Wokabaut Yet Long Rot Jehova i Makim
“Yu mas bilip long Bikpela . . . na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu.”—SONG 37:34.
1, 2. King Devit i mekim wanem bilong wokabaut long rot Jehova i makim? Yumi mas mekim wanem long nau?
“MI SAVE prea long yu tasol. Olsem na yu soim rot long mi na mi ken bihainim.” (Song 143:8) Ol Kristen bilong nau i givim bel long mekim wankain tok olsem dispela tok bilong King Devit. Ol i laik tru long mekim ol pasin Jehova i laikim na wokabaut long rot em i makim. Olsem wanem ol inap mekim olsem? Long Devit, dispela i makim olsem em i mas bihainim lo bilong God. Em i mas bilip long Jehova na em i no ken mekim kontrak wantaim ol narapela lain nabaut. Tru tumas, na em i mas stap gut long Jehova na mekim wok bilong em—em i no ken mekim olsem long ol god bilong ol narapela lain, nogat. Ol Kristen i mas mekim sampela samting moa bilong wokabaut long rot Jehova i makim.
2 Wanpela samting i olsem: Bilong wokabaut long rot Jehova i makim long nau, yumi mas bilip long ofa bilong Krais Jisas, na yumi mas bilip olsem em i ‘rot na as bilong tok tru na as bilong laip.’ (Jon 3:16; 14:6; Hibru 5:9) Na tu, yumi mas bihainim “lo bilong Krais,” em wanpela lo bilong en i olsem yumi mas laikim ol narapela, na laikim tru ol brata bilong Jisas em God i bin makim ol. (Galesia 6:2; Matyu 25:34-40) Ol man i wokabaut long rot Jehova i makim ol i save laikim tru ol lo na tok bilong em. (Song 119:97; Sindaun 4:5, 6) Ol i tingim wok bilong ol long autim tok em i olsem wanpela gutpela samting tru, olsem wanpela gutpela wok ol inap mekim. (Kolosi 4:17; 2 Timoti 4:5) Ol i save beten long olgeta taim. (Rom 12:12) Na ol i save ‘lukaut gut long wokabaut bilong ol. Ol i no save wokabaut olsem man i no gat save. Nogat. Ol i wokabaut olsem man i gat save.’ (Efesus 5:15) Ol i no save lusim ol gutpela samting bilong spirit bambai ol i ken kisim planti samting bilong skin o ol amamas nogut bilong skin—em ol samting bilong i stap sotpela taim tasol. (Matyu 6:19, 20; 1 Jon 2:15-17) Na tu, pasin bilong i stap gut long God na bilip long em, em ol bikpela samting. (2 Korin 1:9; 10:5; Efesus 4:24) Bilong wanem? Long wanem, i stap bilong yumi i wankain olsem bilong ol Israel bilong bipo.
Ol i Mas Bilip na Stap Gut Long God
3. Bilong wanem pasin bilong i stap gut long God na bilip long em bai helpim yumi long wokabaut yet long rot Jehova i makim?
3 Israel em i wanpela liklik lain i stap namel long ol lain i birua long ol. Ol dispela lain i mekim pasin pamuk na pasin i gat sem bilong lotuim ol god giaman bilong ol. (1 Stori 16:26) Israel tasol i lotuim Jehova, em wanpela tasol em i God tru na ol i no inap lukim, na em i laik ol i mas holimpas ol stretpela pasin. (Lo 6:4) Na i wankain tu long nau—sampela milion manmeri tasol ol i save lotuim Jehova, tasol klostu 6 bilion manmeri i stap long dispela graun, em pasin na tingting bilong ol long lotu i narapela kain tru long ol manmeri i save lotuim Jehova. Sapos yumi insait long dispela lain i gat sampela milion tasol long en, yumi mas was gut, nogut yumi larim tingting na pasin bilong dispela graun i pulim yumi long bihainim rot i no stret. Olsem wanem yumi ken was gut? Sampela samting bilong helpim yumi i olsem: Yumi mas i stap gut long God Jehova, bilip long em, na bilip strong olsem em bai truim ol tok promis bilong em. (Hibru 11:6) Dispela bai helpim yumi na yumi no ken bilip long ol samting ol lain bilong dispela graun ol i bilip na wet long en.—Sindaun 20:22; 1 Timoti 6:17.
