai Yu Bekim Olsem Wanem?
◻ Olsem wanem yumi ken i stap gut long narapela?
◻ Yumi tingim wanem ol samting na dispela i mas kirapim yumi long i stap gut long Jehova?
◻ Bilong wanem yumi mas givim baksait long Satan?
◻ Olsem wanem beten i ken helpim yumi long i stap gut long Jehova?
[Piksa long pes 23]
Ol gutpela wokman bilong Jehova i no larim Satan i bagarapim pasin wanbel bilong ol