4. Bilong wanem save bilong ol lain bilong graun “i olsem tudak?”
4 Aposel Pol i soim olsem ol Kristen i mas stap narapela kain tru long pasin bilong dispela graun taim em i tok: “Olsem na mi laik mekim wanpela tok long yupela. Long nem bilong Bikpela mi tokaut strong olsem, yupela i no ken wokabaut moa long pasin bilong ol haiden. Tingting bilong ol i paul olgeta, na save bilong ol i olsem tudak. Ol i no gat save tru, na bel bilong ol i pas, olsem na ol i stap ausait long laip bilong God.” (Efesus 4:17, 18) Jisas em i “lait tru.” (Jon 1:9) Ol man i sakim em o ol man i tok ol i bilip long em, tasol ol i no save bihainim “lo bilong Krais,” orait “save bilong ol i olsem tudak.” Ol i no wokabaut long rot Jehova i makim, ol i stap “ausait long laip bilong God.” Maski ol i ting ol i gat bikpela save long ol samting bilong graun, ol i “no gat save tru” long dispela save em inap bringim ol long laip oltaim, em ol i mas save long God Jehova na Krais Jisas.—Jon 17:3; 1 Korin 3:19.
5. Maski lait bilong tok i tru i kamap klia long olgeta hap, bilong wanem planti man i pasim bel bilong ol na ol i no laik harim tok?
5 Tasol lait bilong tok i tru i kamap klia long olgeta hap! (Song 43:3; Filipai 2:15) “Gutpela na stretpela tingting i olsem wanpela meri i sanap long ol rot na long ol maket na i singaut long ol manmeri.” (Sindaun 1:20) Long yia i go pinis, ol Witnes Bilong Jehova i lusim wan bilion aua samting long toktok wantaim ol man long God Jehova na Krais Jisas. Planti handet tausen ol i bihainim dispela tok. Tasol olsem wanem? Yumi ken kirap nogut long save olsem planti man i no laik bihainim dispela tok? Nogat. Pol i tok “bel bilong ol i pas.” Bel bilong sampela i pas, long wanem, ol i tingim ol yet tasol o ol i gat bikpela laik long mani. Na sampela i larim lotu giaman o ol samting bilong graun i pulim ol, em samting planti man long nau i save givim bel long en. Planti i kisim ol bikpela hevi na dispela i mekim na ol i givim baksait long God. Ol narapela i no laik bihainim ol stretpela lo bilong Jehova. (Jon 3:20) Olsem wanem? Wanpela man i wokabaut long rot Jehova i makim, bel bilong em inap kamap strong long ol dispela samting?
6 Olsem Pol i tok, dispela i bin kamap long lain Israel bilong bipo. Em i tok: “Dispela olgeta samting i bin kamap olsem piksa, bilong yumi ken lukim na yumi no ken mangal long ol samting nogut, olsem ol i bin mekim. Yupela i no ken lotu long ol giaman god, olsem sampela bilong ol i bin mekim. Buk bilong God i tok olsem, ‘Ol i sindaun long kaikai na dring, na bihain ol man i go pilai long ol meri.’ Yumi no ken mekim pasin pamuk, olsem sampela bilong ol i bin mekim, na long wanpela de tasol 23,000 bilong ol i bin lus.”—1 Korin 10:6-8.
6, 7. Maski ol Israel i lain bilong lotuim God Jehova, long wanem ol taim ol i bin lusim Jehova? Bilong wanem ol i mekim olsem?
7 Pastaim Pol i toktok long dispela taim ol Israel i bin lotuim wanpela bulmakau gol long as bilong maunten Sainai. (Kisim Bek 32:5, 6) Dispela samting ol i mekim i brukim wanpela lo bilong God, em sampela wik bipo ol i bin tok ol bai bihainim. (Kisim Bek 20:4-6; 24:3) Bihain Pol i toktok long taim ol Israel i brukim skru wantaim ol meri bilong Moap bilong lotuim god Bal. (Namba 25:1-9) Pasin bilong tingting tasol long inapim laik nogut bilong skin, na “pilai long ol meri,”a em ol samting i bin insait long pasin bilong ol long lotuim bulmakau. Ol man i bin mekim pasin pamuk na ol narapela kain pasin sem nogut tru taim ol i lotuim Bal. (KTH 2:14) Bilong wanem ol Israel i mekim ol dispela rong? Long wanem, ol i larim bel bilong ol i laikim “ol samting nogut”—maski pasin bilong lotuim god giaman o pasin sem i insait long en.
8. Ol samting i bin painim Israel inap skulim yumi long wanem samting?
8 Pol i tok ol dispela samting i mas skulim yumi. Skulim yumi long wanem samting? Wanpela Kristen i no inap tru long brukim skru long wanpela bulmakau gol o long wanpela god bilong ol Moap bilong bipo. Tasol olsem wanem long pasin pamuk o pasin bilong tingting tasol long inapim laik bilong skin? Planti man i save mekim ol dispela samting long nau, na sapos yumi larim laik bilong yumi yet long ol dispela samting i go bikpela moa long bel bilong yumi, ol dispela samting bai mekim na yumi no pas moa wantaim Jehova. Samting i kamap long dispela bai i wankain olsem samting i kamap sapos yumi bin lotuim god giaman—bai yumi stap longwe long God. (Skelim wantaim Kolosi 3:5; Filipai 3:19.) Tru tumas, laspela tok Pol i mekim long ol dispela samting em long kirapim ol wanbilip olsem: “Stap longwe long pasin bilong lotu long ol giaman god.”—1 Korin 10:14.
Kisim Helpim Long Wokabaut Long Rot God i Makim
9. (a) Yumi kisim wanem helpim bambai yumi ken wokabaut yet long rot Jehova i makim? (b) Wanem wanpela rot na yumi save harim tok i kamap ‘baksait long yumi’?
9 Sapos yumi strong long wokabaut yet long rot Jehova i makim, yumi gat helpim. Aisaia i tok profet olsem: “Taim yupela i wokabaut na yupela i paul long wanem rot yupela i mas bihainim, rot bilong han sut o rot bilong han kais, orait em bai i stap baksait long yupela na em bai i tokim yupela long rot yupela i mas bihainim.” (Aisaia 30:21) Olsem wanem yau bilong yumi i save harim tok i kamap ‘baksait long yumi’? Long nau i no gat wanpela man i save harim wanpela nek tru tru o kisim tok i kam long God yet. Dispela tok yumi harim em i kam long yumi olgeta long wankain rot. Namba wan rot na i bikpela tru, em long rot bilong buk bilong God, Baibel. Ol tingting bilong God na ol samting em i bin mekim long ol man i stap long en. Long olgeta de i gat planti tok gris ol lain i stap “ausait long laip bilong God,” ol i wok long mekim bilong bagarapim yumi, olsem na bilong i stap gut long ol samting bilong spirit, olgeta taim yumi mas kaunim Baibel na tingim ol tok bilong en long bel. Dispela bai helpim yumi long abrusim ol “samting nating” na long mekim ‘olgeta gutpela pasin, na redi long mekim olgeta kain gutpela wok.’ (Aposel 14:14, 15; 2 Timoti 3:16, 17) Baibel bai strongim yumi na helpim yumi long wokabaut long stretpela rot. (Josua 1:7, 8) Olsem na tok bilong Jehova long Baibel i tok: “Ol pikinini, yupela i mas harim gut tok bilong mi na bihainim ol pasin bilong mi. Sapos yupela i mekim olsem, bai yupela i amamas. Yupela i mas larim mi i skulim yupela, na bai yupela i kisim gutpela tingting na save. Yupela i no ken givim baksait long dispela wok.”—Sindaun 8:32, 33.
10. Wanem namba 2 rot na yumi save harim tok i kamap ‘baksait long yumi’?
10 Dispela tok i kamap ‘baksait long yumi,’ em i save kam tu long rot bilong “wokboi i gat gutpela tingting,” em dispela wokboi i save givim kaikai “long taim bikman i makim.” (Matyu 24:45-47) Wanpela rot dispela kaikai i save kamap long en, em long rot bilong ol buk na nius em Baibel i as bilong en, na inap sampela yia pinis ol dispela kaikai i planti. Olsem: Long rot bilong nius Wastaua, yumi kisim stretpela save moa long insait bilong ol tok profet. Dispela nius i bin kirapim yumi long strong yet long mekim wok autim tok na kamapim ol disaipel, maski planti man i les long harim tok, na ol tok bilong nius i helpim yumi long abrusim ol hevi, na ol i kirapim yumi long kamapim ol gutpela pasin Kristen. Yumi amamas tru long dispela kaikai i save kamap long taim stret bilong en!
11. Stori long namba 3 rot na yumi inap harim tok i kamap ‘baksait long yumi.’
11 Wokboi i gat gutpela tingting i save givim kaikai long yumi long rot bilong ol miting tu. Olsem: Ol miting bilong kongrigesen, ol kibung yumi save kisim long olgeta 6-pela 6-pela mun insait long sekit bilong yumi, na ol bikpela kibung yumi save kisim long olgeta yia. Kristen i stap gut long God em i save tingim ol dispela bung i bikpela samting. Ol i bikpela samting bilong helpim yumi long wokabaut long rot Jehova i makim. Planti ol i mas lusim bikpela hap taim long ples wok o long skul wantaim ol lain i no gat wankain bilip, olsem na pasin bilong bung oltaim wantaim ol Kristen bai helpim ol long abrusim bagarap na i stap laip. Ol miting i gutpela rot bilong ‘kirapim yumi long laikim ol narapela na mekim ol gutpela pasin long ol.’ (Hibru 10:24) Yumi laikim tru ol brata bilong yumi, na yumi laik tru long bung wantaim ol.—Song 133:1.
12. Ol Witnes Bilong Jehova i strong long mekim wanem? I no longtaim i go pinis na ol i kamapim dispela samting olsem wanem?
12 Dispela ol kaikai bilong spirit i strongim ol, olsem na klostu 6 milion manmeri long nau ol i wokabaut long rot Jehova i makim, na planti milion narapela manmeri ol i stadi long Baibel bambai ol i ken lain long olsem wanem ol i ken mekim olsem. Olsem wanem? Ol i bel hevi o ol i no strong moa, long wanem, ol i no bikpela lain taim ol i skelim namba bilong ol wantaim ol planti bilion manmeri long graun? Nogat tru! Ol i strong long bihainim yet dispela tok i kamap ‘baksait long ol,’ na stap gut long Jehova na mekim laik bilong em. Bilong kamapim klia dispela laik bilong ol long ai bilong ol man, long taim bilong ol “Bihainim Rot God i Makim” Kibung Distrik na Kibung Intenesenel long 1998/1999, ol man i kam long ol kibung ol i wanbel long wanpela bikpela tokaut i kamapim bel bilong ol, olsem ol bai wok yet long bihainim laik bilong Jehova. Nau mipela laik kamapim ol tok bilong dispela bikpela tokaut.
Bikpela Tokaut
13, 14. Ol Witnes Bilong Jehova i gat wanem stretpela tingting long ol hevi i kamap long graun?
13 “Yumi ol Witnes Bilong Jehova, yumi bung long dispela ‘Bihainim Rot God i Makim’ Kibung Distrik, na yumi wanbel long tokaut olsem rot God i makim em i nambawan gutpela rot long bihainim. Tasol yumi save planti manmeri long nau ol i no gat wankain tingting. Ol lain bilong graun ol i bin bihainim kain kain tingting bilong ol man, na ol tok bilong lotu bilong kisim save long wanem rot i nambawan gutpela rot long bihainim. Taim yumi skelim ol samting i bin kamap long bipo na ol samting i kamap long graun long taim bilong yumi, dispela i kamapim klia olsem tok bilong God i stap long Jeremaia 10:23 i tru. Em i tok: ‘Mipela man i no inap bosim wokabaut bilong mipela yet na bihainim ol rot mipela i laikim.’
14 “Long olgeta de yumi inap lukim sampela samting moa i strongim dispela tok, olsem dispela tok i tru olgeta. Planti man tru, ol i givim baksait long rot God i makim. Ol man i mekim ol samting i stret long ai bilong ol yet. Ol samting nogut tru i bin kamap long dispela—ol famili i bruk, olsem na i no gat man i soim rot long ol pikinini; ol man i tingting tasol long kisim ol samting bilong skin, na dispela i mekim na ol i pilim olsem i stap bilong ol i no gat as bilong en na ol i bel hevi; pasin raskol na pasin bilong bagarapim nating man i mekim na planti man i dai; pasin birua na pait namel long narapela narapela lain i bagarapim laip bilong planti man; pasin pamuk i go bikpela, olsem na planti man i kisim ol sik bilong pamuk. Em sampela tasol bilong ol planti bikpela hevi i wok long pasim ol man long kisim amamas, bel isi, na gutpela sindaun.
15, 16. Long bikpela tokaut ol i tokaut strong olsem ol bai mekim wanem bilong bihainim rot God i makim?
15 “I stap bilong ol lain man i nogut tru na ‘bikpela de bilong God I Gat Olgeta Strong,’ em Armagedon (KTH 16:14, 16), i klostu pinis, olsem na yumi ol Witnes Bilong Jehova i tokaut olsem:
16 “Namba wan: Yumi ting olsem yumi bilong God Jehova, na yumi wan wan yumi bin dediketim yumi yet long em, na bai yumi wok yet long holimpas strong bilip bilong yumi long samting Jehova i mekim bilong baim bek ol man, em ofa bilong Pikinini bilong em, Krais Jisas. Yumi tingting strong long wokabaut long rot God i makim, na mekim wok bilong em olsem ol Witnes bilong em, na daun long wok king bilong em long rot bilong wok bos bilong Krais Jisas.
17, 18. Ol Witnes Bilong Jehova bai wok long holim yet wanem tingting long ol stretpela lo na lain brata Kristen bilong ol?
17 “Namba 2: Bai yumi wok yet long bihainim ol lo bilong Baibel long stretpela pasin na long ol samting bilong spirit. Yumi tingting strong long lusim pasin bilong wokabaut olsem ol lain man i save mekim em tingting bilong ol i paul olgeta. (Efesus 4:17-19) Yumi pasim tok long bel olsem yumi bai stap klin long ai bilong Jehova na yumi no ken larim pasin bilong dispela graun i mekim yumi i kamap doti.—Jems 1:27.
18 “Namba 3: Olsem wanpela lain brata Kristen i stap long olgeta hap, yumi bai holimpas strong pasin bilong yumi, em Baibel i as bilong en. Bai yumi bihainim yet lo Kristen olsem yumi no ken insait long ol samting bilong graun; yumi no larim yumi yet i insait long pasin bilong birua long narapela skin, kantri, o lain, o insait long pasin bilong brukim lain.
19, 20. (a) Ol papamama Kristen bai mekim wanem? (b) Olsem wanem olgeta trupela Kristen bai wok yet long kamapim klia olsem ol i disaipel bilong Krais?
19 “Namba 4: Yumi ol papamama, bai yumi skulim pikinini bilong yumi long rot God i makim. Bai yumi stap olsem gutpela piksa long ol samting ol Kristen i mas mekim, olsem pasin bilong ritim Baibel long olgeta de, na pasin bilong mekim famili-stadi, na pasin bilong givim bel long ol wok bilong kongrigesen Kristen na long wok autim tok.
20 “Namba 5: Yumi olgeta bai wok strong long kamapim ol pasin bilong God, em Man bilong wokim yumi, na bai yumi wok long bihainim pasin tru bilong em, olsem Jisas i bin mekim. (Efesus 5:1) Yumi pasim tok long bel long mekim olgeta samting long pasin sori, na long dispela rot bai yumi kamapim klia olsem yumi disaipel bilong Krais.—Jon 13:35.
21-23. Ol Witnes Bilong Jehova bai wok yet long mekim wanem? Ol i bilip tru long wanem samting?
21 “Namba 6: Bai yumi no les long autim tok long gutnius bilong Kingdom bilong God, na kamapim ol disaipel, na bai yumi skulim ol long rot God i makim na strongim ol long kisim sampela skul moa long ol miting bilong kongrigesen.—Matyu 24:14; 28:19, 20; Hibru 10:24, 25.
22 “Namba 7: Yumi olgeta wan wan na olsem wanpela oganaisesen bilong lotu, bai yumi wok yet long putim laik bilong God olsem namba wan samting long i stap bilong yumi. Yumi mekim wok long Tok bilong em, em Baibel, bilong stiaim wokabaut bilong yumi bambai yumi no lusim stretpela rot, na long dispela bai yumi kamapim klia olsem rot God i makim em i winim tru ol rot ol man bilong graun ol i bihainim. Yumi tingting strong long bihainim rot God i makim—yumi no surik na yumi stap gut long dispela rot, long nau na inap oltaim oltaim!
23 “Yumi mekim dispela bikpela tokaut, long wanem, yumi bilip strong long gutpela tok promis bilong Jehova olsem man i bihainim laik bilong God em bai stap oltaim. Yumi mekim dispela bikpela tokaut, long wanem, yumi bilip olsem taim yumi bihainim ol lo na tok bilong Baibel, bai yumi kisim gutpela sindaun long nau na yumi ken wetim ol gutpela samting bai kamap bihain, na bai yumi kisim dispela laip em i laip tru. (1 Timoti 6:19; 2 Timoti 4:7b, 8) Na bikpela samting moa yet, yumi mekim dispela bikpela tokaut, long wanem, yumi laikim tru God Jehova long bel, na spirit, na tingting, na strong olgeta bilong yumi!
24, 25. Ol i mekim wanem taim ol i harim bikpela tokaut? Ol man i wokabaut long rot Jehova i makim, ol i strong long mekim wanem?
24 “Olgeta man i stap long dispela kibung na ol i wanbel long dispela bikpela tokaut, plis tok YES!”
25 Ol manmeri i sindaun long ol handet handet ples bung na stediam long olgeta hap bilong graun na harim dispela bikpela tokaut, ol i givim bel tru long singaut “YES!” Ol Witnes Bilong Jehova i save tru olsem ol bai wokabaut yet long rot Jehova i makim. Ol i bilip tru long Jehova olsem em bai truim ol tok promis bilong em. Ol i stap gut long em, maski wanem samting i kamap. Na ol i strong long mekim laik bilong em.
“God i Helpim Yumi”
26. Ol man i wokabaut long rot Jehova i makim, ol i gat wanem amamas long i stap bilong ol?
26 Ol Witnes Bilong Jehova i tingim tok bilong man bilong raitim Song, em i tok: “Yu mas bilip long Bikpela na prea long em na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu.” (Song 37:34) Ol i no save lusim tingting long gutpela tok bilong Pol, olsem: “Sapos God i helpim yumi, orait husat bai i birua long yumi? God i no bin pasim Pikinini bilong em yet. Nogat. Em i bin salim em i kam bilong helpim yumi olgeta. Na sapos em i givim yumi Pikinini bilong em yet, orait ating em bai i givim yumi olgeta arapela samting tu.” (Rom 8:31, 32) Tru tumas, sapos yumi wokabaut yet long rot Jehova i makim, em bai givim yumi “planti gutpela samting bilong mekim yumi amamas.” (1 Timoti 6:17) I no gat narapela ples i winim dispela ples yumi stap long en—em yumi wokabaut wantaim ol gutpela brata sista bilong yumi long rot Jehova i makim. Jehova i stap wantaim yumi, olsem na yumi mas strong long wokabaut long rot bilong em i go inap long las de, na yumi ken bilip tru olsem long taim Jehova i makim yumi bai lukim em i truim olgeta wan wan tok promis bilong em.—Taitus 1:2.
[Futnot]
a Wanpela saveman i tok, tok Grik ol i tanim olsem “pilai long ol meri” i makim ol danis i bin kamap long ol bikpela de haiden, na em i tok moa: “Planti bilong ol dispela danis, olsem planti man i save, ol i mekim bilong kirapim bel long mekim ol kain kain pasin nogut.”
Yu Inap Tingim?
◻ Kristen i mas mekim wanem bambai em i ken wokabaut long rot Jehova i makim?
◻ Bilong wanem yumi mas wok long kisim pasin bilong bilip long Jehova na stap gut long em?
◻ I gat wanem ol helpim i stap taim yumi wokabaut long rot Jehova i makim?
◻ Stori long sampela gutpela samting long dispela bikpela tokaut ol i bin wanbel long en long ol “Bihainim Rot God i Makim” Kibung Distrik.
[Ol Piksa long pes 18]
Ol i wanbel long wanpela bikpela tokaut i kamap long ol “Bihainim Rot God i Makim” Kibung Distrik na Kibung Intenesenel